O Loo Ola le Afioga a Ieova

Manatu Tāua Mai Tusi i Kalatia, Efeso, Filipi, ma Kolose

INA ua faalogo ua liliuese nisi o Kerisiano mai le tapuaʻiga moni ona o taaʻiga a tagata Iutaia, ona tusia lea e le aposetolo o Paulo se tusi malosi tele “i faapotopotoga i Kalatia.” (Kala. 1:2) Na tusia lenei tusi i se vaitaimi a o faagasolo le 50 T.A.-52 T.A., ma o loo iai ni fautuaga tuusaʻo ma ni apoapoaʻiga malolosi.

E pē a ma le sefulu tausaga mulimuli ane a o iai Paulo i Roma o se “pagota a Keriso Iesu,” na ia tusi atu ai i faapotopotoga i Efeso, Filipi, ma Kolose, ina ia avatu iā i latou ni fautuaga aogā ma faalaeiauga alofa. (Efe. 3:1) E mafai foʻi ona aogā iā i tatou i aso nei le feʻau o loo i tusi o le Tusi Paia o Kalatia, Efeso, Filipi, ma Kolose, pe a tatou uaʻi totoʻa atu i ai.—Epe. 4:12.

IA “TAʻUAMIOTONUINA”—E FAAPEFEA?

(Kala. 1:1–6:18)

Ona sa taumafai tagata Iutaia i se auala faalilolilo e taʻusesēina Paulo, ona ia puipuia lea o lona tofiga faaaposetolo e ala i le tusia o faamatalaga patino e faatatau i lona olaga. (Kala. 1:11–2:14) Ina ia faalēaogāina a latou aʻoaʻoga sesē, na fai ai e Paulo le manatu faapea: “E taʻuamiotonuina le tagata, e lē ona o galuega o le tulafono, ae ona o le faatuatua iā Keriso Iesu.”—Kala. 2:16.

O loo taʻua e Paulo, sa “faasaʻolotoina i latou o nonofo i le tulafono e ala i le faatauina o i latou” ma tuusaʻoloto i latou ina ia maua le saʻolotoga faa-Kerisiano. Na ia matuā lapataʻia Kerisiano i Kalatia: “Ia tutumau ma aua neʻi toe taofia outou i le amo o le pologa.”—Kala. 4:4, 5; 5:1.

Taliina o Fesili Faale-Tusi Paia:

3:16-18, 28, 29—Po o aogā pea le feagaiga faa-Aperaamo? Ioe, o loo aogā pea. O le feagaiga o le Tulafono, sa faaopoopo atu i le feagaiga a le Atua ma Aperaamo, ae e lē o suitulaga i lenā feagaiga. O lea la, o loo tumau pea le feagaiga faa-Aperaamo ina ua “faaumatia” pe aveesea le Tulafono. (Efe. 2:15) O folafolaga o lenā feagaiga ua tuu atu i le “fanau” a Aperaamo—o Keriso Iesu, o le fanau autū lea, ma i latou ua “autasi ma Keriso.”

6:2—O le ā le “tulafono a le Keriso”? O loo iai i lenei tulafono mea uma na aʻoaʻo ma poloaʻi mai ai Iesu. O loo faapitoa lava ona aofia ai le poloaʻiga ia “fealofani.”—Ioa. 13:34.

6:8—E faapefea ona tatou “lūlū e tusa ma le agaga”? E ala lea i lo tatou ola e tusa ma le auala o loo faatonutonuina ai i tatou e le agaga o le Atua. O le ola e tusa ma le agaga, e aofia ai le taumafai ma le loto atoa e auai i gaoioiga o loo faatumauina ai pea le mauaina o le agaga.

Lesona mo i Tatou:

1:6-9. E ao i toeaina Kerisiano ona vave gaoioi pe a tulaʻi mai ni faafitauli i totonu o le faapotopotoga. E ala i le faaaogā o manatu talafeagai e tusa ai ma le Tusi Paia, e latou te vave ona faamaonia le sesē o ni manatu taufaasesē e tulaʻi mai.

2:20. O le togiola o se meaalofa totino a le Atua mo i tatou. E tatau foʻi ona tatou manatu i le togiola e tusa ai ma lenā tulaga, o se meaalofa.—Ioa. 3:16.

5:7-9. E mafai e aumea leaga ona ‘faalavelavea i tatou mai le usiusitaʻi atu pea i le upu moni.’ O se gaoioiga atamai lo tatou ʻalofia o i latou.

6:1, 2, 5. E ono fesoasoani ē ua iai “agavaa faaleagaga” iā i tatou ina ia amoina se avega, atonu o se faafitauli e faigatā ona tatou fesagaʻia  ona o le uia o se ala sesē ma le lē iloa. Ae pe a oo i le taimi e amoina ai o tatou tiute tauave faaleagaga, e ao ona tauave e i tatou lava.

‘AOAOINA MEA UMA IĀ KERISO’

(Efe. 1:1–6:24)

I le faamatalaina o le tulaga autū o le autasi faa-Kerisiano i lana tusi i Kerisiano i Efeso, na tautala ai Paulo i “se pulega i le atoaga o le taimi na atofaina . . . ina ia aoaoina ai mea uma lava ma toe faatasia iā Keriso, o mea i le lagi ma mea i le lalolagi.” Ua foaʻi mai e Keriso “tane e fai ma meaalofa” ina ia fesoasoani iā i tatou uma ‘ina ia tasi i le faatuatuaga.’—Efe. 1:10; 4:8, 13.

Ina ia faamamaluina le Atua ma faatupuina le autasi, e tatau i Kerisiano ona “oofu i le tagata fou” ma “ia gauaʻi le tasi i le isi i le mataʻu iā Keriso.” E manaʻomia foʻi ona latou “tutū mausalī e tetee atu i togafiti a le Tiapolo” e ala i le ofuina o le ofutau atoatoa.—Efe. 4:24; 5:21; 6:11.

Taliina o Fesili Faale-Tusi Paia:

1:4-7—E faapefea ona muaʻi tofia Kerisiano faauuina a o leʻi taitai fananau mai? Sa muaʻi tofia i latou o se vaega, po o se vasega, ae lē tofia taʻitoʻatasi. Sa tupu lenei mea a o leʻi iai le lalolagi o tagata agasala. O le valoaga o loo i le Kenese 3:15, sa faia a o leʻi afuafuaina so o se tagata agasala lava, ma e aofia ai le fuafuaga a le Atua ina ia avea ni soo o Keriso ma nisi e pule faatasi ma ia i le lagi.—Kala. 3:16, 29.

2:2—E faapefea ona pei le agaga o le lalolagi o le ea, ma e faapefea ona faatinoina lana pule i le lalolagi? O “le agaga o le lalolagi”—o le agaga o le fia tutoʻatasi ma le lē usiusitaʻi—o loo taatele i so o se mea, e tai pei lava o le ea o loo tatou mānavaina. (1 Kori. 2:12) O loo faatinoina lana pule i le lalolagi atoa i ana taaʻiga malolosi faifai pea.

2:6—E faapefea ona iai Kerisiano faauuina “i mea o i lagi” a o iai pea i le lalolagi? O le faaupuga lenei o “mea o i lagi,” e lē o faasino atu i o latou taui faalelagi na folafolaina mai. Ae o loo faasino atu i lo latou tulaga faaeaina faaleagaga lea e maua mai lo latou ‘faamaufaailogaina e ala i le agaga paia lea na folafolaina mai.’—Efe. 1:13, 14.

Lesona mo i Tatou:

4:8, 11-15. Sa ‘aveina pagota’ e Iesu, o lona uiga o le aveesea lea o tagata mai le pulea e Satani ina ia faaaogā i latou o ni meaalofa auā le atiina aʻe o le faapotopotoga faa-Kerisiano. E mafai ona tatou faia pe a tatou “tutupu aʻe i le alofa iā [Keriso] i mea uma” e ala i le usitaʻi ma gauaʻi iā i latou o loo taʻimua i le faapotopotoga, ma galulue e ōgatusa ma faatulagaga a le faapotopotoga.—Epe. 13:7, 17.

5:22-24, 33. E ese mai i le gauaʻi o le avā i lana tane, e ao foʻi ona ia faaaloalo i lana tane. E na te faia lea mea e ala i le faaalia o le “agaga agamalu ma le filemu” ma ia taumafai e āva i lana tane e ala i le tautala lelei mo ia, ma lagolagosua i ana faaiʻuga ina ia taulau.—1 Pete. 3:3, 4; Tito 2:3-5.

5:25, 28, 29. E pei lava ona “fafaga” e le tane o ia lava, e tatau foʻi ona ia tausi lelei manaʻoga o lana avā—i le itu faaletino, itu taufaalogona, ma le faaleagaga. E ao foʻi ona ia faapelepele i lana avā, e ala i le faaalu o se taimi e faatasi ai ma ia, ma feutagaʻi lelei ma ia i upu ma gaoioiga.

6:10-13. Ina ia tetee atu i agaga leaga, e ao ona tatou oofu ma le lotoatoa i le ofutau atoa mai le Atua.

“FAAAUAU ONA SAVAVALI MA LE MAOOPOPO”

(Fili. 1:1–4:23)

I le tusi a Paulo i Kerisiano i Filipi, o loo faamamafaina ai le uiga lea o le alofa. “O le mea lenei ua faaauau ai ona ou tatalo,” na ia taʻua, “ina ia tuputupu pea lo outou alofa i le iloa lelei ma le utaga mamao.” Ina ia fesoasoani iā i latou e ʻalofia le mailei lea o le mautinoa naʻuā, na ia timaʻi atu: “Ia faaauau ona outou galulue mo lo outou faaolataga, i le mataʻu ma le gatete.”—Fili. 1:9; 2:12.

 O loo faalaeiauina e Paulo i latou e malolosi faaleagaga ina ia tausinio “i le sini, o le taui lea o le valaau faalelagi mai le Atua.” Na ia faapea mai: “Po o le ā lava le tele o lo tatou agaʻigaʻi i luma, ae seʻi o tatou faaauau ona savavali ma le maopoopo e tusa ma lea lava masani.”—Fili. 3:14-16.

Taliina o Fesili Faale-Tusi Paia:

1:23—O ā “mea e lua” sa faalētonu ai Paulo, ma o le ā sa ia naunau e “faasaʻoloto” mai ai? Ona o le tulaga sa iai Paulo, sa ia faalētonu ai i ni mea se lua sa ia fesagaʻia: o le ola po o le oti. (Fili. 1:21) A o leʻi taʻu maia po o le ā le mea na ia filifili i ai, ae sa ia faailoa mai se mea sa ia faanaunau i ai—‘ia faasaʻoloto o ia ma ia faatasi ma Keriso.’ (Fili. 3:20, 21; 1 Tesa. 4:16) O le “faasaʻoloto” a o faagasolo le faatasi mai o Keriso, o le a iʻu i le mauaina e Paulo o le taui ua saunia e Ieova mo ia.—Mata. 24:3.

2:12, 13—O le ā le auala o loo faapogaia e le Atua i tatou ina ia ‘lotomalilie ma galulue ai’? E mafai ona galue le agaga paia o Ieova i o tatou loto ma mafaufau, ina ia faateleina lo tatou faanaunauga e faia le mea tatou te mafai i lana auaunaga. O lea, o loo tatou maua pea le fesoasoani a o ‘faaauau ona tatou galulue mo lo tatou faaolataga.’

Lesona mo i Tatou:

1:3-5. E ui lava ina matitiva Kerisiano i Filipi, ae sa latou faataatia se faaaʻoaʻoga mo i tatou i le faaalia o le agalelei.—2 Kori. 8:1-6.

2:5-11. E faaalia mai i le faaaʻoaʻoga a Iesu, o le lotomaulalo e lē o se faailoga o le vaivai ae o le malosi tau amio. E lē gata i lea, e faaeaina foʻi e Ieova tagata lotomaulalo.—Faata. 22:4.

3:13. “O mea ua tuanaʻi” atonu o ni mea e pei o galuega totogi lelei, o le puipuia o meatotino a tagata maumea, ia po o ni agasala matuiā foʻi sa faia ae ua tatou salamō ma ‘faamamā’ mai ai. (1 Kori. 6:11) E tatau ona tatou faagalo na mea, o lona uiga, aua le soona popole tele i ai, ae “tepa taulaʻi atu i mea o i le lumanaʻi.”

“IA MAUSALĪ I LE FAATUATUA”

(Kolo. 1:1–4:18)

I le tusi a Paulo i Kerisiano i Kolose, sa ia faaalialia manatu sesē a aʻoaʻo pepelo. Na ia taʻua, e lē faalagolago le faaolataga i le faia o mea e manaʻomia o le Tulafono, ae e ala i le ‘⁠faaauau ona faatuatua.’ Na faalaeiauina e Paulo Kerisiano i Kolose ina ia “faaauau pea ona savavali i le autasi ma [Keriso], ia mauaa ma ia atiaʻe outou iā te ia, ia mausalī i le faatuatua.” Sa aafia faapefea i latou i lenā mausalī?—Kolo. 1:23; 2:6, 7.

Na tusi Paulo, “E iai foʻi se isi mea e manaʻomia, ia oofu outou i le alofa, auā o le fusi lea e atoatoa ona autasi ai. Ia pulea foʻi e le filemu mai iā Keriso o outou loto.” Na ia taʻu atu iā i latou: “E so o se mea tou te faia, ia galue i ai ma le lotoatoa, e pei o loo faia iā Ieova ae lē o tagata.” Na tautala Paulo e uiga i ē o i tua o le faapotopotoga: “Ia outou savavali pea ma le poto e faatatau” iā i latou.—Kolo. 3:14, 15, 23; 4:5.

Taliina o Fesili Faale-Tusi Paia:

2:8—O ā “mataupu faavae a le lalolagi” na lapataʻi mai ai Paulo? O mea nei a le lalolagi a Satani—o mea autū po o taʻiala o loo faia aʻe ai, taʻitaʻia ai, pe atiina aʻe ai lana lalolagi. (1 Ioa. 2:16) E aofia ai i nei mea le filosofia faaletagata, le matapeʻapeʻa, ma le tele o lotu sesē a le lalolagi.

4:16—Aiseā ua lē avea ai le tusi i Kerisiano i Laotikaia ma vaega o le Tusi Paia? Atonu o le māfuaaga, ona e lē o iai i le tusi faamatalaga e manaʻomia mo o tatou aso. Pe atonu foʻi o loo toe taʻua ai manatu o loo iai i isi tusi ua faamaonia o le Tusi Paia.

Lesona mo i Tatou:

1:2, 20. O le togiola, o se sauniuniga o le agalelei faifua o le Atua, lea e mafai ona faamamāina o tatou lagona nofosala ma aumaia ai le toʻafilemu.

2:18, 23. O le “faatagā lotomaulalo”—o le faafoliga atu lea e lotomaulalo ina ia fiafia mai ai isi, atonu e ala i le manaʻo e lafoaʻi ana mea faitino po le soona faatigāina o lona tino—o se faailoaga lea o se tasi ua “faafefeteina fua ona o ona lava mafaufauga faaletino.”