Ia Faia Pea Mea Lelei

‘Ia faia pea mea lelei.’—LUKA 6:35.

1, 2. Aiseā e masani ai ona faigatā le faia o mea lelei i isi?

O LE faia o mea lelei i isi o se mea e faigatā. O i latou e tatou te faaalia i ai le alofa, atonu e latou te lē faaalia mai iā i tatou lenā lava uiga. E ui lava e tatou te faia le mea e sili tatou te mafaia e fesoasoani ai i tagata, e ala i le taumafai malosi e tufa atu i ai “le tala lelei mamalu a le Atua fiafia” ma lona Alo, ae e latou te ono lē manatu mamafa mai pe e lē lotofaafetai foʻi. (1 Timo. 1:11) O isi ua avea ma “fili o le laau na faapuapuagatia ai le Keriso.” (Fili. 3:18) Ona o i tatou o ni Kerisiano, e faapefea la ona tatou feutagaʻi ma na tagata?

² Na taʻu atu e Iesu Keriso i ona soo: “Ia alolofa atu pea i o outou fili ma ia faia mea lelei.” (Luka 6:35) Seʻi o tatou iloiloina totoʻa le fautuaga lenei. O le a tatou mauaina foʻi aogā mai isi manatu na taʻua e Iesu e faatatau i le faia o mea lelei i isi.

‘Alofa i Ou Fili’

3. (a) I au lava upu, ia aotele mai faamatalaga a Iesu o loo tusia i le Mataio 5:43-45. (e) O le ā le vaaiga e faatatau i tagata Iutaia ma tagata e lē o ni Iutaia na tupu aʻe i taʻitaʻi lotu Iutaia i le uluaʻi senituri?

³ I lana Lauga taʻutaʻua i le Mauga, na taʻu atu ai e Iesu iā i latou na faalogologo ina ia alolofa i o latou fili ma tatalo mo ē e faasauā iā i latou. (Faitau le Mataio 5:43-45.) O i latou na iai i inā o tagata Iutaia, na latou iloa lelei le tulafono a le Atua: “Aua e te taui ma sui, aua foʻi le faamoemoe lou ita i tagata o lou nuu, a e te alofa atu i lē lua te tuaoi ia pei o oe lava iā te oe.” (Levi. 19:18) Na manatu taʻitaʻi lotu Iutaia i le uluaʻi senituri e faapea, o “tagata o lou nuu” ma “lē lua te tuaoi” e faasino atu na o tagata Iutaia lava. I le Tulafono Faa-Mose, sa manaʻomia ai e tagata Isaraelu ona vavae ese mai isi nuu, ae na tupu aʻe le manatu faapea o tagata uma e lē o ni Iutaia o ni fili ma e ao ona inosia i latou.

4. E faapefea ona gaoioi soo o Iesu agaʻi i o latou fili?

 ⁴ I le faaeseesega, na faamanino mai e Iesu: “Ia alolofa atu pea i o outou fili ma tatalo mo ē ua sauāina outou.” (Mata. 5:44) E tatau ona alolofa ona soo i tagata e tetee iā i latou. E tusa ai ma le tusitala o le Evagelia a Luka, na fetalai Iesu: “Ou te fai atu iā te outou o ē o faalogologo mai, Ia alolofa atu pea i o outou fili, ia faia mea lelei i ē ua ʻinoʻino mai iā te outou, ia faamanuia atu iā i latou o ē faamalaia mai iā te outou, ia tatalo mo ē ua faalumaina outou.” (Luka 6:27, 28) I le pei o tagata i le uluaʻi senituri o ē na faia mea na taʻu atu e Iesu e fai, e ao foʻi ona tatou “faia mea lelei i ē ua ʻinoʻino” mai e ala i lo tatou tali atu i le filemu a latou gaoioiga tetee. E tatou te “faamanuia atu iā i latou o ē faamalaia mai” iā i tatou e ala i le tautala atu i ai ma le agalelei. Ma e tatou te “tatalo mo ē ua sauāina” i tatou i le tino po o isi faiga e “faalumaina” ai i tatou. O na tatalo e faaalia ai lo tatou alolofa i o tatou fili, ma tatou te mananaʻo i ē sauāina i tatou ina ia suia o latou loto, ma gaoioi i se auala e latou te maua ai le finagalo malie o Ieova.

5, 6. Aiseā e tatau ai ona tatou alolofa i o tatou fili?

⁵ Aiseā e faaalia ai le alofa i o tatou fili? Na fetalai Iesu: “Ina ia avea ai outou ma atalii o lo outou Tamā o i le lagi.” (Mata. 5:45) Pe a tatou utagia lenā fautuaga, ona avea lea o i tatou ma “atalii” o le Atua ma tatou faataʻitaʻi ai iā Ieova, o lē “faaoso lona lā i ē amioleaga ma ē amiolelei, ma faatotō mai le timu i ē amiotonu ma ē amiolētonu.” O le auala lenei o loo faatulaga ai e Luka le manatu lea, “e agalelei mai o ia [le Atua] i ē e lē lotofaafetai ma ē amioleaga.”—Luka 6:35.

⁶ I le faamamafa atu i ona soo o le tāua o le ‘alolofa atu pea i o latou fili,’ na fetalai ai Iesu e faapea: “O le ā se taui tou te maua pe afai tou te alolofa atu i ē o alolofa mai iā te outou? Pe e lē o le mea foʻi lenā o faia e le ʻauaolafoga? O le ā se mea e sili ua outou faia, pe afai tou te faafeiloaʻia na o o outou uso? Pe e lē o le mea foʻi lenā o faia e tagata o nuu ese?” (Mata. 5:46, 47) Pe afai e tapulaa lo tatou alofa iā i latou e talilelei mai, o le a lē maua ai la se “taui” po o le finagalo malie o le Atua. Auā e oo lava i le ʻauaolafoga lea e masani ona ʻinosia e tagata, sa latou faaalia foʻi le alofa i tagata na alolofa ane iā i latou.—Luka 5:30; 7:34.

7. Aiseā e lē faapea ai ua tatou faia se mea e sili atu, pe afai e tatou te faafeiloaʻia na o o tatou “uso”?

⁷ O le faafeiloaʻi masani lava a tagata Iutaia, e aofia ai le upu “manuia” po o le filemu. (Faama. 19:20; Ioa. 20:19) O loo iai i lenā faafeiloaʻiga se moomooga mo le soifua mālōlōina, soifuaga lelei, ma le lelei o le tulaga i le tamaoaiga o le tagata o loo ofo alofa atu i ai. E lē faapea la ‘⁠ua sili se mea ua tatou faia,’ pe afai tatou faafeiloaʻia na o i latou e tatou te manatu i ai o o tatou “uso.” E pei ona taʻua e Iesu, o le mea foʻi lenā o loo faia e “tagata o nuu ese.”

8. O le ā na faalaeiauina e Iesu lana ʻaufaalogologo e fai ina ua ia faapea mai: “Ia atoatoa ona lelei outou”?

⁸ O le agasala tuufaasolo ua lē mafai ai ona lelei atoatoa soo o Keriso. (Roma 5:12) Ae peitaʻi, na faaiʻu e Iesu lenei vaega o lana lauga i le faapea mai: “Ia atoatoa ona lelei outou e pei foʻi o lo outou Tamā o i le lagi, e atoatoa ona lelei o ia.” (Mataio 5:48) Sa ia faalaeiauina i latou na  faalogologo i lana lauga e faaaʻoaʻo i lo latou “Tamā o i le lagi,” o Ieova, i le faaleleia o lo latou alofa—ma ia atoatoa ona fai, e ala i le alolofa i o latou fili. O loo faatalitalia foʻi i tatou e faia faapea.

Aiseā e Loto Faamagalo Ai?

9. E tusa ai o le tatalo faaaʻoaʻo a Iesu, o le ā se tasi o auala tatou te faia ai pea mea lelei i isi?

⁹ E tatou te faia pea mea lelei pe a tatou faamagalo ma le alofa mutimutivale se tasi na agasala mai iā i tatou. O le mea moni, i se vaega o le tatalo faaaʻoaʻo a Iesu o loo iai faaupuga nei: “Faamagalo mai i a matou agasala e pei foʻi ona matou faamagalo atu i ē o agasala mai iā i matou.” (Mata. 6:12) E lagolagoina e le Evagelia a Luka le mea sa i le finagalo o Iesu, auā o loo faapea mai: “Ia faamagalo a matou agasala, e pei foʻi ona matou faamagalo atu i ē o agasala mai iā i matou.”—Luka 11:4.

10. E tusa ai o le faamagalo atu, e faapefea ona tatou faaaʻoaʻo i le Atua?

¹⁰ E manaʻomia ona tatou faaaʻoaʻo i le Atua, o lē e faamagalo atoatoa i tagata agasala ua salamō. Na tusi le aposetolo o Paulo e faapea: “Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa, e pei ona finagalo malie le Atua e faamagaloina outou e ala iā Keriso.” (Efe. 4:32) Na pese le faisalamo o Tavita e faapea: “E alofa mutimuti vale ma alofa fua mai Ieova; e tele gese lona toʻasā, a e tele lona alofa. . . . E leʻi faia e ia iā i tatou e tusa ma a tatou agasala; e leʻi taui mai foʻi o ia iā i tatou e tusa ma a tatou amio leaga. . . . E pei ona vava mamao o sasaʻe ma sisifo, e faapea lava ona faamamao e ia iā i tatou o a tatou solitulafono. E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i ē matataʻu iā te ia. Auā ua silafia lava e ia le mea na fai aʻi i tatou; ua manatu ia o le efuefu lava i tatou.”—Sala. 103:8-14.

11. O ai e faamagalo e le Atua?

¹¹ E mafai ona maua e tagata le faamagaloga a le Atua pe a latou muaʻi faamagalo tagata e agasala mai iā i latou. (Mare. 11:25) Ina ia faamamafa le manatu lenei, na faaopoopo mai Iesu: “Afai tou te faamagaloina mea sesē e fai mai e tagata, ona faamagaloina foʻi lea o outou e lo outou Tamā o i le lagi. Ae afai tou te lē faamagaloina mea sesē e fai mai e tagata, e lē faamagaloina foʻi e lo outou Tamā a outou mea sesē.” (Mata. 6:14, 15) Ioe, e faamagalo e le Atua na o ē e latou te faamagalo ma le lotoatoa isi. Ma o se tasi o auala e faaauau ai ona faia mea lelei, o le usitaʻia lea o le fautuaga a Paulo: “E pei ona finagalo malie Ieova e faamagalo iā te outou, ia faapea foʻi ona outou faia.”—Kolo. 3:13.

‘Aua Tou te Faamasino Atu’

12. O le ā le fautuaga a Iesu na avatu e faatatau i le faamasinoina o isi?

¹² O le isi auala e fai ai mea lelei, lea sa taʻua i le Lauga i luga o le Mauga ina ua fetalai atu i ē na faalogologo i lana lauga, e aua le faamasinoina isi, ona ia faaaogāina lea o se talafaatusa malosi e faamamafa ai le manatu. (Faitau le Mataio 7:1-5.) Seʻi o tatou mafaufau i le uiga o le fetalaiga a Iesu, ‘Aua tou te faamasino atu.’

13. E faapefea iā i latou na faalogologo iā Iesu ona “faamagalo atu pea”?

¹³ Na sii mai e le Evagelia a Mataio le fetalaiga a Iesu e faapea: “Aua tou te toe faamasino atu ina neʻi faamasinoina outou.” (Mata. 7:1) E tusa ai ma le faamatalaga a Luka, na fetalai Iesu e faapea: “Aua foʻi tou te toe faamasino atu, ona lē faamasinoina lea o outou; ma aua tou te toe taʻusalaina se tasi, ona lē taʻusalaina lea o outou. Ia outou faamagalo atu pea, ona faamagaloina ai lea o outou.” (Luka 6:37) Na faamasinoina ma le inainā e Faresaio i le uluaʻi senituri isi, e faavae i aganuu e lē faale-Tusi Paia. O so o se tasi o ē na faalogologo iā Iesu na faia lenā mea, na tatau ona ‘aua neʻi toe faamasino atu.’ Nai lo lenā, e ao ona latou “faamagalo atu pea,” o lona uiga o le faamagalo atu i sesē o isi. Na taʻua foʻi e le aposetolo o Paulo fautuaga talitutusa e faatatau i le faamagalo atu, e pei ona taʻua i luga.

14. O le faasalafa atu o le faamagalo, o le a uunaʻia ai e soo o Iesu tagata e faia le ā?

¹⁴ O le faasalafa atu o le faamagalo, o le a uunaʻia ai e soo o Iesu tagata ia iai lea lava agaga  o le faamagalo atu. Na fetalai Iesu: “O le faamasinoga tou te faamasino atu ai, e toe faamasinoina ai foʻi outou; ma o fua tou te fuaina atu, e fuaina mai ai iā te outou.” (Mata. 7:2) E tusa ai ma le auala e tatou te feutagaʻi ai ma isi, e tatou te selesele mea e tatou te lūlū.—Kala. 6:7.

15. Na faapefea ona faaalia e Iesu e sesē le soona faitio?

¹⁵ Ina ia faailoa le sesē o le soona faitio, na fesili Iesu e faapea: “Aiseā e te vaavaai ai i le fasilaau i le mata o lou uso, ae e te lē vaai i le ogālaau o loo i lou lava mata? E faapefea ona e fai atu i lou uso, ‘⁠Tuu mai seʻi oʻu ʻeuese le fasilaau o loo i lou mata’; ae seʻi vaai, o lenā e iai le ogālaau i lou lava mata?” (Mata. 7:3, 4) O le tagata e faanaunau e faitioina le isi tagata, e na te mātauina si faalētonu itiiti i le “mata” o lona uso. E tusa o loo manatu le tagata faitio e lē o saʻo faaiʻuga o loo faia e lona uso. E ui e itiiti le faalētonu—e pei o le fasilaau—ua ofo atu e le tagata faitio e na te ʻeuese se fasilaau. O loo ofo atu ma le faafiaamiotonu e fesoasoani i le uso ina ia manino lana vaai i mea.

16. Aiseā e tatou te faapea atu ai, sa iai “le ogālaau” i mata o le ʻau Faresaio?

¹⁶ O taʻitaʻi lotu Iutaia sa silimusa i le matuā faitioina o isi. Ina ia faataʻitaʻi lenei manatu: Ina ua faapea mai se tagata tauaso lea na faamālōlōina e Keriso faapea e tatau ona sau Iesu mai le Atua, na matuā feita le ʻau Faresaio ma faapea atu: “Na e fanau mai ua tumu oe i le agasala, ae e te aʻoaʻo mai ea iā i matou?” (Ioa. 9:30-34) E tusa ai o le iai o le tomai e fai ai faaiʻuga saʻo e faavae i le silasila a Ieova i mea, sa iai “le ogālaau” i mata o le ʻau Faresaio ma na matuā tauaso lava. Na alaga Iesu e faapea: “O oe o le tagata faafiaamiotonu! Ia muamua ona aveese le ogālaau o loo i lou lava mata, ona e iloa lelei ai lea ʻeuese le fasilaau o loo i le mata o lou uso.” (Mata. 7:5; Luka 6:42) Pe afai e tatou te naunau e fai mea lelei ma feutagaʻi lelei ma isi, o le a tatou lē faitio ma le inainā, ma vaavaai pea i se fasi laau faafaatusa i le mata o lo tatou uso, po o se sesē itiiti i ni faaiʻuga e na te faia. Nai lo le faia o lenā tulaga, e tatou te iloa e tatou te lē lelei atoatoa ma e tatau ona tatou ʻalofia le faamasinosino ma faitioina o tatou uso talitonu.

Le Auala e Ao Ona Feutagaʻi ai ma Isi

17. E tusa ai ma le Mataio 7:12, e faapefea ona tatou feutagaʻi ma isi?

¹⁷ I le Lauga a Iesu i le Mauga, na ia taʻua ai  faapea, e faaalia e le Atua le uiga faa-Tamā i Ana auauna i le taliina o a latou tatalo. (Faitau le Mataio 7:7-12.) E mataʻina le auala na faatulaga ai e Iesu lenei taʻiala tauamio: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.” (Mata. 7:12) Seʻi vaganā ua tatou feutagaʻi ma o tatou uso i le auala lenei, ona faatoʻā faamaonia lea o i tatou o soo moni o Iesu Keriso.

18. Na faapefea ona faaalia e “le Tulafono,” e tatau ona tatou feutagaʻi ma isi, i le auala e tatou te mananaʻo e latou te faia mai iā i tatou?

¹⁸ Ina ua uma ona ia fetalai e ao ona tatou faia i isi e pei ona tatou mananaʻo e faia iā i tatou, ona ia toe faapea mai lea: “O le uiga lenei o le Tulafono ma le ʻau Perofeta.” Pe a tatou feutagaʻi ma isi i le auala patino na faatonuina mai e Iesu, ua tatou gaoioi la e ōgatasi ma le agaga o “le Tulafono”—tusitusiga ia o loo faia aʻe ai tusi o le Tusi Paia mai le Kenese seʻia oo i le Teuteronome. E ese mai le faailoaina mai o fuafuaga a Ieova i le aumaia o se fanau lea o le a aveesea galuega a le tiapolo, ae ua faatulaga foʻi i nei tusi le Tulafono na tuu atu e le Atua i le nuu o Isaraelu e ala iā Mose i le 1513 T.L.M. (Kene. 3:15) Na faamanino foʻi e le Tulafono e faapea, e ao i tagata Isaraelu ona tonu ma saʻo mea e latou te faia, e lē tatau ona faailoga tagata, ma e ao ona faia mea lelei i ē ua puapuagatia ma tagata aumau i le nuu.—Levi. 19:9, 10, 15, 34.

19. E faapefea ona faaalia e “le ʻau Perofeta” e tatau ona tatou faia mea lelei?

¹⁹ I le faasino atu i “le ʻau Perofeta,” sa i le finagalo o Iesu tusi faavaloaga o Tusitusiga Eperu. O loo iai valoaga e faatatau i le Mesia lea na faataunuu iā Keriso lava ia. O na tusitusiga o loo faaalia ai foʻi, e faamanuia e le Atua ona tagata pe a latou faia le mea ua saʻo i lana silafaga, ma feutagaʻi ma isi i se auala talafeagai. O se faataʻitaʻiga, na avatu e le valoaga a Isaia i tagata Isaraelu le fautuaga lenei: “O loo faapea ona fetalai mai o Ieova, Ia outou tausia le faamasinoga, ma outou faia le amiotonu. . . . Amuia le tagata na te faia lenei mea, ma le atalii o le tagata na te taofimauina ai. . . . ma taofi i lona lima ia lē faia se mea leaga e tasi.” (Isa. 56:1, 2) Ioe, e faatalitalia e le Atua ona tagata e faia e lē aunoa mea lelei.

Ia Faia Pea Mea Lelei i Isi

20, 21. Na faapefea ona tali atu tagata i le Lauga a Iesu i le Mauga, ma aiseā e ao ai ona e manatunatu loloto i ai?

²⁰ Ua tatou iloiloina na o ni nai manatu mai le tele o manatu tāua na taʻua e Iesu i lana lauga taʻutaʻua i Luga o le Mauga. E ui i lea, e faigofie ona tatou malamalama i le tali mai a tagata na faalogo i mea na ia fetalai ai i lenā lauga. Ua faapea mai le Tusi Paia: “Ua māeʻa fetalaiga a Iesu, ona matuā ofo ai lea o le motu o tagata i lana aʻoaʻo atu. Auā ua ia aʻoaʻoina i latou e pei o sē ua iai le pule ae lē pei o le ʻautusiupu.”—Mata. 7:28, 29.

²¹ Ua faamaonia e aunoa ma se faalētonu, o Iesu Keriso o le “Faipule.” (Isa. 9:6) O le Lauga i le Mauga o se faataʻitaʻiga lelei lea o le silafia e Iesu o le auala e silasila ai lona Tamā i mea. E faaopoopo atu i manatu ua uma ona tatou talanoaina, e tele ni manatu o lenā lauga e faatatau i le fiafiaga moni, le auala e ʻalofia ai amioga lē mamā, le auala e faia ai le amiotonu, mea e ao ona tatou fai e maua ai se lumanaʻi mautū ma fiafia, ma isi lava mataupu. Aiseā e lē toe faitau lelei ai le Mataio mataupu e 5 seʻia oo i le mataupu e 7. Manatunatu loloto i fautuaga mananaia a Iesu o loo faamauina ai. Faaaogā i lou olaga mea na fetalai ai Keriso i lana Lauga i le Mauga. Ona sili atu lea ona e faafiafiaina Ieova, feutagaʻi lelei ma isi tagata, ma faia pea mea lelei i isi.

O le ā Lau Tali?

• E faapefea ona tatou feutagaʻi ma o tatou fili?

• Aiseā e ao ai ona tatou faamagalo atu?

• O le ā na fetalai ai Iesu e faatatau i le faamasinoina o tagata?

• E tusa ai ma le Mataio 7:12, o le ā le auala e tatou te feutagaʻi ai ma isi?

[Fesili mo le Suʻesuʻega]

[Faamatalaga faaopoopo i le itulau 10]

Pe tou te silafia le māfuaaga na fetalai ai Iesu: ‘⁠Aua tou te faamasino atu’?

[Ata i le itulau 8]

Aiseā e tatou te tatalo ai mo i latou e sauāina i tatou?

[Ata i le itulau 10]

Po o tou feutagaʻi ma isi i le auala e tou te mananaʻo e fai atu iā te outou?