Pe na Uiga Atu Iesu i le Afi i Seoli?

O NISI o i latou e talitonu i le aʻoaʻoga i le afi i seoli, e latou te faasino atu i fetalaiga a Iesu o loo faamauina i le Mareko 9:48 (po o fuaiupu e 44, 46). Na ia taʻua anufe (po o ilo) e lē mamate ma le afi e lē mafai ona tineia. Pe a fesiligia oe e se tasi e faatatau i lenā fetalaiga, o le a faapefea ona e tali atu?

E faalagolago i le Tusi Paia o loo faaaogā, atonu e faitau e le tagata ia fuaiupu e 44, 46, po o le 48 auā e taitutusa nei fuaiupu i nisi o faaliliuga. * O loo faapea mai le Tusi Paia o le Lalolagi Fou: “Afai foʻi e te tausuai ona o lou mata, ia lafoaʻi auā e sili ona lelei o lou ulu atu i le malo o le Atua ma lou mata e tasi, nai lo o le lafoina o oe ma ou mata e lua i Kena, o le mea e lē mamate ai ilo ma e lē tineia foʻi le afi.”—Mareko 9:47, 48.

E pei ona masani ai, e faapea mai nisi o loo lagolago e fetalaiga a Iesu le manatu faapea, pe a mavae le oti e faapuapuagatia e faavavau agaga o ē amioleaga. O se faataʻitaʻiga, na faapea mai le faamatalaga a le tusi Sipaniolo o le Sagrada Biblia mai le Iunivesite o Navarre: “O loo faaaogā e lo tatou Alii [nei fetalaiga] e faasino atu ai i le faapuapuagatia i seoli. E masani lava, ‘o ilo e lē mamate’ e faasino atu i faanoanoaga o loo aafia ai i latou o loo i le afi i seoli; a o le ‘afi e lē mafai ona tineia,’ e faasino atu i tigā e oo i o latou tino.”

Ae ui i lea, ia faatusatusa fetalaiga a Iesu ma le fuaiupu mulimuli o le valoaga a Isaia. * E manino mai sa faasino saʻo atu Iesu i le mataupu e 66 o le Isaia. O loo aliali mai na faasino atu le perofeta i inā “i le ulufafo atu mai Ierusalema ma agaʻi atu i le Vanu o Hinoma (Kena), lea sa osi muamua ai taulaga tagata (Iere 7:31) ma na mulimuli ane avea ma nofoaga e lafoaʻi i ai otaota a le aai.” (The Jerome Biblical Commentary) O le manatu la e pei ona taʻua i le Isaia 66:24, e manino mai e lē o le faapuapuagatiaina o ni tagata; ae o loo faasino atu i tino o tagata oti. O loo faasino atu le lē mamate i ilo, ae lē o tagata o loo soifua po o se agaga e lē mafai ona oti. O le ā la le uiga o fetalaiga a Iesu?

Seʻi mātau le faamatalaga i le Mareko 9:48 i le tusi a le Katoliko o le El evangelio de Marcos. I le tusi lona lua o le Análisis lingüístico y comentario exegético: “[O loo] sii mai lenei fuaiupu mai le Isaia (66,24). O loo faamalamalama mai e le perofeta auala e lua e faatamaʻia ai tino o tagata oti: e ala i le tuu ia pala ma le susunuina . . . O le faaaogā faatasi o le upu ilo ma le afi o loo faamalosia ai le manatu o le faaumatiaga. . . . E malolosi ma e tumau aafiaga o nei mea, ‘e lē tineia, e lē mamate foʻi,’ e lē mafai ona sao mai ai. O lenei faamatalaga, e na o le pau mea o loo ola pea, o ilo ma le afi, e lē o tagata, ma la te faatoʻilaloina so o se mea e au i ai lo la malosi. O lea la, e lē o se faamatalaga o le faapuapuagatiaina e faavavau ae o le faaumatiaga aʻiaʻi, auā o le a lē toe iai se toetū, ma o le oti e faavavau lea mo i latou. O le [afi] o le faaataga lea o le faaumatiaga aʻiaʻi.”

So o se tagata e iloa o le Atua moni e alofa ma faamasinotonu, e tatau ona ia malamalama i le talafeagai o ia fetalaiga a Iesu. E leʻi faapea mai Iesu o le a faapuapuagatia e faavavau i latou o ē amioleaga. Nai lo lea, latou te ono oo i se tulaga e faaumatia aʻiaʻi ma lē maua ai le faamoemoe o le toetū.

[Faaopoopoga i lalo]