O se Filifiliga Atamai

SA FIA auai ni tama talavou se toʻatolu i le tauaofiaga itumalo na faia i se tasi vaega o lo latou atunuu. Na faapefea ona latou oo i le mea na fai ai le tauaofiaga? Auā e toeitiiti 60 maila (90 kilomita) le mamao o le mea e fai ai, ma e lauleaga ma pefu le auala, ae e leai foʻi se taavale e ō ai. Sa latou taumafai e saʻili ni uilavilivae se tolu e ō ai, ae latou te leʻi maua ni uilavilivae talafeagai mo le malaga.

Na iloa e se toeaina i le latou faapotopotoga lo latou popolega, ona ia avatu lea o lana uilavilivae iā i latou, e ui e tuai ae o loo lelei pea. Na ia faamatala atu iā i latou le mea na latou faia ma isi uso i se isi taimi, ina ia oo ai i le tauaofiaga. Na fautuaina i latou e le toeaina e lelei pe a latou faaaogā le uilavilivae e tasi. O se filifiliga e foliga mai e faigofie ae o se luʻi mo i latou. Na faapefea ona ō nei uso i le uilavilivae e tasi?

Ina ia ʻalofia le vevela o le lā, na feiloaʻi nei uso talavou i le taeao pō lava ma uta uma a latou ato i le uilavilivae. Na vili e le uso muamua le uila ma muamua atu i luma, ae savavali televave atu le isi toʻalua e mulimuli i le uila. Pe tusa e tasi vae tolu o le maila (500 mita) le mamao ua oo ai le tagata muamua, ona taofi lea o le uila ma faalagolago i se laau. E na te faamautinoa ua tuu faalelei le uila i se mea e mafai ona iloa atu e isi uso e toʻalua o loo mulimuli mai ina ia aua neʻi gaoia. Ona faaauau pea lea ona ia savali i le auala.

Pe a taunuu atu le isi toʻalua i le mea o iai le uila, e tiʻetiʻe le isi ae faaauau pea ona savali le isi mo le isi tasi vae tolu o le maila (500 mita) a o leʻi oo i lona taimi e tiʻetiʻe ai. O lea la, o le fuafua lelei ma le maumauaʻi, na mafai ai e nei uso ona savavali i se mamao e 40 maila (60 kilomita) nai lo le 60 maila (90 kilomita) lea sa iai. Na matuā aogā a latou taumafaiga. Na latou feiloaʻi ma uso ma tuafāfine i le tauaofiaga, ma olioli faatasi i le mauaina o taumafa faaleagaga. (Teu. 31:12) I lenei tausaga, po o le a e faia mea uma e te mafai ina ia auai ai i le tauaofiaga itumalo i lo outou vaipanoa?