‘Ia E Sau ma Mulimuli Mai iā te Aʻu’

“A fia mulimuli mai se tasi iā te aʻu, ia faafitia e ia o ia lava ma amo le laau e faapuapuagatia ai o ia i aso uma lava, ma mulimuli mai . . . .iā te aʻu.”—LUKA 9:23.

1, 2. (a) O le ā le valaaulia māfana a Iesu iā i tatou? (e) O faapefea ona e tali atu i le valaaulia a Iesu?

I LE taufaaiʻuiʻuga o lana faiva, sa molimau atu ai Iesu i Perea, o se vaipanoa e i le isi itu o Ioritana, i mātū i sasaʻe o Iutaia. Sa faalatalata atu iā te ia se tauleʻaleʻa, ma fesili atu po o le ā se mea e tatau ona ia faia ina ia maua ai le ola e faavavau. Ina ua silafia e Iesu sa tausia ma le faamaoni e le tauleʻaleʻa le Tulafono a Mose, ona ia faaoo atu lea i ai o se valaaulia mataʻina. Na ia faapea atu: “Ia e alu e faatau atu au meafaitino ma foaʻi atu i ē matitiva, ona e maua ai lea o ʻoa i le lagi, ona e sau ai lea ma mulimuli mai iā te aʻu.” (Mare. 10:21) Seʻi mātau mai—ua ia maua se valaaulia ia mulimuli atu iā Iesu, le Alo pele e toʻatasi o le Atua Silisili Ese!

² Sa teena e lenā tauleʻaleʻa le valaaulia, ae na talia e isi. Muamua atu, na fetalai ai Iesu iā Filipo e faapea: “Inā mulimuli mai iā te aʻu.” (Ioa. 1:43) Sa talia e Filipo le valaaulia ma mulimuli ane avea ma aposetolo. Na taʻu atu foʻi e Iesu le valaaulia iā Mataio, ma na ia taliaina foʻi. (Mata. 9:9; 10:2-4) O le mea moni, o le valaaulia lava foʻi lenā ua ofo mai e Iesu iā i latou uma e naunau i le amiotonu, ina ua ia fetalai: “A fia mulimuli mai se tasi iā te aʻu, ia faafitia e ia o ia lava ma amo le laau e faapuapuagatia ai o ia i aso uma lava, ma mulimuli mai pea iā te aʻu.” (Luka 9:23) O lea la, o so o se tasi lava e mafai ona mulimuli iā Iesu pe avea ma ona soo, pe afai e manaʻo moni lava i ai. Po o iā te oe lenā faanaunauga? O le toʻatele o i tatou ua uma ona tali lelei atu i le valaaulia māfana a Iesu, ma i le faiva i le fanua, o loo tatou faaoo atu ai lenā valaaulia i isi.

3. E faapefea ona tatou ʻalofia le tafetafea ese mai le mulimuli atu iā Iesu?

³ Ae pagā lea, o nisi sa faaalia le naunau i upu moni o le Tusi Paia ua lē o toe faaauau ona suʻesuʻe i le Tusi Paia. Nai lo lea, ua latou faavaivai ma iʻu ai ina “tafetafea ese” mai le mulimuli atu iā Iesu. (Epe. 2:1) E mafai faapefea ona tatou ʻalofia le paʻuʻū atu i lenā mailei? E fesoasoani tele pe afai e tatou te fesili ifo iā i tatou lava: ‘Aiseā ua tatou filifili ai e mulimuli iā Iesu? O le ā le uiga o le mulimuli iā Iesu?’ O le manatuaina o tali o na fesili o le a fesoasoani iā i tatou e faamalosia ai la tatou faaiʻuga, ia tumau i le ala atamai ua tatou filifili i ai. O le a fesoasoani foʻi iā i tatou e faalaeiauina ai isi ina ia mulimuli iā Iesu.

Aiseā e Mulimuli ai iā Iesu?

4, 5. Aiseā ua agavaa ai Iesu e avea ma Taʻitaʻi?

⁴ Na taʻua e le perofeta o Ieremia e faapea: “Ieova e, ua ou iloa e lē o i le tagata lona ala, e lē o i le tagata e savali ona faatonuina le mea e ui ai o ia.” (Iere. 10:23) Ua faamaonia i le talafaasolopito le moni o upu a Ieremia. Ua faateleina faamaoniga e faamaonia ai le lē taulau o tagata lē lelei atoatoa e pulea i latou lava. Na tatou talia le valaaulia ia mulimuli iā Iesu, ona ua tatou iloa ua agavaa o ia e avea ma o tatou Taʻitaʻi i se auala e leai se tagata e mafai ona faataʻitaʻi i ai. Seʻi o tatou iloiloina nisi o agavaa o Iesu.

⁵ Muamua, o Ieova na filifilia Iesu e avea ma Mesia le Alii. E sili atu ona silafia e Lē na Faia i tatou, lē e tatau ona tofia e avea ma o tatou Taʻitaʻi. Lua, e iai uiga o Iesu e mafai ona tatou mātauina ma faataʻitaʻi i ai. (Faitau le Isaia 11:2, 3.) O ia o le faaaʻoaʻoga e sili ona lelei. (1 Pete. 2:21) Tolu, e matuā manatu mamafa Iesu iā i latou o ē mulimuli iā te ia, e pei ona sa ia faaalia ina ua ia maliu mo i latou. (Faitau le Ioane 10:14, 15.) Ma ua ia faaalia mai o ia o se leoleo mamoe alofa, a o ia taʻitaʻia i tatou i se olaga ua maua ai le fiafia i le  taimi nei, ma taʻitaʻi atu ai i se lumanaʻi matagofie e faavavau. (Ioa. 10:10, 11; Faaa. 7:16, 17) Ona o nei māfuaaga faapea ma isi, na tatou faia ai se faaiʻuga atamai ina ua tatou filifili e mulimuli iā Iesu. Peitaʻi, o le ā e aofia ai i le mulimuli iā Iesu?

6. O le ā e aofia ai i le mulimuli iā Iesu?

⁶ O le avea ma ē mulimuli iā Iesu, e sili atu mea e uiga i ai nai lo le tau ina taʻua o i tatou o Kerisiano. Pe tusa ma le lua piliona tagata i aso nei ua faapea mai o i latou o Kerisiano, ae ua faaalia i a latou gaoioiga o i latou o “ē faia mea leaga.” (Faitau le Mataio 7:21-23.) Pe a faaalia e tagata taʻitoʻatasi le naunau i le valaaulia ia mulimuli iā Iesu, e tatou te faamatala atu iā i latou e faapea o Kerisiano moni, e faataʻitaʻi atu o latou olaga atoa i aʻoaʻoga ma faaaʻoaʻoga a Iesu—ma e latou te faia faapea i aso uma o o latou olaga. Ina ia faataʻitaʻia le uiga o lenei manatu, seʻi o tatou iloilo nisi o mea ua tatou iloa e uiga iā Iesu.

Faaaʻoaʻo i le Poto o Iesu

7, 8. (a) O le ā le poto, ma aiseā na tele ai le poto o Iesu? (e) Na faapefea ona faaalia e Iesu le poto, ma e faapefea ona tatou faaaʻoaʻo iā te ia?

⁷ Sa faaalia e Iesu le tele o uiga mataʻina, peitaʻi o le a tatou taulaʻi atu i uiga e fā: o lona poto, lona lotomaulalo, lona maelega, ma lona alofa. Muamua, seʻi o tatou iloiloina lona poto—o lona tomai lea e faaaogā ai le iloa ma le malamalama i se auala aogā. Na tusi le aposetolo o Paulo e faapea: “Ua matuā natia iā [Iesu] le oloa uma o le poto atoa ma le iloa.” (Kolo. 2:3) O fea na maua mai ai e Iesu lenā poto? Na fetalai o ia e faapea: “E pei ona aʻoaʻo mai e le Tamā iā te aʻu, o mea ia ou te tautala atu ai.” (Ioa. 8:28) Na avatu e Ieova iā te ia le poto, o le mea lea e lē faateʻia ai i tatou i le saʻo aʻiaʻi o le faamasinoga a Iesu.

⁸ O se faaaʻoaʻoga, sa faaaogā e Iesu le faautautaga poto i le filifilia o le auala e soifua ai. Sa ia filifili e soifua i se olaga faigofie, ma taulaʻi atu i le mea e tasi: o le faia lea o le finagalo o le Atua. Sa ia faaaogā ma le atamai lona taimi ma le malosi ina ia faaauiluma ai manaʻoga o le Malo. E tatou te mulimuli i le faaaʻoaʻoga a Iesu e ala i le taumafai e ‘faafaigofie le vaai,’ ma ʻalofia ai le faamamafa o mea e lē aogā lea e alu uma ai lo tatou malosi ma uaʻi atu i ai. (Mata. 6:22) E toʻatele Kerisiano i aso nei ua latou faia laasaga ina ia faafaigofie ai o latou olaga, ina ia mafai ona faaaogā le tele o lo latou taimi i le talaʻiga. O nisi ua mafai ona ulu atu i le auaunaga paeonia. Pe afai o oe o se tasi o i latou na, e matuā faamalō atu i lenā tulaga. O le ‘saʻilia muamua o le malo’ e aumaia ai le fiafiaga sili ma le faamalieina.—Mata. 6:33.

Ia Lotomaulalo e Pei o Iesu

9, 10. Na faaalia faapefea e Iesu lona lotomaulalo?

⁹ O le uiga lona lua o Iesu o le a tatou iloiloina, o lona lotomaulalo. Pe a tuuina atu i tagata lē lelei atoatoa le pule, e masani lava ona latou atiaʻe se uiga faamaualuga o le faatāua lea o i latou lava. E matuā ese mai ai lava Iesu! E ui lava e aupito i tāua lona tofiga i le faataunuuina o le fuafuaga a le Atua, e aunoa ma se taimi na faaalia ai e Iesu se uiga faamaualuga. Ma ua faalaeiauina i tatou ina ia faaaʻoaʻo iā te ia i lona lotomaulalo. Na tusi le aposetolo o Paulo e faapea: “Ia faaauau ona iā te outou le mafaufau o Keriso Iesu, o lē e ui ina sa foliga e pei o le Atua, ae e leʻi manatu o ia e faoa le pule, ina ia tutusa ai o ia ma le Atua. E leai, ae na tuua e ia o mea uma lava ma fai o ia ma pologa, ma avea ai o ia e pei o se tagata.” (Fili. 2:5-7) O le ā na aofia ai i lenā mea?

¹⁰ Sa olioli Iesu i le faaeaga mamalu o le iai i le afioaga o lona Tamā i le lagi, peitaʻi sa ia lotomalie  e ‘tuua mea uma.’ Sa faaliliu mai lona soifua i le manava o se taupou Iutaia, ina ia tuputupu aʻe ai mo le iva masina seʻia oo ina fanau mai o se tamameamea, i le aiga o se kamuta e lē taualoa. Sa faasolosolo mālie ona tuputupu aʻe Iesu i le aiga o Iosefa, ma avea ai ma tamaitiiti laʻitiiti, seʻia oo i ona tausaga talavou. E leai sana agasala. Peitaʻi, mai lava i lona talavou, sa tumau pea ona ia gauaʻi i ona mātua e ui o ni tagata agasala e lē lelei atoatoa. (Luka 2:51, 52) E uigaese lenei lotomaulalo!

11. O ā auala e mafai ona tatou faaaʻoaʻo ai i le lotomaulalo o Iesu?

¹¹ E tatou te faaaʻoaʻo i le lotomaulalo o Iesu pe a tatou lotomalilie e talia tofiga ia atonu e foliga mai e faatauvaa. O se faaaʻoaʻoga, seʻi manatu i le tofiga o le talaʻia o le tala lelei. E ono foliga mai e faatauvaa lenā galuega, aemaise lava pe a lē fiafia mai tagata, tauemu, pe tetee mai foʻi. Peitaʻi, o le maumauaʻi pea i le galuega talaʻi, ua tatou fesoasoani ai i isi ina ia tali atu i le valaaulia a Iesu ia mulimuli atu iā te ia. O le faia faapea, ua tatou fesoasoani ai e faasaoina ola o tagata. (Faitau le 2 Timoteo 4:1-5.) O le isi faaaʻoaʻoga o le tausia lelei lea o o tatou Maota mo Sauniga. E mafai ona aofia ai mea e pei o le sasaaina o kalone lapisi, fufulu le fola o le fale, ma faamamā falelētaʻua—o nei galuega uma o ni galuega faatauvaa! Peitaʻi, ua tatou iloa o le tausia lelei o o tatou Maota mo Sauniga—le nofoaga autū o le tapuaʻiga mamā i o tatou vaipanoa—o se vaega o la tatou auaunaga paia. E ala i le lotomalilie e faataunuu tofiga e foliga mai e faatauvaa, ua tatou faaalia ai le lotomaulalo ma ua tatou mulimuli ai i tulagāaao o Keriso.

Ia Maelega e Pei o Iesu

12, 13. (a) Na faaalia faapefea e Iesu le maelega, ma o le ā na uunaʻia ai o ia? (e) O le ā o le a uunaʻia ai i tatou e maelega i le faiva?

¹² Seʻi o tatou iloilo le maelega o Iesu i le faiva. E tele mea sa faia e Iesu a o iai i le lalolagi. I tausaga amata o lona soifuaga, sa la galulue faatasi ai ma lona tamāfai o Iosefa, o se kamuta. I le taimi o lana faiva, sa faia ai e Iesu vavega, e aofia ai le faamālōlōina o tagata mamaʻi ma toe faatutū tagata na maliliu. Ae o lana galuega autū, o le talaʻia o le tala lelei ma aʻoaʻo i latou e fia faalogo. (Mata. 4:23) I le avea ma soo o Iesu, o le galuega foʻi lenā o loo tatou faia. E faapefea ona tatou mulimuli i lana faaaʻoaʻoga? O se tasi o auala, o lo tatou faia lea o le galuega i le māfuaaga lava foʻi lea na faia ai e Iesu.

¹³ O le alofa mo le Atua o le uunaʻiga sili lea sa uunaʻia ai Iesu e talaʻi atu ma aʻoaʻo atu. Peitaʻi, sa naunau foʻi Iesu i upu moni na ia aʻoaʻo atu. Sa avea na upu moni ma ʻoa tautele iā te ia, ma sa ia naunau e faasoa atu na upu moni i isi. I le avea ai o i tatou ma “faiaʻoga,” e faapena foʻi le  lagona o loo iā i tatou. E matuā tāua iā i tatou upu moni matagofie ia ua tatou aʻoaʻoina mai le Afioga a le Atua. Ua tatou iloa le finauga i le pule silisili ese i le aoao o mea, ma iloa le auala o le a foʻia ai. Ua tatou malamalama lelei i le aʻoaʻoga a le Tusi Paia e faatatau i le tulaga o ē ua maliliu, ma faamanuiaga o le a aumaia i le lalolagi fou a le Atua. E tusa lava po ua leva pe e leʻi leva foʻi talu ona tatou aʻoaʻoina upu moni, e lē mafai ona mou atu lo latou aogā, o ni ʻoa tautele iā i tatou. (Faitau le Mataio 13:52.) E ala i le talaʻi atu ma le maelega mai le loto, ua tatou faailoa atu ai i isi lo tatou naunau i mea na aʻoaʻoina ai i tatou e Ieova.

14. E faapefea ona tatou faaaʻoaʻo i le auala na aʻoaʻo atu ai Iesu?

¹⁴ Seʻi mātau foʻi le auala na aʻoaʻo atu ai Iesu. Sa ia faasino atu e lē aunoa lana ʻaufaalogologo i le Tusi Paia. E masani ona ia faailoa atu se manatu tāua e ala i le faapea atu: “Ua tusia.” (Mata. 4:4; 21:13) I ana fetalaiga na faamaumauina, e silia ma le ʻafa o tusi o Tusitusiga Eperu na sii saʻo mai e Iesu, pe faasino lē tuusaʻo atu i ai. I le pei o Iesu, e tatou te faalagolago i taimi uma i le Tusi Paia i la tatou faiva ma taumafai malosi e faamalamalama mau pe a talafeagai ai. O le faia faapea, ua tatou fesoasoani ai i tagata lotofaamaoni ina ia latou iloa o lea tatou te aʻoaʻoina atu manatu o le Atua, ae lē o ni o tatou lava manatu. Maʻeu le faafiafiaina o i tatou pe a lotomalie se tasi e faitau le Tusi Paia, ma talanoaina aogā ma le uiga o le Afioga a le Atua! Ma pe a talia e na tagata le valaaulia a Iesu ia mulimuli atu iā te ia, o le a atili ai lo tatou olioli.

O le Mulimuli iā Iesu, o Lona Uiga ia Alolofa i Isi

15. O le ā le uiga matilatila o Iesu, ma e faapefea i le tomānatu i ai ona aafia ai i tatou?

¹⁵ O le uiga mulimuli o Iesu o le a tatou iloiloina e sili ona faamāfanafanaloto—o lona alofa lea mo tagata. Na tusi le aposetolo o Paulo e faapea: “Ua faamalosia i matou ona o le alofa o le Keriso.” (2 Kori. 5:14) Pe a tatou tomānatu i le alofa o Iesu i tagata lautele ma i tatou taʻitoʻatasi, e pāʻia ai o tatou loto ma faamalosia ai i tatou e mulimuli i lana faaaʻoaʻoga.

16, 17. O ā auala na faaalia ai e Iesu lona alofa mo isi?

¹⁶ Na faaalia faapefea e Iesu le alofa mo isi? O lona lotomalie e foaʻiina mai lona soifua mo tagata, o le faaaliga sili lea o lona alofa. (Ioa. 15:13) Peitaʻi, i le taimi o lana faiva, sa faaalia ai foʻi e Iesu le alofa i isi auala. O se faaaʻoaʻoga, sa ia lagona le alofa mo i latou na mafatia. Ina ua ia silasila atu o fetagisi Maria ma tagata sa iai faatasi ma ia ona o le oti o Lasalo, sa malamalama lona finagalo i lo latou faavauvau. E ui lava o lea o le a ia toe faatūina mai Lasalo, ae sa matuā ootia Iesu ma “tagi ai.”—Ioa. 11:32-35.

¹⁷ I le tau amatamataga o le faiva a Iesu, na faalatalata atu ai se lepela iā Iesu ma faapea atu: “A e finagalo i ai, e mafai lava ona e faamamā iā te aʻu.” Na faapefea ona tali atu Iesu? Ua faapea mai le tala: “Ona mutimutivale lea o lona alofa.” Ona ia faia lea o se gaoioiga e lē masani  ai. “Ua faaloaloa atu lona aao ma paʻi atu iā te ia, ua fetalai atu: ‘Ou te loto i ai. Ia mamā ia oe.’ Ona teʻa ai loa lea o lona lepela, ma ua mamā o ia.” I le Tulafono a Mose, o lepela o tagata e lē mamā, ma sa mafai lava e Iesu ona faamālōlō le tamāloa e aunoa ma le paʻi atu iā te ia. Peitaʻi, ina ua faamālōlō e Iesu le lepela, sa manaʻo ina ia lagona e le tamāloa le paʻi atu o se isi tagata, ma atonu o le taimi muamua lea i le tele o tausaga. Maʻeu se gaoioiga e faaalia ai le alofa!—Mare. 1:40-42.

18. E faapefea ona tatou faaalia le ‘tigā alofa o le tasi i le isi’?

¹⁸ I le avea ma ē mulimuli iā Keriso, ua faatonuina i tatou ina ia faatino lo tatou alofa e ala i le faaalia o le ‘tigā alofa o le tasi i le isi.’ (1 Pete. 3:8) E ono lē faigofie ona malamalama i faalogona o se uso talitonu o loo mafatia i se gasegase faaumiumi po o le matuā mafatia o le mafaufau, aemaise lava pe afai e leʻi tupu lenā tulaga iā i tatou. Peitaʻi, sa tigā alofa Iesu faatasi ma tagata mamaʻi e ui lava e leʻi maʻi muamua o ia. E faapefea ona tatou atiaʻe se tigā alofa faapena? E ala i le faalogologo ma le onosaʻi a o faamatala mai e i latou o mafatia o latou lagona iā i tatou. Atonu tatou te fesili ifo iā i tatou lava, ‘Pe ana o aʻu lea e tupu ai le tulaga lea, o ā ni oʻu faalogona?’ Pe afai tatou te atiaʻe le malamalama i faalogona o isi, o le a mafai la ona tatou “faamāfanafana i ē mafatia.” (1 Tesa. 5:14) O le faia faapea o le a tatou mulimuli ai iā Iesu.

19. O ā auala e aogā ai iā i tatou le faaaʻoaʻoga a Iesu?

¹⁹ Maʻeu lo tatou fiafia ona o le suʻesuʻeina o fetalaiga ma mea sa fai e Iesu Keriso! O le tele tatou te aʻoaʻoina ai e faatatau iā te ia, o le tele foʻi lenā o lo tatou mananaʻo ia pei o ia, ma mananaʻo e fesoasoani atu i isi ina ia faaaʻoaʻo foʻi iā Iesu. O lea la, seʻi o tatou taumafai uma loa e mulimuli atu i le Mesia le Tupu—i le taimi nei e oo i le faavavau!

Pe Mafai Ona E Faamatala?

• E faapefea ona tatou faaalia le poto, e pei ona sa faaalia e Iesu?

• O ā auala e tatou te faaalia ai le lotomaulalo?

• E mafai faapefea ona tatou atiaʻe le maelega mo le faiva?

• O ā auala e mafai ona tatou faaaʻoaʻo ai iā Iesu i le faaalia o le alofa mo isi?

[Fesili mo le Suʻesuʻega]

[Pusa/Ata i le itulau 5]

O SE TUSI E FESOASOANI IĀ I TATOU E FAAAʻOAʻO AI IĀ KERISO

I le polokalame o le tauaofiaga itumalo o le 2007, na tatalaina ai se tusi e 192 ona itulau ua faaulutalaina “Come Be My Follower.” O lenei tusi ua fuafuaina e fesoasoani i Kerisiano ina ia taulaʻi atu iā Iesu, aemaise lava i ona uiga ma mea na fai. Pe a uma mataupu amata e lua, ua saunia mai e le vaega muamua se aotelega o uiga mataʻina o Iesu—o lona lotomaulalo, lona maelega, lona poto, lona usiusitai, ma lona tumau.

Ona sosoo lea ma vaega o loo talanoaina ai mea sa fai e Iesu o se faiaʻoga ma o se tagata talaʻi o le tala lelei, ma nisi o auala na faaalia ai lona alofa silisili. I le tusi atoa, o loo aumaia ai faamatalaga e fesoasoani i se Kerisiano ina ia faaaʻoaʻo ai iā Iesu.

Tatou te mautinoa o le a uunaʻia e lenei tusi i tatou uma e iloilo i tatou lava ma fesili ifo e faapea: ‘Po o oʻu mulimuli moni lava iā Iesu? E mafai faapefea ona ou mulimuli atili atu pea iā te ia?’ O le a fesoasoani foʻi le tusi iā “i latou uma o ē ua saunia o latou loto mo le ola e faavavau,” ina ia avea ma soo po o ē mulimuli iā Keriso.—Galu. 13:48.

[Ata i le itulau 4]

Sa finagalo malie Iesu e afio mai i le lalolagi ma fanau mai o se pepe. O le ā le uiga sa manaʻomia ai?

[Ata i le itulau 6]

O le ā o le a uunaʻia ai i tatou e maelega i le faiva?