Ia Filifili e Auauna iā Ieova a o E Talavou

“Ia e tausisi pea i mea ua e aʻoaʻoina ma ua e talitonu o le mea moni lea.”—2 TIMO. 3:14.

1. O le ā le silasila a Ieova i le auaunaga a ana Molimau talavou?

E MATUĀ tāua iā Ieova le auaunaga paia a talavou, e pei ona sa ia faagaeeina ai se valoaga e faatatau iā i latou. Na pese le faisalamo e faapea: “E fai taulaga ma le loto ou tagata i le aso o lou malosi i au mea paia e matagofie mai le manava o le vave ao; e iā te oe le sau o lou tauleʻaleʻa.” (Sala. 110:3) Ioe, e manatu mamafa Ieova i talavou o ē e naunau e auauna atu iā te ia.

2. O ā taaʻiga mai tagata o le lalolagi o loo fesagaʻi ma talavou i aso nei, lea e aafia ai lo latou lumanaʻi?

² Outou talavou i le faapotopotoga Kerisiano, po ua outou faia ea se tuuina atu iā Ieova? Atonu o le toʻatele o talavou e lē faigofie ona fai se filifiliga, po o le a auauna iā Ieova pe leai. E faalaeiau e pule o pisinisi, o faiaʻoga, ma i nisi taimi o tauaiga ma uō, talavou ina ia taulaʻi atu i le saʻilia o meafaitino. E masani lava ona manatu faatauvaa le lalolagi i talavou pe afai e latou te saʻilia sini faaleagaga. Peitaʻi o le mea moni, o le auauna atu i le Atua moni, o le ala sili lea o le olaga e ao ona e saʻilia. (Sala. 27:4) E tusa ai o lea tulaga, seʻi o tatou iloiloina ni fesili se tolu: Aiseā e ao ai ona e auauna i le Atua? E faapefea ona e taulau o se tagata ua tuuina atu iā Ieova, e tusa lava po o ā tala ma mea e fai atu e isi iā te oe? O ā avanoa matagofie o le auaunaga paia e mafai ona e maua?

O le Auauna iā Ieova o se Mea e Ao Ona Fai

3. O le ā le aafiaga o foafoaga a Ieova iā i tatou?

³ Aiseā e ao ai ona auauna atu i le Atua moni o Lē o soifua pea? Ua taʻu mai e le Faaaliga 4:11 le māfuaaga autū: “Ieova e, lo matou Atua, ua tatau ona e mauaina le viiga, ma le mamalu, ma le mana, auā na e faia mea uma lava, ma o lou finagalo foʻi ua iai nei mea ma ua faia ai.” O Ieova o Lē e ofoofogia na Foafoaina mea uma o loo iai nei. Maʻeu le matagofie o le lalolagi! O laau, o fugālaau, o meaola, o le sami, o mauga, ma afu—o nei mea uma na foafoaina e Ieova. O loo taʻua i le Salamo 104:24 e faapea: “Ua tumu le lalolagi i au oloa.” Maʻeu lo tatou loto faafetai iā Ieova ona ua ia aumaia iā i tatou se tino ma se mafaufau, lea ua mafai ai ona tatou ola olioli i lenei lalolagi ma mea lelei o loo iai! Pe e lē avea ea lo tatou talisapaia o mea matagofie ua foafoaina e Ieova, ma mea e uunaʻia ai i tatou e auauna atu iā te ia?

4, 5. O ā mea na faia e le Atua na uunaʻia ai Iosua e faalatalata atu iā Ieova?

⁴ O le isi māfuaaga e auauna ai iā Ieova, e maua i upu a Iosua, o lē na taʻitaʻia Isaraelu. A o pulapula la goto lona soifua, na taʻu atu e Iosua i tagata o le Atua e faapea: “Ua outou iloa ma o outou loto atoa, ma o outou agaga atoa, e leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou; ua taunuu uma iā te outou.” Aiseā ua faia ai e Iosua nei upu?—Iosua 23:14.

⁵ O lona ola aʻe o se tamaitiiti i Aikupito, sa tatau ona iloa e Iosua le folafolaga a Ieova i tagata Isaraelu, o le a foaʻi atu se laueleele e fai mo i latou. (Kene. 12:7; 50:24, 25; Eso. 3:8) Ona iloa atu lea e Iosua ua amata ona faataunuu e Ieova lana folafolaga, e ala i le aumaia o Mala e Sefulu ina ia taia ai Aikupito, ma uunaʻia ai le tupu lotomaaa o Farao e tuu atu le fanauga a Isaraelu e ō. Sa aofia ai Iosua iā i latou na faasaoina mai le Sami Ulaula, ma na ia vaai atu a o faaumatia Farao ma ana ʻau i lenā sami. A o faia se faigāmalaga umi i le “vao . . . tele ma  le mataʻutia” o le Toafa o Sinai, sa vaai foʻi Iosua i le auala na saunia ai e Ieova mea uma na manaʻomia e tagata Isaraelu. E leai se tasi o i latou na oti ona o le fia inu po o le fia ʻai. (Teu. 8:3-5, 14-16; Iosua 24:5-7) Ina ua oo foʻi i le taimi e faatoʻilalo ai e le fanauga a Isaraelu malo malolosi o Kanana ma ulu atu i le Nuu o le Folafolaga, sa mātauina e Iosua le auala na lagolagosua ai le Atua i le latou galuega, o Lē na latou tapuaʻi i ai faatasi ma isi tagata Isaraelu.—Iosua 10:14, 42.

6. O le ā e fesoasoani iā te oe e atiaʻe ai se faanaunauga e auauna i le Atua?

⁶ Na iloa e Iosua e faataunuu e Ieova ana folafolaga. O lea na ia faailoa atu ai e faapea: “O aʻu nei ma loʻu aiga, matou te auauna iā Ieova.” (Iosua 24:15) Ae faapefea oe? Pe a e tomānatu i folafolaga ua uma ona faataunuu e le Atua, faapea ma folafolaga lea ua toeitiiti faataunuu, po o e faanaunau ai e te auauna iā Ieova e pei ona sa faia e Iosua?

7. Aiseā e avea ai le papatisoga i le vai o se laasaga e tāua ona uia?

⁷ O le manatunatu i galuega ofoofogia a Ieova, ma tomānatu i ana folafolaga matagofie ma le maufaatuatuaina, e ao ona uunaʻia ai oe e lē gata e fai se tuuina atu iā Ieova, ae ia faailoa atu lenā tuuina atu e ala i le papatisoga i le vai. O le papatisoga o se laasaga tāua e ao ona uia e i latou e mananaʻo e auauna i le Atua. Na faamanino mai e lo tatou Faaaʻoaʻo o Iesu lenei mea. A o leʻi amata lana galuega o le Mesia, sa alu atu o ia iā Ioane le Papatiso ina ia papatisoina o ia. Aiseā na uia ai e Iesu lenā laasaga? Na ia fetalai mulimuli ane e faapea: “Na ou sau mai le lagi e fai le finagalo o lē na auina mai aʻu, ae lē o loʻu loto.” (Ioa. 6:38) O lona papatisoga na faailoa atu ai, ua ofoina atu o ia e fai le finagalo o lona Tamā.—Mata. 3:13-17.

8. Aiseā na filifili ai Timoteo e tapuaʻi i le Atua, ma o le ā e ono manaʻomia ona e faia?

⁸ Seʻi manatu foʻi i le tulaga o Timoteo, o se talavou Kerisiano na mulimuli ane avatu i ai e Ieova galuega e tele e faatino, faapea ma faamanuiaga e tele. Aiseā na filifili ai Timoteo e tapuaʻi i le Atua moni? Ua taʻu mai e le Tusi Paia iā i tatou e faapea, ‘sa aʻoaʻoina o ia i mea ma na ia talitonu o le mea moni lea.’ (2 Timo. 3:14) Pe afai ua e suʻesuʻeina le Afioga a le Atua ma ua faatalitonuina oe e moni aʻoaʻoga o loo iai i le Tusi Paia, o lona uiga ua pei lava lou tulaga o le tulaga o Timoteo. Ua manaʻomia nei ona e faia se filifiliga. Aiseā e te lē talanoa ai i ou mātua e faatatau i lau filifiliga i le mea o le a fai? E mafai foʻi ona fesoasoani atu toeaina o le faapotopotoga iā te oe, ina ia e manino i taʻiala a le Tusi Paia mo le papatisoga.—Faitau le Galuega 8:12.

9. E ono aafia faapefea isi pe a e uia le laasaga o le papatisoga?

⁹ Pe afai ua e papatiso, o se amataga sili ona lelei lenei mo le auaunaga i le Atua moni. O le uia o lenei laasaga, ua e ulu atu ai i se taufetuliga umi lea e iʻu ai i le mauaina o le ola e faavavau, ma maua ai le olioli i le taimi nei ona o le faia o le finagalo o le Atua. (Epe. 12:2, 3) O le a e aumaia ai foʻi le olioli i tagata o lou aiga ua leva ona iai i le taufetuliga, faapea au uō i le faapotopotoga Kerisiano. Ae sili ai ona tāua, ua e faafiafia le finagalo o Ieova. (Faitau le Faataoto 23:15.) Atonu e lē o malamalama isi pe aiseā ua e filifili ai e tapuaʻi atu iā Ieova, ma  atonu e latou te manatu e lē saʻo lenā filifiliga. E ono oo lava foʻi ina latou tetee atu iā te oe. Peitaʻi e mafai lava ona e manumalo i nei faigatā.

Pe a Fesiligia pe Tetee Mai Isi iā te Oe

10, 11. (a) O ā fesili e ono fesiligia ai oe e tagata e faatatau i lau filifiliga e auauna i le Atua? (e) O le ā e te aʻoaʻoina mai le auala na tali atu ai Iesu i fesili e faatatau i le tapuaʻiga moni?

¹⁰ Atonu o le a fenuminumiaʻi tamaiti o lau vasega, o ou tuaoi, ma ou tauaiga, i lau filifiliga e auauna iā Ieova. Atonu e latou te fesiligia oe pe aiseā ua e filifili ai e faia lea tulaga, ma fesiligia oe e faatatau i ou talitonuga. O le a faapefea ona e tali atu? O le mea moni, e manaʻomia ona e iloilo ou mafaufauga ma faalogona, ina ia mafai ona e taʻu atu māfuaaga o lau filifiliga. Ma pe a e tali atu i fesili e faatatau i ou talitonuga, e leai se isi faaaʻoaʻoga sili e ao ona e faaaʻoaʻo i ai nai lo o le faaaʻoaʻoga a Iesu.

¹¹ Ina ua tuʻifesili e taʻitaʻi lotu Iutaia Iesu e faatatau i le toetū, sa ia faasino i latou i se mau e latou te leʻi mafaufau i ai. (Eso. 3:6; Mata. 22:23, 31-33) Ina ua fesili atu se tusiupu iā te ia po o lē fea poloaʻiga e sili, sa sii i ai e Iesu mau talafeagai o le Tusi Paia. Sa lotofaafetai lenā tamāloa i le tali a Iesu. (Levi. 19:18; Teu. 6:5; Mare. 12:28-34) O le faaaogāina e Iesu o Tusitusiga Paia ma le auala na ia talanoa ai, na ‘vaeluaina ai le motu o tagata ona o ia,’ ma na lē faaoo ai e tagata na tetee iā te ia le leaga. (Ioa. 7:32-46) Pe a e tali atu i fesili e faatatau i lou faatuatuaga, ia faaaogā le Tusi Paia ma tali atu “ma le agamalu ma le matuā faaaloalo lava.” (1 Pete. 3:15) Pe afai e te lē iloa le tali i se fesili, ia taʻu saʻo atu e te lē iloa le tali, ma fai i ai o le a e alu e fai ni au saʻiliʻiliga loloto. Mulimuli ane, ona tagaʻi lea i le mataupu e ala i le faaaogā o le Watch Tower Publications Index po o le Watchtower Library i le CD-ROM pe afai o maua i lau gagana. O lou sauniuni lelei, o le a e ‘iloa ai le auala e tali atu ai.’—Kolo. 4:6.

12. Aiseā e lē tatau ai ona e faataga sauāga e faavaivaia ai oe?

¹² Atonu e te ono fetaiaʻi ma nisi mea e ese mai i fesili e faatatau i lou tulaga ma ou talitonuga. Aemaise, o loo pulea e le fili o le Atua, o Satani le Tiapolo, le lalolagi. (Faitau le 1 Ioane 5:19.) E lē o se mea atamai lo tatou faatalitalia e faapea, o le a faamālō mai pe fiafia mai tagata uma, ma e te ono fesagaʻia foʻi teteega. O nisi tagata e latou te ono ‘fai atu tala leaga e uiga iā te outou,’ ma atonu e faaauau pea ona latou faia faapea mo se taimi umi. (1 Pete. 4:4) Ae ia manatua, e lē na o oe ua oo i lenā tulaga. Sa mafatia foʻi Iesu i puapuaga. Sa faapena foʻi le aposetolo o Peteru, ma na ia tusi e faapea: “Le ʻaupele e, aua tou te popole i le afi [puapuaga] ua mumū iā te outou, lea ua tupu iā te outou e fai ma tofotofoga, e peiseaʻī o se mea uiga ese ua oo iā te outou. Ae ia outou olioli pea auā ua tofusia outou i mafatiaga o Keriso.”—1 Pete. 4:12, 13.

13. Aiseā e olioli ai Kerisiano pe a sauāina i latou?

¹³ O le tumau o se Kerisiano i sauāga po o teteega, o se mea e olioli ai. Aiseā e olioli ai? Auā pe a taumafai e talia oe e le lalolagi, e faaalia ai o loo e ola e tusa ai ma tapulaa a Satani—ae lē o tapulaa a le Atua. Na lapataʻi mai Iesu: “Oi talofa iā te outou pe a faaviivii mai tagata uma iā te outou, auā o mea foʻi na, na faia e o latou  augātamā i perofeta pepelo.” (Luka 6:26) O sauāga ua faaalia ai le ita o Satani ma lana lalolagi iā te oe, ona o loo e auauna iā Ieova. (Faitau le Mataio 5:11, 12.) Ma o le ‘faalumaina ona o le suafa o Keriso,’ o se mea e olioli ai.—1 Pete. 4:14.

14. O ā iʻuga lelei e maua pe a tumau ma le faamaoni se tagata iā Ieova, e ui lava i sauāga?

¹⁴ Pe afai e te tumau ma le faamaoni iā Ieova e ui lava i teteega, a itiiti mai e fā iʻuga lelei e maua mai ai. Ua e avatu ai se molimau e uiga i le Atua ma lona Alo. O lou tumau ma le faamaoni e faalaeiauina ai ou uso ma tuafāfine Kerisiano. E ono uunaʻia ai nisi na mātau mai, o ē e lē iloa Ieova, ina ia saʻili iā te ia. (Faitau le Filipi 1:12-14.) Ma a o e mātauina le auala o loo saunia ai e Ieova le malosi e onosaia ai puapuaga, o le a tuputupu aʻe ai lou alofa mo ia.

Ua Tuuina Mai iā te Oe le ‘Avanoa Telē’

15. O le ā le ‘avanoa telē’ sa tuuina atu i le aposetolo o Paulo?

¹⁵ E tusa ai o lana faiva i Efeso, na tusi le aposetolo o Paulo e faapea: “E telē le avanoa ua tuuina mai iā te aʻu e fai ai le galuega.” (1 Kori. 16:8, 9) O lea avanoa e tataʻi atu ai i le galuega sili o le talaʻia o le tala lelei ma le faia o isi ma soo i lenā aai. E ala i le taliaina o lenā avanoa, sa fesoasoani ai Paulo i le toʻatele o tagata ina ia aʻoaʻo e faatatau iā Ieova ma tapuaʻi atu iā te Ia.

16. Na faapefea ona ulu atu le vaega totoe faauuina i se “faitotoʻa o loo matala” i le 1919?

¹⁶ I le 1919, na tuu atu ai e Iesu Keriso i luma o le vaega totoe faauuina se “faitotoʻa o loo matala.” (Faaa. 3:8) Na latou ulu atu i lenā faitotoʻa ma amata loa ona talaʻi atu le tala lelei, ma aʻoaʻoina ma le maelega upu moni o le Tusi Paia nai lo o se isi lava taimi muamua. O le ā le iʻuga o le latou faiva? Ua oo atu nei le tala lelei i tuluʻiga uma o le lalolagi, ma e pe tusa ma le fitu miliona le aofaʻi o tagata ua faamoemoe e maua le ola e faavavau i le lalolagi fou a le Atua.

17. E mafai faapefea ona e ulu atu i le ‘avanoa telē ua tuuina mai e fai ai le galuega’?

¹⁷ O loo tatala pea i auauna uma a Ieova le ‘avanoa telē ua tuuina mai e fai ai le galuega.’ O loo olioli i latou ua mauaina lenā avanoa ma lagona le faamalieina, a o latou faia se sao tele i le talaʻia o le tala lelei. O le ā le tele o loo faatāua ai e outou o auauna talavou a Ieova, le faaeaga lē mafaatusalia o le fesoasoani i isi ina ia “faatuatua i le tala lelei”? (Mare. 1:14, 15) Po o e mafaufau e auauna o se paeonia sauatoa po o se paeonia lagolago? O loo iai foʻi avanoa mo le toʻatele o outou, e galulue ai i galuega o le fauina o Maota mo Sauniga, le auaunaga i Peteli, ma le auaunaga faamisionare. Talu ai ua puupuu le taimi o totoe mo le lalolagi amioleaga a Satani, o lea ua manaʻomia ai i aso taʻitasi ona faanatinati ona ulu atu i nei vala o le auaunaga o le Malo. Po o le a e ulu atu i lea ‘avanoa telē’ manū o totoe pea le taimi?

“Inā Tofotofo ia Outou, ma ia Outou Iloa e Lelei Ieova”

18, 19. (a) O le ā na fesoasoani iā Tavita e malosi ai lona faanaunauga e auauna iā Ieova? (e) E faaalia faapefea e leai se taimi na salamō ai Tavita ona o le auauna atu i le Atua?

¹⁸ Ua valaaulia e le faisalamo isi ina ia ‘tofotofo ma ia latou iloa e lelei Ieova.’ (Sala. 34:8) A o avea le tupu o Isaraelu anamuā o Tavita ma se tama leoleo mamoe, sa faasaoina o ia e Ieova mai le osofaʻia e manu feʻai. Sa lagolagoina o ia e le Atua ina ua la tau ma Koliata, ma laveaʻi iā te ia mai le tele o isi mala mataʻutia. (1 Samu. 17:32-51; Sala. 18, ulutala) Talu ai ona o le alofa faamaoni o Ieova, na uunaʻia ai  Tavita e tusi e faapea: “Ieova e, loʻu Atua, e tele lava mea ua e faia, o ou vavega ma ou manatu iā te i matou, e lē mafai ona laulauina atu ai iā te oe.”—Sala. 40:5.

¹⁹ Sa matuā tuputupu aʻe le alofa o Tavita mo Ieova, ma sa ia manaʻo e vivii atu iā te Ia ma le loto atoa, ma le mafaufau atoa. (Faitau le Salamo 40:8-10.) A o faagasolo tausaga, e leai se taimi na salamō ai Tavita ona o le faaaogā o lona olaga e tapuaʻi ai i le Atua moni. Sa avea le ola i le amio atua o se ʻoa e aupito sili ona tāua iā te ia—o le puna o le fiafia e lē mafaatusalia. Ina ua toeaina Tavita, na ia faapea mai: “O oe lava o loʻu faamoemoega, le Alii e Ieova, o loʻu faatuatuaga oe talu ina ou tama itiiti. Le Atua e, aua e te tuulafoaʻi mai iā te aʻu e oo ina toeaina ma ulusinā.” (Sala. 71:5, 18) Sa faatuatua Tavita iā Ieova, ma na matuā malosi le la faiā ma Ia, e oo lava i le taimi ua mou atu ai lona malosi faaletino.

20. Aiseā e avea ai le auauna i le Atua o se auala sili e faaaogā ai lou olaga?

²⁰ Ua faamaonia i olaga o Iosua, Tavita, ma Timoteo, o le auauna iā Ieova o le auala sili lea e faaaogā ai lou olaga. E lē mafai e ni lelei lea e aumaia e galuega totogi lea e puupuu le taimi e aogā ai, ona faatusatusa i aogā tumau lea e te maua mai le ‘auauna atu iā Ieova ma lou loto atoa ma lou agaga atoa.’ (Iosua 22:5) Pe afai e te leʻi tuuina atu iā Ieova e ala i le tatalo, ia fesili ifo iā te oe lava, ‘O le ā ua taofia ai aʻu mai le avea o se Molimau a Ieova?’ Pe afai ua avea oe ma tagata tapuaʻi o Ieova ua uma ona papatiso, pe e te manaʻo e faateleina lou fiafia i lou olaga? O lea la, ia faalautele atu lau faiva, ma ia faaauau pea ona fai se agaʻigaʻi i luma faaleagaga. O le a faailoa atu iā te oe e le mataupu o sosoo mai, le auala e te agaʻigaʻi ai i luma faaleagaga, e ala i le faaaʻoaʻo i le faaaʻoaʻoga a le aposetolo o Paulo.

O le ā Lau Tali?

• O ā māfuaaga e lua e ao ai ona tatou auauna i le Atua?

• O le ā na fesoasoani iā Timoteo e faia ai se filifiliga e auauna i le Atua?

• Aiseā e ao ai ona e tumau pe a fesagaʻi ma sauāga?

• O ā avanoa mo le auaunaga e ono mafai ona e maua?

[Fesili mo le Suʻesuʻega]

[Ata i le itulau 18]

O le auauna iā Ieova o le ala sili lenā o le olaga

[Ata i le itulau 19]

Pe mafai ona e tali atu i fesili e faatatau i lou faatuatuaga?