Ia Faatumauina le ‘Maea Sautuatolu’ o le Faaipoipoga

“O le maea foʻi sautuatolu e lē vave motusia.”—FAI. 4:12.

1. O ai sa ia tuufaatasia le uluaʻi tane ma le fafine i le faaipoipoga?

INA ua uma ona foafoaina laau ma meaola, ona faia lea e Ieova le Atua o le uluaʻi tagata, o Atamu. Na mulimuli ane faamoe gase e le Atua Atamu, ona Ia faaaogā lea o se tasi o ona ivi ʻasoʻaso ina ia fai ai sona fesoasoani e fetaui ma ia. Ina ua vaai atu Atamu i le fafine, ona ia faapea lea: “O le ivi lava lenei o oʻu ivi, ma le aano o oʻu aano.” (Kene. 1:27; 2:18, 21-23) Na faaalia e Ieova lona fiafia i lenei tulaga e ala i le tuufaatasia o le uluaʻi tane ma le fafine i le faaipoipoga, ma folafola atu iā i laʻua lana faamanuiaga.—Kene. 1:28; 2:24.

2. Na faapefea ona faatupu e Satani se fevaevaeaʻi i le va o Atamu ma Eva?

² Pagā lea, e leʻi umi ae faaleagaina le faatulagaga a le Atua i le faaipoipoga. E faapefea? Na faasesēina Eva e se agelu leaga, o lē ua taʻua o Satani, ma ia ʻaina ai le fua o le laau na faasā ona aai ai le ulugalii. E leʻi umi ae auai Atamu i le lē usiusitai a lana avā, ma iʻu ai ina la fouvale i le tonu o le aiā a Ieova e pule ai, atoa ma lana taʻitaʻiga lelei. (Kene. 3:1-7) Ina ua fesili atu Ieova i le ulugalii po o le ā le la mea ua fai, sa iloa manino mai ai ua leaga le la faiā. Sa tuuaʻia e Atamu lana avā, e ala i le faapea atu: “O le fafine na e au mai iā te aʻu, ua na au mai iā te aʻu le fua o le laau, ona ou ʻai ai lea.”—Kene. 3:11-13.

3. O le ā le vaaiga sesē sa iai i nisi tagata Iutaia?

³ I senituri talu mai lenā taimi, ua faaaogā e Satani le tele o auala faatogafiti e faatuputupulaʻia ai feeseeseaʻiga i le va o tagata faaipoipo. O se faaaʻoaʻoga, o nisi taimi sa ia faaaogā ai taʻitaʻi lotu e lagolagoina ai se vaaiga e lē faale-Tusi Paia i faaipoipoga. O nisi o taʻitaʻi Iutaia na latou lē amanaʻia le tāua o tapulaa a le Atua, e ala i le faataga o tane e tatala a latou faaipoipoga ma a latou avā, ona o ni mataupu faatauvaa e pei o le soona faamasima o se meaʻai. Peitaʻi na fetalai Iesu: “Ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.”—Mata. 19:9.

4. Ua faapefea ona faaleagaina le faatulagaga o le faaipoipoga i aso nei?

⁴ O loo pisi pea Satani e taumafai e motusia le noataga o le faaipoipoga. Ua faamaonia le taulau o Satani i lenei tulaga e ala i faaipoipoga a tagata tauatane, o ulugalii e nonofo faapouliuli, ma ua faigofie ona tatala faaipoipoga. (Faitau le Eperu 13:4.) I le avea ma Kerisiano, o le ā e tatou te fai ina ia ʻalo ese ai i le taaʻina i manatu sesē, ua taatele e faatatau i le faaipoipoga? Seʻi o tatou iloilo nisi o uiga o se faaipoipoga fiafia, ma taulau manuia.

Ia Iai Ieova i le Faaipoipoga

5. O le ā le uiga o le faaupuga ‘maea sautuatolu’ e tusa ai o le faaipoipoga?

⁵ Ina ia manuia se faaipoipoga, e manaʻomia ona aofia ai Ieova i le mafutaga. Ua taʻua i lana Afioga e faapea: “O le maea foʻi e sautuatolu e lē vave motusia.” (Fai. 4:12) O le ‘maea sautuatolu’ o se faaupuga faafaatusa. Pe a faatatau atu lenei faataʻitaʻiga i le faaipoipoga, e aofia ai le tane ma le avā, o vaega muamua e lua o le maea, lea e fili faatasi ma le vaega autū o le maea, o Ieova le Atua. O le autasi ma le Atua e aumaia ai i se ulugalii le malosi faaleagaga e feagai ai ma faafitauli, ma o le auala lea e maua ai le fiafiaga sili i le faaipoipoga.

6, 7. (a) O le ā e fai e Kerisiano ina ia faamautinoa ai o loo iai le Atua i a latou faaipoipoga? (e) O le ā ua faatāua e se tasi tuafafine e uiga i lana tane?

⁶ Peitaʻi, o le ā e mafai ona fai e se ulugalii faaipoipo e faamautinoa ai o loo pei le la faaipoipoga o lenā maea sautuatolu? Na pese le faisalamo o Tavita e faapea: “Loʻu Atua e, ou te  fiafia e fai lou finagalo; o loo i totonu lava iā te aʻu lau tulafono.” (Sala. 40:8) O lo tatou alolofa mo le Atua e ono uunaʻia ai i tatou e auauna atu iā te ia ma le loto atoa. O lea la, e ao iā i laʻua uma ona atiaʻe se faiā māfana ma Ieova, ma ia fiafia e fai lona finagalo. E ao foʻi i paaga faaipoipo ona taumafai e faamalosia le alofa o a latou paaga i le Atua.—Faata. 27:17.

⁷ Pe afai e tāmau iā i tatou le tulafono a le Atua, o le a faaalia mai ai uiga e pei o le faamaoni, faamoemoe, ma le alofa, ma o le a fesoasoani e faamalosia ai le fusi o le faaipoipoga. (1 Kori. 13:13) Ua faapea mai se Kerisiano e iā igoa Sandra, ua 50 tausaga talu ona faaipoipo: “O mea e sili ona ou faatāua i laʻu tane, o lana taʻitaʻiga faaleagaga ma ana fautuaga, ma lona alofa iā Ieova, lea e sili atu ona malosi nai lo o lona alofa iā te aʻu.” Tane, pe mafai foʻi ona faia se faamatalaga faapena e faatatau iā te oe?

8. O le ā e manaʻomia ina ia maua ai le “taui lelei” i le faaipoipoga?

⁸ I le avea ai o se ulugalii, po o avea mataupu faaleagaga faapea ma manaʻoga o le Malo, ma mea e sili ona tāua i o oulua olaga? E lē gata i lea, po o e manatu i lau paaga o sē lua te galulue faatasi i le auaunaga iā Ieova? (Kene. 2:24) Na tusi le tupu poto o Solomona e faapea: “E sili ona lelei o le toʻalua i le toʻatasi; auā ua iā te i laʻua le taui lelei i la la galuega.” (Fai. 4:9) Ioe, e ao i se tane ma se avā ona galulue malosi ina ia maua le “taui lelei,” e ala i se mafutaga e tumau ma iai pea le alofa, lea e iai le faamanuia a le Atua.

9. (a) O ā tiute tauave ua iai i tane? (e) E tusa ai o le Kolose 3:19, e ao faapefea i se tane ona feagai ma lana avā?

⁹ O se faamaoniga o le iai o le Atua i se faaipoipoga, o le taumafai lea o le tane ma le avā ia ola e tusa ai ma Lona finagalo. Ua iai i tane le tiute tauave autū e tausia manaʻoga faaletino ma manaʻoga faaleagaga o lona aiga. (1 Timo. 5:8) Ua faalaeiauina foʻi i latou ia magafagafa i manaʻoga tau faalogona o a latou avā. I le Kolose 3:19, e tatou te faitau ai e faapea: “O outou tane, ia alolofa atu pea i a outou avā, ma aua le soona feita iā i latou.” Na faamatala e se faitofā o le Tusi Paia le faaupuga “soona feita,” e aofia ai le “fai atu iā i latou o upu faatigā, ma lē faaalia atu iā i latou le alofa, tausiga, mea e latou te manaʻomia, puipuiga, ma le fesoasoani.” E mautinoa lava, e lē talafeagai ona iai lenā amioga i se aiga Kerisiano. Pe a faatino e se tane lona tulaga ulu i se auala alofa, o le a uunaʻia ai lana avā e gauaʻi atu i lona tulaga ulu.

10. O le ā le uiga e tatau i avā Kerisiano ona faaalia?

¹⁰ O avā Kerisiano e taumafai ia iai Ieova i a latou faaipoipoga, e ao foʻi ona latou ola e tusa ai ma le finagalo o le Atua. Na tusi le aposetolo o Paulo: “O avā, ia gauaʻi atu i a latou lava tane e pei ona gauaʻi atu i le Alii, auā o le tane o le ulu lea o le avā, e pei foʻi o Keriso o le ulu ia o le faapotopotoga.” (Efe. 5:22, 23) Na faasesē e Satani Eva e ala i le faia o se pepelo e faapea, o le tutoʻatasi mai le Atua e aumaia ai le fiafiaga tumau. Ioe, ua vaaia i aso nei i le tele o faaipoipoga le agaga o le fia tutoʻatasi. Peitaʻi, o fafine amioatua, o le gauaʻi i o latou ulu alolofa e lē o se mea e leaga iā i latou. E latou te manatua na tofia e Ieova Eva e fai ma “fesoasoani e tatau” mo lana tane, lea sa manino lelei o se tulaga faaaloalogia i le finagalo o Ieova. (Kene. 2:18) O se avā Kerisiano e lotomalie e lagolagosua atu i lenā faatulagaga, e avea moni lava o ia ma “pale” i lana tane.—Faata. 12:4.

11. O le ā na taʻua e se tasi uso ua fesoasoani i lana faaipoipoga?

¹¹ O se tasi fesoasoani ina ia iai pea le Atua i se faaipoipoga, o le suʻesuʻe faatasi lea e se ulugalii o le Afioga a le Atua. Ua faapea mai Gerald, ua 55 tausaga o fiafia i lana faaipoipoga, “O le mea aupito sili ona tāua i se faaipoipoga taulau manuia, o le faitau lea ma suʻesuʻe faatasi le Tusi Paia.” Ua ia faapea atili mai, “O le faifaimea faatasi, aemaise lava i mea faaleagaga, o le a māfana ai le tasi i le isi ma vavalalata atu ai iā Ieova.” O le suʻesuʻeina faatasi o le Tusi Paia e fesoasoani ai i le aiga e manatua pea i mafaufau tapulaa a Ieova, e faamalosia ai la latou faiā ma Ia, ma faaauau ai pea ona agaʻigaʻi i luma.

12, 13. (a) Aiseā e tāua tele ai le tatalo faatasi o se ulugalii? (e) O ā isi gaoioiga faaleagaga e faamalosia ai se faaipoipoga?

¹² O ulugalii faaipoipo e fiafia, e tatalo faatasi foʻi. Pe a “momoli atu [e se tane lona] loto” faatasi ai ma manaʻoga e patino i lo la tulaga, e  mautinoa o le a fesoasoani e faamalosia ai le fusi o le faaipoipoga. (Sala. 62:8) O se faataʻitaʻiga, o le a faigofie ona foʻia so o se feeseeseaʻiga i le va o oulua ma lau paaga, pe a māeʻa ona lua tatalo faatasi atu i Lē Ona le Malosi Uma lava mo le taʻitaʻiga faapea ma taʻiala! (Mata. 6:14, 15) I le ōgatusa ai ma le tatalo, o se mea talafeagai mo paaga taʻitoʻatasi ona taumafai e fesoasoani i le isi ina ia “faaauau ona onosai le tasi i le isi, ma ia fefaamagaloaʻi ma le lotoatoa.” (Kolo. 3:13) Ia manatua o le tatalo e faaalia atu ai le faalagolago i le Atua. Na faapea atu le tupu o Tavita: “E faasaga atu iā te oe mata o mea uma lava.” (Sala. 145:15) Pe a tatou faamoemoe atu i le Atua e ala i le tatalo, o le a faaitiitia ai o tatou popolega, i le iloaina lea ‘o loo manatu mamafa mai o ia iā i tatou.’—1 Pete. 5:7.

¹³ O se isi auala autū ina ia iai Ieova i se faaipoipoga, o le auai lea i sauniga a le faapotopotoga ma galulue faatasi i le faiva. I a tatou sauniga, e aʻoaʻo mai ai e ulugalii le auala e tetee atu ai i “togafiti” o loo faaaogā e Satani ina ia fevaevaeaʻi ai aiga. (Efe. 6:11) Ma o se tane ma se avā e galulue faatasi e lē aunoa i le faiva, o le a avea ma ē ‘tutumau ma mausalī.’—1 Kori. 15:58.

Pe a Tutupu Faafitauli

14. O ā mea e mafai ona faapogaia ai faafitauli i le faaipoipoga?

¹⁴ O le mea moni, atonu e lē fou i le faalogo fautuaga ua taʻua i luga, ae aiseā e te lua lē iloiloina ai ma lau paaga na fautuaga? Tagaʻi pe e lē o iai nisi vala o le lua faaipoipoga o loo manaʻomia ona uaʻi atili atu i ai. Ona ua taʻua i le Tusi Paia e faapea, e oo lava foʻi i tagata o loo iai le Atua i a latou faaipoipoga, “e oo puapuaga i o latou tino.” (1 Kori. 7:28) Ona o le tulaga lē lelei atoatoa faaletagata, o taaʻiga leaga o lenei lalolagi solitulafono, ma mailei a le Tiapolo, e oo ai lava foʻi i faaipoipoga a auauna faamaoni a le Atua e mafai ona fesagaʻi ma faafitauli ogaoga. (2 Kori. 2:11) Peitaʻi e fesoasoani mai Ieova iā i tatou ina ia manumalo ai i na faafitauli. Ioe, e mafai lava ona faia. Sa leiloloa uma lafumanu a Iopu le tagata faamaoni, ma feoti ana auauna ma lana fanau. Peitaʻi, ua taʻua i le Tusi Paia: “Ua lē agasala Iopu i na mea uma, ua na lē taʻuvaleina foʻi le Atua.”—Iopu 1:13-22.

15. E ono tali mai faapefea tagata ona o faafitauli, ma e faapefea ona taulimaina lelei e paaga le tali mai faapena?

¹⁵ Ae i le isi itu, na faapea atu le avā a Iopu iā te  ia: “Ua e taofi mau pea ea i lau amiotonu? inā faifai ia e oe o le Atua, ma e oti ai!” (Iopu 2:9) Ioe, pe a tutupu mai ni mala po o nisi tulaga faigatā, e mafai e popolega lea e māfua mai i nei tulaga ona faapogaia ai se tasi e faia se mea e aunoa ma le mafaufau lelei. Ua faapea mai le tagata poto, “O le sauā e faavalea ai lava le tagata poto.” (Fai. 7:7) Pe afai e fai mai ma le ita tele e lau paaga ni upu faatigā ona o faigatā po o omiga o iai, ia taumafai e toʻafilemu pea. O le toe tali atu i le auala lava lenā e ono faapogaia ai se tasi po o oulua uma foʻi, e fai atu se faamatalaga o le a iʻu ai ina faateteleina le faafitauli. (Faitau le Salamo 37:8.) O lea, ia aua neʻi amanaʻia so o se ‘upu e soona fai mai,’ ona e māfua mai i le ita ma le lē fiafia.—Iopu 6:3.

16. (a) E faapefea ona faatatau fetalaiga a Iesu o loo i le Mataio 7:1-5 i le faaipoipoga? (e) Aiseā e tāua tele ai le paleni i le faaipoipoga?

¹⁶ E manaʻomia i paaga faaipoipo ona iai ni faamoemoega e mafai ona faataunuuina. E ono mātauina e le isi paaga ni uiga masani o le isi ma manatu faapea, ‘E mafai ona ou suia o ia.’ E ala i le alofa ma le onosai, e ono mafai ai ona e fesoasoani i lau paaga ina ia faasolosolo ona fai ni suiga. Peitaʻi, ia aua neʻi galo, na faatusa e Iesu se tasi na te amanaʻia masei laiti o isi, i se tasi o loo vaavaai atu i le “fasilaau” i le mata o lona uso ae lē o vaavaai i le “ogālaau” o loo i lona foʻi mata. Na timaʻi mai Iesu iā i tatou e faapea: “Aua tou te toe faamasino atu ina neʻi faamasinoina outou.” (Faitau le Mataio 7:1-5.) E lē o le uiga o lenei manatu e faapea ia lē amanaʻia ai vaivaiga matuiā. Ua faapea mai Ropati, ua lata i le 40 tausaga talu ona faaipoipo: “O le talanoa saʻoloto atu ma le tautala saʻo o le tasi i le isi, ma nofosauni e talia ni faamatalaga e aogā, e ono manaʻomia ai e paaga faaipoipo ona faia ni suiga i o la uiga.” O lea, ia paleni. Nai lo le atugalu i uiga e te manaʻo ia iai i lau paaga, ia iloa ona lotofaafetai ma fiafia i uiga lelei ua iā te ia i le taimi nei.—Fai. 9:9.

17, 18. Pe a tutupu faafitauli, o fea tatou te liliu atu i ai mo se fesoasoani?

¹⁷ E ono tulaʻi mai tofotofoga pe a suia le tulaga o mea. E ono fesagaʻi se ulugalii ma ni luʻi ina ua fai le la fanau. Atonu foʻi ua maʻi tigāina le tasi o le paaga po o se tasi o le fanau. Pe atonu ua manaʻomia se tausiga faapitoa mo mātua ua matutua. Atonu ua siitia atu i atunuu mamao le fanau matutua. O isi suiga e māfua mai ona o le faataunuuina o faaeaga ma tiute tauave i le faapotopotoga. O nei suiga uma e mafai ona aumaia ai nisi o faafitauli ma popolega i se mafutaga.

¹⁸ Pe afai ua e lagona ua tauau ina uma lou onosaʻi ona o omiga i le lua faaipoipoga, o le ā e mafai ona e fai? (Faata. 24:10) Ia aua le fiu! E pau le mea o loo manaʻo ai Satani ia lafoaʻia e se tasi o auauna a le Atua le tapuaʻiga mamā. O le a fiafia foʻi o ia pe a faia faapena e se ulugalii. O lea, ia e faia mea uma e te mafaia, ina ia faamautinoa ai o loo tumau pea lau faaipoipoga o se maea sautuatolu. O loo iai i le Tusi Paia le tele o tala i tagata na tumau i le faamaoni e ui i tulaga faigatā. O se faataʻitaʻiga, i se tasi taimi, na sasaa atu ai e Tavita lona loto iā Ieova, e ala i le faapea atu: ‘Le Atua e, ia e alofa mai iā te aʻu; auā ua faasauā mai tagata iā te aʻu i aso uma lava.’ (Sala. 56:1) Pe na iai se taimi na e lagona ai ua faasauā mai se “tagata” iā te oe? E tusa pe te manatu o faafitauli o loo e fesagaʻia e māfua mai i se tasi e lē felataʻi le lua faiā, pe e mai se tasi e vavalalata atu iā te oe, ia manatua: Na maua e Tavita le malosi e tumau ai, ma o le a faapena foʻi oe. “Na ou saʻili atu iā Ieova, ona tali mai ai lea o ia iā te aʻu, . . . na laveaʻiina aʻu ai mea uma na ou fefe ai.”—Sala. 34:4.

Isi Faamanuiaga

19. O le ā le auala e tatou te tetee atu ai i osofaʻiga a Satani?

¹⁹ I lenei taimi o le iʻuga, e manaʻomia e paaga  faaipoipo ona ‘fefaamāfanafanaaʻi pea ma atiaʻe e le tasi le isi.’ (1 Tesa. 5:11) Ia aua neʻi galo, o loo maumaututū pea Satani e faapea o lo tatou faamaoni iā Ieova e faavae i le manatu faapito. O le a ia faaaogā so o se auala na te mafai ona faaaogā, e aofia ai le faavevesiina o se faaipoipoga, ina ia lafoaʻia ai lo tatou faamaoni i le Atua. Ina ia tetee atu i osofaʻiga a Satani, e manaʻomia ona tuu atu lo tatou faatuatuaga atoatoa iā Ieova. (Faata. 3:5, 6) Na tusi Paulo e faapea: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”—Fili. 4:13.

20. O ā faamanuiaga e maua pe a iai le Atua i le faaipoipoga a se tasi?

²⁰ E anoanoaʻi faamanuiaga e maua pe a iai le Atua i se faaipoipoga. Ua matuā faamaonia le moni o lenei manatu iā Ioelu ma lana avā ua 51 tausaga talu ona faaipoipo. Ua ia faapea mai: “E lē aunoa ona ou faafetai iā Ieova ona o laʻu avā ma la ma mafutaga fiafia. Ua avea o ia o se paaga lelei.” Ua faapefea ona faamalosia pea le la faaipoipoga? “E ma te taumafai pea e faaalia le agalelei, onosai, ma le alofa o le tasi i le isi.” E leai se tasi o i tatou e atoatoa ona ia faia lenā tulaga i lenei faiga o mea. Peitaʻi, seʻi o tatou galulue malosi e faatatau taʻiala a le Tusi Paia, ma ia iai pea Ieova i a tatou faaipoipoga. Pe a tatou faia faapea, o le a avea a tatou faaipoipoga e pei o se “maea . . . e sautuatolu [lea] e lē vave motusia.”—Fai. 4:12.

Pe E te Manatua?

• O le ā le uiga o le iai o Ieova i se faaipoipoga?

• O le ā e ao ona fai e paaga faaipoipo pe a tutupu faafitauli?

• E faapefea ona tatou iloa o loo iai le Atua i se faaipoipoga?

[Fesili mo le Suʻesuʻega]

[Ata i le itulau 18]

O le tatalo faatasi, e fesoasoani i ulugalii faaipoipo ina ia fesagaʻia ai tulaga faigatā