Manatu Tāua Mai Tusi iā Tito ma Filemoni, ma le Tusi i Eperu
O Loo Ola le Afioga a Ieova
Manatu Tāua Mai Tusi iā Tito ma Filemoni, ma le Tusi i Eperu
INA ua mavae ona faasaʻoloto le aposetolo o Paulo mai i lona uluaʻi faafalepuipuiina i Roma i le 61 T.A., na ia asiasi atu ai i le motu o Kereta. Ina ua iloa e Paulo e manaʻomia ona faamalosia le tulaga faaleagaga o le faapotopotoga i inā, na ia tuu ai Tito e fesoasoani iā i latou. Mulimuli ane, e foliga mai a o iai i Maketonia, na tusi atu ai e Paulo se tusi iā Tito e faatonutonu ai le faia o ona tiute ma faailoa atu lona lagolagoina o le galuega a Tito.
E muamua atu i lenā, a o toeitiiti lava faasaʻolotoina o ia mai le falepuipui i le 61 T.A., na tusia e Paulo lana tusi iā Filemoni, o se uso Kerisiano sa nofo i Kolose. O se ʻaiʻoiga i se uō.
Pe tusa o le 61 T.A., na tusi ai foʻi e Paulo se tusi i uso talitonu Eperu sa i Iutaia, lea sa ia faailoa atu ai le tāua ma le silisili o le faa-Kerisiano nai lo faiga o mea faa-Iutaia. O loo maua i nei tusi uma e tolu fautuaga aogā mo i tatou.—Epe. 4:12.
IA MALOLOSI PEA I LE FAATUATUA
Ina ua uma ona taʻu atu e Paulo taʻiala mo le ‘tuuina atu o tofiga i toeaina i lea aai ma lea aai,’ ona ia fautua atu lea iā Tito ina ia “aʻoaʻi atu pea iā i latou, ina ia latou malolosi i le faatuatua.” Sa ia lapataʻia i latou uma i Kereta e “teena amioga faalēmataʻu . . . , ma ia ola ma le mafaufau lelei.”—Tito 1:5, 10-13; 2:12.
Sa avatu foʻi e Paulo nisi fautuaga e fesoasoani ai i uso i Kereta ina ia malolosi pea i le faatuatua. Na ia faatonuina Tito ina “ia ʻaloese mai fesili valea, . . . ma finauga i le Tulafono.”—Tito 3:9.
Taliina o Fesili Faale-Tusi Paia:
1:15—E faapefea ona “mamā mea uma i tagata e mamā o latou mafaufau,” ae e lē mamā “i tagata e palapalā o latou mafaufau”? E maua le tali pe a malamalama i le uiga o upu a Paulo e faatatau i “mea uma.” E leʻi tautala Paulo i mea e taʻusalaina e le Afioga tusia a le Atua, ae na ia tautala e uiga i mea e fai e le tagata talitonu lava ia le filifiliga e tusa ma lona lotofuatiaifo. O le tagata la e mafaufau i mea e ōgatusa ma taʻiala a le Atua, o mea na e mamā. Ae e lē mamā i le tagata e sesē lona mafaufau ma palapalā lona lotofuatiaifo. *
3:5—E faapefea i Kerisiano faauuina ona ‘faaolaina e ala i le faataeleina,’ ma ‘faafouina e le agaga paia’? Ua ‘faaolaina i latou e ala i le faataeleina’ i le uiga faapea ua faataeleina e le Atua, pe ua faamamāina i latou i le toto o Iesu e ala i le tāua o le taulaga togiola. Ua ‘faafouina i latou e le agaga paia’ ona ua avea i latou ma “foafoaga fou” o ni atalii faauuagagaina o le Atua.—2 Kori. 5:17.
Lesona mo i Tatou:
1:10-13; 2:15. E tatau i toeaina Kerisiano ona lototetele e faasaʻo mea sesē i totonu o le faapotopotoga.
2:3-5. I le pei o Kerisiano i le uluaʻi senituri, e ao i tuafāfine Kerisiano matutua i aso nei ona “pei a latou amio o tagata paia, e lē faitala taufaaleaga, e lē faapologaina i le inu tele i le uaina, o ē e aʻoaʻo atu i mea lelei.” O le faia faapea, latou te taulau ai i le avatu o se fesoasoani totino i “fafine talavou” o loo i le faapotopotoga.
3:8, 14. O lo tatou manatua o le “tausisi i galuega lelei,” e ‘lelei ma e aogā,’ auā e fesoasoani iā i tatou e fua mai ai i le auaunaga i le Atua, ma faaauau ai pea ona tatou vavae ese mai le lalolagi amioleaga.
ʻAIʻOI ATU E FAAVAE ‘I LE ALOFA’
Sa taʻuleleia Filemoni ona o le avea ma faaaʻoaʻoga o le ‘alofa ma le faatuatua.’ Ona o le avea o ia ma puna o faalaeiauga i uso Kerisiano, sa ‘matuā tele ai le olioli ma faamāfanafanaina’ ai Paulo.—File. 4, 5, 7.
Ua faataatia e Paulo se faaaʻoaʻoga mo toeaina uma, i le auala na ia taulimaina ai le mataupu maʻaleʻale e faatatau iā Onesemo, e ala i le ʻaiʻoi atu e faavae ‘i le alofa,’ ae lē o le fai atu o se faatonuga. Na ia fai atu iā Filemoni: “Ua ou tusi atu iā te oe, auā ou te talitonu o le a e gauaʻi mai, ma ou te iloa e sili atu mea e te faia i lo o mea ua ou fai atu ai.”—File. 8, 9, 21.
Taliina o Fesili Faale-Tusi Paia:
10, 11, 18—Sa faapefea ona “aogā” Onesemo o lē sa “lē aogā muamua”? O Onesemo, o se pologa lē usitaʻi sa sola ese mai le aiga o Filemoni i Kolose ma alu atu i Roma. Atonu sa gaoia foʻi e Onesemo se mea mai lona matai e aogā i lana malaga e 900-maila (1,400 kilomita) le mamao. O lea la, sa leai sona aogā iā Filemoni. Ae a o iai i Roma, sa fesoasoani ai Paulo iā Onesemo e avea ma Kerisiano. Ona o lea ua fai lenei pologa sa “lē aogā” ma uso faaleagaga, ua avea ai o ia ma se tasi e “aogā.”
15, 16—Aiseā na lē fai ai Paulo iā Filemoni e faasaʻoloto Onesemo? Sa tausisi Paulo i lona tofiga o le ‘talaʻi atu lea o le malo o le Atua iā i latou, ma aʻoaʻo atu ma le lē taofiofia mea e uiga i le Alii o Iesu Keriso.’ O lea, na ia filifili ai e aua neʻi aafia o ia i mataupu fai a tagata, e pei o mataupu e faatatau i pologa.—Galu. 28:31.
Lesona mo i Tatou:
2. Sa faaaogā le fale o Filemoni e fai ai sauniga faa-Kerisiano.O se faaeaga le faia o faatasiga mo le galuega talaʻi i o tatou fale.—Roma 16:5; Kolo. 4:15.
4-7. E ao ona tatou tausolomua e faamālō atu i uso talitonu o ē ua fai ma faaaʻoaʻoga o le faatuatua ma le alofa.
15, 16. E lē tatau ona tatou faataga mea e faalētonu i le olaga e faapopoleina ai i tatou. O le faia faapea, o le a aogā lea iā i tatou, e pei lava o le mea sa tupu iā Onesemo.
21. Na faatalitalia e Paulo Filemoni e faamagalo atu iā Onesemo. E faapena foʻi ona faatalitalia i tatou ina ia faamagalo atu i se uso ua faia se mea sesē iā i tatou.—Mata. 6:14.
‘IA FINAFINAU E AVEA MA TAGATA MATUTUA’ FAALEAGAGA
Ina ia faamaonia, o le faatuatua i le taulaga togiola a Iesu e sili atu i lo galuega o le Tulafono, ua faamatilatila mai ai e Paulo le silisili o Lē na Amataina le faa-Kerisiano, lona tulaga faaositaulaga, lana taulaga, ma le feagaiga fou. (Epe. 3:1-3; 7:1-3, 22; 8:6; 9:11-14, 25, 26) Atonu na fesoasoani lenei malamalamaga i Kerisiano Eperu, ina ia onosaia ai sauāga mai tagata Iutaia. Ua faalaeiauina e Paulo uso talitonu i Eperu ina ‘ia finafinau e avea ma tagata matutua’ faaleagaga.—Epe. 6:1.
Aiseā e tāua ai i Kerisiano ona faaalia le faatuatua? Ua tusi Paulo: “A aunoa ma le faatuatua e lē mafai ona faafiafiaina ai [le Atua].” Sa ia faalaeiauina uso i Eperu: “Ia tatou taufetuli ma le onosai i le tuuga o loo i o tatou luma,” e ala i le faatuatua.—Epe. 11:6; 12:1.
Taliina Fesili Faale-Tusi Paia:
2:14, 15—Ona o Satani ua “māfua ai le oti,” po o lona uiga la e mafai ona ia faapogaia le oti o so o se tagata pe a ia manaʻo i ai? E leai, e lē mafai. Peitaʻi, mai le amataga ina ua amioleaga Satani i Etena, o lana pepelo na māfua ai le oti, ona na agasala ai Atamu ma tuufaasolo mai ai i tagata uma le agasala ma le oti. (Roma 5:12) Ae e lē gata i lea, ua sauāina foʻi e ʻau faalelalolagi a Satani auauna a le Atua ma oo ina maliliu ai, e pei ona latou faia iā Iesu. Ae e lē faapea ai ua iā Satani le mana e fasiotia ai so o se tagata e manaʻo i ai. Ana faapea o le tulaga lenā e iai, semanū ua leva ona ia faia faapea i tagata tapuaʻi o Ieova. E puipuia e Ieova ona tagata, ma e na te lē faatagaina Satani e faaumatia i latou. E ui lava e lē o taofia e le Atua le oti o nisi o i tatou ona o osofaʻiga a Satani, ae ua tatou mautinoa lelei, o le a toe faaleleia e le Atua mea leaga uma lava e oo iā i tatou.
4:9-11—E faapefea ona tatou “ulu atu i le mālōlōga o le Atua”? I le faaiʻuga o le aso lona ono o le foafoaga, na mālōlō ai le Atua mai ana galuega o le foafoaga, ma lona mautinoa o le a faataunuuina lana fuafuaga e faatatau i le lalolagi ma tagata. (Kene. 1:28; 2:2, 3) E tatou te “ulu atu i [lenā] mālōlōga,” e ala i le ʻalofia o galuega e taʻutonuina ai i tatou lava ae talia le sauniuniga a le Atua mo lo tatou faaolataga. Pe a tatou faatuatua iā Ieova ma mulimuli atoatoa i lona Alo nai lo le saʻilia o o tatou lava manaʻoga manatu faapito, o le a tatou olioli ai i faamanuiaga e faafouina ma toʻafilemu ai i aso uma.—Mata. 11:28-30.
9:16—O ai le “tagata o loo faataunuuina” le feagaiga fou? O Ieova o ia Lē na faia le feagaiga fou, a o Iesu o ia o le “tagata o loo faataunuuina.” O Iesu le Puluvaga o lenā feagaiga, ma e ala i lona maliu na ia saunia ai le taulaga na manaʻomia e faamaonia ai.—Luka 22:20; Epe. 9:15.
11:10, 13-16—O le ā le “aai” sa faatalitali i ai Aperaamo? E lē o se aai moni ae o se aai faafaatusa. Na faatalitali Aperaamo i le “Ierusalema faalelagi,” lea e aofia ai Iesu Keriso ma le 144,000 o ē pule faatasi ma ia. O loo taʻua foʻi nei pule faatasi ma Iesu i o latou tulaga mamalu i le lagi, o se “aai paia o Ierusalema Fou.” (Epe. 12:22; Faaa. 14:1; 21:2) O lea la, sa faatalitali Aperaamo e ola i le taimi o le pulega a le Malo o le Atua.
12:2—O le ā le ‘olioli sa i luma o Iesu,’ lea “na tumau ai o ia e ui ina faapuapuagatia i le laau”? O le olioli lea ona o le vaai atu i mea na faataunuuina e ala i lana faiva—e aofia ai le faapaiaina o le suafa o Ieova, le lagolagoina o le pule silisili ese a le Atua, ma le laveaʻia o tagata mai le oti e ala i lana taulaga togiola. Sa taulaʻi atu foʻi Iesu i le taui o le avea lea ma Tupu ma Ositaulaga Sili mo le lelei o tagata.
13:20—Aiseā ua taʻua ai le feagaiga fou o le feagaiga e “faavavau”? E tolu māfuaaga: (1) O le a lē mafai ona toe suia, (2) e tumau pea mea o loo faataunuuina ai, ma le (3) o le a faaauau pea ona aogā i “isi mamoe,” pe a māeʻa Amaketo.—Ioa. 10:16.
Lesona mo i Tatou:
5:14. E ao ona tatou maelega o ni tagata aʻoga o le Afioga a le Atua, ma ia faatatau mea o loo tatou aʻoaʻoina mai ai. E na o le pau lea o le auala e tatou te maua ai le “mafaufau e iloa le mea saʻo ma le mea sesē ina ua aʻoaʻoina.”—1 Kori. 2:10.
6:17-19. O le mausalī o lo tatou faamoemoe e faavae mai i folafolaga a le Atua ma lana tautoga, e fesoasoani lea iā i tatou ia lē see ese ai mai le savali i le ala o le upu moni.
12:3, 4. Nai lo le “lē lavavā ma faavaivai” ona o tofotofoga ma faafitauli laiti e tatou te fesagaʻi, e ao ona tatou agaʻigaʻi i luma faaleagaga ma taumafai e faaleleia lo tatou tomai e onosaia ai tofotofoga. E ao ona tatou matuā teena seʻia ‘oo lava i le faamaligiina o o tatou toto,’ o lona uiga seʻia oo lava i le oti.—Epe. 10:36-39.
12:13-15. E lē tatau ona tatou faataga se “aa oona,” po o so o se isi i totonu o le faapotopotoga e faitio i le auala o loo faia ai mea, e taofia ai i tatou mai le ‘faasaʻoina o ala mo o tatou vae.’
12:26-28. O “mea ia na faia” e se tasi e ese mai i le Atua, e aofia ai lenei faiga atoa o mea, e oo lava i le “lagi” amioleaga, o le a lūlūina e lē toe iai. Pe a tupu lenā mea, e na o “mea e leʻi lūlūina” o le Malo lea ma ē e lagolagoina o le a tumau. E matuā tāua tele ai la ona tatou maelega pea i le folafolaina o le Malo ma ola e tusa ma ona mataupu silisili!
13:7, 17. O le teulotoina pea o lenei fautuaga e uiga i le usiusitaʻi ma gauaʻi i toeaina i le faapotopotoga, o le a fesoasoani iā i tatou e faaalia ai le agaga felagolagomaʻi.
[Faaopoopoga i lalo]