Ua Lata le Laveaʻiga e Ala i le Malo o le Atua!

“Ia oo mai lou malo. Ia faia lou finagalo i le lalolagi, e pei ona faia i le lagi.”—MATA. 6:10.

1. O le ā le aʻoaʻoga autū a Iesu?

INA ua faia e Iesu Keriso lana Lauga i le Mauga, na aofia ai ma se tatalo faataʻitaʻi lea na aotele ai lana aʻoaʻoga autū. Na ia aʻoaʻo ona soo ia tatalo i le Atua: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mata. 6:9-13) Sa ‘⁠malaga atu o ia mai lea aai i lea aai, ma lea nuu i lea nuu, ua talaʻi ma folafola atu le tala lelei o le malo o le Atua.’ (Luka 8:1) Na uunaʻia e Keriso ona soo: “Ia faaauau pea ona . . . saʻili muamua le malo ma le amiotonu.” (Mata. 6:33) A o e suʻesuʻeina lenei mataupu, vaai i auala e faaaogā ai manatu nei i lau faiva. O se faataʻitaʻiga, manatu i le auala e te ono tali ai fesili nei: O le ā le tāua o le feʻau o le Malo? O le ā e manaʻomia ona laveaʻi mai ai tagata? Ma o le a faapefea ona laveaʻia tagata e le Malo o le Atua?

2. O le ā le tāua o le feʻau o le Malo?

² Na valoia e Iesu: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga.” (Mata. 24:14) O le tala lelei e uiga i le Malo o le Atua o le mea aupito tāua lea. Auā, o le feʻau aupito i sili lea ona tāua i le lalolagi! I le silia i le 100,000 faapotopotoga o Molimau a Ieova i le lalolagi aoao, pe tusa e fitu miliona auauna a le Atua o loo auai i se galuega talaʻi e lē mafaatusalia, i le taʻu atu i isi o le Malo ua faavaeina nei. O le faavaeina o lea malo o se tala lelei, ona e taʻu mai ai ua faavaeina e le Atua se malo i le lagi e pulea atoatoa mataupu fai a le lalolagi. E ala i le pulega o le Malo, o le a faia ai le finagalo o Ieova i le lalolagi e pei ona faia i le lagi.

3, 4. O le ā le tulaga o le a iai pe a faia le finagalo o le Atua i le lalolagi?

³ O le ā o le a tupu i tagata pe a faia le finagalo o le Atua i le lalolagi? O le a “soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaa. 21:4) O le a lē toe mamaʻi tagata pe feoti ona o le agasala tuufaasolo ma le lē lelei atoatoa. O i latou ua feoti o loo ola pea i le finagalo o le Atua, o le a maua le avanoa e ola ai e faavavau, ona ua folafola mai i le Tusi Paia: “E toetutū mai tagata amiotonu ma tagata amiolētonu.” (Galu. 24:15) O le a lē toe iai ni taua, maʻi, po o le fia ʻai, ma o  le a suia le lalolagi e avea ma parataiso. E oo lava i meaola o loo mataʻutia i le taimi nei o le a nonofo fifilemu ma tagata, faapea foʻi ma isi meaola.—Sala. 46:9; 72:16; Isa. 11:6-9; 33:24; Luka 23:43.

⁴ O na faamanuiaga mataʻina e maua ona o le pulega o le Malo, e lētioa la a tautala valoaga a le Tusi Paia i le olaga i lenā taimi i upu faamāfanafana loto nei: “O ē agamalu, e fai mo latou le nuu; e faafiafia foʻi i latou iā te i latou ona o le manuia e tele.” Ae faapefea tagata faatupu vevesi? Na valoia e le Tusi Paia: “E toe itiiti, ona leai lea o le tagata amio leaga.” Ae peitaʻi, “o ē faatalitali iā Ieova, o i latou lava ia e fai mo latou le nuu.”—Sala. 37:9-11.

5. O le ā le tulaga o le a iai le faiga o mea o loo iai nei?

⁵ Ina ia taunuu nei mea uma, e tatau ona aveesea lenei faiga o mea ma ona pulega feteenaʻi, lotu, faapea ma faiga faapisinisi o loo iai. Ma o le mea tonu lava lea o le a fai e le malo i le lagi. Na faagaeeina le perofeta o Tanielu e valoia faapea: “O ona po o ia tupu [o loo iai nei] e faatuina ai e le Atua o le lagi o le malo [i le lagi] e lē faaumatia e faavavau; o lea malo foʻi, e lē tuuina atu ia i se tasi nuu, na te tuʻimomomoina ma faaumatia ia malo [o loo iai nei] uma lava, a o ia e tumau lava e faavavau.” (Tani. 2:44) O le Malo o le Atua—o se malo fou faalelagi—o le a ia pulea se sosaiete fou i le lalolagi. O le a iai “le lagi fou ma le lalolagi fou . . . e mau ai le amiotonu.”—2 Pete. 3:13.

Ua Matuā Manaʻomia se Laveaʻiga i le Taimi Nei

6. O faapefea ona faamatalaina e le Tusi Paia le tulaga leaga o lenei lalolagi?

⁶ Ina ua fouvale Satani, Atamu ma Eva i le Atua, i le mananaʻo e filifili lava e i latou le mea e saʻo ma le mea e sesē, na amata ai loa ona oo mai puapuaga i le aiga faaletagata. A o leʻi oo ane le Lolo i le silia i le 1,600 tausaga mulimuli ane ai, “ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.” (Kene. 6:5) Pe tusa o le 1,300 tausaga mulimuli ane ai, na iloa ai e Solomona le matuā leaga o le tulaga o mea, lea na ia tusi ai e faapea: “Ona ou faamanuia ai lea i ē ua oti, ē ua oti anamua, e sili i ē ola, o i latou o ē ola mai nei. A e sili ona manuia iā te i laʻua o lē ua lē fanau mai, o lē ua lē iloa le galuega leaga ua faia i lalo o le lā.” (Fai. 4:2, 3) Pe tusa ma le isi 3,000 tausaga lea ua oo mai ai i o tatou aso, o lea lava e faaauau pea ona tutupu le anoanoaʻi o mea leaga.

7. Aiseā ua iai se manaʻoga tele i le taimi nei mo se laveaʻiga mai le Atua?

⁷ E ui lava ua leva ona iai le leaga, ae ua sili atu ona tatou matuā manaʻomia se laveaʻiga e ala i le Malo o le Atua i le taimi nei, i lo se isi lava taimi. E sili atu ona leaga le tulaga o mea i le 100 tausaga ua tuanaʻi atu, nai lo se isi lava taimi, ma ua faaauau pea ona leaga. O se faaaʻoaʻoga, na lipotia mai e le Faalapotopotoga e Mataʻituina Mea e Tutupu faapea: “E faatoluina le toʻatele o le aofaʻi o tagata na fasiotia i taua i le senituri [lona 20], nai lo ē  na fasiotia i taua uma mai le uluaʻi senituri T.A. e oo i le 1899.” Talu mai le 1914 e silia i le 100 miliona tagata ua fasiotia i taua! O se faatusatusaga a se tasi o encyclopedia e faapea, e oo atu i le 60 miliona tagata na feoti i le Taua Lona Lua a le Lalolagi. Ona o loo iai nisi o atunuu ua faaauupegaina i meatau faaniukilia, o lea la ua i le tagata le malosi e tafiesea ai se vaega tele o le faitau aofaʻi o le lalolagi. E ui lava i le alualu i luma o le tomai faasaienisi ma faafomaʻi, ae i tausaga taʻitasi e feoti ai lava le pe tusa o le lima miliona tamaiti ona o le molemanava.—Tagaʻi i le mataupu e 9 o le tusi O ā Aʻoaʻoga Moni a le Tusi Paia?

8. O le ā ua matuā faamaonia i le faitau afe o tausaga o pulega a tagata?

⁸ Ua lē taulau taumafaiga a tagata e taofia le tutupu aʻe pea o mea leaga. E leʻi mafaia lava e ni faalapotopotoga faapolotiki, faapisinisi ma faalotu ona faataunuu manaʻoga o tagata mo le filemu, tulaga lelei tau tamaoaiga ma le soifua mālōlōina lelei. Nai lo le fesoasoani o nei faalapotopotoga e foʻia faafitauli o loo fesagaʻi ma tagata, ua latou faaopoopo atu i na faafitauli. E mautinoa, o le faitau afe o tausaga o pulega a tagata ua na ona faamaonia ai o upu nei: “E lē o i le tagata lona ala, e lē o i le tagata e savali ona faatonuina le mea e ui ai o ia.” (Iere. 10:23) Ioe, ua “pule . . . le tasi tagata i le tasi, [ua] leaga ai o ia lava.” (Fai. 8:9) E lē gata i lea, “o loo ōi faatasi pea ma tigā faatasi foafoaga uma.”—Roma 8:22.

9. O ā tulaga e faatalitalia e Kerisiano moni i nei “aso e gata ai”?

⁹ Na valoia e le Tusi Paia o tatou taimi e faapea: “O aso e gata ai e oo mai ai aso e sili ona faigatā.” Ina ua uma ona faamatala mai tulaga o le a iai i aso e gata ai ona o pulega a tagata, ona faapea mai lea o le valoaga: “O tagata amioleaga ma ē taufaasesē, e faateteleina pea lo latou leaga.” (Faitau le 2 Timoteo 3:1-5, 13.) O le mea lenā e faatalitalia e Kerisiano, ona “o le lalolagi atoa o loo nofo toʻilalo i le pule a lē o loo leaga.” (1 Ioa. 5:19) Ae peitaʻi o le tala fiafia, ua toeitiiti nei ona laveaʻia lea e le Atua i latou e alolofa iā te ia. O le a laveaʻia i latou mai lenei lalolagi lea ua televave tele ona oo atu i tulaga e sili ona leaga.

Puna Maufaatuatuaina e Tasi mo le Laveaʻiga

10. Aiseā ua na o Ieova ai lava le Puna o le laveaʻiga?

¹⁰ A o e talaʻia le tala lelei, ia faamatala i tagata, e na o Ieova e mafai ona faia le laveaʻiga. E na o ia e iai le mana ma o loo faanaunau e laveaʻia ana auauna mai so o se tulaga leaga. (Galu. 4:24, 31; Faaa. 4:11) E tatou te mautinoa o le a laveaʻia e lē aunoa e Ieova ona tagata ma faataunuuina lona finagalo, ona na ia faamautinoa mai: “E pei ona ou manatu e faapea lava ona taunuu.” O lana upu ‘e lē foʻi fua atu iā te ia.’—Faitau le Isaia 14:24, 25; 55:10, 11.

11, 12. O le ā le faamautinoaga ua aumai e le Atua i ana auauna?

¹¹ Ua faamautinoa e Ieova o le a ia laveaʻia ana auauna pe a ia aumaia le sala faafaamasinoga i tagata amioleaga. Ina ua ia auina atu le perofeta o Ieremia e tautala atu ma le lototele i tagata amioleaga, na fetalai le Atua: “Aua e te fefe.” Aiseā? “Ou te iā te oe e laveaʻi iā te oe.” (Iere. 1:8) E faapena foʻi le tulaga na iai, ina o le a faaumatia e Ieova Sotoma ma Komoro, na ia auina atu agelu e toʻalua e taʻitaʻi ese ma le saogalemu Lota ma lona aiga mai lea vaipanoa. “Ona faatotō faaua ifo lea e Ieova mai i le lagi, o le teiō ma le afi . . . i luga o Sotoma ma Komoro.”—Kene. 19:15, 24, 25.

¹² E oo lava i le lalolagi aoao, e mafai foʻi e Ieova ona laveaʻi i latou o loo faia lona finagalo. Ina ua faaumatia le lalolagi amioleaga anamua i le Lolo, “na o Noa lē talaʻi le amiotonu, o lona toʻavalu lea na faaolaina.” (2 Pete. 2:5) O le a toe laveaʻia foʻi e Ieova tagata amiotonu pe a ia faaumatia le lalolagi amioleaga o loo iai nei. Ua taʻua i lana Afioga: “Ia outou saʻili iā Ieova, outou uma ua agamalu i le nuu . . . ia outou saʻili le amiotonu,  ia outou saʻili le agamalu, atonu e lilo ai outou i le aso o le toʻasā o Ieova.” (Sefa. 2:3) O le iʻuga o le faaumatiaga i le lalolagi aoao, ‘O ē amio saʻo latou te nonofo i le lalolagi, ae o le a aveesea ē amioleaga.’—Faata. 2:21, 22.

13. O le a faapefea ona laveaʻia auauna a Ieova ua maliliu?

¹³ Ae peitaʻi, o le toʻatele o auauna a le Atua ua maliliu ona o maʻi, sauāga, ma isi lava māfuaaga. (Mata. 24:9) O le a faapefea la ona laveaʻia nei tagata uma? E pei ona taʻua muamua, “e toetutū mai tagata amiotonu.” (Galu. 24:15) Maʻeu le faamāfanafanaina i le iloa, e leai se mea e taofia ai Ieova mai le laveaʻia o ana auauna!

Se Malo Amiotonu

14. Aiseā e tatou te mautinoa ai o le Malo o le Atua o se pulega amiotonu?

¹⁴ A o auai i le talaʻiga, e mafai ona e faamatala le Malo o Ieova i le lagi, o se malo e amiotonu. E amiotonu ona e faaalia mai ai uiga mataʻina o Ieova e pei o le tonu o mea na te fai, amiotonu, ma le alofa. (Teu. 32:4; 1 Ioa. 4:8) Ua avatu e le Atua le Malo iā Iesu Keriso, auā o ia e aupito sili ona agavaa e pulea le lalolagi. Ua fuafuaina foʻi e Ieova le 144,000 o Kerisiano faauuina, e ave atu mai le lalolagi ina ia ola i le lagi o ni suli faatasi ma Keriso e pulea le lalolagi.—Faaa. 14:1-5.

15. Fai se faaeseesega o le pulega a le Malo o le Atua ma pulega a tagata.

¹⁵ Maʻeu le ese o le pulega a Iesu ma le 144,000 ma pulega a tagata lē lelei atoatoa! O taʻitaʻi o lenei faiga o mea e masani lava ona sauā, ma taʻitaʻia ona tagata i faigātaua, lea ua fasiotia ai le faitau miliona o tagata. E lētioa a fautua mai le Tusi Paia e aua le tuu lo tatou faatuatuaga i tagata, “e lē o i ai se olataga”! (Sala. 146:3) Ae maʻeu se uiga lelei o le a mātaulia ai le pulega a Keriso! Na fetalai Iesu: “Ia outou ō mai iā te aʻu o outou uma ua tigāina ma mafatia, o aʻu foʻi e mālōlō ai outou. Ia outou ave laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona outou mālōlō ai lea. Auā e avegofie laʻu amo, ma e māmā foʻi laʻu avega.”—Mata. 11:28-30.

Ua Toeitiiti Iʻu Aso e Gata Ai!

16. O le a faapefea ona iʻu nei aso e gata ai?

¹⁶ Ua iai le lalolagi i aso e gata ai, po o le faaiʻuiʻuga o le faiga o mea talu mai le tausaga e 1914. (Mata. 24:3) Ua toeitiiti nei, ona tupu loa lea o le mea e taʻua o le “puapuaga tele.” (Faitau le Mataio 24:21.) O se puapuaga e lē mafaatusalia o le a aumaia ai le lalolagi a Satani i lona iʻuga. Peitaʻi, o le a faapefea ona amata le puapuaga tele? Ma e faapefea ona iʻu?

17. O le ā o loo faailoa mai i le Tusi Paia e faatatau i le amataga o le puapuaga tele?

¹⁷ O le a faafuaseʻi lava ona amata le puapuaga tele. Ioe, o le “aso o Ieova” o le a sau faafuaseʻi “pe a latou faapea ane: ‘Ua filemu ma saogalemu!’” (Faitau le 1 Tesalonia 5:2, 3.) O le a amata le puapuaga  e pei ona valoia, pe a manatu malo ua latalata ona latou foʻia nisi o latou faafitauli tetele. O le a faafuaseʻi ona faaumatia “Papelonia Tele,” le emepaea o lotu sesē a le lalolagi, ma o le a matuā faateʻia ai le lalolagi. O le a matuā teteʻi ma ofo tupu, faapea ma isi pe a faaoo mai le faaumatiaga o Papelonia Tele.—Faaa. 17:1-6, 18; 18:9, 10, 15, 16, 19.

18. E faapefea ona gaoioi Ieova i osofaʻiga a Satani i Ona tagata?

¹⁸ Pe a oo ina tugā le tulaga o mea, o le a iai “faailoga i le lā, le masina, ma fetu,” ona “iloa ai lea i le lagi o le faailoga o le Atalii o le tagata.” O le taimi lea e ‘ea ai i luga o tatou ulu, auā ua latalata ona laveaʻiina tatou.’ (Luka 21:25-28; Mata. 24:29, 30) O le a liliu mai ʻau a Satani, po o Koku, i tagata o le Atua. Ae o i latou e osofaʻia ana auauna faamaoni, ua fetalai Ieova: “O lē paʻi atu iā te outou, ua pāʻia e ia le tamatamaʻi mata o [loʻu] fofoga.” (Saka. 2:8) O lea la, o taumafaiga a Satani e faaumatia i latou o le a lē taulau. Aiseā? Auā o le a vave ona gaoioi Ieova ina ia laveaʻia ana auauna.—Eseki. 38:9, 18.

19. Aiseā e tatou te mautinoa ai, o le a gaoioi ʻau faaoosala a le Atua e faaumatia le faiga o mea a Satani?

¹⁹ Pe a gaoioi le Atua faasaga i atunuu, o le a latou ‘⁠iloa o ia lava o Ieova.’ (Eseki. 36:23) O le a ia auina mai lana ʻau faaoosala—e mano ni mano o foafoaga agaga e taʻitaʻia e Keriso Iesu—e faaumatia vaega o loo totoe o le faiga o mea a Satani i le lalolagi. (Faaa. 19:11-19) Pe a tatou manatu i se tasi o mea na tupu, e na o le toʻatasi le agelu na ‘fasia tagata e selau afe ma afe e valu sefulu ma afe e lima’ o fili o le Atua, e mautinoa foʻi la, o le a faigofie e ʻau faalelagi ona faaumatia vaega uma o le faiga o mea a Satani i le lalolagi, a o oo atu le puapuaga tele i lona tumutumuga iā Amaketo. (2 Tu. 19:35; Faaa. 16:14, 16) O le a lafo Satani ma ana temoni i le tō e lē gata mo le afe tausaga seʻia oo ai ina faaumatia.—Faaa. 20:1-3.

20. O le ā o le a faataunuu e Ieova e ala i le Malo?

²⁰ O le a faamamāina le lalolagi mai le amioleaga, ma ola ai tagata amiotonu e faavavau i luga o le lalolagi. O le a faamaonia Ieova o ia o le Laveaʻi Sili. (Sala. 145:20) E ala i le Malo, o le a ia faamaonia ai le tonu o lana pule silisili ese, faapaiaina lona suafa, ma faataunuuina lana fuafuaga matagofie mo le lalolagi. Tau ina ia e olioli i lau faiva a o e folafola atu le tala lelei, ma fesoasoani iā i latou “o ē ua saunia o latou loto mo le ola e faavavau,” ina ia latou iloa ua lata le laveaʻiga e ala i le Malo o le Atua!—Galu. 13:48.

Pe E te Manatua?

• Na faapefea ona faamatilatila e Iesu le tāua o le Malo?

• Aiseā ua iai se manaʻoga tele mo se laveaʻiga i le taimi nei nai lo se isi lava taimi?

• O ā mea e tutupu e tatou te faatalitalia i le taimi o le puapuaga tele?

• E faapefea ona faamaonia o Ieova o le Laveaʻi Sili?

[Fesili mo le Suʻesuʻega]

[Ata i le itulau 12, 13]

Na valoia e le Afioga a le Atua se talaʻiga e leʻi faapea ona faia muamua i le lalolagi e pei o o tatou aso

[Ata i le itulau 15]

Na laveaʻi e Ieova Noa ma lona aiga, e mafai foʻi ona Ia laveaʻia i tatou

[Ata i le itulau 16]

O Ieova o le a ia “soloiesea foʻi loimata uma . . . e lē toe iai se oti.”—Faaa. 21:4