Malosi Pea e Ui i Mea e Vaivai Ai

E MAFAI ona lofitūina oe e ou vaivaiga. E tumau pea iā te oe e pei o se mea faapipii. Atonu e te manatu faapea, e lē mafai ona e manumalo i ou vaivaiga, pe atonu foʻi e te manatu ua e lē taulau, ma faatusatusa oe i isi, ma manatu ai faapea e sili isi tagata nai lo oe. Atonu foʻi o loo e tauivi ma se maʻi tugā lea e ono mou atu ai lou malosi ma le fiafia i le olaga. Po o le ā lava le māfuaaga, ua foliga mai ua leai se mea e mafai ona e toe fai. Atonu e tutusa o oulua faalogona ma Iopu, o lē sa faapea atu i le Atua: “E! fia natia aʻu e oe i le tuugamau ma ia e faaliloina aʻu, seʻia mavae atu lou toʻasā; ia e atofaina mai se aso mo aʻu, ma ia e manatua mai ai aʻu.”—Iopu 14:13.

E faapefea ona e manumalo i na tulaga atuatuvale? E ui atonu e faigatā, e manaʻomia ona aua e te mafaufau i ou faafitauli mo sina taimi. Mo se faaaʻoaʻoga, e te ono manatunatu i fesili faagaeeina nei a Ieova i lana auauna faamaoni o Iopu: “O ifea sa e i ai ina o oʻu faavaeina le lalolagi? Inā faaali mai ia pe afai ua e iloa mafaufau. O ai ea na ia fuafuaina ai, pe afai ua e iloa? O ai foʻi ua na faataoto i ai le fua?” (Iopu 38:4, 5) O lo tatou mafaufau i le tāua o nei fesili, atonu e uunaʻia ai i tatou ina ia iloa le maoaʻe o le atamai ma le malosi o Ieova. Ua ia faataga mea o loo tutupu i lenei lalolagi e faaauau pea, ona o ni māfuaaga lelei.

“Le Mea Matuitui i le Tino”

Na talosaga atu se tasi o auauna faamaoni iā Ieova ina ia aveese “le mea matuitui i le tino,” o se faafitauli na fai ma faalavelave iā te ia. E faatolu ona tatalo le aposetolo o Paulo i le Atua e aveese lenā faafitauli mai iā te ia. Po o le ā lava le faafitauli na iai lea e pei o se mea matuitui, sa ono mou atu ai le fiafia o Paulo i lana auaunaga iā Ieova. Na faatusa e Paulo lenā faafitauli e pei o se isi e faaauau ona tā atu iā te ia. Na tali mai Ieova e  faapea: “Ua lava le agalelei faifua ua ou faaali atu iā te oe; auā ua faaatoaina loʻu mana i vaivaiga.” E leʻi aveesea e Ieova lenā mea matuitui i le tino. Sa tatau ona tauivi Paulo ma lenā faafitauli, ae sa ia toe faapea mai: “Pe a ou vaivai, ona ou malosi ai lea.” (2 Kori. 12:7-10) O le ā le uiga o lenā faamatalaga?

E leʻi faavavega ona mou ese le faafitauli o Paulo, ae e leʻi taofia mai ai o ia i le faataunuuina o mea mataʻina i le auaunaga iā Ieova. Sa faalagolago Paulo i le lagolagosua a Ieova, ma tatalo e lē aunoa mo lana fesoasoani. (Fili. 4:6, 7) A o lata ina iʻu lona soifuaga i le lalolagi, na faapea mai Paulo: “Ua ou tau le taua lelei, ua ou faaiʻuina le tausinioga, ua ou tausia le faatuatua.”—2 Timo. 4:7.

O loo faaaogā e Ieova tagata lē lelei atoatoa ina ia faia lona finagalo e ui i o latou vaivaiga ma faafitauli, ma e viia ai Ieova i lenei mea. E na te foaʻi iā i latou le taʻitaʻiga ma le atamai e fesagaʻia ai o latou faafitauli, ma tumau ai pea ona fiafia i le auaunaga iā te ia. Ioe, e mafai ona ia faaaogā tagata lē lelei atoatoa e faia galuega mataʻina e ui lava i o latou vaivaiga.

Na taʻua e Paulo le māfuaaga na lē aveesea ai e le Atua le mea matuitui i le tino lea sa iā te ia: “Ina neʻi oʻu faamaualuga naʻuā.” (2 Kori. 12:7) Na faamanatu mai e lenei “mea matuitui” iā Paulo, e gata mai lona malosi, ma fesoasoani iā te ia ina ia tumau ai pea ona lotomaulalo. E ōgatusa lenā ma le mea na aʻoaʻo mai e Iesu: “O sē na te faaeaina o ia lava, e faamaulaloina lea, ae o sē e faamaulalo iā te ia lava, e faaeaina o ia.” (Mata. 23:12) E mafai e tofotofoga ona aʻoaʻoina auauna a le Atua ina ia lotomaulalo ma latou iloa ai, ina ia latou tumau i le onosaʻi, e ao ona latou faalagolago iā Ieova. O lea, i le pei o le aposetolo, e mafai ona latou ‘mitamita iā Ieova.’—1 Kori. 1:31.

O Vaivaiga Iloagatā

O nisi atonu e iai vaivaiga e latou te lē o iloa, po o le mumusu foʻi e faailoa mai na vaivaiga. Mo se faaaʻoaʻoga, e ono mautinoa naʻuā se tasi, ma faalagolago iā te ia lava. (1 Kori. 10:12) O le isi vaivaiga e taatele i tagata lē lelei atoatoa, o le faanaunauga lea i tulaga taualoa.

O Ioapo, o lē na avea ma taʻitaʻiʻau a le tupu o Tavita, o se tagata toa, maumauaʻi, ma atamai i le foʻiaina o faafitauli. Peitaʻi, sa nofosala Ioapo i le amio lē pulea matuiā lea e faailoa mai ai le uiga faamaualuga, ma se faanaunauga o le fia taualoa. Na ia fasiotia ma le lē alofa taʻitaʻiʻau e toʻalua. Muamua, sa ia taui ma sui ina ua ia fasiotia Apineru. Ona sosoo lea ma lona faatagā faafeiloaʻia o lona tausoga o Amase, ona tago atu lea o lona lima taumatau i le ʻava a Amase e peiseaʻī e sogi iā te ia, ma tutuʻi iā Amase i le pelu o loo i lona lima tauagavale. (2 Samu. 17:25; 20:8-10) Muamua atu, na avea Amase ma taʻitaʻiʻau e suitulaga iā Ioapo, o lea la ua faaaogā e Ioapo le avanoa lea e fasiotia ai lē sa faatavā ane, ma atonu sa faamoemoe e toe avea ai o ia ma taʻitaʻiʻau. E manino mai le leʻi mafai ona pulea e Ioapo o ona faanaunauga, e aofia ai lona faanaunauga manatu faapito. Sa gaoioi ma le sauā e aunoa ma se salamō i le mea na ia fai. Ina ua lata ina maliu le tupu o Tavita, na ia faatonuina lona atalii o Solomona ina ia faamautinoa e faasalaina Ioapo ona o lana mea leaga na fai.—1 Tu. 2:5, 6, 29-35.

E lē tatau ona tatou lolo atu i o tatou faanaunauga sesē; ae e mafai ona tatou pulea o tatou vaivaiga. Muamua, e ao ona tatou iloa ma faailoa o tatou vaivaiga. Ona tatou gaoioi lea e foʻia. Ia tatalo e lē aunoa iā Ieova mo lana fesoasoani ina ia manumalo i na vaivaiga, ma ia toʻaga e suʻesuʻe lana Afioga, ina ia maua ai ni auala e pulea ai na faanaunauga. (Epe. 4:12) E manaʻomia ona tatou taumafai pea lava pea e faaleleia o tatou vaivaiga, ma ia aua neʻi lotovaivai ai i le faia faapea. E faaauau pea lenā tauiviga ona o lo tatou lē lelei atoatoa. Na faaalia e Paulo le mea lenei i lona lava tulaga na iai: “Auā o le mea ou te loto i ai, o le mea lea ou te lē faia, a o le mea ou te ʻinoʻino i ai, o lea ou te faia.” E pei ona tatou iloa, e leʻi lolo atu Paulo i lona vaivaiga e pei ua lē mafai ona ia pulea. Nai lo lea, na ia tauivi pea ma lona vaivaiga, ma faalagolago atu i le fesoasoani a le Atua e ala mai iā Iesu Keriso. (Roma 7:15-25) Na taʻua e Paulo i se tasi  o ana tusi e faapea: “Ou te tatuʻi loʻu tino ma fai ma pologa ina neʻi taʻuleagaina aʻu, ae sa ou talaʻi atu i isi tagata.”—1 Kori. 9:27.

E taumafai tagata e fai faamolemolega mo i latou lava. E mafai ona tatou faaleleia lenā uiga e ala i le iloa o le silafaga a Ieova, e pei ona fautuaina ai e Paulo Kerisiano e faapea: “Ia ʻinoʻino i le leaga, ae pipii i le lelei.” (Roma 12:9) I le tauiviga ina ia manumalo mai i o tatou vaivaiga, e manaʻomia ona tatou faamaoni, maumauaʻi, ma ia pulea i tatou lava. Na talosaga atu Tavita iā Ieova: “Ia e faamamā i oʻu manatu ma loʻu loto.” (Sala. 26:2) Na iloa lelei e Tavita, e mafai e le Atua ona suʻesuʻeina ma le saʻo o tatou faanaunauga loloto, ma foaʻi mai le fesoasoani tatou te manaʻomia. Pe a tatou gaoioi e tusa ai ma le taʻitaʻiga o loo saunia e Ieova, e ala mai i lana Afioga ma lona agaga paia, e mafai ai ona tatou manumalo i o tatou vaivaiga.

O nisi atonu ua feagai ma faafitauli e latou te manatu e lē mafai ona latou fesagaʻia na o i latou lava. E mafai e toeaina o le faapotopotoga ona avatu le fesoasoani ma faalaeiauga māfana. (Isa. 32:1, 2) Ae o se mea talafeagai lo tatou malamalama lelei i le tulaga o mea. O nisi faafitauli, e lē mafai ona foʻia i le faiga o mea o iai nei. Ae ui i lea, e toʻatele tagata ua mafai ona fesagaʻia faafitauli, ma ua mafai ai ona latou maua ni olaga faamalieina.

E Mautinoa le Fesoasoani a Ieova

Po o ā lava faafitauli o loo tatou fesagaʻia i nei taimi faigatā, ae e mafai ona tatou mautinoa o le a taʻitaʻia ma lagolagoina i tatou e Ieova. O loo faalaeiau mai le Tusi Paia e faapea: “O le mea lea, ia faamaulalo outou i lalo o le aao malosi o le Atua, ina ia faaeaina e ia outou i le taimi e tatau ai; ma ia taʻu atu o outou popolega uma iā te ia, auā o loo manatu mamafa mai o ia iā te outou.”—1 Pete. 5:6, 7.

Ina ua iloa e Kathy, lea sa auauna i le Peteli mo le tele o tausaga, ua maua lana tane i le maʻi o le Alzheimer (le gasegase o le tau galogalo o mea), e na te leʻi manatu o le a mafai ona ia onosaia tulaga o lenā maʻi. Na avea le tatalo iā Ieova mo le atamai ma le malosi, o se mea na ia faia i aso uma. A o faasolo ina leaga le tulaga o le maʻi o lana tane, na taumafai uso alolofa e faailoa atu le auala e fesagaʻia ai  tulaga o le maʻi, ma na avatu foʻi e tuafāfine le fesoasoani tau i faalogona. Sa avea nei Kerisiano ma puna o faalaeiauga ua saunia mai e Ieova, ma sa mafai e Kathy ona tausia lana tane mo le 11 tausaga seʻia oo ina maliu. Na ia taʻua: “Ou te matuā faafetai iā Ieova ma le loto atoa mo lana fesoasoani; lea na ou tumau ai. Ou te leʻi iloa e mafai ona ou onosaia lea tulaga mo se taimi umi, e ui lava ina ou vaivai!”

Fesoasoani Ina ia Pulea ai Vaivaiga Iloagatā

Pe a lagona e tagata ua leai so latou aogā, atonu e latou te manatu e lē o faafofoga mai Ieova i a latou talosaga mo se fesoasoani i taimi e mafatia ai. O se mea lelei lo tatou manatunatu i le mea na taʻua e Tavita ina ua ia salamō i le la agasala matuiā ma Patesepa: “Le Atua e, e te lē inosia le loto momomo ma le nutimomoia.” (Sala. 51:17) Na matuā salamō moni Tavita, ma na ia iloa e mafai ona ia faalatalata atu i le Atua ma e mautinoa na te faamagaloina o ia. Na faataʻitaʻi mai e Iesu faalogona alofa o Ieova. Sa faatatau atu e le tusitala Evagelia o Mataio upu a Isaia iā Iesu: “E na te lē nutimomomoina se ū ua vaivai, pe tineia se vavae ua mū itiiti.” (Mata. 12:20; Isa. 42:3) A o iai Iesu i le lalolagi, sa ia alofa atu i ē ua faatauvaa ma lotomafatia. E na te leʻi tineia si aloiafi o le ola o ē sa pei o se vavae o le molī ua toeitiiti uma le suāuu. Nai lo lenā, sa ia faapelepeleina ē ua mafatia ina ia toe maua le ola. O le mea lenā sa faia e Iesu a o iai i le lalolagi. E te silafia, o loo faaauau pea ona faia faapea e Iesu e ala i lona tigā alofa faatasi ma oe i ou vaivaiga? Mātau le Eperu 4:15 lea o loo faaalia mai ai e faapea, o Ia o lē e mafai ona “tigā alofa faatasi ma i tatou i o tatou vaivaiga.”

Ina ua ia tusi e faatatau i le “mea matuitui i le tino,” na iloa ai e Paulo le mana o Keriso sa pei o se “faleʻie” i ona luga. (2 Kori. 12:7-9) Sa ia maua le puipuiga a Ieova e ala mai i le Keriso, e pei lava o se tagata o loo i totonu o se faleʻie na te lagona le saogalemu mai le matagi. I le pei o Paulo, tatou te lē mananaʻo e lolo atu i o tatou vaivaiga ma faafitauli. Ina ia tumau pea ona tatou malolosi faaleagaga, e ao ona tatou faaaogā sauniuniga uma o loo foaʻi mai e Ieova e ala i lana faalapotopotoga i le lalolagi. E mafai ona tatou faia mea uma e gata ai lo tatou malosi, ona vaai atu lea ma le mautinoa iā Ieova na te taʻitaʻia o tatou ala. Pe a tatou iloa e mafai e le mana o le Atua ona fesoasoani i o tatou vaivaiga, o le a tatou faapea atu pei ona taʻua e Paulo: “Pe a ou vaivai, ona ou malosi ai lea.”—2 Kori. 12:10.

[Ata i le itulau 3]

Sa faaauau pea ona tatalo Paulo iā Ieova ina ia fesoasoani iā te ia e fai lona finagalo

[Ata i le itulau 5]

Sa tuu atu e le tupu o Tavita le faatuatuaga iā Ioapo e vaaia le ʻautau

[Ata i le itulau 5]

Sa gaoioi Ioapo e fasiotia lona fili faatautavā o Amase

[Ata i le itulau 6]

E aumaia e toeaina taʻitaʻiga mai le Tusi Paia lea e fesoasoani ina ia tatou onosaia ai faafitauli