Fesili Mai le ʻAufaitau

I le tusi a le aposetolo o Paulo i Eperu, na ia tautala ai i le “papaʻi atu o lima.” Pe na ia faasino atu i le tofiaina o toeaina pe i se isi mea?—Epe. 6:2.

E leai se māfuaaga tatou te maumaututū ai i o tatou manatu, ae atonu na faasino atu Paulo i le papaʻi atu o lima ina ia avatu meaalofa o le agaga.

O loo iai i le Tusi Paia faamatalaga e uiga i le papaʻi atu o lima e faasino atu i tofiga faatiokarate. Sa “faaee atu e Mose ona lima” i luga o Iosua ina ua tofia o ia e avea ma ona sui. (Teu. 34:9) I faatulagaga faa-Kerisiano, sa tofia nisi o tane agavaa e ala i le papaʻi atu o lima. (Galu. 6:6; 1 Timo. 4:14) Na lapataʻi mai Paulo e faatatau i le vave papaʻi atu o lima i se tagata.—1 Timo. 5:22.

Peitaʻi, na faalaeiauina e Paulo Kerisiano i Eperu e ‘finafinau ina ia avea ma tagata matutua,’ ona o lea ua latou tuua “aʻoaʻoga muamua.” Ona ia lisiina mai lea ‘o le salamō mai i galuega iʻuvale ma le faatuatua i le Atua, o aʻoaʻoga i papatisoga, ma le papaʻi atu o lima.’ (Epe. 6:1, 2) Pe mafai ona taʻua le tofiaina o toeaina o se mea muamua lea e tatau i Kerisiano ona finafinau i ai? E leai. O le avea ma toeaina o le faapotopotoga, o se sini mo uso malolosi faaleagaga lea e ao ona aapa atu i ai ma talisapaia.—1 Timo. 3:1.

Ae sa iai le isi faaaogāina o le papaʻi atu o lima. I le uluaʻi senituri, sa teena e Ieova le nuu o Isaraelu ae taliaina le Isaraelu faaleagaga e fai ma ona nuu, le faapotopotoga o Kerisiano faauuina. (Mata. 21:43; Galu. 15:14; Kala. 6:16) O meaalofa faavavega o le agaga, e pei o le tautala i gagana eseese, ua faamaonia ai lenā suiga. (1 Kori. 12:4-11) Ina ua avea Konelio ma lona aiga ma uso talitonu, na maua e nei tagata fou le agaga paia, ona sa faaalia mai i lo latou “tautatala i gagana eseese.”—Galu. 10:44-46.

I lenā taimi, sa faaooina mai meaalofa faavavega e ala i le papaʻi atu o lima. Ina ua talaʻi atu e Filipo le tala lelei i Samaria, e toʻatele sa papatisoina. Sa auina atu loa e le vaega pule le aposetolo o Peteru ma Ioane i inā. Aiseā? E tatou te faitau ai e faapea: “Ona paʻi atu lea o o la lima iā i latou [tagata faatoʻā papatiso], ma latou maua ai le agaga paia.” O le uiga o lenā tulaga, ua latou maua le meaalofa o le agaga, o ni agavaa ua mātauina e isi. E tatou te faamaonia lenei mea iā Simona, o lē sa avea muamua ma faitogafiti faataulāitu, sa ia vaai i lenei gaoioiga o le agaga ma taumafai loa e faatau mai le pule ina ia papaʻi atu ai ona lima i isi, ina ia latou maua le agaga paia ma faia ai le tele o vavega. (Galu. 8:5-20) I se taimi mulimuli ane, sa papatisoina ai tagata e toʻasefululua i Efeso. E tatou te faitau ai e faapea: “Ua paʻi atu lima o Paulo iā i latou, ona alu ifo lea o le agaga paia i o latou luga, ma latou tautatala ai i gagana eseese ma fai valoaga.”—Galu. 19:1-7; faatusatusa i le 2 Timoteo 1:6.

O lea la, i le Eperu 6:2, e foliga mai sa faasino atu Paulo i le papaʻi atu o lima ina ia avatu meaalofa o le agaga i uso talitonu fou.