Le Auala o Loo Faamaopoopo ai le Vaega Pule

E IAI i le Vaega Pule a Molimau a Ieova tamāloloa tuuina atu, o ē ua avea ma auauna faauuina a le Atua. E latou te galulue e fai ma sui o le pologa faamaoni ma le faautauta, lea e sauniunia meaʻai faaleagaga ma tuuina mai taʻiala ma faamalosiauga auā le talaʻia o le Malo i le lalolagi atoa.—Mata. 24:14, 45-47.

E faia fono a le Vaega Pule i vaiaso taʻitasi, lea e masani ona faia i le Aso Lulu. E mafai e nei fono ona fesoasoani i nei uso ina ia galulue faatasi ma le autasi. (Sala. 133:1) E galulue foʻi sui o le Vaega Pule i ni komiti eseese. I le tausia o manaʻoga o le Malo, e tofu komiti taʻitasi ma o latou vaega e vaai, e pei ona auʻiliʻili mai i lalo.

▪ KOMITI SOOUPU: O lenei komiti e faia aʻe i sooupu o isi komiti o le Vaega Pule, faapea ma le failautusi, o se tasi foʻi o sui o le Vaega Pule. E latou te faamautinoa o loo lelei pea mea uma i komiti taʻitasi e aunoa ma se faalētonu. E gafa foʻi i latou ma le vaaia o faalavelave faafuaseʻi, o sauāga, mala, ma isi mea tutupu faafuaseʻi o loo aafia ai Molimau a Ieova i le lalolagi atoa.

▪ KOMITI O LE ʻAUFAIGALUEGA: Ua tuu atu i uso o lenei komiti le vaavaaia o fuafuaga mo le tausia o manaʻoga faaletino o sui taʻitasi o aiga Peteli i le lalolagi atoa, ma fesoasoani ina ia latou tumau i la latou faiā ma Ieova. E vaavaaia e lenei komiti le filifilia ma le valaaulia o sui fou o aiga Peteli, ma e gafa ma mea o fia malamalama ai i latou i le auaunaga i Peteli.

▪ KOMITI LOMITUSI: E gafa lenei komiti ma le lolomiina ma le tufaina o tusi, ma le laʻuina o lomiga faale-Tusi Paia i le lalolagi atoa. E latou te vaaia fale lomitusi ma meatotino a sosaiete ua lesitalaina faaletulafono a Molimau a Ieova, lea o loo latou faaaogā e faatino ai a latou galuega. E vaavaaia e lenei komiti le faaaogāina lelei o tupe ua foaʻi mo le galuega o le Malo i le lalolagi atoa.

▪ KOMITI O LE AUAUNAGA: O i latou o loo i lenei komiti, e latou te vaavaaia le galuega talaʻi ma mataupu e aafia ai faapotopotoga, paeonia, toeaina, ma ovasia asiasi. E gafa foʻi i latou ma le sauniunia o La Tatou Faiva o le Malo, ma valaaulia tagata mo le Aʻoga i Kiliata ma le Aʻoga mo Toleniga i le Faiva, ma avatu i ē ua faauu mai na aʻoga a latou tofiga.

▪ KOMITI TAUAʻOAʻOGA: E saunia e lenei komiti aʻoaʻoga o loo faamatilatila i fonotaga, tauaofiaga, ma i sauniga a le faapotopotoga. E latou te saunia polokalame faaleagaga mo sui o le aiga Peteli ma vaaia le tele o aʻoga, e pei o le Aʻoga i Kiliata ma le Aʻoga o le Auaunaga Paeonia, ma e latou te saunia foʻi polokalame i kaseti puʻe leo ma vitiō.

▪ KOMITI O TUSITUSIGA: E gafa lenei komiti ma le vaavaaia o le tusiaina o meaʻai faaleagaga mo lomiga, ma le tufatufaina atu o na lomiga i lo tatou ʻauuso faapea ma tagata lautele. E taliina e lenei komiti fesili faale-Tusi Paia, ma faamaonia mea e pei o tusitusiga o tala ma auivi o lauga. E latou te vaaia foʻi le galuega faaliliu i le lalolagi aoao.

Sa faatusa e le aposetolo o Paulo le faapotopotoga o uso faauuina i le tino o le tagata, ma faamamafa ai galuega tāua a i latou uma faapea lo latou felagolagomaʻi, lo latou alofa, ma le lagolagosua e faia le galuega na tuuina mai e le Atua. (Roma 12:4, 5; 1 Kori. 12:12-31) O loo saunia e lo latou Ulu, o Iesu Keriso, mea e manaʻomia mo le lelei o le lagolagosua, le felagolagomaʻi, ma faamalosia ai i latou faaleagaga. (Efe. 4:15, 16; Kolo. 2:19) Ona o lenā tulaga, ua faamaopoopo ai le Vaega Pule ina ia taʻimua i le galuega a o taʻitaʻia i latou e le agaga paia o Ieova.