Faauta! i le Auauna Filifilia a Ieova

“Faauta i laʻu auauna, . . . [o lē] ua fiafia i ai loʻu loto!”—ISA. 42:1.

1. O le ā ua faalaeiauina tagata o Ieova e fai, aemaise lava a o lata mai le Faamanatuga, ma aiseā?

A O LATA mai le taimi e faamanatu ai le maliu o Keriso, ua talafeagai i tagata o le Atua ona mulimuli i le fautuaga a le aposetolo o Paulo, ia “vaavaai totoʻa atu iā Iesu o le Sui Sili, ma o Lē e faaatoatoaina lo tatou faatuatua.” Na faaopoopo mai Paulo: “Ia manatunatu lelei i lē na tumau e ui i upu faifai a tagata agasala ia na taʻusalaina ai i latou, ina neʻi outou lē lavavā ma faavaivai ai.” (Epe. 12:2, 3) O le uaʻi totoʻa atu i le ala faamaoni o Keriso, lea na taualuga i lana taulaga, o le a fesoasoani i Kerisiano faauuina ma a latou aumea o isi mamoe, ina ia faaauau ona auauna ma le faamaoni iā Ieova ma ia ʻalofia ai le “faavaivai.”—Faatusatusa i le Kalatia 6:9.

2. O le ā e tatou te aʻoaʻoina mai valoaga a Isaia lea e faatatau atu i le Alo o le Atua?

² E ala i le perofeta o Isaia, sa faagaeeina ai e Ieova se faasologa o valoaga e faatatau tonu lava i lona Alo. O nei valoaga o le a fesoasoani iā i tatou ina ia ‘vaavaai totoʻa atu ai i le Sui Sili, ma o Lē e faaatoatoaina lo tatou faatuatua,’ o Keriso Iesu. * O loo faamatala mai ai i nei valoaga ona uiga, o ona mafatiaga, ma lona faaeaina e avea ma o tatou Tupu ma Togiola. O le a faalautele ai lo tatou malamalamaga e faatatau i le Faamanatuga, lea o le a tatou faamanatuina i lenei tausaga i le Aso Tofi, Aperila 9, pe a mavae le goto o le lā.

Ua Faailoa Mai le Auauna

3, 4. (a) I le tusi o Isaia, o ai e faatatau i ai le upu “auauna”? (e) O faapefea ona faamatala mai e le Tusi Paia le Auauna lea na valoia i le Isaia mataupu e 42, 49, 50, 52, ma le 53?

³ E tele taimi ua faaaogā ai le upu “auauna” i le tusi o Isaia. O isi taimi e faatatau atu ai i le perofeta o Isaia. (Isa. 20:3; 44:26) O nisi taimi e faatatau atu i le nuu atoa o Isaraelu, ia po o Iakopo. (Isa. 41:8, 9; 44:1, 2, 21) Ae faapefea valoaga mataʻina e faatatau i le Auauna lea e faamauina i le Isaia mataupu e 42, 49, 50, 52, ma le 53? O loo manino ona faailoa mai i Tusitusiga Kerisiano Eleni, le Auauna a Ieova lea o loo faamatalaina mai i na mataupu. O le itu e mataʻina ai, sa faitau e le tagata maualuga Aitiope lea na taʻua i le tusi o Galuega, se tasi o nei valoaga, i le taimi lea na faatonu ai e le agaga paia le faievagelia o Filipo e faalatalata atu iā te ia. Sa faitau e le tamāloa Aitiope le vaega o le Tusi Paia lea e tatou te maua i aso nei i le Isaia 53:7, 8, ma fesili atu iā Filipo: “Ou te fesili atu iā te oe, o ai lea e talanoa i ai le perofeta? Pe faatatau iā te ia po o se isi tagata?” Ona faamatala atu loa lea e Filipo e faapea sa  tautala Isaia e faatatau i le Mesia, o Iesu.—Galu. 8:26-35.

⁴ A o avea Iesu ma pepe, sa folafola atu e se tane amiotonu e igoa iā Simeona, e ala i le taʻitaʻiga a le agaga paia e faapea, o le a avea “le tamaitiiti o Iesu” o se “malamalama e aveesea ai le ufiufi mai atunuu,” e pei ona valoia i le Isaia 42:6 ma le 49:6. (Luka 2:25-32) E lē gata i lea, i le valoaga o le Isaia 50:6-9, na valoia ai faiga faalumaina lea sa feagai ma Iesu i le pō o lona faamasinoga. (Mata. 26:67; Luka 22:63) Ina ua mavae le Penetekoso 33 T.A., na faailoa manino mai ai e le aposetolo o Peteru e faapea, o Iesu o le “Auauna” lea a Ieova. (Isa. 52:13; 53:11; faitau le Galuega 3:13, 26.) O le ā e tatou te aʻoaʻoina mai nei valoaga e uiga i le Mesia?

E Aʻoaʻoina e Ieova Lana Auauna

5. O le ā le toleniga na maua e le Auauna?

⁵ O se tasi o valoaga a Isaia e faatatau i le Auauna a le Atua, o loo faamanino mai ai le faiā māfana a Ieova ma lona Alo ulumatua a o leʻi afio mai le Alo i le lalolagi. (Faitau le Isaia 50:4-9.) Ua faaalia e le Auauna e faapea sa faaauau ona toleniina o ia e Ieova, e ala i le faapea mai: “Na te fagua oʻu taliga, ina ia ou faalogologo e pei o ē ua aʻoaʻoina.” (Isa. 50:4) I na taimi uma, sa faalogo ai le Auauna a Ieova i lona Tamā ma aʻoaʻo mai iā te ia, ma avea ai ma sē na aʻoaʻoina e Ieova e sili ona gauaʻi. Maʻeu se faaeaga tutasi o le aʻoaʻoina e Lē na Faia le vateatea!

6. Na faaalia faapefea e le Auauna lona gauaʻi atoatoa i lona Tamā?

⁶ I lenei valoaga, o loo taʻua ai e le Auauna lona Tamā o le “Alii [“Pule Aoao,” NW] o Ieova.” Ua faaalia mai ai na malamalama lelei le Auauna i le upu moni autū e faatatau i le pule silisili ese a Ieova i le aoao o mea. I le faaalia o lona gauaʻi atoatoa i lona Tamā, na ia taʻua ai e faapea: “Ua toina le puipui o oʻu taliga e le Alii o Ieova, a ou te leʻi finau vale; ou te lē foʻi atu lava.” (Isa. 50:5) Na ‘i ai o ia ma Ieova, o ia o le tufuga’ i le foafoaina o le lagi ma le lalolagi ma le tagata. O lenei “tufuga” sa ‘⁠olioli i luma o Ieova i aso uma lava. Sa olioli i mea e mau ai tagata i lona lalolagi; o le fiafia foʻi o le Alo o le Atua, sa i le fanau o tagata lea.’—Faata. 8:22-31.

7. O le ā e faaalia ai sa mautinoa e le Auauna le fesoasoani a lona Tamā i taimi o ona puapuaga?

⁷ O lenei toleniga na maua e le Auauna atoa ma lona fiafia i tagata, sa aogā mulimuli ane iā te ia ina ua afio mai i le lalolagi ma fesagaʻi ma teteega e sili ona ogaoga. Sa faaauau ona fiafia o ia e fai le finagalo o lona Tamā, e oo lava foʻi i taimi o sauāga ogaoga. (Sala. 40:8; Mata. 26:42; Ioa. 6:38) A o feagai o ia ma puapuaga i le lalolagi, sa mautinoa e Iesu le faamaoniga a lona Tamā atoa ma lana fesoasoani. E pei ona sa valoia i le valoaga a Isaia, sa mafai ona faapea mai Iesu: “O loo ua latalata mai lē na te taʻuamiotonuina aʻu, o ai ea sē finau ma aʻu? . . . Faauta, o le Alii o Ieova, na te fesoasoani mai iā te aʻu.” (Isa. 50:8, 9) E mautinoa sa fesoasoani Ieova i lana Auauna faamaoni i le taimi o lana faiva i le lalolagi, e pei ona faaalia mai i se isi valoaga a Isaia.

Le Faiva a le Auauna i le Lalolagi

8. O le ā e faamaonia ai, o Iesu o ia o lē na “filifilia” e Ieova, e pei ona sa valoia i le Isaia 42:1?

⁸ O loo taʻua i faamaumauga a le Tusi Paia le mea na tupu ina ua papatiso Iesu i le 29 T.A.: “Ua i ona luga le agaga paia . . . , ma ua oo mai foʻi le siʻufofoga mai le lagi e faapea: ‘⁠O loʻu Atalii pele oe, ua malie loʻu loto iā te oe.’” (Luka 3:21, 22) Sa faailoa manino mai e Ieova lē na ia “filifilia,” lea na taʻua i le valoaga a Isaia. (Faitau le Isaia 42:1-7.) I le taimi o lana talaʻiga i le lalolagi, sa faataunuu ai e Iesu lenei valoaga i se auala mataʻina. I le tusi o le evagelia a Mataio, na ia sii mai ai upu o loo i le Isaia 42:1-4 ma faatatauina iā Iesu.—Mata. 12:15-21.

9, 10. (a) Na faapefea ona faataunuu e Iesu le Isaia 42:3 i le taimi o lana talaʻiga? (e) Na faapefea ona faia e Keriso le “faamasinoga” tonu a o iai i le lalolagi, ma o afea e na te ‘⁠faatūina ai le faamasinoga i le lalolagi’?

⁹ Sa manatu faatauvaa taʻitaʻi lotu Iutaia i tagata lautele Iutaia. (Ioa. 7:47-49) Sa faileagaina tagata ma sa faatusaina i ni “ū gapēpē” po o ni “vavae ua mū itiiti” ua toetoe ina a tineia. Peitaʻi,  sa faaalia e Iesu le alofa i ē matitiva ma ē mafatia. (Mata. 9:35, 36) Sa ia avatu i na tagata se valaaulia māfana, i le faapea atu: “Ia outou ō mai iā te aʻu o outou uma ua tigāina ma mafatia, o aʻu foʻi e mālōlō ai outou.” (Mata. 11:28) E lē gata i lea, sa faia foʻi e Iesu le “faamasinoga” tonu e ala i le aʻoaʻoina o tapulaa a Ieova i le saʻo ma le sesē. (Isa. 42:3) Sa ia faaalia atili e faapea e manaʻomia ona faatatauina le Tulafono a le Atua, i se tulaga magafagafa ma le alofa mutimutivale. (Mata. 23:23) Sa faaalia foʻi e Iesu le faamasinotonu e ala i le talaʻi ma le lē faaituʻau i tagata mauʻoa ma tagata matitiva.—Mata. 11:5; Luka 18:18-23.

¹⁰ Ua valoia foʻi i le valoaga a Isaia e faapea, e “faatūina le faamasinoga i le lalolagi” e lē na “filifilia” e Ieova. (Isa. 42:4) Ua lē o toe umi ona ia faia lea o lenei tulaga pe a gaoioi o ia o le Tupu o le Malo faa-Mesia, e faaumatia malo faapolotiki uma ae suia i lana pulega amiotonu. O le a ia aumaia se lalolagi fou, lea “e mau ai le amiotonu.”—2 Pete. 3:13; Tani. 2:44.

“O le Malamalama” ma o se “Feagaiga”

11. I le ā le uiga na avea ai Iesu ma “malamalama o nuu ese” i le uluaʻi senituri, ma ua faapefea ona avea o ia ma “malamalama o nuu ese” e oo mai i aso nei?

¹¹ I le faataunuuina o le Isaia 42:6, sa faamaonia ai le avea o Iesu ma “malamalama o nuu ese.” I le taimi o lana talaʻiga i le lalolagi, sa patino lava ona ia avatu le malamalama faaleagaga i tagata Iutaia. (Mata. 15:24; Galu. 3:26) Peitaʻi na fetalai Iesu: “O aʻu o le malamalama o le lalolagi.” (Ioa. 8:12) Sa avea o ia ma malamalama i tagata Iutaia ma tagata o nuu ese, e lē gata e ala i le aumaia o le malamalama faaleagaga, ae ala foʻi i le ofoina mai o lona soifua lelei atoatoa o se taulaga togiola mo tagata uma. (Mata. 20:28) Ina ua mavae lona toetū, sa ia faatonuina ona soo ina ia fai ma molimau iā te ia “i tuluʻiga uma o le lalolagi.” (Galu. 1:8) I le taimi o le la talaʻiga, na sii mai ai e Paulo ma Panapa le faaupuga o le “malamalama o nuu ese,” ma faatatau atu i le galuega talaʻi na la faia i nuu e lē o ni Iutaia. (Galu. 13:46-48; faatusatusa i le Isaia 49:6.) O loo faaauau pea ona faia lenā galuega, e pei ona faasalalau atu e uso faauuina o Iesu i le lalolagi ma a latou aumea le malamalama faaleagaga, ma fesoasoani atu i tagata ina ia faatuatua iā Iesu, o ia o le “malamalama o nuu ese.”

12. Ua faapefea ona tuuina mai e Ieova lana Auauna “e fai ma feagaiga a le nuu”?

¹² I le valoaga lava foʻi lenā, na taʻu atu ai e Ieova i lana Auauna filifilia e faapea: “[Ou te] leoleo iā te oe, ou te avatua foʻi oe e fai ma feagaiga a le nuu.” (Isa. 42:6) Sa faia e Satani ni taumafaiga maumauaʻi ina ia fasiotia ai Iesu ma taofia ai o ia mai le faamāeʻaina o lana talaʻiga i le lalolagi, ae sa puipuia e Ieova Iesu seʻia oo i le taimi atofaina e maliu ai o ia. (Mata. 2:13; Ioa. 7:30) Ona toe faatūina lea e Ieova o Iesu ma tuuina atu o ia o se “feagaiga,” po o se taʻutinoga i tagata i le lalolagi. O lenā taʻutinoga na faamautinoa mai ai e faapea, o le a faaauau ona avea le Auauna faamaoni a le Atua ma “malamalama o nuu ese,” e faasaʻolotoina i latou o loo i le pogisa faaleagaga.—Faitau le Isaia 49:8, 9. *

13. I le ā le auala na laveaʻi ai e Iesu “ē ua nonofo i le pogisa” i le taimi o lana talaʻiga i le lalolagi, ma ua faapefea ona faaauau pea ona ia faia faapea?

 ¹³ I le ōgatusa ai ma lenei taʻutinoga, o le a gaoioi le Auauna filifilia a Ieova e “faapupula i mata o ē tauaso,” “aumaina i fafo nai le fale puipui lē ua fusifusia,” ma laveaʻi “ē ua nonofo i le pogisa.” (Isa. 42:7) I le taimi o lana talaʻiga i le lalolagi, na faia ai faapea e Iesu e ala i le faaalialia o le sesē o tū faalotu, ma talaʻi atu le tala lelei o le Malo. (Mata. 15:3; Luka 8:1) O lea na ia laveaʻiina ai tagata Iutaia na avea ma ona soo, mai le nofo pologa faaleagaga. (Ioa. 8:31, 32) I se auala talitutusa, ua aumaia foʻi e Iesu le laveaʻiga faaleagaga i le faitau miliona o tagata e lē o ni Iutaia. Ua ia faatonuina ona soo ina ia “ō atu e fai tagata o nuu uma lava ma soo,” ma folafola mai o le a ia faatasi ma ona soo “seʻia oo i le iʻuga o faiga o mea a le lalolagi.” (Mata. 28:19, 20) O loo vaavaaia mai e Iesu Keriso le galuega talaʻi i le lalolagi atoa, mai lona tulaga i le lagi.

Ua Faasilisilia e Ieova le “Auauna”

14, 15. Aiseā, ma na faapefea ona faasilisilia e Ieova lana Auauna?

¹⁴ I se isi valoaga e faatatau i lana Auauna faa-Mesia, ua fetalai ai Ieova e faapea: “Faauta, e manuia laʻu Auauna, e faasilisiliina o ia, ma viia, ma matuā faaneeneeina.” (Isa. 52:13) Ona o le gauaʻi faamaoni o Iesu i le pule silisili ese a Ieova ma lona faamaoni i le tofotofoga e sili ona faigatā, na faasilisilia ai o ia e Ieova.

¹⁵ Na tusi le aposetolo o Peteru e faatatau iā Iesu e faapea: “Ua afio o ia i le lagi ma o loo i le itu taumatau o le Atua; ma ua faia e le Atua ina ia gauaʻi atu agelu, ma pule ma ē malolosi iā te ia.” (1 Pete. 3:22) I se tulaga tutusa, na tusi le aposetolo o Paulo e faapea: “Ua ia faamaulalo iā te ia lava, ma iʻu ai ina usiusitai e oo i le oti, ioe, o le oti lea i le laau na faapuapuagatia ai o ia. O le mea lea ua faaeaina ai foʻi o ia e le Atua i se tulaga e sili ona maualuga, ma avatu ma le agalelei iā te ia le suafa e sili i isi igoa uma, ina ia tootutuli tulivae uma lava i le suafa o Iesu, o i latou o i le lagi, ma i latou o i le lalolagi, ma i latou o i lalo ifo o le eleele, ma ia taʻutaʻu atu e laulaufaiva uma o Iesu Keriso o le Alii, ina ia faamamaluina ai le Atua le Tamā.”—Fili. 2:8-11.

16. Na faapefea ona “matuā faaneeneeina” Iesu i le 1914, ma o le ā na ia faia talu mai lenā taimi?

 ¹⁶ I le 1914, na toe faasilisilia ai e Ieova Iesu. Na “matuā faaneeneeina” o ia ina ua faanofotupuina e Ieova o ia e avea ma Tupu o le Malo Faa-Mesia. (Sala. 2:6; Tani. 7:13, 14) Talu mai lenā taimi, ua oo atu ai le ‘pule a Keriso i totonu o ē ita iā te ia.’ (Sala. 110:2) Sa muamua ona ia pule iā Satani ma ana temoni, e ala i le lafoina mai o i latou i le lalolagi. (Faaa. 12:7-12) O lea la, i le gaoioi ai e avea ma Kuresa Sili, ua laveaʻi ai e Keriso le vaega totoe o ona uso faauuina i le lalolagi, mai le nofo pologa iā “Papelonia Tele.” (Faaa. 18:2; Isa. 44:28) Ua taʻimua o ia i le galuega talaʻi i le lalolagi aoao lea ua iʻu ai i le aoaoina mai o “ē o totoe” o ona uso faaleagaga, ona aoaoina ai lea o le faitau miliona o “isi mamoe,” o aumea faamaoni a le “lafu mamoe itiiti.”—Faaa. 12:17; Ioa. 10:16; Luka 12:32.

17. O le ā ua tatou aʻoaʻoina mai le suʻesuʻeina o valoaga a Isaia e faatatau i le “auauna”?

¹⁷ O le suʻesuʻeina o nei valoaga mataʻina i le tusi a Isaia, e mautinoa ua faatuputeleina ai lo tatou talisapaia o lo tatou Tupu ma lo tatou Togiola, o Keriso Iesu. O lona gauaʻi o se atalii i le taimi o lana talaʻiga i le lalolagi, ua atagia mai ai le toleniga na ia maua a o iai o ia faatasi ma lona Tamā, i le taimi e leʻi afio mai i le lalolagi. Ua ia faamaonia le avea o ia ma “malamalama o nuu ese” e ala i lana faiva, ma e ala i le galuega talaʻi lea na te vaavaaia e oo mai lava i le taimi nei. E pei ona o le a sosoo ai nei ona tatou vaaia, o se isi valoaga e faatatau i le Auauna Faa-Mesia ua faaalia ai, sa mafatia o ia ma ofoina mai lona soifua mo i tatou, ma o mea ia e tatau ona tatou “mafaufau” i ai a o lata le Faamanatuga o lona maliu.—Epe. 12:2, 3.

[Faaopoopoga i lalo]

O se Autaluga

• O ai le “auauna” na taʻua i valoaga a Isaia, ma e faapefea ona tatou iloa?

• O le ā le toleniga na maua e le Auauna mai iā Ieova?

• Ua faapefea ona avea Iesu ma “malamalama o nuu ese”?

• Na faapefea ona faasilisilia le Auauna?

[Fesili mo le Suʻesuʻega]

[Ata i le itulau 21]

Sa iloa manino e Filipo o le “auauna” na taʻua e Isaia, o Iesu le Mesia

[Ata i le itulau 23]

I le avea ma Auauna filifilia a Ieova, sa faaalia e Iesu le alofa i ē matitiva ma ē mafatia

[Ata i le itulau 24]

Sa faaneeneeina Iesu e lona Tamā ma faanofotupuina e avea ma Tupu o le Malo Faa-Mesia