E te Lē Iloa po o Lē Fea e Manuia!

“O le taeao ia e lūlū ai au saito, aua foʻi le mapu lou lima i le afiafi; auā e te lē iloa po o lē fea e manuia.”—FAI. 11:6.

1. Aiseā e ofoofogia ma manino ai lo tatou faatauvaa, i le molimauina o le tuputupu aʻe o se laau?

E MANAʻOMIA i se faifaatoʻaga ona onosaʻi. (Iako. 5:7) Pe a uma ona totō le fatu, e manaʻomia ona faatalitali se faifaatoʻaga seʻia tupu aʻe ma ola. Afai e sologa lelei le tulaga o mea, ona amata loa lea ona pāpā fatu ma tātupu aʻe mai le eleele. Ona faasolo lava lea ona tupu ma avea ma laau e maua mai ai saito. Mulimuli ane, ua tatau i le faifaatoʻaga ona selesele le fanua. E matuā ofoofogia lava le mātauina o le tuputupu aʻe faavavega o se laau! E matuā manino ai foʻi lo tatou faatauvaa, i le faatusatusa atu i Lē na faapogaia lea tuputupu aʻe. E mafai ona tatou tausia lelei le fatu. E mafai foʻi ona tatou fesoasoani e faasūsū. Ae e na o le Atua e mafai ona ia faatupuina le fatu.—Faatusatusa i le 1 Korinito 3:6.

2. O ā manatu e faatatau i le tuputupu aʻe faaleagaga, na aʻoaʻo mai e Iesu i talafaatusa na talanoaina i le mataupu ua mavae?

² E pei ona taʻua i le mataupu ua mavae, sa faatusa e Iesu le galuega talaʻi o le Malo i le lūlūina e se faifaatoʻaga o ni fatu laau. I le talafaatusa i ituaiga eleele eseese, sa faamamafa ai e Iesu, e tusa lava pe lūlū e le faifaatoʻaga ni fatu lelei, ae e faalagolago i le tulaga o le loto o le tagata, pe faamata e tupu le fatu ma matua pe leai foʻi. (Mare. 4:3-9) I le talafaatusa i le tagata lūlū fatu lea na moe, sa faamatilatila ai e Iesu, e matuā lē iloa lava e le tagata galue fanua pe faapefea ona tuputupu aʻe le fatu. O le māfuaaga, ona e faalagolago le ola ma le tuputupu aʻe i le mana o le Atua, ae lē fua i taumafaiga a le tagata. (Mare. 4:26-29) Seʻi o tatou iloiloina nei, isi talafaatusa e tolu a Iesu—i le fatu o le sinapi, le mea faafefete, ma le upega fagota. *

Le Talafaatusa i le Fatu o le Sinapi

3, 4. O ā vala e tusa ai o le feʻau o le Malo, ua faamatilatila mai i le talafaatusa i le fatu o le sinapi?

³ Ua faamatilatila mai i le talafaatusa i le fatu o le sinapi, lea foʻi e faamauina i le Mareko mataupu e 4, ni mea se lua: muamua, o le faatelega mataʻina o tagata o loo tali mai i le feʻau o le Malo; ma lona lua, o le puipuiga o loo avatu iā i latou o ē ua taliaina le feʻau. Na fetalai Iesu: “O le ā se mea ua tatou faatusaina i ai le malo o le Atua, po o le ā se talafaatusa e tatou te faamatalaina ai? E pei o le fatu o le sinapi, i le taimi na lūlūina ai i le palapala, o se fatu e sili ona itiiti i lo o fatu uma i le laueleele — ae ina ua lūlūina, ua tupu aʻe e sili atu i lo o isi fualaau faisua, ma ua tutupu foʻi ona lālā tetele, ua ofaga i ai manufelelei o le lagi i lona paolo.”—Mare. 4:30-32.

⁴ Ua faaāta mai ai i inei le tuputupu aʻe o le “malo o le Atua,” e pei ona faamaonia i le salalau atu o le feʻau o le Malo, ma le faatuputeleina o le faapotopotoga Kerisiano mai le Penetekoso 33 T.A. ma faasolo mai ai. O le fatu o le sinapi o se fatu itiiti, e mafai ona fai ma ata o  se mea e matuā laʻitiiti lava. (Faatusatusa i le Luka 17:6.) Peitaʻi, mulimuli ane e ono oo atu le maualuga o le laau o le sinapi mai le 10 i le 15 futu, ma i ai ni ona lālā malolosi, ma oo ai lava ina avea ma laau.—Mata. 13:31, 32.

5. O le ā le faatelega na i ai i le faapotopotoga Kerisiano i le uluaʻi senituri?

⁵ Na amata ona tuputupu aʻe le faapotopotoga Kerisiano i se numera toʻaitiiti i le 33 T.A., ina ua faauuina i le agaga paia soo e tusa ma le 120. Ma e leʻi umi se taimi ae aofia ai i lenei faapotopotoga toʻaitiiti le faitau afe o tagata talitonu. (Faitau le Galuega 2:41; 4:4; 5:28; 6:7; 12:24; 19:20.) I totonu o le tolu sefulu tausaga ua mavae, ua matuā faatuputeleina le aofaʻi o ē galulue mo le seleselega, e pei ona sa fai atu ai le aposetolo o Paulo i le faapotopotoga i Kolose e faapea, ua ‘⁠talaʻiina atu le tala lelei i le lalolagi aoao.’ (Kolo. 1:23) Maʻeu se faatelega a mataʻina!

6, 7. (a) O le ā le faatelega ua i ai talu mai le 1914? (e) O le ā le isi faatelega o le a i ai?

⁶ Talu mai le taimi na faavaeina ai le Malo o le Atua i le lagi i le 1914, ua faalauteleina ai lālā o le “laau” o le sinapi i se tulaga e leʻi faatalitalia. Ua vaaia e tagata o le Atua le faataunuuina moni o le valoaga na faamauina e Isaia: “O le toʻaitiiti e fai ma toʻaafe, ma lē ua faatauvaa e fai ma nuu malosi.” (Isa. 60:22) E leʻi manatu le vaega toʻaitiiti o le ʻaufaauuina na auai i le galuega o le Malo i le senituri lona 20 e faapea, e oo ifo i le 2008 ua tusa ma le fitu miliona Molimau o le a auai i lenei galuega i le silia i le 230 atunuu. E moni lava o se faatelega lē mafaatusalia, e pei lava o le fatu o le sinapi i le talafaatusa a Iesu!

⁷ Ae pe na muta ai i inā le tuputupu aʻe? E leai. E sau le taimi o le a na o tagatānuu ai o le Malo o le Atua o le a nofoia le lalolagi. O i latou uma e tetee o le a tafiesea. O le a tupu lenei mea pe a faalaa mai le Alii o Ieova i mataupufai a le lalolagi, ae lē ona o ni taumafaiga a tagata. (Faitau le Tanielu 2:34, 35.) Ona tatou vāai loa lea i le faataunuuga mulimuli o se tasi o valoaga na faamauina e Isaia: “E tumu le lalolagi i le malamalama o Ieova, e pei ona ufitia o le iliti tai i le suāsami.”—Isa. 11:9.

8. (a) O ai ua faaāta mai e manulele i le talafaatusa a Iesu? (e) O ā mea ua puipuia mai ai i tatou e oo lava foʻi i aso nei?

⁸ Na fetalai Iesu e ofaga manulele o le lagi i le paolo o lenei Malo. O nei manulele e lē o faaāta mai ai fili o le Malo o ē o loo taumafai e ʻai le fatu lelei, e pei o manulele i le talafaatusa i le tagata na ia lūlū fatu i ituaiga eleele eseese. (Mare. 4:4) Nai lo lea, o manulele i le talafaatusa lenei o loo faaāta mai ai tagata loto faamaoni o ē o loo saʻili atu i le faapotopotoga Kerisiano mo le puipuiga. E oo lava foʻi i aso nei, o loo puipuia nei tagata mai masaniga e taofia ai i latou mai le mauaina o se faiā lelei ma le Atua, ma faiga lē mamā a lenei lalolagi. (Faatusatusa i le Isaia 32:1, 2.) Ua faapena foʻi ona faatusaina e Ieova le Malo o le Mesia i se laau, ma ia fetalai faavaloaga ai e faapea: “O le mauga maualuga o Isaraelu ou te totōina ai; e  tutupu ai la, ma fua mai, e avea foʻi ma arasi tele; e i ona lalo ifo o manu felelei uma e uiga eseese, latou te aofaga i le paolo o ona la.”—Eseki. 17:23.

Le Talafaatusa i le Mea Faafefete

9, 10. (a) O le ā le manatu na faamamafa e Iesu i lana talafaatusa i le mea faafefete? (e) O le ā e masani ona faaatagia mai e le mea faafefete i le Tusi Paia, ma o le ā le fesili e faatatau i le fetalaiga a Iesu i le mea faafefete, o le a tatou iloiloina?

⁹ E lē o taimi uma e iloa atu ai e mata o tagata le faagasologa o le tuputupu aʻe. Ua faamamafa e Iesu lenei manatu i lana talafaatusa o loo sosoo mai. Ua ia fetalai: “Ua faatusaina le malo i le lagi i se mea faafefete, na ave e se fafine ma natia i fua falaoamata tetele se tolu, seʻia oo ina fefete ai le paluga atoa.” (Mata. 13:33) O le ā ua faaāta mai e lenei mea faafefete, ma e faapefea ona fesootaʻi atu i le tuputupu aʻe o le Malo?

¹⁰ I le Tusi Paia, e masani ona faaaogā le mea faafefete e fai ma sui o le agasala. Sa faasino atu le aposetolo o Paulo i le mea faafefete, ina ua ia talanoa e faatatau i taaʻiga leaga a se tagata agasala i le faapotopotoga i Korinito anamua. (1 Kori. 5:6-8) Po o lona uiga sa faaaogā e Iesu le mea faafefete, e faaāta ai le tuputupu aʻe o se mea lē lelei?

11. Sa faapefea ona faaaogā i Isaraelu anamua le mea faafefete?

¹¹ A o leʻi taliina lenā fesili, e manaʻomia ona tatou mātauina ni mea moni autū se tolu. Muamua, e ui e leʻi faatagaina e Ieova ni mea faafefete i taimi o le tausamiga o le Paseka, ae e iai taimi sa ia talia ai taulaga na iai le mea faafefete. Sa faaaogā le mea faafefete e fesootaʻi atu ma taulaga faafetai, lea e ofo atu ai e lē e ana le taulaga lana taulaga, e faaalia atu ai lona loto faafetai iā Ieova mo le tele o ana faamanuiaga. O se tasi lenei o tausamiga sa sili ona olioli ai i latou sa auai ai.—Levi. 7:11-15.

12. O le ā tatou te aʻoaʻoina mai le auala o loo faaaogā ai i le Tusi Paia ia gagana faafaatusa po o se mea e faaāta mai ai se isi mea?

¹² Lona lua, e ui lava atonu o nisi taimi e faaaogā ai i le Tusi Paia se mea i se uiga lē lelei, ae i nisi taimi, atonu e faaaogā ai le mea lava lenā e faaāta mai ai se mea i se uiga lelei. O se faaaʻoaʻoga, i le 1 Peteru 5:8, ua faatusa ai e Iesu Satani i se leona, e faaatagia mai ai lona mataʻutia ma le sauā. Ae i le Faaaliga 5:5, o loo faatusa ai Iesu i se leona—“le Leona mai le ituaiga o Iuta.” Pe a fua i le manatu lona lua, o loo fai le leona ma faailoga o le faamasinotonu, e faia ma le lototele.

13. O le ā ua faaalia i le talafaatusa a Iesu i le mea faafefete, e tusa ai o le tuputupu aʻe faaleagaga?

¹³ Lona tolu, i le talafaatusa a Iesu, na te leʻi taʻua e faapea ua faaleagaina le paluga atoa i le mea faafefete, ma lē aogā atoa ai. Sa ia faasino atu i le auala masani e fai ai falaoa. Sa tuu e le fafine le mea faafefete i le paluga, ma mulimuli ane maua mai ai iʻuga lelei. Sa natia le mea faafefete i totonu o le paluga. O lona uiga, sa natia mai i le fafine pe na te leʻi iloa atu le faagasologa o le fefete lea na fefete ai le paluga atoa. Ua faamanatu mai e lenei mea iā i tatou le tagata lea sa ia lūlū fatu ona moe lea i le pō. Na fetalai Iesu na “tātupu ma ola le fatu ae na te leʻi iloa pe na faapefea ona tupu.” (Mare. 4:27) O se auala faigofie lenei e faataʻitaʻi mai ai, e lē mafai ona vaaia e mata le faagasologa o le tuputupu aʻe faaleagaga! Atonu tatou te lē vāai  i le amataga o le tuputupu aʻe, ae a o faagasolo taimi, o le a tatou mātauina ai iʻuga.

14. O le ā le vala o le galuega talaʻi ua faataʻitaʻia mai e le mea moni e faapea, ua fefete le paluga atoa i le mea faafefete?

¹⁴ E lē gata e lē vaaia e mata o tagata lenei tuputupu aʻe, ae o loo tupu foʻi i le lalolagi aoao. O se tasi lenei o vala na faamamafa mai i le talafaatusa i le mea faafefete. Ua fefete le paluga atoa i le mea faafefete, “ma natia i ni fua falaoamata tetele se tolu.” (Luka 13:21) I le pei o le mea faafefete, ua faatupulaʻia le aofaʻi o soo ona o le galuega talaʻi o le Malo, ma ua faalautele atu le talaʻiina o lenā Malo “i tuluʻiga uma o le lalolagi.” (Galu. 1:8; Mata. 24:14) O se faaeaga matagofie le faia o se sao i lenei faatelega mataʻina o le galuega o le Malo!

Le Upega Fagota

15, 16. (a) Ia faamatala puupuu mai le talafaatusa i le upega fagota. (e) O le ā ua faaāta mai e le upega fagota, ma o le ā le vala o le tuputupu aʻe o le Malo o loo faasino atu i ai lenei talafaatusa?

¹⁵ O le mea e sili ona tāua, e lē o le aofaʻi o i latou e faapea mai ua avea ma soo o Iesu Keriso, ae o lo latou tulaga o iai. O loo faasino atu Iesu i le vala lenei o le tuputupu aʻe o le Malo ina ua ia faia se isi talafaatusa, le tala e faatatau i le upega fagota. Na ia fetalai: “Ua faatusaina foʻi le malo o le lagi i se upega ua lafo i le vai ma maua mai ai ituaiga iʻa eseese.”—Mata. 13:47.

¹⁶ Ua aoaoina e le upega, lea e faaatagia ai le galuega talaʻi o le Malo, ituaiga iʻa eseese. Ua faapea mai atili Iesu: “Ina ua tumu [le upega], ona latou sisi aʻe lea ma toso atu i le auvai, ua nonofo i lalo ma latou tuu ese iʻa lelei i ola, ae lafoaʻi iʻa leaga. E faapena foʻi le iʻuga o faiga o mea a le lalolagi: e ō atu agelu ma tuueseese tagata amioleaga mai i tagata amiotonu, ma lafo i latou i le ogaumu aasa. O i inā e latou te tagiauē ai ma lilivau o latou nifo.”—Mata. 13:48-50.

17. O le ā le vaitaimi o loo faasino atu i ai le tuueseeseina, lea na taʻua i le talafaatusa i le upega fagota?

¹⁷ Po o faasino atu lenei tuueseeseina i le faamasinoga faaiʻu o mamoe ma ʻoti, lea na fetalai Iesu o le a tupu pe a afio mai o ia i lona mamalu? (Mata. 25:31-33) E leai. O le a faia lenā faamasinoga faaiʻu i le taimi o le afio mai o Iesu, a o faagasolo le puapuaga tele. O le eseesega la, o le tuueseeseina lea sa faasino atu i ai i le talafaatusa i le upega fagota, e tupu a o faagasolo “le iʻuga o faiga o mea a le lalolagi.” * O le taimi tonu lenei lea o loo tatou ola ma soifua ai—o aso e iʻu atu i le puapuaga tele. O faapefea la ona faataunuu i aso nei le galuega o le tuueseeseina?

18, 19. (a) O faapefea ona faatino i aso nei se galuega o le tuueseeseina? (e) O le ā le laasaga e tatau i tagata loto faamaoni uma ona fai? (Tagaʻi foʻi i le faaopoopoga pito i lalo i le itulau e 21.)

¹⁸ I le tulaga moni lava ia, e faitau miliona iʻa faafaatusa mai le sami o tagata ua tosina mai i le faapotopotoga a Ieova i aso nei. O nisi ua  auai i le Faamanatuga, o isi ua auai mai i a tatou sauniga, ae o isi o loo fiafia e suʻesuʻe le Tusi Paia. Ae po ua faamaonia ai ua avea i latou uma nei ma Kerisiano moni? Atonu ua ‘⁠sisi aʻe i latou ma toso atu i le auvai,’ ae ua taʻu mai e Iesu iā i tatou e faapea e na o “iʻa lelei” ua tuu i le ola, lea o loo faaāta mai ai le faapotopotoga Kerisiano. E lafoaʻi ese iʻa leaga, ma mulimuli ane lafoina i se ogaumu aasa faafaatusa, e faasino atu i le faaumatiaga i le lumanaʻi.

¹⁹ I le avea ai ma iʻa lē lelei, o le toʻatele o i latou na suʻesuʻeina le Tusi Paia faatasi ma tagata o Ieova ua lē o toe suʻesuʻe. O nisi na fananau mai i mātua Kerisiano, e lē mananaʻo e avea ma ē e mulimuli i tulagāaao o Iesu. E lē o i ai so latou faanaunauga e filifili e auauna iā Ieova, pe ina ua mavae ona latou auauna iā Ieova mo sina taimi, ae e leʻi umi ae latou lē toe faia faapea. * (Eseki. 33:32, 33) Peitaʻi, e tāua tele i tagata loto faamaoni uma ona faataga i latou e aoaoina i totonu o faapotopotoga e pei ni ola, a o leʻi oo i le aso faaiʻu o le faamasinoga, ma tumau ai i se nofoaga saogalemu.

20, 21. (a) O le ā ua tatou aʻoaʻoina mai le iloiloina o talafaatusa a Iesu e faatatau i le tuputupu aʻe? (e) O le ā ua e maumauaʻi nei e fai?

²⁰ O le ā la ua tatou aʻoaʻoina mai le autaluina puupuu o talafaatusa a Iesu e faatatau i le tuputupu aʻe? Muamua, e pei o le tuputupu aʻe o le fatu o le sinapi, ua faapena foʻi ona iai se faatelega mataʻina i manaʻoga o le Malo i inei i le lalolagi. E leai se mea e mafai ona taofia ai le faalauteleina atu o le galuega a Ieova! (Isa. 54:17) E lē gata i lea, ua saunia le puipuiga faaleagaga mo i latou o ē ofaga “i lona [laau] paolo.” Lona lua, o le Atua o ia lea na te faatupuina. E pei lava ona lē iloa le auala e oo atu ai le mea faafefete lea e natia i se paluga atoa, ua faapena foʻi ona lē faigofie i taimi uma ona iloa atu pe malamalama i lenei tuputupu aʻe, ae peitaʻi o loo tupu moni lava! Tolu, e lē o tagata uma e tali mai, e faamaonia ua avea ma Kerisiano moni. O nisi ua pei o iʻa leaga na taʻua i le talafaatusa a Iesu.

²¹ Peitaʻi, o se faalaeiauga le vaai atu i le tele o iʻa lelei ua tosina mai e Ieova! (Ioa. 6:44) O lenei tulaga ua iʻu ai i ni faatelega mataʻina mai lea atunuu i lea atunuu. Ae o le viiga e ao ona avatu iā Ieova le Atua. Ona o le molimauina o lenei tulaga, e ao ai ona uunaʻia i tatou taʻitoʻatasi e usitaia le timaʻiga na tusia i senituri ua mavae: “O le taeao ia e lūlū ai au saito . . . ; auā e te lē iloa po o lē fea e manuia, o lenei, po o lenā, pe gatusa ona lelei o ia mea e lua.”—Fai. 11:6.

[Faaopoopoga i lalo]

O le ā Lau Tali?

• O le ā ua tatou aʻoaʻoina mai le talafaatusa a Iesu e faatatau i le fatu o le sinapi, e faatatau i le faatuputeleina o le Malo ma le puipuiga faaleagaga?

• O le ā o loo faaāta mai e le mea faafefete i le talafaatusa a Iesu, ma o le ā le mea moni e faatatau i le faatuputeleina o le Malo ua faamamafa mai e Iesu?

• O le ā le vala o le faatuputeleina o le Malo ua faamamafa mai i le talafaatusa i le upega fagota?

• E faapefea ona tatou faamautinoa o loo tumau ona tatou i ai faatasi ma i latou o ē ua ‘⁠tuu ese i ola’?

[Fesili mo le Suʻesuʻega]

[Ata i le itulau 18]

O le ā ua tatou aʻoaʻoina mai le talafaatusa i le fatu o le sinapi, e faatatau i le faatelega o le Malo?

[Ata i le itulau 19]

O le ā ua tatou aʻoaʻoina mai le talafaatusa i le mea faafefete?

[Ata i le itulau 21]

O le ā ua faaāta mai i le tuueseeseina o iʻa lelei ma iʻa leaga?