O Uiga e Ao Ona Tatou Sa‘ilia
O Uiga e Ao Ona Tatou Saʻilia
“Ia saʻili le amiotonu, le faamaoni i le Atua, le faatuatua, le alofa, le tumau ma le agamalu.”—1 TIMO. 6:11.
1. Faataʻitaʻi le uiga o le upu “saʻili” po o le tuliloa?
O LE ā e oso mai i lou mafaufau pe a e faalogo i le upu “saʻili” lea i nisi taimi e faaaogā le faaupuga tuliloa? Atonu e te mafaufau i le taimi o Mose ina ua saʻili atu pe ‘tuliloa atu,’ e ʻautau a Aikupito ia Isaraelu, ae na malaia ai i le Sami Ulaula. (Eso. 14:23) Po o lou mafaufau foʻi i le mataʻutia o le tulaga e oo i ai se tagata fasioti tagata paʻivalea i Isaraelu anamua. Sa tatau ona taumafai e oo vave atu, i se tasi o aai e ono o le sulufaʻiga sa faatulaga e sola i ai le tagata fasioti tagata paʻivalea. E ao ona faia lea gaoioiga auā o loo “tuliloaina le fasioti tagata e lē na te taui ma sui le toto, a o tigā lona loto, ma maua atu iā te ia . . . ona fasioti ai lea iā te ia.”—Teu. 19:6.
2. (a) O le ā le taui ua valaaulia e le Atua nisi Kerisiano e saʻilia? (e) O le ā le faamoemoe ua ofoina mai e Ieova mo le toʻatele o Kerisiano i aso nei?
2 I le tuufaafeagai ma faataʻitaʻiga faale-Tusi Paia e pei ona taʻua, ia manatu i le uiga lelei sa i le aposetolo o Paulo: “Ua ou tausinio i le sini, o le taui lea o le valaau faalelagi mai le Atua, e ala iā Keriso Iesu.” (Fili. 3:14) Ua faaalia i le Tusi Paia faapea e 144,000 le aofaʻi o Kerisiano faauuina e aofia ai ma Paulo, ua latou maua le taui o le ola i le lagi. O le a latou pule faatasi ma Iesu Keriso i lana Pulega o le Afe tausaga agaʻi mai i le lalolagi. Maʻeu se sini matagofie ua valaaulia e le Atua i latou e saʻilia! Ae peitaʻi, o le toʻatele o Kerisiano moni i aso nei, e ese lo latou faamoemoe, po o le sini. Ua ofo mai ma le alofa e Ieova iā i latou le mea na leiloa iā Atamu ma Eva, o le faamoemoe lea o le ola e faavavau i le soifua mālōlōina atoatoa lelei i se lalolagi parataiso.—Faaa. 7:4, 9; 21:1-4.
3. E faapefea ona tatou faaalia le talisapaia o le agalelei fai fua o le Atua?
3 E lē mafai e tagata agasala ona maua le ola e faavavau i a latou lava taumafaiga e fai le mea ua tonu. (Isa. 64:6) E faatoʻā mafai ona maua le ola e faavavau, e ala i le faatuatua i sauniuniga alofa a le Atua mo le faaolataga e ala iā Iesu Keriso. O le ā e tatou te fai e faaalia ai lo tatou talisapaia o le agalelei fai fua o le Atua? O se tasi o mea e ao ona fai, o le usiusitai lea i lana faatonuga: “Ia saʻili le amiotonu, le faamaoni i le Atua, le faatuatua, le alofa, le tumau ma le agamalu.” (1 Timo. 6:11) O le manatunatu i nei uiga, e ono fesoasoani iā i tatou e maumauaʻi ai pea e “saga” saʻilia na uiga.—1 Tesa. 4:1.
“Saʻili le Amiotonu”
4. Aiseā e tatou te mautinoa ai o le saʻilia o le “amiotonu” e tāua tele, ma o ā uluaʻi laasaga e ao ona faia e se tagata?
4 I tusi e lua a le aposetolo o Paulo iā Timoteo, na ia lisi ai uiga e ao ona saʻilia, ma i taimi taʻitasi, na ia taʻua muamua ai le “amiotonu.” (1 Timo. 6:11; 2 Timo. 2:22) E lē gata i lea, i isi fuaitau o le Tusi Paia o loo ia faalaeiauina e lē aunoa i tatou e saʻili le amiotonu. (Faata. 15:9; 21:21; Isa. 51:1) O se auala e amata ai ona faia faapea o le ‘iloa lelei o le Atua moni e toʻatasi, atoa ma Iesu Keriso, o lē na ia auina mai.’ (Ioa. 17:3) O le saʻilia o le amiotonu o le a uunaʻia ai se tagata e fai se gaoioiga—e salamō mai agasala na fai i aso ua teʻa ma “liliu” ese ina ia fai le finagalo o le Atua.—Galu. 3:19.
5. O le ā e ao ona tatou fai ina ia maua ma tumau ai i se tulaga amiotonu ma le Atua?
5 O le toʻatele o loo saʻilia moni le amiotonu, ua tuuina atu o latou ola iā Ieova, ma faailogaina lo latou tuuina atu e ala i le papatisoga i le vai. Pe afai o oe o se Kerisiano ua papatiso, po ua e mafaufau ma amanaʻia le mea moni, o le auala e te ola ai, e ono faaalia ai o loo faaauau pea ona e saʻilia le amiotonu? O se tasi o vala i le faia o lenā tulaga, o lou iloa lea mai le Tusi Paia o le mea e “saʻo ma le mea sesē” pe a feagai ma filifiliga o le olaga. (Faitau le Eperu 5:14.) O se faataʻitaʻiga, pe afai o oe o se Kerisiano nofofua ua i tausaga e mafai ai ona e faaipoipo, po ua e filifili atoatoa i lou loto e ʻalofia le alofa faananau atu i so o se tasi e lē o se Kerisiano papatiso? O lou faia faapea, o lona uiga, o loo e saʻilia le amiotonu.—1 Kori. 7:39.
6. O le ā e aofia ai i le saʻilia moni o le amiotonu?
6 O le amiotonu e ese mai le faafiaamiotonu po o le “amiotonu naʻuā.” (Fai. 7:16) Ua lapataʻi mai Iesu i le faia o lea ituaiga o amiotonu ina ia foliga atu ai e sili oe i lo isi. (Mata. 6:1) O le saʻilia moni o le amiotonu e aofia ai le loto—le faasaʻoina o mafaufauga sesē, uiga, uunaʻiga o le loto, ma faanaunauga. Pe afai e faaauau ona tatou faia lenei mea, e tatou te ono lē faia ai se agasala matuiā. (Faitau le Faataoto 4:23; faatusatusa i le Iakopo 1:14, 15.) E lē gata i lea, o le a faamanuia Ieova iā i tatou ma fesoasoani iā i tatou i lo tatou saʻilia o isi uiga tāua faa-Kerisiano.
“Saʻili . . . le Faamaoni i le Atua”
7. O le ā le “faamaoni i le Atua”?
7 O le faamaoni e aofia ai le naunau e tuuina atu oe i le Atua ma tuu atu lou faatuatuaga iā te ia. Na taʻua e se tasi o lomifefiloi o le Tusi Paia faapea, o le upu Eleni e faaliliu i le “faamaoni i le Atua” e faamatalaina ai “le lelei ma le faaeteete e aua neʻi faatagaina se mea e faavaivaia ai lo tatou mataʻu i le Atua.” Sa masani ona lē taulau tagata Isaraelu e faaalia lenā faamaoni, e pei ona iloa i lo latou lē usiusitaʻi, e ui lava ina ua uma ona faasaʻoloto i latou e le Atua mai Aikupito.
8. (a) O le ā le fesili na lāgā ona ua agasala Atamu? (e) Na faapefea ona faaalia le tali i lenei “mea lilo”?
8 Mo le faitau afe o tausaga talu ona agasala le tagata lelei atoatoa o Atamu, na lāgā ai le fesili lenei, “Pe mafai e se tagata ona faaalia le faamaoni atoatoa i le Atua?” Mo le faitau senituri, e leai ma se tagata na mafai ona ola i se olaga e faamaoni atoatoa atu i le Atua. Ae i lana lava taimi atofaina, na faaalia ai e Ieova le tali i lenei “mea lilo.” Na ia faaliliuina le ola o lona Alo pele e toʻatasi i le manava o Maria ina ia fanau mai o se tagata e lelei atoatoa. I lona soifuaga atoa i le lalolagi e aofia ai ma lona maliu faalumaina, na faaalia ai e Iesu le uiga o le tuuina atu atoatoa ma faamaoni atoatoa atu i le Atua. Na faaalia i ana tatalo lona āva i lona Tamā i le lagi. (Mata. 11:25; Ioa. 12:27, 28) O le ala lea, na faagaeeina ai e Ieova Paulo e taʻua le “faamaoni i le Atua” i le faamatalaina o le auala na soifua ai Iesu.—Faitau le 1 Timoteo 3:16.
9. E faapefea ona tatou saʻilia le faamaoni i le Atua?
9 I lo tatou lava tulaga agasala, e lē mafai ona tatou faaalia le faamaoni atoatoa i le Atua. Ae e mafai ona tatou saʻilia. E manaʻomia ai ona tatou mulimulituʻi i le faaaʻoaʻoga na faataatia e Keriso. (1 Pete. 2:21) O lea la, e tatou te lē pei o tagata faafiaamiotonu “o ē foliga mai e faamaoni i le Atua, ae latou te lē o ola e tusa ai ma lea mana.” (2 Timo. 3:5) E lē o le uiga o lea mea faapea, o le faamaoni i le Atua e lē o iai sana sootaga i foliga vaaia atu i fafo. E mautinoa o le tulaga lenā. O se faataʻitaʻiga, po o le filifilia o se ofu faaipoipo po o le filifili po o le ā le ofu e ofu pe a alu e fai se faatau, e ao lava i o tatou foliga vaaia ona talafeagai ma lo tatou tulaga “matataʻu i le Atua.” (1 Timo. 2:9, 10) Ioe, o le saʻilia o le faamaoni i le Atua e manaʻomia ai lo tatou amanaʻiaina o tapulaa amiotonu a le Atua i o tatou olaga.
“Saʻili . . . le Faatuatua”
10. O le ā e ao ona tatou fai ina ia malosi ai lo tatou faatuatua?
10 Faitau le Roma 10:17. Ina ia ati aʻe ma faatumau se faatuatua malosi, e ao ona faaauau ona manatunatu loloto se Kerisiano i upu moni tāua o loo i le Afioga a le Atua. Ua saunia mai e le “pologa faamaoni ma le faautauta” le tele o lomiga talafeagai. E tolu tusi sili ona lelei, Le Tagata Silisili o Ē Uma na Soifua Mai, Ia Faalogo i le Faiaʻoga Sili, ma le “Come Be My Follower,” ua faia ina ia fesoasoani iā i tatou e iloa lelei ai Keriso ma mafai ai ona faaaʻoaʻo atu iā te ia. (Mata. 24:45-47) Ua faatulaga foʻi e le vasega o le pologa ia sauniga, fonotaga, ma tauaofiaga, ma o le tele lava o na polokalame o loo faamatilatila ai ‘le upu e uiga iā Keriso.’ O lea la, po o e iloa nisi auala e te faaaogā lelei ai nei sauniuniga ma “matuā uaʻi atu i mea” ua saunia mai e le Atua?—Epe. 2:1.
11. O le ā le matafaioi a le tatalo ma le usiusitai i lo tatou saʻilia o le faatuatua?
Luka 17:5) Ina ia tupu tele le faatuatua, e ao ona tatou tatalo mo le fesoasoani a le agaga paia o le Atua; ma o le faatuatua o se tasi lea o vala o “fua o le agaga.” (Kala. 5:22) E lē gata i lea, o le usiusitai i faatonuga a le Atua e faamalosia ai lo tatou faatuatua. O se faataʻitaʻiga, o le faateleina o so tatou sao i le galuega talaʻi. O le faia faapea, e ono tele so tatou fiafia e maua mai ai. Afai e tatou te mafaufau i faamanuiaga e aumaia e le “saʻili muamua [o] le malo ma le amiotonu a le Atua,” o le a oo ina tupu aʻe lo tatou faatuatua.—Mata. 6:33.
11 O le tatalo o le isi lea fesoasoani e ati aʻe ai se faatuatua malosi. Na iai se taimi na ʻaiʻoi atu ai soo o Iesu iā te ia: “Ia e faatuputeleina lo matou faatuatua.” E mafai foʻi ona tatou ōle atu faapena ma le lotomaulalo i le Atua. (“Saʻili . . . le Alofa”
12, 13. (a) O le ā le poloaʻiga fou a Iesu? (e) O ā auala tāua e ao ona tatou saʻilia ai le alofa e pei o le alofa o Keriso?
12 Faitau le 1 Timoteo 5:1, 2. Na avatu e Paulo fautuaga aogā i le auala e faaalia ai e Kerisiano le alofa o le tasi i le isi. O lo tatou faamaoni i le Atua e tatau ona aofia ai le usitai i le poloaʻiga fou a Iesu, “ia outou fealofani” e pei ona ia alofa mai iā i tatou. (Ioa. 13: 34) Na taʻua e le aposetolo o Ioane e faapea: “A o sē ua tele ana meafaitino i lenei lalolagi ma ua vaai atu i lona uso ua lē tagolima o ia, a ua lē faaalia e ia le alofa faapelepele iā te ia, pe faapefea la ona tumau iā te ia le alofa o le Atua?” (1 Ioa. 3:17) Pe e te manatua ni mea na tutupu na e faaalia ai le alofa i se auala talafeagai?
13 O le isi auala e tatou te saʻilia ai le alofa, o le faamagalo atu ae lē o le faaputuputu o mea e te lē fiafia ai i o tatou uso. (Faitau le 1 Ioane 4:20.) Nai lo o le faia faapea, e tatou te mananaʻo e mulimulituʻi i le fautuaga lenei: “Ia faaauau ona onosai le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia.” (Kolo. 3:13) Po o iai se tasi i le faapotopotoga e mafai ona e faatatauina i ai lenei fautuaga? Po o le a e faamagalo ea o ia?
“Saʻili . . . le Tumau”
14. O le ā e tatou te aʻoaʻoina mai le faapotopotoga i Filatelefaia?
14 E mafai ona tatou faia le mea sili e faataunuu ai so tatou sini mo se taimi puupuu, ae e ese lenā mai le sini e faigatā ona faataunuu, ia po o le umi foʻi nai lo le mea na tatou faatalitalia. O le mea moni, o le saʻilia o le sini o le ola e faavavau e manaʻomia ai le tumau. Na taʻu atu e le Alii o Iesu i le faapotopotoga i Filatelefaia e faapea: “Auā ua e tausia le upu e uiga i loʻu tumau, ou te tausia foʻi oe i le taimi o tofotofoga.” (Faaa. 3:10) O le mea moni, na aʻoaʻo e Iesu le manaʻomia ona tumau—o se uiga e fesoasoani iā i tatou e aua le faavaivai pe a feagai ma puapuaga ma tofotofoga. Sa tatau ona faaalia e uso i le faapotopotoga i Filatelefaia i le uluaʻi senituri lo latou tumau, a o feagai ai ma le tele o tofotofoga o le faatuatua. O lea la, na faamautinoa atu e Iesu iā i latou le isi fesoasoani i le tofotofoga tele o lumanaʻi ai.—Luka 16:10.
15. O le ā na aʻoaʻo e Iesu e faatatau i le tumau?
15 Na silafia e Iesu o le a inosia ona soo e o latou aiga lē talitonu ma tagata lautele, o lea a itiiti mai e lua ni mea na tutupu na ia faalaeiau ai i latou i le auala lenei: “A o lē e tumau seʻia oo i le iʻuga, e faaolaina o ia.” (Mata. 10:22; 24:13) Na faaalia foʻi e Iesu le auala e maua ai e ona soo i lenā taimi le malosi e latou te manaʻomia e tumau ai. I se tasi o talafaatusa, na ia faatusa ai le eleele papa i tagata na latou “talia [le upu a le Atua] ma le olioli” ae na latou paʻuʻū ina ua latou feagai ma tofotofoga o le faatuatua. Ae peitaʻi, na ia faatusa ona soo faamaoni i le eleele lelei ona na latou “tausi” i le afioga a le Atua ma “ua fua mai, ma ua tumau.”—Luka 8:13, 15.
16. O le ā le sauniuniga alofa ua fesoasoani i le faitau miliona o tagata ina ia tumau?
16 Pe na e mātauina le auala e mafai ai ona tumau? E ao ona tatou “tausi” le afioga a le Atua, ma ia ola pea i o tatou loto ma manatu. O le mauaina o le faaliliuga o le Tusi Paia o le Lalolagi Fou—o se faaliliuga e saʻo lelei, faigofie ona faitau, ma ua mafai ona maua i le tele o gagana ua faigofie ai ona fai lenei mea. O lo tatou manatunatu loloto i se vaega o le Afioga a le Atua i aso uma, o le a fesoasoani iā i tatou e maua ai le malosi e manaʻomia e faaauau ai ona fua mai ma ia “tumau.”—Sala. 1:1, 2.
“Saʻili . . . le Agamalu” ma le Filemu
17. (a) Aiseā e tāua tele ai le “agamalu”? (e) Na faaalia faapefea e Iesu lona agamalu?
17 E leai se tasi e fiafia e tuuaʻia i se mea e na te leʻi faia. O le tulaga masani lava o tagata, o le tali atu ma le ita i ni tuuaʻiga lē tonu. Ae maʻeu se lelei o le faaalia o le “agamalu”! (Faitau le Faataoto 15:1.) E manaʻomia le lototele ina ia maua ai le agamalu e tali atu ai i tuuaʻiga lē tonu. Na faataatia e Iesu Keriso se faaaʻoaʻoga o lenei tulaga. “Ina ua upuleagaina o ia, e leʻi toe fai atu e ia ni upuleaga. Ina ua puapuagatia o ia, e leʻi faamataʻu atu, ae na ia tuuina atu pea o ia lava i lē e faamasinotonu.” (1 Pete. 2:23) E lē faapea o le a tatou faia le tulaga tonu lava na faia e Iesu e tusa ai ma lenei tulaga, ae pe e mafai ona tatou galulue e faaleleia lenei uiga i le tele e tatou te mafai ai?
18. (a) O le ā se mea lelei e mafai ona fai ona o le agamalu? (e) O le ā le isi uiga ua uunaʻia i tatou e saʻilia?
18 Ina ia faataʻitaʻi iā Iesu, seʻi tatou “nofo sauni pea e tali atu” i o tatou talitonuga, ma ia “faia faapea faatasi ma le agamalu ma le matuā faaaloalo lava.” (1 Pete. 3:15) O lo tatou agamalu e taofia ai le faia o ni taugāupu aasa ona o le eseese o manatu, e lē gata i tagata tatou te feiloaʻi i le talaʻiga ae faapea foʻi ma o tatou uso talitonu. (2 Timo. 2:24, 25) O le agamalu e fesoasoani iā i tatou e maua ai le filemu. Atonu o le pogai lenā i lana tusi lona lua iā Timoteo, na lisi atu ai e Paulo le “filemu” i uiga e ao ona saʻilia. (2 Timo. 2:22; faatusatusa i le 1 Timoteo 6:11.) Ioe, o le “filemu” o le isi lea uiga o loo uunaʻia i tatou e le Tusi Paia e saʻilia.—Sala. 34:14; Epe. 12:14.
19. I le māeʻa ai ona talanoaina uiga faa-Kerisiano e fitu, o le ā ua e naunau nei e saʻilia, ma aiseā?
19 O lea ua tatou talanoaina uiga faa-Kerisiano e fitu e ao ona saʻilia—o le amiotonu, faamaoni i le Atua, faatuatua, alofa, tumau, agamalu, ma le filemu. Maʻeu se faamanuiaga i faapotopotoga taʻitasi, pe a faia e uso ma tuafāfine ni taumafaiga e faaalia atoatoa ai nei uiga tāua tele! O le faia faapea, o le a faaalia ai le āva iā Ieova ma tuu atu e na te suia i tatou mo lona viiga.
Manatu e Manatunatu Loloto i Ai
• O le ā e aofia ai i le saʻilia o le amiotonu ma le faamaoni i le Atua?
• O le ā e fesoasoani iā i tatou ia saʻilia le faatuatua ma le tumau?
• E faapefea e le alofa ona aafia ai a tatou feutagaʻiga ma isi?
• Aiseā e manaʻomia ai ona tatou saʻilia le agamalu ma le filemu?
[Fesili mo le Suʻesuʻega]
[Ata i le itulau 12]
Sa lapataʻia e Iesu ia aua le faaalia ni uiga faafiaamiotonu e faafiafia ai tagata
[Ata i le itulau 13]
E mafai ona tatou saʻilia le faatuatua i le manatunatu loloto i upu moni o le Afioga a le Atua
[Ata i le itulau 15]
E mafai ona tatou saʻilia le alofa ma le agamalu