“O le Suafa Moni Lea o le Atua, e Paia ma Mamalu”
“O le Suafa Moni Lea o le Atua, e Paia ma Mamalu”
O Nicholas e sau mai Cusa sa faia lenei faamatalaga i sana lauga na faia i le 1430. * O se tamāloa na tele ni mea na fiafia ai, o se faaaʻoaʻoga, na ia uaʻi atu i le suʻesuʻeina o le gagana Eleni, Eperu, filosofia, o lotu, matematika, faapea ma fetu ma le vanimonimo. I le 22 o ona tausaga, sa ia maua ai se faailoga taualoa i tulafono a le lotu Katoliko Roma. I le 1448 na tofia ai o ia e fai ma katinale.
I le pe tusa o le 550 tausaga ua mavae, sa faavae ai e Nicholas mai Cusa se fale e tausia ai tagata matutua i Kues, lea ua taʻua nei o Bernkastel-Kues, o se taulaga e tū pe tusa o le 80 maila i saute o Bonn i Siamani. O lenā lava fale , ua iai nei le faletusi o Cusa, lea e maua ai le silia ma le 310 manusikulipi. O se tasi o na manusikulipi o le Codex Cusanus 220 lea e maua ai le lauga a Cusa na faia i le 1430. I lenā lauga, In principio erat verbum (I le Amataga sa iai le Upu), sa faaaogā e Nicholas mai Cusa le faa-Latina o Ieova o Iehoua. * O loo maua i le itulau e 56 le faamatalaga e faatatau i le suafa o le Atua: “Ua tuuina mai le Atua. O le Tetakalamatone, o le faataʻitaʻiga, o le suafa lea e faia aʻe i mataʻitusi e fā. . . . O le suafa moni lea o le Atua, e paia ma mamalu.” E ōgatusa le faamatalaga a Nicholas mai Cusa ma manatu e iai le suafa o le Atua i le uluaʻi tusi o Tusitusiga Eperu.—Eso. 6:3.
O lenei tusi mai anamua (codex) e mai le senituri lona 15 ma o se tasi o faamaumauga aupito i leva, lea e maua ai i le Tetakalamatone le “Iehoua.” O se tasi lea o faamaoniga atili lea e tusia ai le suafa o le Atua e taitutusa ma “Ieova,” ma o le auala lea ua tele ina tusia ai le suafa o le Atua mo le tele o senituri.
[Faaopoopoga i lalo]
^ pala. 2 Sa iloa foʻi Nicholas mai Cusa o Nikolaus Cryfts (Krebs), Nicolaus Cusanus, ma Nikolaus von Kues. O Kues le igoa o le nuu na fanau ai o ia i Siamani.
^ pala. 3 Sa lagolagoina e lana lauga le Tasitolu.
[Ata i le itulau 16]
Faletusi o Cusa