Ia Faaaʻoaʻo iā Iesu Tapuaʻi Atu i le Auala e Taliaina e le Atua

Ua valaaulia ma le alofa e le Atua tagata “mai i atunuu uma, ma ituaiga, ma nuu, ma gagana” ia tapuaʻi iā te ia. (Faaa. 7:9, 10; 15:3, 4) O i latou e talia lenei valaaulia e mafai ona ‘⁠iloa atu le matagofie o Ieova.’ (Sala. 27:4; 90:17) I le pei o le faisalamo, latou te sii aʻe o latou leo ma vivii atu i le Atua, i le faapea atu: “Ia tatou ifo, ma ia tatou punonou, ia tatou tootuli i luma o Ieova o lē na faia i tatou.”—Sala. 95:6.

Tapuaʻiga e Matuā Tāua iā Ieova

A o avea ma Alo pele e toʻatasi o le Atua, na tele avanoa na aʻoaʻoina ai e Iesu le finagalo o lona Tamā, o ana mataupu silisili, ma ana faatulagaga. O lea la, na taʻu atu ma le mautinoa e Iesu i isi le auala saʻo e tapuaʻi ai iā Ieova. Na ia fetalai atu: “O aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.”—Ioa. 1:14; 14:6.

Na faataatia e Iesu se faaaʻoaʻoga sili ona lelei o le gauaʻi ma le lotomaulalo i lona Tamā. Na ia faapea mai: “Ou te lē faia se mea i loʻu lava loto, ae e pei ona aʻoaʻo mai e le Tamā iā te aʻu, o mea ia ou te tautala atu ai.” O lea, na ia toe faapea mai: “Ou te faia pea mea e fiafia i ai lona finagalo.” (Ioa. 8:28, 29) O le ā le auala na faafiafia ai e Iesu lona Tamā?

O se tasi o auala, na tuutoina atu atoatoa Iesu i lona Tamā, ma o le uiga moni lenā o le tapuaʻi i le Atua. Na faaalia e Iesu lona māfana totino i lona Tamā e ala i le usiusitaʻi iā te Ia, i le faia o  lona finagalo e ui e aofia ai le tele o faigatā e oo i le tagata. (Fili. 2:7, 8) O se vala tāua o le tapuaʻiga a Iesu o lona auai lea e lē aunoa i le galuega o le fai ma soo, o le māfuaaga lenā na taʻua ai o ia e tagata talitonu ma ē lē talitonu, o le Aʻoaʻo. (Mata. 22:23, 24; Ioa. 3:2) E lē gata i lea, na faaaogā e Iesu le tele o lona malosi ma le taimi e fesoasoani atu ai i isi. O lona agaga faataulagaina na itiiti ai se taimi mo ia lava, ae sa ia fiafia e auauna atu i isi. (Mata. 14:13, 14; 20:28) E ui lava ina pisi, ae sa faaavanoa pea e Iesu le taimi e talanoa atu ai i lona Tamā faalelagi e ala i le tatalo. (Luka 6:12) E mautinoa le tāua i le Atua o le tapuaʻiga a Iesu!

Taumafaiga e Faafiafia le Atua

Na silafia e Ieova uiga o lona Alo ma na ia finagalo malie i ai. (Mata. 17:5) Peitaʻi, na mātauina foʻi e Satani le Tiapolo le soifuaga faamaoni o Iesu. O lea, na avea ai Iesu ma taulaʻiga faapitoa a Satani. Aiseā? Ona e leʻi iai se tagata na ia tausisia atoatoa le usiusitaʻi i le Atua i le auala o loo ia manaʻomia e tapuaʻi atu ai. Ma na manaʻo le Tiapolo e taofia Iesu mai le tuuina atu o le tapuaʻiga lea e na o Ieova e tonu ma tatau i ai.—Faaa. 4:11.

I le taumafai e faasesēina Iesu, na alu atu ai Satani ma tofotofo o ia. Ona ia ave lea o Iesu i le “mauga matuā maualuga lava, ma faaali atu iā te ia malo uma o le lalolagi ma o latou mamalu.” Ona ia faapea atu lea: “Ou te avatu nei mea uma iā te oe, pe afai e tau lava ina e faapaʻū ma tapuaʻi mai iā te aʻu.” Na faapefea ona tali atu Iesu? Na ia fetalai atu: “Inā alu ese ia oe Satani! Auā ua tusia, ‘E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.’” (Mata. 4:8-10) Ioe, na silafia e Iesu o se gaoioiga ifo i tupua le ifo atu iā Satani e tusa lava po o ā aogā e ono maua mai ai. E oo lava i se gaoioiga e tasi o le tapuaʻi, na ia musu e avatu i so o se tasi e ese mai iā Ieova.

I lo tatou tulaga, atonu o le a lē ofo mai e Satani malo uma o le lalolagi ma o latou mamalu e sui aʻi la tatou tapuaʻiga. Ae o loo ia taumafai pea e lepeti le tapuaʻiga o loo tuuina atu e Kerisiano faamaoni i le Atua. O le faanaunauga o le Tiapolo, ia tatou tapuaʻi atu i se isi po o se isi mea.—2 Kori. 4:4.

Na faamaonia e Iesu Keriso lona faamaoni seʻia oo i le oti. I le tumau pea o lona faamaoni i le Atua, na faamamaluina ai e Iesu Ieova i se auala e lē mafai e se tagata ona faia. Ae mo Kerisiano moni i aso nei, tatou te taumafai e mulimuli i le soifuaga faamaoni o Iesu e ala i le faamuamua o la tatou tapuaʻiga i Lē na Faia i tatou i lo isi mea uma. O le mea moni, o le faiā lelei ma le Atua o le mea lenā e sili ona tāua iā i tatou.

Faamanuiaga Ona o le Tapuaʻi Atu i le Auala e Taliaina e le Atua

O le faaauilumaina ‘o le tapuaʻiga e mamā ma lē taʻuleagaina’ i le silafaga a le Atua, e tele ona aogā. (Iako. 1:27) Mo se faataʻitaʻiga, ua tatou  ola i le taimi ua sili ona toʻatele ai tagata “e alolofa iā i latou lava, o ē mananaʻo tele i tupe, o ē fia tagata,” ma “ē lē fiafia i mea lelei.” (2 Timo. 3:1-5) Ae ui i lea, i totonu o le ʻauaiga o le Atua, ua iai iā i tatou le faaeaga o le aufaatasi ma tagata mamā o e taumafai e tausisia faatulagaga a le Atua i le tapuaʻia o ia. Pe lē o se mea ea lenā e faafouina ai?

O le tumau i se tulaga mamā i lenei lalolagi, ua iā i tatou se faamanuiaga faaopoopo o le mauaina lea o se loto fuatiaifo mamā. Tatou te mananaʻo e tausisia lenā loto fuatiaifo mamā e ala i lo tatou gauaʻi atu i mataupu silisili amiotonu a le Atua, ma usitaʻi i tulafono a Kaisara lea e lē feteenaʻi ma tulafono a le Atua.—Mare. 12:17; Galu. 5:27-29.

O le tapuaʻi ma le loto atoa, e aumaia ai se isi ituaiga o faamanuiaga. Pe a tatou taulaʻi atu i le faia o le finagalo o le Atua nai lo i tatou lava, o le a tatou ola ai i ni olaga uigā ma faamalieina. Nai lo le faapea atu: “Seʻi o tatou aai la ma inu auā o taeao tatou te feoti ai,” ua iā i tatou se faamoemoe maufaatuatuaina o le ola e faavavau i le parataiso i le lalolagi.—1 Kori. 15:32.

I le tusi o Faaaliga, o loo faasino atu i le taimi mo i latou o loo tausisia le tulaga mamā i luma o Ieova faapea, o le a “sao mai le puapuaga tele.” Ua faamatala mai e faapea, “e fofola atu foʻi e Lē o loo afio i le nofoālii lona faleʻie i luga iā i latou.” (Faaa. 7:13-15) O lē o loo nofo i le nofoālii e leai lava ma se isi ua na o Ieova le Atua o Lē e aupito sili ona mamalu i le vateatea aoao. Taumafai e faaata i lou mafaufau le olioli o le a iai pe a ia valaaulia oe o se mālō i lona faleʻie, ma avatu iā te oe le puipuiga malu lea o le a leai se mea leaga e oo iā te oe! O loo mafai lava foʻi i ni tulaga patino ona tatou olioli i lana puipuiga ma lana tausiga alofa i o tatou aso.

Ae lē gata i lea, o i latou o loo avatuina le tapuaʻiga e talileleia e le Atua, ua faamatalaina o loo taʻitaʻia i latou i “vaipuna o le vai o le ola.” O nei vaipuna e faafouina ai, o loo faaatagia ai sauniuniga uma o loo faia e Ieova mo lo tatou mauaina o le ola e faavavau. Ioe, e ala i le togiola a Keriso, o le a “soloiesea foʻi e le Atua o loimata uma mai o latou mata.” (Faaa. 7:17) O le a maua e le fanau a tagata le fesoasoani ina ia oo ai ina lelei atoatoa, lea e aumaia ai le olioli e lē mafaatusalia mo i latou e iai le faamoemoe e ola e faavavau i le lalolagi. E oo lava i le taimi nei, o tagata tapuaʻi fiafia o le Atua o loo alalaga atu ma le olioli, e faaleo atu lo latou loto talisapaia iā Ieova ma tapuaʻi iā te ia faatasi ma i latou i le lagi o loo pepese: “Ieova e, le Atua, o Lē e ona le malosi uma lava, e mataʻina ma ofoofogia au galuega. E tonu ma faamaoni ou ala, le Tupu o le vavau e. Ieova e, o ai sē e lē mataʻu iā te oe ma faamamaluina lou suafa? Auā ua na o oe e faamaoni. E ō mai atunuu uma lava ma tapuaʻi atu i ou luma, talu ai ua faailoa mai au poloaʻiga amiotonu.”—Faaa. 15:3, 4.

[Ata i le itulau 27]

O le ā ua ofo mai e Satani iā i tatou e ono sui aʻi la tatou tapuaʻiga?