O Loo Ola le Afioga a Ieova

Manatu Tāua Mai le Tusi na Tusia mo Kerisiano i Roma

I LE pe tusa o le 56 T.A., a o iai i lana malaga faamisionare lona tolu, na taunuu ai le aposetolo o Paulo i le aai o Korinito. Ua ia iloa ai le eseesega o manatu o tagata Iutaia ma Kerisiano mai Nuu Ese i Roma. Ona o lona faanaunauga ina ia latou autasi uma iā Keriso, na aʻe ai se tofā iā Paulo e tusi atu se tusi iā i latou.

I lenā tusi i tagata Roma, na faamalamalama ai le auala e taʻuamiotonuina ai tagata, ma le auala e tatau ona ola ai ia ituaiga tagata. E faalolotoina e lenā tusi lo tatou iloa e uiga i le Atua ma lana Afioga, faamamafa mai ai le agalelei faifua o le Atua, ma faamamalu ai le matafaioi a Iesu i lo tatou faaolataga.—Epe. 4:12.

TAʻUAMIOTONUINA—E FAAPEFEA?

(Roma 1:1–11:36)

Na tusi Paulo e faapea, “Ua agasala tagata uma lava, ma ua lē ausia le mamalu o le Atua, ma o se meaalofa foaʻi fua le taʻuamiotonuina o i latou i lona [Atua] agalelei faifua, ma ua faasaʻolotoina ai e ala i le togiola a Keriso Iesu.” Ua faapea atili mai Paulo: “Ua taʻuamiotonuina le tagata i le faatuatua ae lē o galuega o le tulafono.” (Roma 3:23, 24, 28) Ona o le faatuatua i le “amiotonu a le tagata e toʻatasi,” ua mafai ai ona “taʻuamiotonuina” Kerisiano faauuina ma sui o le “motu o tagata e toʻatele” po o “isi mamoe,” ma o le a pule faatasi Kerisiano faauuina ma Keriso i le lagi ae avea le motu o tagata e toʻatele ma uō a le Atua, ma o loo latou tulimataʻia lo latou faasaoina mai le “puapuaga tele.”—Roma 5:18; Faaa. 7:9, 14; Ioa. 10:16; Iako. 2:21-24; Mata. 25:46.

Na fesili Paulo: “Pe e tatou te faia ea se agasala ona ua tatou lē nonofo i le tulafono, a o le agalelei faifua?” Ona ia tali mai lea, “Ia aua lava neʻi faapea!” Na faamalamalama mai e Paulo, ‘⁠O outou o pologa . . . , a lē o le agasala e iʻu ai i le oti, po o le usiusitai e iʻu ai i le amiotonu.’ (Roma 6:15, 16) Na ia faapea mai, “Afai tou te faaumatia galuega a le tino e ala i le agaga, e ola ai outou.”—Roma 8:13.

Taliina o Fesili Faale-Tusi Paia:

1:24-32—Pe na faasino atu amioga lē mamā o loo faamatala i inei i tagata Iutaia po o tagata o Nuu Ese? E ui e fetaui lenei faamatalaga i nei ituaiga tagata e lua, ae na faasino patino atu Paulo i tagata Isaraelu anamua o ē na fulitua i le tapuaʻiga moni. E ui na latou iloa tapulaa amiotonu a le Atua, ae “latou te leʻi mananaʻo e iloa lelei le Atua.” O i latou la o ni tagata amioleaga.

3:24, 25—E faapefea i le “togiola a Keriso Iesu” ona ufiufi ai “agasala ua mavae” po o agasala sa fai a o leʻi saunia le togiola? O le uluaʻi valoaga e faatatau i le Mesia, lea o loo faamauina i le Kenese 3:15, na faataunuuina i le 33 T.A. ina ua fasiotia Iesu i luga o le laau e faapuapuagatia ai. (Kala. 3:13, 16) Peitaʻi, o le taimi lava na fetalai ai Ieova i lenā valoaga, na tai pei lava ua uma ona totogi, auā e leai ma se mea e mafai ona taofia fuafuaga a le Atua. E faavae la i le togiola a Iesu Keriso lea o le a faia mulimuli ane ai, o le a mafai ai e Ieova ona faamagalo suli o Atamu e faatuatua i lenā folafolaga. Ona o le togiola, ua mafai ai foʻi ona toe faatutūina i latou na maliliu a o lumanaʻi le faa-Kerisiano.—Galu. 24:15.

6:3-5—O le ā le uiga o le papatisoina iā Keriso Iesu ma le papatisoina i lona maliu? Ina ua faauuina e Ieova i latou na mulimuli iā Keriso i le agaga paia, ua latou autasi ai ma Iesu ma avea i latou ma vaega o le faapotopotoga po o le tino o Keriso, auā o ia o le Ulu. (1 Kori. 12:12, 13, 27; Kolo. 1:18) E tusa o lea ua latou papatisoina iā Keriso Iesu. E “papatiso i lona [Iesu] maliu” Kerisiano faauuina, i lo latou ola  lea i se olaga faataulagaina ma faafitia lo latou faamoemoe o le ola e faavavau i le lalolagi. O lea la, o lo latou oti, e faataulagaina e pei o le maliu o Iesu, e ui e leai se aogā e pei o se togiola. E māeʻa lenei papatisoga i le maliu o Keriso pe a latou maliliu ma toe faatūina i le olaga i le lagi.

7:8-11—E faapefea ona faatupu e le agasala lenei poloaʻiga? Na fesoasoani le tulafono i tagata e malamalama lelei ai i le mea e taʻu o le agasala, ma latou amanaʻia ai lo latou tulaga agasala. Ua latou iloa ai isi auala e tele o loo latou agasala ai, ma ua iloa ai foʻi e nisi a latou agasala o loo fai. O lea la, ua faapea ai ua faatupu e le agasala lenei poloaʻiga ona o le Tulafono.

Lesona mo i Tatou:

1:14, 15. E tele māfuaaga tatou te talaʻia ai ma le maelega le tala lelei. O se tasi o māfuaaga ona o loo tatou nofo aitalafu iā i latou na faatauina i le toto o Iesu, ma o la tatou matafaioi o le fesoasoani atu lea i lo latou itu faaleagaga.

1:18-20. O i latou e lē amio Atua ma e amiolētonu e “lē mautali,” auā o loo atagia mai i foafoaga uiga lē vaaia o le Atua.

2:28; 3:1, 2; 7:6, 7. Pe a māeʻa ona faia e Paulo ni faamatalaga e foliga mai e tausuai ai tagata Iutaia, e na te faia ni faamatalaga e logolelei. O se faaaʻoaʻoga lelei lea mo i tatou i le auala e taulima ai mataupu maʻaleʻale i se auala faautauta ma le filemu.

3:4. Pe a feteenaʻi manatu o tagata ma fetalaiga a le Atua o i lana Afioga, tatou te “tuu atu le faamaoni i le Atua” e ala i le talitonu i le feʻau o loo i le Tusi Paia, ma gaoioi e tusa ma le finagalo o le Atua. E ala i le faia o se sao maelega i le galuega o le talaʻia o le Malo ma le faia o soo, ua mafai ai ona tatou fesoasoani i isi ia manatu e moni le Atua.

4:9-12. Ua leva ona taʻua Aperaamo e amiotonu ona o lona faatuatua, ae leʻi taitai peritomeina o ia i le 99 o ona tausaga. (Kene. 12:4; 15:6; 16:3; 17:1, 9, 10) I lenā auala mataʻina, na faaalia mai ai e le Atua le auala e amiotonu ai le tagata i lana silafaga.

4:18. O se vala tāua o le faatuatua le iai o se faamoemoe, auā e faavae lo tatou faatuatua i le faamoemoe.—Epe. 11:1.

5:18, 19. E ala i le faasolosolo lelei ona faamalamalama mea e taitutusa ai Iesu iā Atamu, na taʻua ai e Paulo le māfuaaga e mafai ai e se tagata e toʻatasi ona “foaʻi atu lona ola e fai ma togiola e sui aʻi tagata e toʻatele.” (Mata. 20:28) O le faasolosolo lelei ma le faapuupuu, o ni tomai lelei tele i le aʻoaʻo atu.—1 Kori. 4:17.

7:23. O vaega o le tino e pei o o tatou lima, vae, ma le laulaufaiva, e mafai ona ‘faapologaina ai i tatou i le tulafono a le agasala,’ e ao la ona tatou pulea lelei nei vaega.

8:26, 27. Pe a tatou oo i se tulaga faigatā ma ua tatou lē iloa se mea e tatalo ai, e “ʻaiʻoi atu le agaga mo i tatou.” Ona o Ieova o le “Faafofoga tatalo,” e na te taliaina tatalo o loo tusia i lana Afioga e mai iā i tatou.—Sala. 65:2.

8:38, 39. E lē mafai ona taofia le alofa o Ieova mo i tatou ona o mala, agaga leaga, ma faigāmalo a tagata; ma e lē tatau foʻi ona taofia ai i tatou mai le alolofa atu iā te ia.

9:22-28; 11:1, 5, 17-26. O le tele o valoaga e faasino atu i le toe atiina aʻe o Isaraelu, o loo faataunuuina e le faapotopotoga o Kerisiano faauuina, lea o ona sui “o ē ua ia valaauina, e lē mai na o tagata Iutaia, ae atoa foʻi ma nuu ese.”

10:10, 13, 14. Ona o lo tatou alofa mo le Atua ma o tatou tuaoi, o le faatuatua malosi iā Ieova ma ana folafolaga e mafai ona uunaʻia ai i tatou e fai se sao maelega i le auaunaga faa-Kerisiano.

11:16-24, 33. E mataʻina le paleni o le “agalelei ma le toʻasā o le Atua”! Ioe, “o le Papa, e sao lava lana galuega; auā e tonu ona ala uma lava.”—Teu. 32:4.

OLA E TUSA MA LE TAʻUAMIOTONUINA

(Roma 12:1–16:27)

Na faapea mai Paulo, “O lenei le ʻauuso e, ou te ʻaiʻoi atu iā te outou i le alofa mutimutivale  o le Atua, ia tuuina atu o outou tino o le taulaga ola, e paia, ma e mālie i le Atua.” (Roma 12:1) O le faaupuga “o lenei,” ia pe a fua foʻi i le manatu, ua taʻuamiotonuina Kerisiano ona o lo latou faatuatua, e tatau la ona aafia ai la latou vaaiga iā i latou lava, o isi, ma pulega a malo i upu a Paulo ia e sosoo mai ai.

Na timaʻi mai Paulo, “Ou te fai atu ai iā te outou taʻitoʻatasi, ina ia aua neʻi faasili le manatu o se tasi iā te ia lava. . . Aua tou te faatagā alofa.” (Roma 12:3, 9) “Ia gauaʻi tagata uma i faipule silisili.” (Roma 13:1) I mataupu e fitoitonu i le lotofuatiaifo, na ia faalaeiauina Kerisiano ‘e aua le toe faamasinosino se tasi i le isi.’—Roma 14:13.

Taliina o Fesili Faale-Tusi Paia:

12:20—E faapefea ona tatou ‘⁠faaputu malala ola’ i luga o le ulu o le fili? I vaitaimi o le Tusi Paia, sa tuuina auro i totonu o se ogaumu ma sa tuuina malala i luga ma lalo o le ogaumu. E fesoasoani le aasa i luga e liusuavai ai le uʻamea ma aveese ai otaota. I se tulaga talitutusa, tatou te tuuina malala ola i luga o le ulu o le fili, ma o le faia o ni gaoioiga lelei mo ia, o le a liusuavai ai ona uiga faaulumalō ae aliali mai ona uiga lelei.

12:21—E faapefea ona tatou “faatoʻilaloina pea le leaga i le lelei”? O se tasi o auala e fai ai lenei mea, o le tausisi lea ma le lē fefe i la tatou galuega mai le Atua o le talaʻia lea o le tala lelei o le Malo, seʻia malie le finagalo o Ieova.—Mare. 13:10.

13:1—E faapefea ona “faataga e le Atua [faipule silisili] e pule i o latou tulaga eseese”? Ua “faataga e le Atua” faipule silisili “e pule i o latou tulaga eseese” i le faatinoina lea o la latou pule i lalo o le faatagaga a le Atua, ma o nisi taimi e muaʻi silafia mai e le Atua a latou pulega. E moni lenei tulaga i mea na valoia e le Tusi Paia e faatatau i nisi tupu.

Lesona mo i Tatou:

12:17, 19. O le toe taui atu i le leaga o lona uiga ua tatou faia le taui ma sui, ae lē taatia atu i aao o Ieova. Ua iloa ai i inā lo tatou faamaualuga pe a tatou “taui atu le leaga i le leaga”!

14:14, 15. E lē tatau ona tigā pe tausuai so tatou uso ona o meaʻai po o vaiinu na tatou ave i ai.

14:17. E lē faalagolago se faiā lelei a se tasi ma le Atua i mea e ʻai po o vaiinu, po o mea e filifili se tasi e ʻai pe inu ai. Nai lo lea, e tāua le iai o le amiotonu, filemu, ma le olioli.

15:7. E tatau ona tatou talia ma le lē faailogatagata i totonu o le faapotopotoga, i latou uma o loo saʻili ma le faamaoni i le upu moni, ma faalauiloa atu le feʻau o le Malo i so o se tasi tatou te feiloaʻi i ai.

[Ata i le itulau 31]

Pe mafai ona aogā le togiola i agasala na faia a o leʻi saunia le togiola?