“Ia Tetee Atu i le Tiapolo” Faapei Ona Faia e Iesu

“Ia tetee atu i le Tiapolo, ona sola ese ai lea o ia mai iā te outou.”—IAKO. 4:7.

1. O ā teteega na silafia e Iesu o le a ia fesagaʻia i le lalolagi, ma o le ā le iʻuga?

SA SILAFIA e Iesu Keriso o le a oo iā te ia teteega mai le Tiapolo. Na atagia le moni o lenei mea i le fetalaiga a le Atua i le gata, ma sa taulaʻi atu le fetalaiga i le agaga leaga lea na tautala mai ai: “Ou te faatupuina le feitagaʻi iā te oulua ma le fafine [o le vaega i le lagi o le faalapotopotoga a Ieova], o lau fanau foʻi ma lana fanau; na te [Iesu Keriso] tuʻimomomoina lou ulu, a o oe e te tuʻimomomoina lona mulivae.” (Kene. 3:14, 15; Faaa. 12:9) O le tuʻimomomoina o le mulivae o Iesu, o lona uiga o le a mafatia o ia i se tā lē tumau e ala i lona maliu a o iai i le lalolagi, auā o le a toe faatūina o ia e Ieova i lona mamalu i le lagi. Ae o le tuʻimomomoina o le gata i lona ulu, o lona uiga o le a taia le Tiapolo i se tā e oti ai, ma lē toe iai lava e faavavau.—Faitau le Galuega 2:31, 32; Eperu 2:14.

2. Aiseā na mautinoa ai e Ieova o le a taulau Iesu i le tetee atu i le Tiapolo?

² Sa mautinoa e Ieova o le a taulau Iesu i le faatinoina o lona tofiga ma tetee atu i le Tiapolo a o iai i le lalolagi. Aiseā na matuā mautinoa ai e Ieova lenei tulaga? Ona sa ia foafoaina Iesu i le lagi a o leʻi taitai foafoaina isi mea, sa ia mātauina o ia, ma silafia ai o lenei “tufuga” ma le “ulumatua o foafoaga uma,” na usiusitai ma faamaoni. (Faata. 8:22-31; Kolo. 1:15) Ina ua auina mai Iesu i le lalolagi ma faatagaina le Tiapolo e tofotofoina o ia seʻia oo i lona maliu,  sa mautinoa e le Atua o le a taulau lona Alo pele e toʻatasi.—Ioa. 3:16.

E Faasaoina e Ieova Ana Auauna

3. O ā uiga faaalia o le Tiapolo i auauna a Ieova?

³ Sa faasino atu Iesu i le Tiapolo o le “pule o lenei lalolagi” ma lapataʻia Ona soo o le a sauāina i latou, e pei ona faia iā te ia. (Ioa. 12:31; 15:20) O le lalolagi lea o loo nofo toʻilalo i le pule a Satani le Tiapolo, e latou te inosia Kerisiano moni ona o lo latou auauna iā Ieova ma e latou te talaʻia le amiotonu. (Mata. 24:9; 1 Ioa. 5:19) O loo faapitoa lava ona uaʻi atu le Tiapolo i le vaega totoe o le ʻaufaauuina, o ē o le a pule faatasi ma Keriso i lona Malo i le lagi. O loo taulaʻi atu foʻi Satani i Molimau a Ieova e toʻatele o ē o loo i ai le faamoemoe e ola e faavavau i le lalolagi parataiso. Ua lapataʻi mai le Afioga a le Atua: “O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te foloina.”—1 Pete. 5:8.

4. O le ā e faamaonia ai ua taulau tagata o le Atua i le tetee atu i le Tiapolo i aso nei?

⁴ I le avea ma faalapotopotoga o loo olioli i le lagolagosua a Ieova le Atua, ua tatou taulau ai i le tetee atu i le Tiapolo. Mafaufau i manatu nei: I le 100 tausaga ua mavae, sa taumafai ai nisi o taʻitaʻi aupito i sauā i le talafaasolopito e soloa i le fuefue Molimau a Ieova. Ae o loo faaauau pea ona faatupulaʻia le aofaʻi o Molimau ma ua toeitiiti oo atu i le 7,000,000 i le silia ma le 100,000 faapotopotoga i le lalolagi aoao. O taʻitaʻi sauā ia sa sauāina tagata o Ieova, ua soloa i le fuefue!

5. Ua faapefea ona faamaonia le moni o le Isaia 54:17 i le tulaga o auauna a Ieova?

⁵ Ina ua fetalai le Atua i lana “fafine” le faapotopotoga o Isaraelu anamua, na ia folafola atu e faapea: “O auupega uma e faia e tau ma oe e lē manuia ia; o laulaufaiva uma e finau atu iā te oe i le faamasinoga e te faasalaina ia; o le tofi lenā o auauna a Ieova, o a latou amiotonu foʻi mai iā te aʻu.” (Isa. 54:11, 17) Ua faamaonia le moni o lenā folafolaga mo tagata o Ieova i le lalolagi aoao a o faagasolo “aso e gata ai.” (2 Timo. 3:1-5, 13) E faaauau ona tatou tetee atu i le Tiapolo, ma e lē taulau so o se auupega o le a ia taumafai e faaaogā e tafiesea atoatoa ai tagata o le Atua, auā o loo tatou ʻau ma Ieova.—Sala. 118:6, 7.

6. O le ā o loo taʻu mai e le valoaga a Tanielu iā i tatou e tusa ai ma le lumanaʻi o le pulega a le Tiapolo?

⁶ I le iʻuga o lenei faiga o mea amioleaga lea ua matuā lata mai lava, o le a nutimomoia ai vala uma o le pule a Satani. Na faagaeeina le perofeta o Tanielu, e valoia mai e faapea: “O ona po o ia tupu [lea o loo iai i aso nei] e faatūina ai e le Atua o le lagi o le malo [i le lagi] e lē faaumatia e faavavau; o lea malo foʻi, e lē tuuina atu ia i se tasi nuu, na te tuʻimomomoina ma faaumatia ia malo uma lava [lea o loo iai nei], a o ia e tumau lava e faavavau.” (Tani. 2:44) Pe a tupu lenei mea, o le a lē toe i ai se pulega a Satani ma tagata lē lelei atoatoa. O le a matuā leai ma se vala o lenei faiga o mea a le Tiapolo e sao atu, ma o le a lē toe iai se mea e tetee atu i le Malo o le Atua i le lalolagi aoao.—Faitau le 2 Peteru 3:7, 13.

7. E faapefea ona tatou iloa e mafai e auauna taʻitoʻatasi a Ieova ona taulau i le tetee atu i le Tiapolo?

⁷ E mautinoa lava o le a faasaoina le faalapotopotoga a Ieova, ma faaauau ona maua le finagalo malie ma faamanuiaga a le Atua. (Faitau le Salamo 125:1, 2.) Ae faapefea i tatou? O loo faapea mai le Tusi Paia e mafai ona tatou taulau i le tetee atu i le Tiapolo, e pei ona faia e Iesu. Pe a fua i le valoaga lea na tuuina mai e Keriso e ala i le aposetolo o Ioane, ua faaalia ai e ui i le tetee mai o Satani, ae o le a iai “se motu o tagata e toʻatele” o ē e faamoemoe e ola i le lalolagi o le a sao mai le iʻuga o lenei faiga o mea. E tusa ai ma le faamatalaga a le Tusi Paia, o le a latou alalaga atu: “O lo tatou faaolataga e mai le Atua o lē o loo afio i le nofoālii, ma le Tamaʻi Mamoe [Iesu Keriso].” (Faaa. 7:9-14) O le taʻua o le ʻaufaauuina e faapea ua latou manumālō iā Satani, ma o loo taulau foʻi a latou aumea o “isi mamoe” i le tetee atu i le Tiapolo. (Ioa. 10:16; Faaa. 12:10, 11) Ae e manaʻomia i lenei mea ni taumafaiga filigā ma le finafinau i  le tatalo ina ia ‘laveaʻi ai mai lē o loo leaga.’—Mata. 6:13.

Faaaʻoaʻoga Silisili i le Teea o le Tiapolo

8. O le ā le uluaʻi faaosoosoga o loo tusia na faaaogā e le Tiapolo iā Iesu i le vao, ma na faapefea ona tali atu le Keriso?

⁸ Sa taumafai le Tiapolo ia lē faamaoni Iesu. A o iai i le vao, sa faaaogā e Satani ni faaosoosoga i ana taumafaiga ia lē usiusitai Iesu iā Ieova. Peitaʻi, sa faataatia e Iesu se faaaʻoaʻoga silisili i le tetee atu iā Satani. Faatoʻā māeʻa lava ona anapogi Iesu mo le 40 aso ma le 40 pō, atonu sa matuā fia taumafa. Na faapea atu Satani: “Afai o oe o le atalii o le Atua, inā fetalai atu ia i nei maa ia liu falaoa.” Sa lē manaʻo Iesu e faaaogā le mana na maua mai lona Atua mo lona lava lelei. Nai lo le lolo i ai, na fetalai atu Iesu: “Ua tusia, ‘E lē na o meaʻai e ola ai le tagata, ae o afioga uma e tulei mai i le fofoga o Ieova.’”—Mata. 4:1-4; Teu. 8:3.

9. Aiseā e tatau ai ona tatou teena taumafaiga a le Tiapolo, e faaaogā o tatou faanaunauga masani o le tino e toe maileia ai i tatou?

⁹ I aso nei, ua taumafai le Tiapolo e faaaogā faanaunauga masani o le tino o auauna a Ieova e toe osofaʻia ai i latou. E tatau la ona tatou matuā tetee atu i faaosoosoga o feusuaʻiga lē mamā, lea ua taatele i lenei lalolagi ua tumu i amioga lē mamā. O loo timaʻi malosi mai le Afioga a le Atua: “Pe tou te lē iloa ea o tagata amioleaga e lē fai mo latou tofi le malo o le Atua? Aua neʻi faasesēina outou. O ē e faitaaga, o ē e ifo i tupua, o ē e mulilulua, o tauatane, o tane e momoe ma isi tane . . . e lē fai mo latou tofi le malo o le Atua.” (1 Kori. 6:9, 10) Ua manino mai la, o tagata e ola i se olaga lē mamā ma e mumusu e fai ni suiga, o le a lē faatagaina e ola i le lalolagi fou a le Atua.

10. E tusa ai ma le Mataio 4:5, 6, o le ā le isi faaosoosoga na faaaogā e Satani i ana taumafaiga e lepetia ai le faamaoni o Iesu?

¹⁰ E tusa ai ma se tasi o faaosoosoga na fesagaʻia e Iesu i le vao, o loo faapea mai le Tusi Paia: “Ona ave lea o ia e le Tiapolo i le aai paia, ma faatū iā te ia i luga o le pā o le malumalu ma faapea mai: ‘Afai o oe o le atalii o le Atua, inā oso ia i lalō; auā ua tusia, “E na te faatonuina ana agelu latou te ave iā te oe i o latou lima, ina neʻi tuʻia lou vae i se maa.”’” (Mata. 4:5, 6) Atonu na manatu Satani, o le a faaalia ai i inei le mataʻina o le avea o Iesu ma Mesia. Ae o le mea moni, e lē talafeagai, ma o se gaoioiga faasausili lea e ono lē maua ai le finagalo malie ma le lagolagosua a le Atua. Ua toe manumalo foʻi le faamaoni o Iesu iā Ieova ma ia tali atu e ala i le sii atu o se mau. Sa ia fetalai: “Ua tusia foʻi, ‘Aua e te faia se mea e tofotofo ai iā Ieova lou Atua.’”—Mata. 4:7; Teu. 6:16.

11. O ā ni auala e ono faaosoosoina ai e Satani i tatou, ma o le ā le iʻuga e ono oo i ai?

¹¹ E ono faaosoosoina e Satani i tatou e saʻilia le mamalu i ni auala eseese. E ono taumafai  Satani e uunaʻia i tatou e mulimuli atu i se āʻega i lavalava ma teuga, po o le auai atu i ni faafiafiaga e lē talafeagai. A tatou lē amanaʻia fautuaga a le Tusi Paia ae faataʻitaʻi atu i le lalolagi, pe tatou te faatalitalia ea agelu e puipuia i tatou mai āuga leaga o na gaoioiga? E ui sa salamō le tupu o Tavita mai lana agasala ma Patisepa, ae e leʻi puipuia o ia mai āuga o ana gaoioiga. (2 Samu. 12:9-12) Ia aua lava neʻi o tatou tofotofoina Ieova i ni auala lē talafeagai, atonu i le faia o se faauōga ma le lalolagi.—Faitau le Iakopo 4:4; 1 Ioane 2:15-17.

12. O le ā le faaosoosoga o loo taʻua i le Mataio 4:8, 9, ma na faapefea ona tali atu le Alo o le Atua?

¹² O se isi faaosoosoga na faaaogā e le Tiapolo i le vao na aofia ai le ofoina atu o pulega faapolotiki iā Iesu. Sa faaali atu e Satani iā Iesu malo uma o le lalolagi ma lo latou mamalu ma faapea atu: “Ou te avatu nei mea uma iā te oe, pe afai e tau lava ina e faapaʻū ma tapuaʻi mai iā te aʻu.” (Mata. 4:8, 9) O se taumafaiga lē migao le taumafai ia maua le tapuaʻiga lea e na o Ieova e tatau i ai, ma le taumafai e faamalosia Iesu e aua le faamaoni i le Atua! Ona o le taulaʻi atu i lona faanaunauga ia tapuaʻia o ia, na māfua ai ona agasala lenei agelu sa faamaoni muamua, matapeʻapeʻa, ma avea ai loa ma taufaaosooso taufaaleaga o Satani le Tiapolo. (Iako. 1:14, 15) Peitaʻi, na matuā tuufaafeagai le tulaga na iai, sa maumauaʻi Iesu e tumau ma le faamaoni i lona Tamā i le lagi ma faailoa atu: “Inā alu ese ia oe Satani, auā ua tusia, ‘E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.’” O le faia faapea, sa toe teena ai foʻi ma le maumauaʻi e Iesu le Tiapolo. E leʻi finagalo le Alo o le Atua e avea o ia ma vaega o le lalolagi a Satani, ma e lē mafai ona ia tapuaʻia lenei agelu leaga!—Mata. 4:10; Teu. 6:13; 10:20.

“Ia Tetee Atu i le Tiapolo, Ona Sola Ese ai Lea o Ia iā te Outou”

13, 14. (a) I lona faaali atu iā Iesu o malo uma o le lalolagi, o le ā sa ofo atu e le Tiapolo iā te ia? (e) E faapefea ona taumafai Satani e faaleagaina i tatou?

¹³ I le faaali atu iā Iesu o malo uma o le lalolagi, sa ofo atu ai e le Tiapolo le pule uma o malo a tagata. Sa faamoemoe Satani o le a tosina Iesu i mea na tau iai lana vaai, ma faatalitonu ai o ia e filifili e avea ma taʻitaʻi faapolotiki aupito i malosi o le lalolagi. I aso nei, ua lē o toe ofo mai e le Tiapolo ni malo iā i tatou, ae o loo ia taumafai e faaleaga o tatou loto e ala i mea e tatou te vāai, faalogo, ma mafaufau i ai.

¹⁴ O loo pulea e le Tiapolo le lalolagi. O lea la, ua ia pulea ai faasalalauga uma e pei o nusipepa, leitiō, televise, ma mea faapena. E lē faateʻia la i tatou i le faatumulia o mea e matamata, faalogo ma faitau i ai le lalolagi i faiga lē mamā ma le sauā. O loo taumafai faasalalauga faapisinisi a le lalolagi e faapogaia i tatou e manaʻonaʻo i le tele o mea fou ae tatou te lē manaʻomia. E ala mai i nei faatosinaga, ua faaauau ai pea ona faaosoosoina i tatou e le Tiapolo i meafaitino ia e tosina atu ai la tatou vaai, faalogo, ma le mafaufau. Peitaʻi, a tatou teea le matamata, faalogo, ma faitau i manatu e lē ōgatusa ma le Tusi Paia, e tusa o lea ua tatou faapea atu: “Inā alu ese ia oe Satani”! E tusa ua tatou faaaʻoaʻo iā Iesu i le tumau ma le maumauaʻi e tetee atu i le lalolagi lē mamā a Satani. O le lē avea o i tatou ma vaega o le lalolagi a Satani, o loo mātauina foʻi pe a tatou lototetele e faailoa atu i tatou o Molimau a Ieova ma o soo o Iesu i galuega, aʻoga, nuu, ma o tatou aiga.—Faitau le Mareko 8:38.

15. Aiseā e faaauau ai pea ona mataala i le tetee atu iā Satani?

¹⁵ O le faatolu ai ona lē taulau o le Tiapolo i le taumafai e faapogaia Iesu ia lē faamaoni i le Atua, “ona alu ese ai lea o le Tiapolo.” (Mata. 4:11) Peitaʻi, e leʻi manaʻo Satani e faamuta ai i inā ana taumafaiga, auā o loo faapea mai le Tusi Paia: “Ona faaiʻu ai lea e le Tiapolo nei faaosoosoga uma [i le vao], ma alu ese mai iā te ia seʻia oo i se isi taimi talafeagai.” (Luka 4:13) Pe a tatou taulau i le tetee atu i le Tiapolo, e tatau ona tatou faafetaia Ieova. Ae e tatau foʻi ona tatou saʻili atu i le fesoasoani faifai pea a le  Atua, auā e toe foʻi mai le Tiapolo e faaosoosoina i tatou i se isi taimi e fetaui mo ia, ae atonu e lē o le taimi tatou te faatalitalia ai se faaosoosoga. O lea la, e tatau ai ona tatou mataala i taimi uma, ma nofosauni e tuuina atu le auaunaga paia iā Ieova e tusa lava po o le ā le tofotofoga e tatou te fesagaʻia.

16. O le ā le mana aupito i malosi ua auina mai e Ieova iā i tatou, ma aiseā e tatau ai ona tatou tatalo mo lenā fesoasoani?

¹⁶ Ina ia fesoasoani i a tatou taumafaiga e tetee atu i le Tiapolo, e tatau ona tatou tatalo atu, ma o le a tatou maua foʻi le mana aupito i malosi i le aoao o mea uma, le agaga paia o le Atua. O le a mafai ai ona tatou faia mea, e lē au i ai lo tatou malosi. Sa faamautinoa e Iesu i ona soo e mafai ona maua le agaga o le Atua i lona faapea atu: “O outou o ē leaga [ona o le lē lelei atoatoa], afai tou te avatu i a outou fanau meaalofa lelei, e sili atu la ona foaʻi mai e le Tamā o i le lagi le agaga paia iā i latou o ē ōle atu iā te ia!” (Luka 11:13) Seʻi faaauau ona tatou tatalo atu iā Ieova mo lona agaga paia. I le lagolagoina o i tatou e lenei mana aupito i sili ona malosi a o tatou maumauaʻi e tetee atu i le Tiapolo, o le a mafai ai ona tatou taulau. E lē gata i le tatalo faatauanau e lē aunoa, e tatau foʻi ona tatou oofu i le ofutau atoatoa faaleagaga mai le Atua ina ia ‘tutū mausalī e tetee atu i togafiti, po o gaoioiga faaʻoleʻole a le Tiapolo.’—Efe. 6:11-18.

17. O le ā le olioli na fesoasoani iā Iesu e tetee atu ai i le Tiapolo?

¹⁷ Sa iai foʻi se isi mea na fesoasoani iā Iesu e tetee atu ai i le Tiapolo, ma e mafai foʻi ona fesoasoani iā i tatou. Ua taʻua i le Tusi Paia: “Auā o le olioli sa i ona luma, na tumau ai o ia e ui ina faapuapuagatia i le laau, na lē amanaʻia e ia le mā, ma nofo o ia i le itu taumatau o le nofoālii o le Atua.” (Epe. 12:2) E mafai foʻi ona tatou olioli faapena e ala i le lagolagoina o le pule silisili ese a Ieova, faamamaluina o lona suafa, ma lo tatou taulaʻi atu i le taui o le ola e faavavau i le lumanaʻi. Maʻeu se olioli o le a iai pe a aveesea e faavavau galuega a Satani, ae ‘⁠o ē agamalu e fai mo latou le nuu ma faafiafia iā te i latou ona o le manuia e tele’! (Sala. 37:11) O lea la, ia faaauau pea ona tetee atu i le Tiapolo e pei ona faia e Iesu.—Faitau le Iakopo 4:7, 8.

O le ā Lau Tali?

• O ā faamaoniga o loo i ai e faasaoina e Ieova ona tagata?

• Na faapefea ona faataatia e Iesu se faaaʻoaʻoga i le tetee atu iā Satani?

• O ā auala e mafai ai ona e tetee atu i le Tiapolo?

[Fesili mo le Suʻesuʻega]

[Ata i le itulau 29]

O le faauō ma le lalolagi e avea ai i tatou ma fili o le Atua

[Ata i le itulau 31]

Sa teena e Iesu le ofo a Satani o malo uma o le lalolagi