Fesili Mai le ʻAufaitau

Na faapea mai le aposetolo o Paulo o le a ‘faaolaina Isaraelu uma.’ (Roma 11:26) Po o le uiga o ana upu o le a iai se taimi e liliu uma ai tagata Iutaia i le faa-Kerisiano?

E lē o le uiga lenā o upu a Paulo. I le avea o se nuu, o ē na tupuga mai iā Aperaamo, na latou teena Iesu o le Mesia. Ma i tausaga mulimuli ane talu ona maliu Iesu, na atagia mai ai o le a lē liliu uma tagata Iutaia o se nuu i le faa-Kerisiano. Ae ui i lea, e moni lava upu a Paulo e ‘faasaoina Isaraelu uma.’ I le ā le itu?

Na fetalai atu Iesu i taʻitaʻi lotu Iutaia i ona vaitaimi: “E aveesea le malo o le Atua mai iā te outou, ae tuuina atu i se nuu e fua mai ai ona fua.” (Mata. 21:43) Talu ai na teena e le nuu o Isaraelu Iesu, ua liliu atu ai Ieova i se nuu fou, o se nuu faaleagaga. Na taʻua e Paulo lenei nuu o le “Isaraelu a le Atua.”—Kala. 6:16.

O nisi vaega o Tusitusiga Eleni o loo faamanino mai ai le “Isaraelu a le Atua,” o loo faia aʻe i Kerisiano e 144,000 ua faauuina i le agaga. (Roma 8:15-17; Faaa. 7:4) E aofia ai i lenei vaega i latou e lē o ni Iutaia, ma o loo faamaonia lea i le Faaaliga 5:9, 10, lea e faaalia mai ai o Kerisiano faauuina e “mai i ituaiga uma, ma gagana uma, ma nuu uma, ma atunuu uma.” Na tofia faapitoa sui o le Isaraelu faaleagaga e avea ma ‘⁠malo ma ositaulaga e pule mai foʻi o ni tupu i le lalolagi.’ E ui na teena e Ieova le nuu o Isaraelu e avea ma ona nuu filifilia, ae e mafai lava e tagata taʻitoʻatasi ona toe maua se leleiga ma ia. O le mea lenā na tupu i aposetolo ma le tele o uluaʻi Kerisiano. Peitaʻi, o nei tagata Iutaia e tutusa pau ma isi tagata, e tatau ona faatauina mai i latou i le toto o Iesu Keriso.—1 Timo. 2:5, 6; Epe. 2:9; 1 Pete. 1:17-19.

E ui i le toʻatele o tagata Iutaia i le uluaʻi senituri na melea lenei avanoa e pule faatasi ai ma Iesu, e leʻi taofia ai le fuafuaga a le Atua mai le faataunuuina. E leai se isi na te taofia le lē faataunuuina o lenei mea, auā na fetalai mai Ieova e ala i lana perofeta: “E faapea foʻi laʻu upu e alu atu ai loʻu gutu, e lē foʻi mai fua iā te aʻu; ae peitaʻi e faia le mea ou te loto i ai, e manuia foʻi i le mea ou te auina atu ai.”—Isa. 55:11.

E moni lenā mea e tusa ai ma le fuafuaga a le Atua e tofia le 144,000 e pule faatasi ma lona Alo i le lagi. O loo manino le Tusi Paia o le a faauuina e le Atua le 144,000. E lē faagaloina se tasi!—Faaa. 14:1-5.

O lea la, ina ua tusi Paulo o le a ‘faaolaina Isaraelu uma,’ e na te leʻi valoia le liliuina o tagata Iutaia uma i le faa-Kerisiano. Nai lo lea, na ia uiga atu i le fuafuaga a le Atua ina ia pule faatasi ma lona Alo o Iesu Keriso i le lagi, le 144,000 o le Isaraelu faaleagaga. I le taimi atofaina a le Atua, o le fuainumera atoa o “Isaraelu uma,” o le a iai i se tulaga faaolaina, ma e iʻu ina pule o ni tupu ma ositaulaga i le Malo o le Mesia.—Efe. 2:8.

[Ata i le itulau 28]

O Kerisiano faauuina e “mai i ituaiga uma, ma gagana uma, ma nuu uma, ma atunuu uma”