Pe E te Manatua?

Pe na e fiafia i le faitauina o lomiga fou o Le Olomatamata? Seʻi vaai pe e mafai ona e taliina fesili o loo mulimuli mai:

• E faapefea ona tatou tautatala i le “gagana lelei,” le upu moni e faatatau i le Atua ma ana fuafuaga? (Sefa. 3:9)

I se gagana e masani ona tautatala ai, ina ia lelei le tautala i le “gagana lelei,” e tatau ona faalogologo lelei, faataʻitaʻi i failauga lelei, ia manatua igoa o tusi o le Tusi Paia ma ni nai mau, ia toe taʻu mea ua tatou aʻoaʻoina, faitau leo tele, iloilo le kalama, po o mamanu o le upu moni, ia taumafai e agaʻigaʻi i luma, faatulaga taimi mo suʻesuʻega, ma faataʻitaʻi ona “tautala” i le gagana lelei.—8/15, itulau e 21-25.

• O ā nisi o mea e aofia ai i lo tatou iloaina pe faapeʻī le Atua?

“O Ieova o lona suafa lea,” ma o lona finagalo ia tatou iloa o ia i lenā suafa. (Eso. 15:3) O ia “o le Atua o le alofa ma le filemu.” (2 Kori. 13:11) O ia o le “Atua sisila” pe silafia mea uma ma le ‘Atua o le olataga.’ (1 Samu. 2:3; Sala. 25:5) O le a faalatalata atu le Atua iā i latou e iloa o ia.—9/1, itulau e 4-7.

• E faapefea ona faatatau i le faaipoipoga le manatu o le ‘⁠maea e sautuatolu’?

O se faaupuga faafaatusa le ‘maea e sāutuatolu.’ (Fai. 4:12) Pe a faatatau i le faaipoipoga, e aofia ai le tane ma le avā, o ni maea se lua, o lea ua fili faatasi ma le maea autū, o le Atua. O le autasi ma le Atua, o le a mafai ai e se ulugalii ona maua le malosi faaleagaga e fesagaʻia ai faafitauli ma maua le olioli.—9/15, itulau e 16.

• O le ā e faatatau i ai “le papaʻi atu o lima” i le Eperu 6:2?

Nai lo le faatatau atu i le tofiaina o toeaina Kerisiano, e ono faasino atu i le papaʻi atu o lima e tuuina atu se meaalofa faavavega o le agaga paia. (Galu. 8:14-17; 19:6)—9/15, itulau e 32.

• O ā manaʻoga o le fanau e amanaʻia e se tamā lelei?

O nisi o latou manaʻoga o le (1) alofa, (2) o se faaaʻoaʻoga lelei, (3) o se aiga fiafia, (4) aʻoaʻoina i le tāua o mea faaleagaga, (5) aʻoaʻiga, (6) le malupuipuia.—10/1, itulau e 18-21.

• E faapefea ona faaalia e i latou o loo taʻimua le faaaloalo i isi?

O se tasi o auala e faia ai e se toeaina, o le lē talosaga atu lea i se isi e faia se mea e na te lē fia faia. E lē gata i lea, e na te faaalia le faaaloalo e ala i le tuuina atu o ni māfuaaga mo lana talosaga po o ni faatonuga na te tuuina atu.—10/15, itulau e 22.

• O ā nisi o auala e faatumauina ai le faanaunauga ia mautū le faaipoipoga?

E lua auala: (1) Ia faatāua lau faaipoipoga. (2) Ia ʻalofia vala uma o le lē faamaoni. Po o malosi po o tau faalētonu lau faaipoipoga, e tatau ona iloa e lau paaga o loo e tinoū ina ia taulau manuia le faaipoipoga; o le a fesoasoani na auala e lua i le lua faaipoipoga.—11/1, itulau e 18-21.

• O le ā e mafai ona aʻoaʻo mai e se toeaina Kerisiano mai le auala na faaaogā ai e se leoleo mamoe Isaraelu le tootoo?

Sa faaaogā e se leoleo mamoe se tootoo umī, e taʻitaʻia ai lana lafu. Pe a ulu atu pe ō ese foʻi mamoe mai le lotoa, e “ui ane i lalo o le tootoo” ona mafai lea ona faitauina i latou. (Levi. 27:32) E manaʻomia ona iloa ma mātauina e se leoleo mamoe Kerisiano le lafu a le Atua o loo ia vaavaaia.—11/15, itulau e 9.

• E faapefea ona faaalia e se tinā e na te faatāuaina le tumamā?

E tele auala e mafai ai ona leaga meaʻai, o lea la, e ao ai ona fufulu ona lima a o leʻi tagofia meaʻai ma ia ufiufi foʻi. E na te faamamāina le fale e ʻalofia ai faafitauli i isumu ma iniseti. O le isi auala e aofia ai le mamā o lavalava ma ia toaga e tatā, ma ia taeʻele. E ōgatusa nei auala uma ma le Tusi Paia.—12/1, itulau e 9-11.