O le ā se Mea e Avatu Ina ia E Ola ai e Faavavau?

“O le ā se mea e avatu e se tagata e sui aʻi lona ola?”—MATA. 16:26.

1. Aiseā na teena ai e Iesu le aʻoaʻiga a Peteru?

SA TEʻI le aposetolo o Peteru i mea sa ia faalogo i ai. Ona sa fetalai “saʻo” atu Iesu Keriso lona taʻitaʻi e pele iā te ia, ua toeitiiti faapuapuagatia o Ia ma maliu ai! E mautinoa lava na lelei le uunaʻiga na iā Peteru, ma ia aʻoaʻia ai Iesu i le faapea atu: “Le Alii e, soia e te manatu faapena, e lē taitai tutupu na mea iā te oe.” Ona liliu atu lea o le tua o Iesu iā Peteru ma silasila atu i isi soo. Atonu sa i iai foʻi i na soo lenā manatu sesē. Ona ia fetalai atu lea iā Peteru: “Satani e, inā alu ese ia oe, auā e lē o manatu o le Atua ua e manatu ai, a o manatu o tagata.”—Mare. 8:32, 33; Mata. 16:21-23.

2. Na faapefea ona faamatalaina e Iesu mea e faatalitalia mo se soo moni?

² Atonu na fesoasoani fetalaiga na sosoo ai a Iesu iā Peteru, na te iloa ai le māfuaaga o le matuā teena e Iesu o lana aʻoaʻiga. “Ua ia valaau atu i le motu o tagata e ō mai iā te ia ma ona soo” ma fetalai atu: “A fia mulimuli mai se tasi iā te aʻu, ia faafitia e ia o ia lava ma amo le laau e faapuapuagatia ai o ia, ma mulimuli mai pea iā te aʻu. Auā o sē e fia faasaoina lona ola, e lē maua e ia; ae o sē e oti ona o aʻu ma le tala lelei, e toe ola o ia.” (Mare. 8:34, 35) E manino mai, e lē gata o le a ia faataulagaina lona ola, ae sa ia faatalitalia ē na mulimuli iā te ia e nofo sauni e faataulagaina o latou ola i le auaunaga a le Atua. A latou faia faapea, o le a telē so latou taui e maua.—Faitau le Mataio 16:27.

3. (a) O ā fesili na fesili atu ai Iesu i lana ʻaufaalogologo? (e) Faamata o le ā le mea na faamanatu mai e le fesili lona lua a Iesu i lana ʻaufaalogologo?

³ E lua ni fesili faatupu manatu na lāgā e Iesu i lenā taimi: “O le ā le aogā i le tagata pe afai na te maua le lalolagi uma ae maʻimau ai lona ola?” ma le “O le ā foʻi se mea o le a avatu e le tagata e sui aʻi lona ola?” (Mare. 8:36, 37) E manino ma e faigofie i tagata le tali o le fesili muamua. E leai ma se aogā e maua ai e se tasi le lalolagi uma ae maʻimau ai lona ola. E aogā ma fiafia se tagata i meafaitino pe afai o ola. O le fesili lona lua a Iesu: “O le ā foʻi se mea o le a avatu e le tagata e sui aʻi lona ola?” Atonu na faamanatu ai i ē na faalogologo ane, le tuuaʻiga  a Satani i le vaitaimi o Iopu e faapea: “O mea uma foʻi ua i ai i le tagata, e avatua e ia e sui aʻi lona ola.” (Iopu 2:4) Mo i latou e lē tapuaʻi iā Ieova, e ono moni iā i latou upu a Satani. E toʻatele e latou te lafoaʻi so o se mataupu silisili tau amio, ona o lo latou mananaʻo e ola pea. Ae e ese la le vaaiga a Kerisiano.

4. Aiseā ua matuā uigā ai fesili a Iesu mo Kerisiano?

⁴ Ua tatou iloa e leʻi afio mai Iesu i le lalolagi e aumaia le soifua mālōlōina, le tamaoaiga, ma se olaga umi i lenei lalolagi. Na afio mai o ia e tuuina mai le avanoa e ola ai e faavavau i le lalolagi fou, ma o le faamoemoe mo lenā olaga e tatou te matuā faatāuaina. (Ioa. 3:16) E malamalama se Kerisiano i le fesili muamua a Iesu e uiga faapea, “O le ā le aogā i le tagata pe afai na te maua le lalolagi uma ae maʻimau ai lona faamoemoe o le ola e faavavau?” O le tali i ai, E matuā leai lava se aogā. (1 Ioa. 2:15-17) Ina ia fesoasoani iā i tatou e tali le fesili lona lua a Iesu, tatou te ono fesili ifo ai iā i tatou lava, ‘O le ā le tele o se faataulagaina ua ou malie e fai ina ia faamautinoa ai loʻu faamoemoe o le ola e faavavau i le lalolagi fou?’ O la tatou tali i lenā fesili, e atagia atu i le auala o loo tatou ola ai, ma faaalia ai le malosi o lenā faamoemoe i o tatou loto.—Faatusatusa i le Ioane 12:25.

5. E faapefea ona tatou maua le meaalofa o le ola e faavavau?

⁵ E mautinoa lava, e leʻi faapea mai Iesu e maua le ola e faavavau i a tatou galuega. O le ola, e oo lava i lo tatou olaga puupuu i lenei faiga o mea, o se meaalofa. E lē mafai ona tatou faatau mai pe faia se mea e te maua ai. E na o le pau le auala e mafai ona tatou maua ai le meaalofa o le ola e faavavau, o le ‘⁠faatuatua iā Keriso Iesu’ ma Ieova, o lē “na te tauia ē e matuā saʻili iā te ia.” (Kala. 2:16; Epe. 11:6) E ui i lea, e tatau ona faaalia le faatuatua e ala i gaoioiga, auā e “mate le faatuatua pe a leai ni galuega.” (Iako. 2:26) O lea la, pe a faaauau ona tatou manatunatu loloto i le fesili a Iesu, e tatau la ona tatou iloilo totoʻa po o le ā le tele o le a tatou lafoaʻi ai lenei faiga o mea, ma o le ā o loo tatou malilie e fai i le auaunaga iā Ieova e faaalia ai o loo ola moni lo tatou faatuatua.

“E Oo Lava i le Keriso Na te Leʻi Faafiafia i Lona Lava Loto”

6. O le ā na faamuamua e Iesu?

⁶ Nai lo le taulaʻi atu i mea o loo maua i le lalolagi, sa uaʻi atu Iesu i mea e sili atu ona tāua ae teena le faaosoosoga o le saʻilia o meafaitino e faafaigofie ai le olaga. Sa ola o ia i se olaga e faataulaga ma gauaʻi atu i le Atua. Nai lo le faafiafia o ia lava, na ia fetalai mai: ‘Ou te faia pea mea e fiafia i ai le finagalo o le Atua.’ (Ioa. 8:29) O le ā le telē o le faataulaga na faia e Iesu e faamalieina ai le Atua?

7, 8. (a) O le ā le faataulaga na faia e Iesu, ma na faapefea ona tauia o ia? (e) O le ā le fesili e tatau ona fesili ai le tagata iā te ia lava?

⁷ Na iai se taimi na fetalai atu ai Iesu i ona  soo: “E leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.” (Mata. 20:28) Muamua atu, ina ua lapataʻia e Iesu ona soo ua toeitiiti ona ‘foaʻi atu lea o lona ola,’ sa finau atu Peteru e lē oo lenā mea iā te ia. E leʻi maluelue ai le taofi o Iesu. Sa ia lotomalie e faataulagaina lona ola faaletagata lelei atoatoa mo tagata uma. Ona o lona olaga lē manatu faapito, sa faamautūina ai le lumanaʻi o Iesu. Sa faatūina o ia ma “faaeaina o ia i le itu taumatau o le Atua.” (Galu. 2:32, 33) Sa avea o ia ma faaaʻoaʻoga mataʻina mo i tatou.

⁸ Sa fautuaina e le aposetolo o Paulo ia Kerisiano i Roma e ‘⁠aua neʻi faafiafia i o latou lava loto’ ma faamanatu iā i latou “e oo lava i le Keriso, na te leʻi faafiafia i lona lava loto.” (Roma 15:1-3) O lea la, o le ā le tele o le a tatou faatatauina ai lenei fautuaga mai le aposetolo, ma tuuina atu i tatou e faaaʻoaʻo iā Keriso?

E Finagalo Ieova e Avatu le Mea e Sili Ona Lelei

9. O le ā e fai e se Kerisiano pe a ia tuuina atu o ia i le Atua?

⁹ I Isaraelu anamua, na faapea mai le Tulafono a Mose e faatatau i pologa Eperu e ao ona faasaʻolotoina i latou a lē i le tausaga lona fitu o le avea ai o i latou ma pologa, po o le tausaga o le Iupeli. Ae peitaʻi, sa iai foʻi se isi filifiliga e mafai ona latou faia. Pe afai ua alofa se pologa i lona matai, e mafai ona ia filifili e avea pea o ia ma pologa i lona olaga atoa. (Faitau le Teuteronome 15:12, 16, 17.) E tatou te faia se filifiliga faapena pe a tuuina atu i tatou i le Atua. Ua tatou filifili ma lotomalilie e fai le finagalo o le Atua, ae lē mulimuli i o tatou faanaunauga. O lo tatou faia faapea, ua faaalia ai le loloto o lo tatou alofa mo Ieova ma lo tatou faanaunauga e auauna iā te ia e faavavau.

10. I le ā le itu ua avea ai i tatou ma mea totino a le Atua, ma e faapefea ona aafia ai o tatou mafaufauga ma gaoioiga i lenā mea?

¹⁰ E faamālō atu pe afai o loo e suʻesuʻeina le Tusi Paia ma Molimau a Ieova i le taimi nei, faia se sao i le talaʻia o le tala lelei, ma auai i sauniga. Matou te faamoemoe ua toeitiiti ona e lagona lea o le uunaʻiga e tuuina atu oe iā Ieova ma e fesili ifo i le fesili lea na fesili ai le Aitiope iā Filipo: “O le ā se mea e taofia ai aʻu mai le papatisoina?” (Galu. 8:35, 36) O lau faiā ma le Atua o le a pei o Kerisiano ia na tusi atu i ai Paulo e faapea: “E lē o toe pule foʻi outou iā te outou, auā e taugatā le tau na faatauina mai ai outou.” (1 Kori. 6:19, 20) Pe i le lagi po o le lalolagi lo tatou faamoemoe, afai ua tuuina atu i tatou iā Ieova, o ia la e Pule iā i tatou. E tāua tele le taofia o o tatou faanaunauga manatu faapito ma ‘soia le faia o tatou ma pologa a tagata’! (1 Kori. 7:23) Maʻeu se faaeaga o le avea ma auauna faamaoni a Ieova, e na te faaaogā i tatou e tusa ma lona finagalo!

11. O ā taulaga o loo uunaʻia Kerisiano e ofoina atu, ma o le ā le uiga moni o lenā mea, e pei ona faaataina mai i taulaga i le Tulafono a Mose?

¹¹ Na apoapoaʻi atu Paulo i uso talitonu: “Ia tuuina atu o outou tino o le taulaga ola, e paia, ma e mālie i le Atua, ia faia le auaunaga paia ma lo outou mafaufau lelei.” (Roma 12:1) O upu na atonu sa faamanatu atu ai i Kerisiano Iutaia a latou taulaga sa faia o se vaega o la latou tapuaʻiga, a o leʻi avea ma soo o Iesu. Sa latou iloa i le Tulafono a Mose, o taulaga e ofo atu i le fata faitaulaga a Ieova e faia i manu e sili ona lelei. E lē talia ni manu e faalētonu. (Mala. 1:8, 13) E faapena foʻi pe a tatou tuuina atu o tatou tino o se “taulaga ola.” E tatou te tuuina atu iā Ieova mea silisili, ae lē o mea ua totoe ina ua uma ona faamalieina o tatou lava manaʻoga. Ina ua tuuina atu i tatou i le Atua, ua tatou tuuina atu atoatoa o tatou “ola,” lea e aofia ai lo tatou malosi, mea totino, ma agavaa iā te ia. (Kolo. 3:23) E faapefea ona tatou faatatauina lenei mea i o tatou olaga?

Ia Faaaogā Tatau le Taimi

12, 13. O le ā se auala e mafai ona tatou tuuina atu ai le mea sili tatou te mafai iā Ieova?

¹² O se auala e tuuina atu ai iā Ieova le mea sili tatou te mafai, o le faaaogā tatau lea o o tatou taimi. (Faitau le Efeso 5:15, 16.) E  manaʻomia ona pulea lelei lea vala. O taaʻiga mai le lalolagi ma le tuufaasolo mai o le lē lelei atoatoa, e uunaʻia ai i tatou e faaaogā le taimi i mea e tatou te fiafia ai ma aogā iā i tatou. E moni, “o le mea ma lona tausaga i mea uma,” e aofia ai mālōlōga, tafaoga ma galuega totogi lea e mafai ai ona faataunuuina o tatou tiute o ni Kerisiano. (Fai. 3:1) Peitaʻi, o se Kerisiano tuuina atu e manaʻomia ona paleni ma faaaogā tatau lona taimi.

¹³ Ina ua asiasi atu Paulo i Atenai, sa ia mātauina “ua faaalu vale e tagata Atenai ma tagata ese o loo aumau i inā, lo latou taimi e faamatala ai se mea, pe faalogologo foʻi i se mea fou.” (Galu. 17:21) I aso nei, e toʻatele i latou e faamaʻimau faapena o latou taimi. Ua aofia i faatosinaga i aso nei le matamata i televise, taalo i taaloga vitiō, ma le faaaogāina o le Initaneti. Ua faatupulaʻia le aofaʻiga o faatosinaga ua faoa ai o tatou taimi. Pe a tatou lolo atu i na mea, tatou te ono lē amanaʻia ai o tatou manaʻoga faaleagaga. Atonu foʻi e iā i tatou le talitonuga ua leai se taimi mo “mea e sili ona tāua,” o mataupu e fesootaʻi atu i le auaunaga iā Ieova.—Fili. 1:9, 10.

14. O ā fesili e ao ona tatou uaʻi faapitoa atu i ai?

¹⁴ O lea la, i le avea ma auauna tuuina atu a Ieova, ia fesili ifo iā te oe lava, ‘Po o aofia i laʻu faasologa o aso taʻitasi se taimi mo le faitauina o le Tusi Paia, manatunatu loloto ai, ma le tatalo?’ (Sala. 77:12; 119:97; 1 Tesa. 5:17) ‘Po o ou faaavanoa se taimi e sauniuni ai mo sauniga Kerisiano? Po o ou faalaeiauina isi e ala i le faia o soʻu sao i le sauniga?’ (Sala. 122:1; Epe. 2:12) Ua faapea mai le Afioga a le Atua, sa faaalu e Paulo ma Panapa ‘⁠se taimi umi e tautatala atu ai ma le lototetele e ala i le pule mai iā Ieova.’ (Galu. 14:3) Pe mafai ona fetuunaʻi lou tulaga ina ia faaalu se “taimi” e umi atu i le talaʻiga, atonu foʻi e auauna o se paeonia?—Faitau le Eperu 13:15.

15. E faapefea ona faaaogā tatau taimi o toeaina?

¹⁵ Ina ua asiasi atu le aposetolo o Paulo ma Panapa i le faapotopotoga Kerisiano i Anetioka, na ‘tele aso na latou nonofo ai ma le ʻauuso’ ina ia faalaeiauina i latou. (Galu. 14:28) O toeaina agaalofa i aso nei ua faapena foʻi ona latou faaaluina le tele o lo latou taimi e faamalosiau ai i isi. E faaopoopo atu i la latou galuega talaʻi, e galulue malosi foʻi toeaina i le leoleoina o le lafu, saʻilia o mamoe leiloloa, fesoasoani i ē ua mamaʻi, ma taulimaina le tele o isi tiute i le faapotopotoga. Pe afai o oe o se uso papatiso, pe mafai ona e aapa atu mo isi faaeaga i le auaunaga pe a tusa ai ma lou tulaga?

16. O ā ni auala e mafai ai ona tatou “faia mea lelei . . . i ē tatou te aiga i le faatuatua”?

¹⁶ E toʻatele ua maua le olioli e ala i le fesoasoani iā i latou ua faaleagaina meatotino ona o mala mai tagata, ma mala faalenatura. O se faaaʻoaʻoga, o se tuafafine ua silia ma le 60 tausaga lona matua ma o loo auauna i Peteli, e mamao nofoaga sa masani ona ia malaga atu i ai mo le faia o fesoasoani laveaʻi. Aiseā na ia faaaogā ai ona aso mālōlō mo na mea? Sa ia faapea mai: “E ui e leai saʻu taleni faapitoa, ae o se faaeaga le mafai ona fesoasoani po o le ā lava le mea e manaʻomia ona fai. Sa matuā faalaeiauina aʻu i loʻu vaai atu i le malosi o le  faatuatua o uso ma tuafāfine ua faaleagaina le tele o a latou meatotino.” E lē gata i lea, e faitau afe o loo fesoasoani e fausia Maota mo Sauniga ma Maota mo Fonotaga i le lalolagi aoao. I le faia o se sao i na galuega, e tatou te mafai ai ona “faia mea lelei . . . i ē tatou te aiga i le faatuatua” e aunoa ma le manatu faapito.—Kala. 6:10.

“Ou te Faatasi ma Outou i Aso Uma Lava”

17. O le ā o le a e avatu e maua ai le ola e faavavau?

¹⁷ O tagata uma ua faaesea mai le Atua o le a mavae atu. E tatou te lē iloa po o afea tonu e tupu ai lenā mea. E ui i lea, ua tatou iloa “ua itiiti le taimi o totoe” ma ua “suia le tulaga o mea a lenei lalolagi.” (Faitau le 1 Korinito 7:29-31.) O lea ua sili ai ona tāua iā i tatou le uiga o le fesili a Iesu e faapea: “O le ā se mea e avatu e se tagata e sui aʻi lona ola?” E mautinoa e so o se mea e faafinagaloina e Ieova mai iā i tatou o le a tatou faia ina ia maua ai le “ola moni.” (1 Timo. 6:19) O lea la, e tatau ona tatou utagia timaʻiga a Iesu e ‘mulimuli pea iā te ia’ ma “saʻili muamua le malo.”—Mata. 6:31-33; 24:13.

18. O le ā le faamautinoaga e mafai ona tatou maua, ma aiseā?

¹⁸ O le mea moni, e lē faigofie i taimi uma ona mulimuli iā Iesu, ma ua maliliu ai nisi a o faagasolo lenei faiga o mea e tusa ai ma le lapataʻiga a Iesu. E ui i lea, i le pei o Iesu, e tatou te ʻalofia le faaosoosoina i le manatu e faapea, talosia ia lē tupu se mea faapena iā i tatou. E tatou te faatuatua i le faamautinoaga na ia tuuina atu i ona soo faauuina i le uluaʻi senituri e faapea: “Ou te faatasi ma outou i aso uma lava seʻia oo i le iʻuga o faiga o mea a le lalolagi.” (Mata. 28:20) O lea, ia tatou faaaogā o tatou taimi ma tomai i le mea sili e mafai i le auaunaga paia. A tatou faia faapea, ua faaalia ai lo tatou talitonuina o Ieova o le a faasaoina i tatou i le puapuaga tele, pe toe faafoʻisia mai foʻi lo tatou ola i le lalolagi fou. (Epe. 6:10) O le a faaalia ai lo tatou matuā faatāuaina o le meaalofa o le ola.

O ā Au Tali?

• Sa mataʻina faapefea le faaalia o le lotomalie o Iesu e auauna i le Atua ma tagata?

• Aiseā e faafitia ai e se tagata ia lava, ma e faapefea ona faia lenā mea?

• I Isaraelu anamua, e na o ā ituaiga taulaga na talia e Ieova, ma e faapefea ona tatou faatatauina lenei mea i aso nei?

• O ā auala e mafai ona tatou faaaogā tatau ai o tatou taimi?

[Fesili mo le Suʻesuʻega]

[Ata i le itulau 26]

Na faia pea e Iesu mea e fiafia ai le finagalo o le Atua

[Ata i le itulau 28]

Sa tuuina atu e tagata Isaraelu loto faafetai mea silisili e lagolago ai le tapuaʻiga moni

[Ata i le itulau 29]

E tatou te faafiafiaina le Atua i le faaaogā tatau o tatou taimi