Ia Taaʻina Ou Uiga i Fetalaiga a Iesu

“O lē na auina mai e le Atua, e fetalai o ia i afioga a le Atua.”—IOA. 3:34.

1, 2. O le ā e ono faatusa i ai upu a Iesu i le Lauga i le Mauga, ma aiseā e faapea atu ai na faavae mai i “afioga a le Atua”?

O SE tasi o taimane pito i telē lava o loo iai i le taimi nei, e taʻu o le Fetu o Aferika (Star of Africa), ma o lona telē e 530 carat (o le fua e fua aʻi maatāua). E mautinoa o se taimane e tāua tele! Peitaʻi, e sili atu ai ona tāua ʻoa faaleagaga mai le Lauga a Iesu i le Mauga. E lē o se mea lenā e faateʻia ai, auā o fetalaiga a Keriso e mai iā Ieova! I le faasino atu iā Iesu, ua taʻua i le Tusi Paia e faapea: “O lē na auina mai e le Atua, e fetalai o ia i afioga a le Atua.”—Ioa. 3:34-36.

² E ui lava atonu e leʻi atoa se afa itula na faia ai le Lauga i le Mauga, ae e 21 mau o loo iai na sii mai i tusi e valu o le Tusi Paia Eperu. O lona uiga la sa faavae mai i “afioga a le Atua.” Seʻi o tatou iloiloina nei pe faapefea ona tatou faatatauina nisi o le tele o fetalaiga tāua, o loo maua i lenei lauga o loo faaalia ai le tele o le tomai o le Alo pele o le Atua.

Ia “Muaʻi Faalelei ma Lou Uso”

3. Ina ua uma ona ia lapataʻia ona soo e faatatau i aafiaga o le ita, o le ā le fautuaga na avatu e Iesu?

³ I le avea ma Kerisiano, e tatou te fiafia ma filemu ona o loo iā i tatou le agaga paia o le Atua, ma e aofia ai i le fua o le agaga paia le filemu ma le olioli. (Kala. 5:22, 23) E leʻi finagalo Iesu i ona soo ia mou atu lo latou filemu faapea ma le fiafia, ma o lea na ia lapataʻia ai i latou e faatatau i aafiaga e iʻu ai i le oti, ona o le ita faaumiumi. (Faitau le Mataio 5:21, 22.)  Ona sosoo ai lea ma lona faapea atu: “Pe afai foʻi e te avatu lau taulaga i le fata faitaulaga, ona e manatua ai lea o loo iai se mea e lē malie ai lou uso iā te oe, inā tuu ia o lau taulaga i luma o le fata faitaulaga, ae ia e alu e muaʻi faalelei ma lou uso, ona e sau ai lea ma avatu lau taulaga.”—Mata. 5:23, 24.

4, 5. (a) O le ā le “taulaga” sa faasino i ai le fetalaiga a Iesu i le Mataio 5:23, 24? (e) O le ā le tāua o le toe faalelei ma se uso e lē o fiafia iā i tatou?

⁴ O le “taulaga” lea na taʻua e Iesu, e faasino atu i so o se taulaga lava na ofoina atu i le malumalu i Ierusalema. O se faataʻitaʻiga, sa tāua taulaga na osia i manu ona i lenā taimi, sa avea ma vaega o le tapuaʻiga na tuuina atu iā Ieova e ona tagata. Peitaʻi, e iai se isi mea e sili atu ona tāua na faamamafa e Iesu, o le toe faalelei lea ma se uso e lē o fiafia iā i tatou, a o leʻi ofoina atu se taulaga i le Atua.

⁵ O le ā la se lesona tatou te aʻoaʻoina mai lenei fetalaiga a Iesu? Ua mautinoa mai ai, o le auala tatou te feutagaʻi ai ma isi, e aafia ai foʻi la tatou faiā ma Ieova. (1 Ioa. 4:20) O le mea moni, sa leai se tāua o taulaga na ofoina atu i le Atua i aso anamua, pe afai sa lē lelei le auala na feagai ai lē o loo ofoina atu le taulaga, ma ona uso a tagata.—Faitau le Mika 6:6-8.

E Ao Ona Faaalia le Lotomaulalo

6, 7. Aiseā e manaʻomia ai le lotomaulalo, pe a taumafai e toe maua se faiā filemu ma se uso ua tatou faatigā i ai?

⁶ O le faia o se faaleleiga ma se uso e lē o fiafia mai, o se tulaga e tofotofoina ai lo tatou lotomaulalo. O tagata lotomaulalo e lē finau pe faatautavā ma uso talitonu, i le taumafai lea e taʻu atu o ia e saʻo. O lenā tulaga o le a afāina ai faaleagaga, e pei o le tulaga lea na tupu i Kerisiano i Korinito anamua. E tusa ai o lenā tulaga, na faapea mai le faamatalaga faatupu manatu a le aposetolo o Paulo: “Ua outou toʻilalo ona ua molia e le tasi le isi i le tulafono. Aiseā tou te lē onosai ai pe a agaleagaina outou? Aiseā tou te lē onosai ai pe a gaoia a outou mea?”—1 Kori. 6:7.

⁷ E leʻi faapea mai Iesu e ao ona tatou ō atu i lo tatou uso ina ia taʻu i ai e faapea, o tatou e saʻo a o ia e sesē. O lo tatou sini, ia toe maua se faiā filemu. Ina ia tausia le filemu, e ao ona tatou faailoa saʻo atu o tatou lagona. E manaʻomia foʻi ona tatou faailoa atu ua tatou malamalama ma amanaʻia o loo tigā faalogona o le isi tagata iā i tatou. Ma pe afai o tatou e sesē, e mautinoa lava o le a tatou taumafai e faatoese atu ma le lotomaulalo.

Pe “Afai E te Tausuai Ona o Lou Mata Taumatau”

8. Faamatala puupuu mai upu a Iesu o loo i le Mataio 5:29, 30.

⁸ I lana Lauga i le Mauga, na avatu ai e Iesu se fautuaga aogā e faatatau i amioga. Sa silafia e ia, e ono lamatia i tatou ona o o tatou tino lē lelei atoatoa. O lea na fetalai ai Iesu e faapea: “O lenei, afai e te tausuai ona o lou mata  taumatau, ia sali ese ma lafoaʻi. Auā e sili ona lelei ona aveese o se vaega o lou tino, nai lo le lafo o lou tino atoa i Kena. Afai foʻi e te tausuai ona o lou lima taumatau, inā tipi ese ia ma lafoaʻi. Auā e sili ona lelei ona aveese se vaega o lou tino, nai lo le lafo o lou tino atoa i Kena.”—Mata. 5:29, 30.

9. E faapefea ona tatou “tausuai” ona o o tatou “mata” po o tatou “lima”?

⁹ O le “mata” lea na taʻua e Iesu, o loo faaāta mai ai le malosi po o le tomai e tatou te taulaʻi atu ai i se mea, ae o le “lima” e fesootaʻi atu i mea e tatou te faia i o tatou lima. Pe afai tatou te lē faaeteete, e ono faapogaia e nei vaega o le tino i tatou e “tausuai” ma lē toe ‘savavali ai ma le Atua.’ (Kene. 5:22; 6:9) O lea la, pe a tofotofoina i tatou ia lē usiusitai iā Ieova, e manaʻomia ona tatou faia ni taumafaiga malolosi, lea ua faatusa atu i le saliina ese o le mata po o le tipiina ese o le lima.

10, 11. O le ā e fesoasoani iā i tatou ina ia ʻalofia ai amioga lē mamā tau feusuaʻiga?

¹⁰ E faapefea ona tatou taofia o tatou mata mai le taulaʻi atu i mea lē mamā? Na taʻua e le tagata e mataʻu i le Atua, o Iopu, e faapea, “Ua ou osia le feagaiga ma oʻu mata, se ā foʻi le mea ou te manatu ai i se taupou?” (Iopu 31:1) O Iopu o se tane ua uma ona faaipoipo, ma sa maumauaʻi ia aua neʻi solia tulafono a le Atua i amioga tatau. O le uiga foʻi lenā e tatau ona iā i tatou, pe ua tatou faaipoipo, pe nofofua foʻi. Ina ia ʻalofia amioga lē mamā tau feusuaʻiga, e manaʻomia ona taʻitaʻia i tatou e le agaga paia o le Atua, lea e fuaina mai ai le amio pulea e i latou e alolofa i le Atua.—Kala. 5:22-25.

¹¹ Ina ia ʻalofia amioga lē mamā tau feusuaʻiga, atonu e lelei ona tatou fesili ifo iā i tatou lava e faapea, ‘Po o faaauau ona ou tilotilo pea i tusi, o televise, po o le Initaneti i ata ma faamatalaga matagā, ma faamaʻite aʻe ai se faanaunauga i ia mea?’ Ia aua foʻi neʻi galo upu nei a le soo o Iakopo: “Ua faaosoosoina tagata taʻitoʻatasi ona ua tosina ma maileia i ona lava tuʻinanau. Auā a tō le tuʻinanau, ona fanau mai ai lea o le agasala, a matua le agasala ona fanau mai ai lea o le oti.” (Iako. 1:14, 15) O le mea moni, pe afai e ‘vaavaai atu pea’ se tasi ua uma ona tuutoina i le Atua, ma ni faanaunauga lē mamā i se tagata o le isi itupā, e manaʻomia ona ia faia ni suiga tetele lea e faatusa atu i le sali ese o le mata ma lafoaʻi.—Faitau le Mataio 5:27, 28.

12. O le ā le fautuaga a Paulo e mafai ona fesoasoani iā i tatou e tetee atu ai i tuʻinanauga leaga?

¹² E ao ona tatou maumauaʻi e tumau i le mamā tau amio, auā e matuā solia lava tapulaa tau amio a Ieova pe afai e lē faaaogāina tatau o tatou lima. O lea la, e ao ona tatou utagia le fautuaga a Paulo, e faapea: “Ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻonaʻo fua i mea a isi, o le ifo i tupua lava lea.” (Kolo. 3:5) O le upu “fasiotia” ua faamamafa mai ai taumafaiga malolosi e ao ona faia, ina ia tetee atu ai i tuʻinanauga leaga.

13, 14. Aiseā e tāua ai ona ʻalofia mafaufauga ma gaoioiga lē mamā?

¹³ Ina ia faasaoina le ola o se tagata, e lē taumatea o le a lotomalie o ia e fai se taotoga e tipi ese ai lona vae po o lona lima. O lea, e tāua tele ona tatou ‘lafoaʻiina’ faafaatusa lo tatou mata po o lo tatou lima, ina ia ʻalofia ai mafaufauga ma gaoioiga lē mamā, lea e mafai ona afāina ai lo tatou ola faaleagaga. E pau le auala e tatou te ʻalofia ai le faaumatiaga e faavavau lea e faaāta mai e Kena, o le tausia pea lea o le tulaga mamā i le mafaufau, i amio, ma le faaleagaga.

¹⁴ Ona o le agasala tuufaasolo ma le tulaga lē lelei atoatoa, o lea e manaʻomia ai ni taumafaiga ina ia tausia pea le mamā tau amio. Na faapea mai Paulo, “Ou te tatuʻi loʻu tino ma fai ma pologa ina neʻi taʻuleagaina aʻu, ae sa ou talaʻi atu i isi tagata.” (1 Kori. 9:27) O lea la, seʻi o tatou maumauaʻi e faaaogā fautuaga a Iesu e faatatau i amioga mamā, ma ia aua neʻi o tatou faia se mea e faaalia ai lo tatou lē lotofaafetai mo lana taulaga togiola.—Mata. 20:28; Epe. 6:4-6.

 “Ia Outou Foaʻi Atu Pea”

15, 16. (a) Na faapefea ona faataatia e Iesu se faaaʻoaʻoga i le limafoaʻi? (e) O le ā le uiga o fetalaiga a Iesu o loo i le Luka 6:38?

¹⁵ Ua faamamafa mai e Iesu le agaga foaʻi i ana fetalaiga ma lana faaaʻoaʻoga silisili. O le auala na ia faaalia ai lona lotofoaʻi tele, o le afio mai lea i le lalolagi mo le lelei o tagata lē lelei atoatoa. (Faitau le 2 Korinito 8:9.) Sa lotomalie Iesu e tuua lona mamalu i le lagi ina ia avea ma tagata ma foaʻi mai lona soifua mo tagata agasala, ma o nisi o i latou o le a faamanuiaina i le lagi pe a avea ma ona suli i le Malo. (Roma 8:16, 17) Ma e mautinoa sa faalaeiauina e Iesu le agaga foaʻi ina ua ia fetalai e faapea:

¹⁶ “Ia outou foaʻi atu pea, ona foaʻi mai lea o tagata iā te outou. Latou te sasaa ifo i o outou ʻie pulupulu ni fua lelei, ua lolomi, ma lūlūina, ma ua tumu. Auā o le fua tou te fuaina atu, e toe fuaina mai iā te outou.” (Luka 6:38) O loo faasino atu le ‘sasaaina ifo i le ʻie pulupulu’ i le masani a nisi o tagata faatauoloa o lea taimi, o le faatumu lea o le gauga o le ofu talaloa tele o se tagata faatau, lea sa fusi i se fusi ma fai ai se tamaʻi taga e pei o se ato e ave ai mea. Pe a tatou foaʻi ma le loto malie, e ono iʻu ai ina fuaina mai iā i tatou se fua lelei, atonu pe i se taimi ua tatou manaʻomia ai.—Fai. 11:2.

17. Na faapefea ona faataatia e Ieova le faaaʻoaʻoga sili o le foaʻi atu, ma o le ā le ituaiga foaʻi atu e aumaia ai iā i tatou le olioli?

¹⁷ E alofa Ieova ma tauia ē e foaʻi atu ma le lotofiafia. Ua ia faataatia se faaaʻoaʻoga sili, e ala i le auina mai o lona Alo pele e toʻatasi “ina ia lē fano tagata uma e faatuatua iā te ia, a ia maua le ola e faavavau.” (Ioa. 3:16) Na tusi Paulo e faapea: “O lē e lima foaʻi, e tele ana mea e maua. Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.” (2 Kori. 9:6, 7) Pe a foaʻi lo tatou taimi, malosi, ma mea faitino e faaauiluma ai le tapuaʻiga moni, e mautinoa o le a aumaia ai iā i tatou le olioli ma faamanuiaga e tele.—Faitau le Faataoto 19:17; Luka 16:9.

“Aua Neʻi Ilia se Pū i Ou Luma”

18. O ā tulaga o le a ‘leai ai so tatou taui’ mai lo tatou tamā i le lagi?

¹⁸ “Ia faaeteete ia aua neʻi faaalialia la outou amiotonu i luma o tagata ina ia iloa ai e i latou; auā pe a faia faapea, e leai so outou taui mai lo outou Tamā o i le lagi.” (Mata. 6:1) O le uiga o le faamatalaga a Iesu i le “amiotonu,” e faatatau i amioga e ōgatusa ma le finagalo o le Atua. E leʻi uiga o ia e faapea e lē tatau ona faaalia i le lautele a tatou galuega alofa, auā na ia fetalai i ona soo ia “susulu atu lo [latou] malamalama i luma o tagata.” (Mata. 5:14-16) Ae o le a “leai so [tatou] taui” mai lo tatou Tamā o i le lagi, pe afai tatou te faia mea “ina ia iloa” ma viiviia ai e isi, e pei o  tagata o loo faatinoina mai ata tifaga. Pe afai e iā i tatou na uunaʻiga, o le a tatou lē olioli i se faiā māfana ma le Atua, po o faamanuiaga e faavavau o le pulega o le Malo.

19, 20. (a) O le ā le uiga o le tala a Iesu ina ua ia fetalai e faatatau i le ‘iliina o se pū’ pe a foaʻi ni “meaalofa”? (e) E faapefea ona tatou lē faailoaina i le lima agavale le mea o loo faia e le lima taumatau?

¹⁹ Pe a iā i tatou se uiga saʻo, o le a tatou mulimuli i le apoapoaʻiga a Iesu e faapea: “O lea, pe a foaʻi ni au meaalofa, aua neʻi ilia se pū i ou luma, e pei ona faia e tagata faafiaamiotonu i sunako ma auala tetele, ina ia viiviia ai i latou e tagata. E moni ou te fai atu iā te outou, Ua maua e i latou lo latou taui.” (Mata. 6:2) O “meaalofa” e tusa ai o le mau, o loo faasino atu i foaʻi sa faia ina ia fesoasoani ai i ē o manaʻomia. (Faitau le Isaia 58:6, 7.) Sa iai se vaegātupe a Iesu ma ona aposetolo na faaaogā e fesoasoani atu ai i ē matitiva. (Ioa. 12:5-8; 13:29) E leʻi ilia ni pū e taʻu atu ai o lea ua fai le meaalofa, ae sa faia e Iesu se faamatalaga faafaatusa e taʻu mai ai e lē tatau ona tatou faaalialia pe “ilia se pū” pe a tatou faia “meaalofa” i isi. E lē tatau lava ona tatou faailoa atu i le lautele na foaʻi, e pei ona sa faia e le ʻau Faresaio Iutaia. Sa taʻua e Iesu i latou o tagata faafiaamiotonu, ona na latou faailoa atu “i sunako ma auala tetele” a latou foaʻi o le agalelei. Na maua e na tagata faafiaamiotonu “lo latou taui.” E pau lo latou taui e maua, o le viiviia lea e tagata ma atonu foʻi e maua ni o latou nofoa pito i luma i le sunako i autafa o taʻitaʻi lotu Iutaia, auā e latou te lē maua se mea mai iā Ieova. (Mata. 23:6) Sa tatau la faapefea ona gaoioi soo o Keriso? Na fetalai Iesu iā i latou, ma i tatou, e faapea:

²⁰ “A o oe, pe a foaʻi ni au meaalofa, aua neʻi iloa e lou lima agavale le mea o loo faia e lou lima taumatau, ae ia lilo lau foaʻi; ona tauia ai lea o oe e lou Tamā, o lē o loo silasila mai iā te oe mai le mea lilo.” (Mata. 6:3, 4) O le tulaga masani lava, e galulue faatasi o tatou lima. O lea la, o le lē iloaina e le lima agavale o le mea o loo faia e le lima taumatau, o lona uiga e tatou te lē faailoaina atu a tatou gaoioiga po o galuega alofa, e oo lava i ē e vavalalata mai iā i tatou, e pei ona vavalalata lo tatou lima agavale i lo tatou lima taumatau.

21. O le ā e aofia ai i taui mai Lē o loo ‘silasila mai le mea lilo’?

²¹ O le a lilo a tatou “meaalofa,” pe afai e lē faia a tatou foaʻi ma le faaalialia. Ona tauia lea o i tatou e lo tatou Tamā, ‘⁠o lē o loo silasila mai le mea lilo.’ Ona o loo afio o ia i le lagi ma e lē o vaaia e mata o tagata, o lea, e tusa ai ma tagata, o loo iai pea lo tatou Tamā i le lagi i le “mea lilo.” (Ioa. 1:18) E aofia ai i taui mai lē o loo ‘silasila mai le mea lilo,’ lo tatou mauaina o se faiā māfana ma Ieova, le faamagaloina o a tatou agasala, ma le foaʻiina mai iā i tatou o le ola e faavavau. (Faata. 3:32; Ioa. 17:3; Efe. 1:7) E sili mamao atu lenā nai lo le mauaina o le viiga mai tagata!

O ni Fetalaiga e Ao Ona Faapelepele i Ai

22, 23. Aiseā e ao ai ona tatou faapelepele i fetalaiga a Iesu?

²² E mautinoa le faatumulia o le Lauga i le Mauga i ʻoa faaleagaga o loo iai vala matagofie e tele. O le mea moni o loo iai upu tautele e aumaia ai iā i tatou le olioli, a o iai i lenei lalolagi ua tumu i faalavelave. Ioe, pe afai tatou te faapelepele i fetalaiga a Iesu ma taaʻina ai o tatou uiga ma le auala e ola ai, o le a tatou fiafia.

²³ O le a faamanuiaina i latou uma e “faalogo” ma “faia” mea na aʻoaʻo mai e Iesu. (Faitau le Mataio 7:24, 25.) O lea la, seʻi o tatou maumauaʻi e usiusitai i fautuaga a Iesu. O le a talanoaina isi ana fetalaiga i le Lauga i le Mauga, i le mataupu mulimuli o lenei faasologa o mataupu.

E Faapefea Ona E Tali?

• Aiseā e tāua ai ona toe faalelei ma se uso e lē o fiafia mai?

• E faapefea ona tatou ʻalofia le tausuai ona o lo tatou “mata taumatau”?

• O le ā lo tatou uiga e tatau ona iai e tusa ai o le foaʻi atu?

[Fesili mo le Suʻesuʻega]

[Ata i le itulau 11]

E tāua tele ona “faalelei” ma se uso o loo tigā ona o i tatou

[Ata i le itulau 12, 13]

E faamanuia e Ieova i latou e foaʻi atu ma le lotofiafia