O Loo Ola le Afioga a Ieova

Manatu Tāua Mai Tusi na Tusia mo Kerisiano i Korinito

O LOO matuā naunau le aposetolo o Paulo i le lelei faaleagaga o le faapotopotoga i Korinito. Ua ia faalogo i tala o feeseeseaʻiga o le ʻauuso i inā. Ua latou talia amioga lē mamā. Ua uma foʻi ona tusi atu le faapotopotoga iā Paulo, e faatatau i ni mataupu patino. I le pe tusa o le 55 T.A., a o iai o ia i Efeso i lana malaga faamisionare lona tolu, na tusia ai e Paulo le uluaʻi tusi o tusi e lua na tusia mo Kerisiano i Korinito.

E foliga mai na tusia le tusi lona lua i ni nai masina mulimuli ane ai talu ona uma ona tusia le uluaʻi tusi, o se sosooga o le tusi muamua. Talu ai ona e tele vala e tutusa ai le tulaga o mea i fafo ma totonu o le faapotopotoga Kerisiano i Korinito ma o tatou taimi, e telē la se aogā o tusi na avatu i Kerisiano i Korinito iā i tatou.—Epe. 4:12.

‘IA MATAALA, IA TUTŪ MAUSALĪ, IA LOTOTETELE’

(1 Kori. 1:1–16:24)

Ua timaʻi mai Paulo, “Ia outou autasi i a outou upu.” (1 Kori. 1:10) E leai se isi ‘faavae nai lo o Iesu Keriso’ lea e faavae ai uiga faa-Kerisiano. (1 Kori. 3:11-13) Ua faapea mai Paulo e tusa ai o se tagata faitaaga: “Ia faateʻaeseina lenā tagata leaga mai iā te outou.” (1 Kori. 5:13) Na ia faapea mai atili, “O le tino e lē tatau mo le faitaaga ae e tatau mo le Alii.”—1 Kori. 6:13.

I le tali atu e ‘tusa ai ma mea na latou tusi mai ai,’ na tuuina atu ai e Paulo ni fautuaga aogā e faatatau i faaipoipoga ma le nofofua. (1 Kori. 7:1) Ina ua uma ona talanoa atu e faatatau i le tulaga ulu faa-Kerisiano, o le amio pulea i sauniga faa-Kerisiano, ma le faamoemoe mautinoa o le toetū, na timaʻi atu ai Paulo: “Ia mataala, ia tutū mausalī i le faatuatua, ia lototetele, ma ia malolosi.”—1 Kori. 16:13.

Taliina o Fesili Faale-Tusi Paia:

1:21—Pe faaaogā moni lava e Ieova le “valea” e faasaoina ai i latou o ē talitonu? E leai, na te lē faia faapena. Peitaʻi, ona “ua lē iloa e le lalolagi le Atua i lo latou lava poto,” o lea ua foliga ai e valea i le lalolagi le auala ua ia faaaogā e faasaoina ai tagata.—Ioa. 17:25.

5:5—O le ā le uiga o le ‘tuuina atu o lea tagata [amioleaga] iā Satani e faaumatia ai le tino, ina ia faaolaina ai le agaga’? Pe a faateʻa mai le faapotopotoga se tagata lē salamō ua masani i le faia o se agasala matuiā, ua toe avea ai o ia ma se vaega o le lalolagi amioleaga a Satani. (1 Ioa. 5: 19) O lea la, ua faapea ai ona tuuina atu o ia iā Satani. O le faateʻaeseina o le tagata e iʻu ai ina faaumatia po o le aveesea o aafiaga leaga a lenā tagata mai le faapotopotoga, ae e faasaoina ai le agaga o le faapotopotoga, po o uiga o loo pulea ai.—2 Timo. 4:22.

7:33, 34—O le ā le uiga o “mea a le lalolagi” lea e popole ai se tane po o se fafine faaipoipo? O loo faasino atu Paulo i mea masani o le olaga, lea e tatau ona popole pe manatu mamafa i ai Kerisiano faaipoipo. E aofia ai taumafa, o lavalava, ma fale, ae e lē aofia ai mea leaga o lenei lalolagi, lea e lafoaʻi e Kerisiano.—1 Ioa. 2:15-17.

11:26—E faafia ona faamanatu le maliu o Iesu, ma “seʻia” oo afea? E leʻi faapea mai Paulo e tatau ona faamanatu soo le maliu o Iesu. O le upu Eleni o loo faaaogā mo “taimi uma” o lona uiga o “so o se taimi” po o le “taimi e tatau ai.” O lea la, na faapea mai Paulo, o taimi uma e tagofia ai e Kerisiano faauuina le areto ma le uaina o le Faamanatuga, lea e faatasi i le tausaga, iā Nisani 14, ua latou “faalauiloaina atu ai pea le maliu o le Alii.” O le a latou faia lenei mea “seʻia taunuu mai o ia,” o lona uiga, seʻia oo i le taimi e na te talia ai i latou i le lagi e ala i le toetū.—1 Tesa. 4:14-17.

13:13—E faapefea ona sili atu le alofa nai lo le faatuatua ma le faamoemoe? Pe a taunuu se mea na “faamoemoe i ai,” ma ua iloa tino mea na ‘faatalitali ai ma le mautinoa,’ ua lē toe manaʻomia la le faatuatua ma le faamoemoe. (Epe. 11:1) E sili atu ai le alofa i le faatuatua ma le faamoemoe, ona e tumau e faavavau.

15:29—O le ā le uiga o le “papatisoina ina ia avea ma tagata oti”? E leʻi faapea mai Paulo e papatiso tagata o loo feola e fai ma sui o i latou ua maliliu ae leʻi papatisoina. O loo uiga atu Paulo i le ulu atu o Kerisiano faauuina i le agaga i se olaga faamaoni seʻia oo i le oti, ma sosoo ai ma lo latou toetutū i se olaga agaga.

Lesona mo i Tatou:

1:26-31; 3:3-9; 4:7. O le mitamita ma se agaga loto maulalo iā Ieova, ae lē o tatou lava, o le a faamalosia ai le autasi o le faapotopotoga.

2:3-5. A o talaʻi Paulo i Korinito, le nofoaga sa avea ma ogatotonu o aʻoaʻoga ma filosofia Eleni, atonu na ia naunau pe faamata o le a mafai ona ia faatalitonuina lana ʻaufaalogologo. Peitaʻi, na te leʻi faatagaina se vaivaiga sa iā te ia po o le fefe e faalavelave i lana auaunaga mai le Atua. O lea la, e lē tatau ona tatou faatagaina ni tulaga e lē masani ai, e taofia i tatou mai le faalauiloaina atu o le tala lelei o le Malo o le Atua. E mafai ona tatou saʻili atu ma le mautinoa iā Ieova mo se fesoasoani, e pei ona sa faia e Paulo.

2:16. O le “iloa [o] manatu o Keriso” o le iloa lea o le auala e manatunatu ai Keriso, ia manatunatu e pei ona ia manatunatu, o le iloa atoatoa o ona uiga, ma le faaaʻoaʻo i ana faaaʻoaʻoga. (1 Pete. 2:21; 4:1) E tāua tele lo tatou iloilo ma le faaeteete o le soifuaga ma le auaunaga a Iesu!

3:10-15; 4:17. E tatau ona tatou toe iloilo ma faaleleia atili o tatou tomai e aʻoaʻo atu ai ma le faia o soo. (Mata. 28:19, 20) Afai e lē lelei le auala tatou te aʻoaʻo ai, e ono lē tumau la tatou tagata aʻoga pe a tofotofoina lona faatuatua, ma atonu o le a tatou fesagaʻi ma mafatiaga ma tigā ma o le a pei ua ‘ui i le afi’ lo tatou faaolataga.

6:18. O le “sosola ese i le faitaaga” e lē na o le ʻalofia o gaoioiga por·neiʹa, ae aofia ai ma ata matagā, amioga lē mamā, mafaufau i mea valea, faatafai, po o so o se mea e ono taʻitaʻia atu ai i le faitaaga.—Mata. 5:28; Iako. 3:17.

7:29. E ao i paaga faaipoipo ona faaeteete, ina neʻi alu uma o la taimi iā i laʻua ae lona lua ai manaʻoga o le Malo i o la olaga.

10:8-11. Sa matuā tigā le finagalo o Ieova ina ua muimui le nuu o Isaraelu faasaga iā Mose ma Arona. O se gaoioiga atamai lo tatou puipuimalu mai le faapogaia o se uiga muimui.

16:2. O le a mafai ona faaauau pea ona fai a tatou meaalofa tautupe mo le faaauilumaina  o manaʻoga o le Malo, pe afai e fuafua lelei ma pipii i lenā fuafuaga.

‘IA FAAAUAU ONA TOE FAASAʻO’

(2 Kori. 1:1–13:14)

Na fai atu Paulo i Kerisiano i Korinito e tatau ona latou “faamagalo ma le agalelei ma faamāfanafana atu,” i se tagata fai mea sesē ua salamō sa aʻoaʻia. E ui na latou faanoanoa i lana tusi muamua, ae na faaalia le olioli o Paulo auā sa latou “faanoanoa i le salamō.”—2 Kori. 2:6, 7; 7:8, 9.

‘E pei ona matuā tele mea uma ua iā te i latou,’ o lea na faalaeiau ai e Paulo Kerisiano i Korinito ina ia ‘matuā foaʻi.’ Ina ua uma ona tali atu i ē tetee, ona ia tuuina atu lea o ni fautuaga faaiʻu mo i latou uma: “Ia faaauau ona outou olioli, ia toe faasaʻo o outou manatu, ia faamāfanafanaina, ia tutusa o outou mafaufau, ia nonofo ma le filemu.”—2 Kori. 8:7; 13:11.

Taliina o Fesili Faale-Tusi Paia:

2:15, 16—E faapefea ona avea i tatou ma “manogi lelei o Keriso”? O le tulaga lenā ona o loo tatou pipii i le Tusi Paia aemaise le faia o se sao i le talaʻia o le feʻau o loo i ai. E ui ina ʻinoʻino tagata amiolētonu i lenā “manogi,” ae e manogi lelei iā Ieova ma ē loto faamaoni.

5:16—E faapefea ‘ona lē toe iloaina se tagata i la le tino’ e Kerisiano faauuina? Latou te lē vāai faaletino i tagata, i le faaalia o lo latou faaituʻau ona o le tele o le tamaoaiga, ituaiga, po o fea foʻi e sau ai. E sili ona latou faatāuaina la latou faiā faaleagaga ma uso talitonu.

11:1, 16; 12:11—Pe sa lē talafeagai upu a Paulo mo Kerisiano i Korinito? E leai. Peitaʻi, atonu na atagia atu i nisi lona lē fetuutuunaʻi ma lona mitamita vale, ona o ana faamatalaga na fai e puipuia ai lona tofiga o se aposetolo.

12:1-4—O ai ‘na ave faafuaseʻi i le parataiso’? Ona e lē o uiga atu le Tusi Paia i se isi tagata o lē na iai sana faaaliga faapea ma o loo taulaʻi atu lenei feʻau i le tali atu a Paulo mo lona tulaga o se aposetolo, ma atonu la o se mea na tupu iā te ia. Atonu o le vaaiga lea na iloa e le aposetolo o le parataiso faaleagaga lea o loo olioli ai le faapotopotoga Kerisiano i “ona pō o le iʻuga.”—Tani. 12:4.

Lesona mo i Tatou:

3:5. I se faalautelega, ua taʻu mai e lenei mau iā i tatou ua tuuina e Ieova le agavaa i Kerisiano mo le auaunaga e ala i lana Afioga, o lona agaga paia, ma le vaega i le lalolagi o lana faalapotopotoga. (Ioa. 16:7; 2 Timo. 3:16, 17) E ao ona tatou filigā i le suʻesuʻeina o le Tusi Paia ma lomiga faale-Tusi Paia, tatalo e lē aunoa mo le agaga paia, ma auai e lē aunoa ma fai se sao i sauniga faa-Kerisiano.—Sala. 1:1-3; Luka 11:10-13; Epe. 10:24, 25.

4:16. Ona o loo ‘faafouina pea o tatou tagata i totonu i lea aso ma lea aso’ e Ieova, o lea e tatau ai ona tatou faaaogā lelei faatulagaga a Ieova, ae aua neʻi o tatou faatalalē i le suʻesuʻeina o mea faaleagaga i aso taʻitasi.

4:17, 18. O le manatuaina e “māmā ma puupuu puapuaga,” o le a fesoasoani iā i tatou e tutumau ai ma le faamaoni iā Ieova i taimi o faigatā.

5:1-5. E mataʻina le auala o loo faamatalaina ai e Paulo faalogona o Kerisiano faauuina, e tusa ai ma lo latou faamoemoe i le olaga i le lagi!

10:13. I le avea ai ma tulafono masani, seʻi iloga lava ua fai ni fuafuaga mo i tatou e fesoasoani i vaipanoa o loo tele ai le manaʻoga, e tatau la ona tatou galueaʻiina na o le oganuu ua tofia mo la tatou faapotopotoga.

13:5. Ina ia ‘tofotofo pea iā i tatou po o tatou iai i le faatuatua,’ e tatau ona fua a tatou amio e tusa ai ma le malamalama i mea na tatou aʻoaʻoina mai le Tusi Paia. O le ‘suʻesuʻe ifo pea iā i tatou po o faapeʻī i tatou,’ e tatau ona iloiloina lo tatou tulaga faaleagaga, e aofia ai ma le lelei o tatou “mafaufau” ma le tele o a tatou galuega o le faatuatua. (Epe. 5:14; Iako. 1:22-25) I le faatatauina o fautuaga aogā a Paulo, o le a mafai ai pea ona tatou savavali i le ala o le upu moni.

[Ata i le itulau 26, 27]

O le ā le uiga o lenei faamatalaga “o taimi uma lava tou te aai ai i lenei falaoa [areto] ma inu i lenei ipu”?—1 Kori. 11:26