Aiseā e Tausisi ai Pea i Lau Amio Saʻo?

‘Ieova e, ia e faamasino iā te aʻu e tusa ma laʻu amio saʻo.’—SALA. 7:8.

1, 2. O ā nisi o tulaga masani lea e aumaia ai luʻi i le amio saʻo o se Kerisiano?

SEʻI faaāta i lou mafaufau tulaga nei e tolu: O se tamaitiiti o loo faalili e tamaiti o lana vasega. O loo latou taumafai e faalili o ia ina ia ita, ma atonu e na te faia ai ni faamatalaga lē lelei pe fusu ai foʻi. Po o le a ia tauimasui atu, pe taofiofi lona ita ma savali ese mai iā i latou? O se tane e na o ia o loo i le fale ma o loo fai ni ana saʻiliʻiliga i le Initaneti. Ua aliali aʻe se polokalame i lana komepiuta o loo faasalalau mai ai se polokalame i le Initaneti o amioga matagā. Po o le a faaosoosoina o ia e tatala lenā polokalame, po o le a ia faamautinoa e na te teena? O se tuafafine Kerisiano o loo talanoa ma isi tuafāfine, ae ua amata ona lē lelei a latou talanoaga, ua amata ona fai tala faatigā e faatatau i se tuafafine i le faapotopotoga. Po o le a ia faaopoopo atu foʻi ma ia i lenā talanoaga, ia po o le a taumafai e sui le mataupu e talanoa i ai?

² E ui lava e eseese uma na tulaga, ae e iai se mea e tutusa uma ai. O loo aofia uma ai le tauivi ina ia tausisia pea le amio saʻo po o le faamaoni o se Kerisiano. Po o e mafaufau e faatatau i lau amio saʻo a o e fesagaʻi ma ou popolega, o ou manaʻoga, ma sini i le olaga? O aso taʻitasi e mafaufau ai tagata e uiga i o latou foliga vaaia, o o latou soifua mālōlōina, o luʻi o le saʻilia o mea e ola ai, o taimi lelei ma taimi e faalētonu ai a latou faigāuō, e oo lava foʻi i faiā e faavae i le alofa fetosinaaʻi. Atonu o mea foʻi na e tatou te popole i ai. Ae o ā mea e sili ona tāua iā Ieova a o ia suʻesuʻeina o tatou loto? (Sala. 139:23, 24) O lo tatou amio saʻo po o le faamaoni.

3. O le ā le filifiliga ua tuu mai e Ieova iā i tatou e fai, ma o le ā o le a tatou talanoaina i lenei mataupu?

³ O Ieova, o Lē na Foaʻi maia “meaalofa lelei uma ma mea uma e atoatoa ona lelei,” ua ia tuuina mai iā i tatou taʻitoʻatasi le tele o meaalofa eseese. (Iako. 1:17) E faafetaia o ia, ona ua iā i tatou meaalofa e pei o le tino, le mafaufau, le soifua mālōlōina, ma tomai eseese. (1 Kori. 4:7) Peitaʻi, e lē o faamalosia e Ieova i tatou e faaalia le amio saʻo po o le faamaoni. Ua ia tuu mai e tatou te filifili i tatou lava pe tatou te atiaʻe lenei uiga. (Teu. 30:19) O lea la, e manaʻomia ai ona tatou iloiloina po o le ā lenei mea e taʻu o le amio saʻo. O le a tatou talanoaina foʻi māfuaaga e tolu e tāua tele ai lenei uiga.

O le ā Lenei Mea o le Amio Saʻo?

4. O le ā e aofia ai i le amio saʻo, ma o le ā tatou te ono aʻoaʻoina mai le tulafono a Ieova e faatatau i taulaga na faia i manu?

⁴ O le toʻatele o tagata e foliga mai e lē malamalama po o le ā lenei mea e taʻu o le amio saʻo. E tāua tele le tautala saʻo, peitaʻi o lenei uiga ua na o se vala o le amio saʻo. E pei ona faaaogā ai i le Tusi Paia, o le amio saʻo po o le faamaoni, e aofia ai le atoa po o le matuā saʻo o le amio. O upu Eperu e fesootaʻi atu i le “amio saʻo,” e faavae mai i se upu o lona uiga e sao ona lelei, po o le lē masesē pe lē ponā. O se tasi o nei upu sa faaaogā e faatatau i taulaga e ofo atu iā Ieova. Na faatoʻā talia e Ieova se manu na ofo atu ai se taulaga, pe afai sa sao ona lelei, pe lē ponā lenā manu. (Faitau le Levitiko 22:19, 20.) Sa matuā taʻusalaina e Ieova i latou na lē usitaia lana taʻiala, e ala i le ofoina atu o taulaga i manu vaepiʻo, mamaʻi, pe tauaso.—Mala. 1:6-8.

5, 6. (a) O ā faataʻitaʻiga e faaalia ai e masani lava ona tatou faatāuaina le mea e atoa? (e) Pe a tuu mai i tagata lē lelei atoatoa, pe e uiga le amio saʻo i le lelei atoatoa? Faamatala.

⁵ O lea faiga o le saʻilia ma le faatāua o le mea e atoa, e lē o se faiga fou. O se faataʻitaʻiga, seʻi manatu i se tagata e na te aoaoina mai ni tusi. Ina ua māeʻa se saʻiliʻiliga umi, ona ia maua lea o se tusi tāua tele, peitaʻi, na ia mātauina ua leai nisi itulau tāua o le tusi. O le lē fiafia tele, atonu na te toe tuu ai le tusi i luga o le fata. Ia pe faaāta foʻi i lou mafaufau se fafine o loo savalivali i le matafaga, o  loo ia aoaoina nisi o atigi figota ua tafia mai i galu. Ona o le maofa i le eseese ma le matagofie o nei figota, ua ia punou ai i lalo ma iloilo atili nei atigi figota. Faamata o ā atigi figota e na te aveina? O atigi figota o loo atoa. I se tulaga tutusa, o loo saʻilia e le Atua tagata e iā i latou le uiga lenei o le atoa.—2 No. 16:9.

⁶ Peitaʻi, atonu e te taumānatu pe faamata o le amio saʻo e manaʻomia ai ona lelei atoatoa. Ona o lo tatou tulaga agasala ma le lē lelei atoatoa, tatou te ono manatu ai iā i tatou lava e tai pei o se tusi ua lē atoa ona itulau, ia po o se atigi figota foʻi ua faaleagaina. Po o faapena lou lagona i nisi o taimi? Ma le mautinoa lava e lē o faatalitalia e Ieova i tatou, ia lelei atoatoa e aunoa ma se sesē. E na te lē faatalitalia se mea e sili atu nai lo le mea tatou te mafaia. * (Sala. 103:14; Iako. 3:2) Peitaʻi, e na te faatalitalia i tatou ia tausisia pea le amio saʻo po o le faamaoni. Pe e iai la se eseesega i le va o le lelei atoatoa ma le amio saʻo? Ioe. O se faataʻitaʻiga: Seʻi faapea ua alofa se alii talavou i le tamaʻitaʻi talavou lea o le a ia faaipoipo i ai. O se faiga lē atamai mo ia ona faatalitalia le tamaʻitaʻi o le a lelei atoatoa. Peitaʻi, o se mea atamai mo ia ona faatalitalia le tamaʻitaʻi e alofa ma le lotoatoa iā te ia, o lona uiga, e na o ia lava e alofa faananau i ai. I se tulaga talitutusa, o Ieova o le “Atua fuā.” (Eso. 20:5) E na te lē faatalitalia i tatou ia lelei atoatoa, ae ia alofa atu iā te ia ma le lotoatoa, ma tuuina atu le tapuaʻiga tau lava o ia.

7, 8. (a) O le ā le faaaʻoaʻoga na faataatia e Iesu e tusa ai o le amio saʻo? (e) O le ā le faauigaina e le Tusi Paia o le amio saʻo?

⁷ Atonu e faamanatu mai ai i inei iā i tatou le tali a Iesu ina ua fesiligia o ia po o lē fea poloaʻiga e sili ona tāua. (Faitau le Mareko 12:28-30.) E lē gata na taʻu atu e Iesu le tali; ae sa ia soifua ai e tusa ma mea e manaʻomia e lenā poloaʻiga. Sa ia faataatia le faaaʻoaʻoga sili i le alofa atu iā Ieova ma lona mafaufau atoa, loto atoa, ola atoa, ma le malosi atoa. Sa ia faaalia e faapea, e lē iloa se amio saʻo tau o upu, ae e iloa i gaoioiga lelei e faavae mai i ni uunaʻiga lelei. E manaʻomia la ona tatou tausisi i le amio saʻo ina ia mulimuli ai i tulagāaao o Iesu.—1 Pete. 2:21.

⁸ O le faauigaina la lenei e le Tusi Paia o la tatou amio saʻo: o le tuutoina atu lea ma le lotoatoa i Lē e toʻatasi o i le lagi, o Ieova le Atua, faapea lona finagalo ma ana fuafuaga. O le tausisia o le amio saʻo, o lona uiga, i o tatou olaga i aso faisoo, o le a sili atu ona tatou saʻili e faafiafia Ieova le Atua nai lo se isi lava mea. O le a tatou faaatagia atu i mea e tatou te faamuamua i o tatou olaga, mea e sili ona tāua iā Ieova. Seʻi o tatou iloiloina māfuaaga e tolu e tāua tele ai lenei tulaga.

1. La Tatou Amio Saʻo ma le Finauga o le Pule Silisili Ese

9. E faapefea ona fesootaʻi la tatou amio saʻo ma le finauga i le pule silisili ese i le aoao o mea?

⁹ E lē faalagolago le pule silisili ese a Ieova i la tatou amio saʻo. E tonu lana pule silisili ese, e faavavau, ma e pule i le aoao o mea. E faavavau lana pule i le aoao o mea, e tusa lava po o ā tala po o mea e fai e isi. Peitaʻi, ua matuā taʻuleagaina le pule silisili ese a le Atua i le lagi ma le lalolagi. Ua manaʻomia lava la ona faamaonia atu i foafoaga atamamai uma o ia tonu le pule, e faamasinotonu, ma e alofa. I le avea ai ma Molimau a Ieova, e tatou te fiafia e talanoa ma so o se tasi e faalogo mai, e faatatau i le pule silisili ese a le Atua i le aoao o mea. Peitaʻi, e faapefea ona tatou faia ni filifiliga ma gaoioi e tusa ma lo tatou amanaʻiaina o lana pule silisili ese? E ala i le tausisia pea o le amio saʻo.

10. O le ā le tuuaʻiga ua faia e Satani e faatatau i le amio saʻo o tagata, ma o le a faapefea ona e tali atu i ai?

¹⁰ Seʻi o tatou iloiloina po o le ā e aofia ai i lau amio saʻo. O Satani o ia lea ua pogai mai ai le manatu e faapea, e leai se tagata o le a ia lagolagoina le pule silisili ese a le Atua, o tagata uma o le a auauna iā Ieova ona o le alofa manatu faapito. A o faalogologo ane se aofaʻiga toʻatele o agelu, na faapea atu le Tiapolo iā Ieova: “O le paʻu e sui aʻi le paʻu; o mea uma foʻi ua i ai i le tagata, e avatua e ia e sui aʻi lona ola.” (Iopu 2:4) Sa leʻi gata ai i le tagata faamaoni o Iopu ia tuuaʻiga a Satani, ae sa faatatau mai i le fanau uma a tagata. Ua taʻua i le  Tusi Paia Satani o “lē na molia o tatou uso.” (Faaa. 12:10) Ua ia faalumaluma iā Ieova i le faapea atu o Kerisiano—e aofia ai ma oe—o le a lē tumau i le faamaoni. Ua faapea mai Satani o le a e lē faamaoni iā Ieova ina ia faasaoina ai lou ola. O le ā sou lagona e faatatau i na tuuaʻiga sesē ua faia faasaga iā te oe? Po o le a e lē manaʻomia ea se avanoa e faamaonia ai le pepelo o Satani? E ala i le tausisia pea o lau amio saʻo, e mafai ai ona e faamaonia le pepelo o Satani.

11, 12. (a) O ā faaaʻoaʻoga ua faataʻitaʻia ai le auala e fesootaʻi ai a tatou filifiliga i aso taʻitasi, ma le finauga i le amio saʻo o le tagata? (e) Aiseā o se faaeaga ai le tausisia pea o le amio saʻo?

¹¹ O lea la, o le finauga e faatatau i lau amio saʻo, e tāua tele ai amioga ma filifiliga i aso fai soo. Seʻi o tatou toe iloiloina tulaga e tolu ia na taʻua i le amataga. Sa faapefea ona latou tausisia pea le amio saʻo? O le tamaitiiti lea e faalili e tamaiti o lana vasega, ua matuā tofotofoina o ia ina ia osofaʻi atu pe lafo atu ni upu mamafa iā i latou, ae ua ia manatua le fautuaga lenei: “Le ʻaupele e, aua tou te tauimasui, ae ia tuu atu i le toʻasā o le Atua; auā ua tusia: ‘O aʻu e faia le tauimasui; ou te taui atu lava, ua fetalai mai ai Ieova.’” (Roma 12:19) Sa savali ese. O le tane lea o loo ia faaaogāina le Initaneti, ua vaai atu i mataupu e faaoso ai lagona i feusuaʻiga, ae ua ia toe manatua le mataupu silisili lea e atagia mai i upu a Iopu: “Ua ou osia le feagaiga ma oʻu mata, se ā foʻi le mea ou te manatu ai i se taupou?” (Iopu 31:1) I se tulaga tutusa, ua teena foʻi e le tamāloa ia lē vaai atu ona mata i vaaiga e lē talafeagai, ma teena na mea ona e faaleagaina ai. O le fafine sa talanoa ma isi fafine ae atonu ua faalogo atu i ni tala felaʻuaʻi e faatigā ai ona lē toe faaauauina lea o lana talanoa, na ia manatuaina le fautuaga e faapea: “Ia taʻitasi i tatou ma faafiafia i lona tuaoi i le mea lelei, ina ia atiaʻe ai o ia.” (Roma 15:2) O tala felaʻuaʻi ia e ono mafai ona ia toe fai atu e lē atiaʻe ai. O le a lē aogā i lona tuafafine Kerisiano; o le a lē faafiafiaina ai foʻi lona Tamā i le lagi. O lea la, sa ia filifili e lē faaopoopo atu i le talanoaga ma sui le mataupu e talanoa i ai.

 ¹² I tulaga taʻitasi e pei ona taʻua, e faia e le Kerisiano se faaiʻuga e atagia atu ai, e tusa o lea e faapea atu: ‘O Ieova loʻu Pule. O le a ou taumafai e fai le mea e faafiafia ai o ia i lenei mataupu.’ Po o faapena ona e taumafai e faafiafia Ieova, pe a fai au filifiliga ma faaiʻuga? Pe afai o loo e faia faapea, o loo e usiusitai moni lava la i upu faamāfanafanaloto lea e faamauina i le Faataoto 27:11: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” Maʻeu se faaeaga mo i tatou o le faafiafiaina lea o le finagalo o le Atua! E mautinoa o le a tauia a tatou taumafaiga ina ia tausisia pea lo tatou amio saʻo po o le faamaoni.

2. Le Faavae mo le Faamasinoga a le Ieova

13. Ua faapefea i upu a Iopu ma Tavita ona faaalia ai, e faamasino e Ieova i tatou e fua i le amio saʻo?

¹³ Ua tatou iloa o le amio saʻo e mafai ai ona tatou lagolagoina le pule silisili ese a Ieova. O le faavae lea e mafai ona faamasinoina ai i tatou e le Atua. Sa malamalama lelei Iopu i lenei mea moni. (Faitau le Iopu 31:6.) Sa iloa e Iopu e fua e Ieova le tulaga o tagata uma i le “fua faatautau tusa,” e ala i le faaaogāina o Ana tapulaa lelei atoatoa o le faamasinotonu, ina ia fua ai lo tatou amio saʻo. Na taʻua foʻi e Tavita le manatu lenā e faapea: “E faatonuina nuu e Ieova; Ieova e, ia e faamasino iā te aʻu e tusa ma laʻu amio, e tusa foʻi ma laʻu amio saʻo. . . . Auā e suʻesuʻe loto ma manatu e le Atua amiotonu.” (Sala. 7:8, 9) Ua tatou iloa o le Atua e mafai ona silasila i le tagata lilo i totonu, le “loto ma manatu.” Peitaʻi, e manaʻomia ona tatou manatua po o le ā o saʻilia mai e Ieova. E pei ona taʻua e Tavita, e faamasino e Ieova i tatou e tusa ma la tatou amio saʻo.

14. Aiseā e lē tatau ai ona tatou manatu faapea o lo tatou natura lē lelei atoatoa ma agasala, e lē mafai ai ona tatou tausisia pea le amio saʻo?

¹⁴ Seʻi faapea o lea o loo suʻesuʻe e Ieova le faitau piliona o loto o tagata i aso nei. (1 No. 28:9) E faafia ona ia mauaina se tasi o loo tausisia pea le amio saʻo i le avea ai o se Kerisiano? E seāseā lava! Ae e lē tatau ona tatou manatu faapea o lo tatou tulaga lē lelei atoatoa, ua lē mafai ai ona tatou tausisi pea i le amio saʻo. Nai lo lea, ua iā i tatou māfuaaga tāua e mautinoa ai, e pei lava o Tavita ma Iopu, o le a maua mai i tatou e Ieova o tausisi pea i le amio saʻo, e ui lava i lo tatou tulaga lē lelei atoatoa. Aua neʻi galo, e lē faapea a tatou lelei atoatoa ona faamaonia ai lea e mafai ona tatou tausisi i le amio saʻo. E na o le toʻatolu tagata lelei atoatoa na soifua mai i lenei lalolagi, ma na lē taulau le toʻalua, o Atamu ma Eva, i le tausisia o le amio saʻo. Peitaʻi, e faitau miliona tagata lē lelei atoatoa ua taulau i le tausisia pea o le amio saʻo. E te mafaia foʻi.

3. E Tāua i lo Tatou Faamoemoe

15. Na faaalia faapefea e Tavita, e tāua le amio saʻo i lo tatou faamoemoe mo le lumanaʻi?

¹⁵ Talu ai ona o le amio saʻo po o le faamaoni o le faavae lea o le faamasinoga a Ieova, e tāua tele la i lo tatou faamoemoe mo le lumanaʻi. Sa iloa lelei e Tavita le moni o lenei manatu. (Faitau le Salamo 41:12.) Sa ia faapelepele i le faamoemoe ia faavavau o maua le finagalo malie o le Atua. I le pei o Kerisiano moni i aso nei, sa faamoemoe Tavita e ola e faavavau, ia faaauau pea ona mafuta vavalalata atu iā Ieova le Atua a o auauna iā te ia. Sa iloa e Tavita e tatau ona ia tausisia pea lana amio saʻo, pe afai e fia vaai i le faataunuuina o lenā faamoemoe. I se tulaga tutusa, e faamalosia e Ieova i tatou, aʻoaʻo, taʻitaʻi, ma faamanuia iā i tatou a o tausisia pea lo tatou amio saʻo po o le faamaoni.

16, 17. (a) Aiseā ua e filifili ai e tausisia pea lau amio saʻo? (e) O ā fesili o le a talanoaina i le mataupu o sosoo mai?

¹⁶ E tāua tele le faamoemoe i le mauaina o le fiafia i le taimi nei. E mafai ona aumaia ai iā i tatou le olioli e manaʻomia, ina ia manumalo ai i taimi o faigatā. O le faamoemoe foʻi e mafai ona puipuia ai o tatou manatunatuga. Ia manatua, ua faatusa e le Tusi Paia le faamoemoe i se puloutau.  (1 Tesa. 5:8) E pei ona puipuia le ulu o se fitafita i le pulou i le taimi o le taua, e mafai foʻi e le faamoemoe ona puipuia ai o tatou mafaufau mai mafaufauga lē lelei ma lē saʻo, lea ua faaauiluma e Satani i lenei lalolagi tuai ua mou mālie atu. E leai la se tāua o le olaga pe afai e leai so tatou faamoemoe. E manaʻomia ona tatou suʻesuʻe ma le faamaoni i tatou lava, e ala i le iloiloina ma le faaeteete o le tulaga o iai la tatou amio saʻo, ma le faamoemoe lea e fesootaʻi atu i ai. Ia aua neʻi galo o le tausisia pea o le amio saʻo, ua e lagolagoina ai le pule silisili ese a Ieova ma puipuia ai lou faamoemoe matagofie mo le lumanaʻi. Tau ina ia e tausisia pea lau amio saʻo!

¹⁷ Ona e tāua tele le amio saʻo po o le faamaoni, o lea e manaʻomia ai ona tatou manatunatu atili i nisi o fesili. E faapefea ona tatou atiaʻe le amio saʻo? E mafai faapefea ona tatou faatumauina le amio saʻo? Ma o le ā e mafai ona fai pe afai na iai se taimi ua lē tausisia ai e se tasi le amio saʻo? O le a talanoaina i le mataupu o sosoo mai nei fesili.

[Faaopoopoga i lalo]

O le ā Lau Tali?

• O le ā lenei mea o le amio saʻo?

• E faapefea ona fesootaʻi le amio saʻo ma le finauga i le pule silisili ese i le aoao o mea?

• E faapefea i le amio saʻo ona saunia ai se faavae mo lo tatou faamoemoe?

[Fesili mo le Suʻesuʻega]

[Ata i le itulau 5]

O aso uma o le olaga e tulaʻi mai ai le tele o tofotofoga i la tatou amio saʻo