Ia “Loto Faatasi” e Auauna i le Atua

UA FAAPOTOPOTO ane tagata Iutaia ma tagata liulotu i le mea o loo iai soo o Iesu Keriso. O le taimi lea o le Tausamiga o le Penetekoso, ma ua ō mai nei tagata asiasi i Ierusalema mai mea mamao e pei o Roma ma Patia. Ua faalogoina gagana eseese i lenei motu o tagata. Peitaʻi, o soo o Iesu o loo talanoa atu iā i latou, o tagata Kalilaia. Ua fesili atu nisi o tagata asiasi na lē mautonu: “Ae faapefea ona taʻitasi i tatou ma faalogo atu i lana lava gagana na fanau mai ai?”—Galu. 2:8.

Ua tū i luga le aposetolo o Peteru ma faamatala atu le pogai o le vavega o loo latou  molimauina. Ua vave ona talia e le motu o tagata le feʻau. E faitau afe tagata fou na papatisoina! (Galu. 2:41) E ui lava i le tele vave ona tupu o le faapotopotoga, ae o loo tumau pea i le autasi. Ua faapea mai le tusitala o le Tusi Paia, o Luka, “Ua loto faatasi le motu o tagata e toʻatele o ē ua talitonu.”—Galu. 4:32.

E faitau afe i latou o ē na papatiso i le aso o le Penetekoso i le 33 T.A., na mananaʻo e nonofo ai pea i Ierusalema mo se taimi umi, ina ia aʻoaʻoina atili e faatatau i lo latou faatuatuaga fou. Peitaʻi latou te leʻi ō mai sauni e nonofo mo sea taimi umi. O lea, sa faia ai sina saʻiliga seleni i lenā taimi ina ia tausia ai manaʻoga o loo manaʻomia. Sa ofo atu tagata talitonu e faatau atu a latou meatotino ma avatu tau o nei mea i le ʻauaposetolo, ina ia tufatufa atu iā i latou o loo manaʻomia le fesoasoani. (Galu. 2:42-47) Maʻeu se uiga lelei o le alofa ma le limafoaʻi!

O loo iai pea i Kerisiano moni lenā agaga o le alofa ma le limafoaʻi. I aso nei, o loo faaauau pea ona auauna ma le autasi le faapotopotoga Kerisiano iā Ieova, ma le “loto faatasi.” Ua ofo atu ma le lotomalie e Kerisiano lo latou taimi, malosi, ma alāmanuia, e talaʻi atu ai le tala lelei ma faaauiluma ai manaʻoga o le Malo o le Atua.—Tagaʻi i le pusa  “Auala ua Filifilia e Nisi e Faia ai Foaʻi.”

[Pusa i le itulau 6, 7]

 AUALA UA FILIFILIA E NISI E FAIA AI FOAʻI

MEAALOFA MO LE GALUEGA I LE LALOLAGI AOAO

E toʻatele i latou ua faaagaga se vaega tupe e lafo i pusa o loo faailogaina, “Galuega i le Lalolagi Aoao.”

I masina taʻitasi, e avatu ai e faapotopotoga nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona auina atu foaʻi tauofo o tupe i le Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, po o le ofisa o le lālā o Molimau a Ieova o loo vaavaaia lou atunuu. E ao ona tusia le igoa “Watchtower” i se siaki pe a fia faia se foaʻi i lenā auala. E mafai foʻi ona foaʻi atu maatāua po o isi mea tāua. O na foaʻi e tatau ona auina atu faatasi ma se tusi puupuu e faamanino atu ai o lenā foaʻi e leai ni tuutuuga.

FUAFUAGA O FOAʻI E IAI TUUTUUGA

E mafai ona foaʻi atu se tupe e teuina i lalo o se āiāiga faapitoa ma le Watchtower Bible and Tract Society of Pennsylvania, mo le faaaogāina i le lalolagi. Ae e mafai ona toe faafoʻi atu lenā foaʻi i lē e ana le tupe pe a ia talosagaina. Mo nisi faamatalaga, faamolemole faafesootaʻi le Treasurer’s Office e ala i le tusi atu i le tuatusi o loo taʻua i luga, pe telefoni atu foʻi i ai i le (718) 560-7500.

FUAFUAGA O FOAʻI FAAMEAALOFA

E lē gata i foaʻi tuusaʻo tautupe, ae e iai isi auala e faia ai foaʻi ina ia fesoasoani i le galuega o le Malo i le lalolagi. E aofia ai mea nei:

Inisiua: E mafai ona avea le Watch Tower and Tract Society of Pennsylvania, ma faalapotopotoga e uili atu i ai taui po o lē e mauaina le inisiua o le ola o se tasi, po o taui e maua pe a litaea po le penisione.

Teugātupe i le Faletupe: O teugātupe i le faletupe, pepa o teugātupe, po o teugātupe e maua e le tagata pe a litaea, e mafai ona tuu faamavaega mo le Watch Tower and Tract Society of Pennsylvania e tusa ai ma faatulagaga manaʻomia a le faletupe o le atunuu.

Tupe Faafaigaluega (Stocks) ma Pepa Faamaonia mo Tupe (Bonds): O nei mea e mafai ona foaʻi faameaalofa tuusaʻo atu i le Watch Tower Bible and Tract Society of Pennsylvania.

Fanua ma Fale: E mafai ona foaʻi atu au meatotino e pei o fanua po o fale, e ala i le foaʻi saʻo atu, po o le tuu foʻi o le fale po o le fanua e nofo ai pea lē e ana, seʻia oo ina maliu. Ia faafesootaʻi le ofisa o le lālā i lou atunuu a o leʻi faapepaina faaletulafono so o se fanua o le a foaʻi atu.

Tupe Faameaalofa e Iai Tuutuuga (Gift Annuity): O tupe faameaalofa e iai tuutuuga ua faatulaga e se tasi e avatu i se faalapotopotoga faaletulafono o loo faaaogāina e Molimau a Ieova. Ae e maua e lē e ana le foaʻi faameaalofa, po o se tasi ua tofia, se aofaʻiga patino o se tupe e avatu i ai i tausaga taʻitasi a o soifua pea o ia. O le a faaitiitia le lafoga e totogi e le tagata na faia le foaʻi, i le tausaga tonu na faamautū ai lea fuafuaga.

Uili ma Mavaega: E mafai ona faaui atu meatotino po o se vaega tupe i le Watch Tower and Tract Society of Pennsylvania, e ala i se uili ua faia e tusa ai ma le tulafono, pe avea foʻi le Watch Tower Bible and Tract Society of Pennsylvania ma lē e mauaina le taui, o se feagaiga o se teugātupe ua tuu mavaega. O se teugātupe ua tuu faamavaega e faia mo le manuia o se faalapotopotoga faalelotu, e ono maua mai ai nisi fesoasoani tau lafoga.

E pei ona faailoa mai i le faaupuga “foaʻi faameaalofa,” o nei ituaiga o foaʻi, e manaʻomia ai ona fuafua lelei e lē a ana le foaʻi. Ina ia fesoasoani i ē o loo naunau e fesoasoani i le galuega a Molimau a Ieova i le lalolagi aoao, e ala i nisi o foaʻi faameaalofa, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Na tusia le polosiua ina ia saunia ai faamatalaga i auala eseese, e mafai ona fai ai meaalofa i le taimi nei po o le taimi foʻi e maliu ai. Pe a uma ona faitauina le polosiua ma talanoa faatasi ma a latou lōia po o tagata faufautua tau i lafoga, ua mafai ai e le toʻatele ona lagolagoina gaoioiga fesoasoani faalelotu a Molimau a Ieova i le lalolagi aoao, ma maua ai foʻi aogā tau lafoga. E mafai ona maua lenei polosiua mai le Charitable Planning Office.

Mo nisi faamatalaga atili, e mafai ona e faafesootaʻi atu le Charitable Planning Office, e ala i lou tusi atu i le tuatusi pe telefoni atu foʻi i le numera, lea o loo taʻua i lalo, ia pe faafesootaʻi le ofisa o le lālā o Molimau a Ieova i lou atunuu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefoni: (845) 306-0707