Maliu o Kerisiano Ia Mamalu, Talafeagai, ma ia Fiafia i ai le Atua

UA E faalogoina le tagiauē. O loo laʻeiina e tagata faavauvau ofu uli, ma taafifili i le palapala ona o le faanoanoa. O loo sisiva tagata i le musika. A o nisi o loo aai ma fiafia ma le leo tetele ma faia poula. O nisi ua taatitia solo, ona ua onanā i le uaina ma le pia. O le ā le mea o loo tupu? I nisi vaipanoa o le lalolagi, o tū masani nei e faia i maliu, lea e faitau selau tagata e auai atu ai e faamavae i lē ua maliu.

E toʻatele Molimau a Ieova e nonofo i vaipanoa e matuā talitonu ai o latou tauaiga ma tuaoi, i talitonuga faataulāitu ma fefefe i ē ua maliliu. E faitau miliona tagata e talitonu e faapea, pe a maliu se tasi o le a faatasi o ia ma agaga o ona tuaa, ma e mafai ona ia fesoasoani pe faaleagaina foʻi i latou o loo feola. Ua fesootaʻi atu nei talitonuga i le tele o tū masani o maliu. Ae mautinoa lava, o le faanoanoa o se faalogona masani pe a maliu se tagata. I nisi taimi, na faavauvau ai Iesu ma ona soo i le maliu o sē e pele. (Ioa. 11:33-35, 38; Galu. 8:2; 9:39) Ae e leʻi iai se taimi na latou faavauvau ai i auala soonafai e pei ona masani ai i o latou aso. (Luka 23:27, 28; 1 Tesa. 4:13) Aiseā? O se tasi o māfuaaga ona na latou iloa le mea moni e faatatau i le oti.

O loo faapea mai ma le manino le Tusi Paia: “Auā o ē ua ola, ua latou iloa e oti i latou; a o ē ua oti, latou te lē iloa se mea . . . O lo latou alofa foʻi, ma lo latou ita, ma lo latou matauʻa, ua mavae lava ia . . . E leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Fai. 9:5, 6, 10) E manino lava fuaiupu faagaeeina o le Tusi Paia, pe a oti se tagata, ua ia lē toe iloa se mea. Ua lē mafai ona ia toe mafaufau, lagona, talanoa, po o le malamalama i so o se mea. E faapefea ona faatautaia maliu a Kerisiano, ona o le malamalamaga o le upu moni o le Tusi Paia?

“Aua Tou te Toe Papaʻi Atu i se Mea Lē Mamā”

E tusa lava po o le ā le ituaiga aganuu e sau ai, e matuā ʻalofia lava e Molimau a Ieova so o se tū e fesootaʻi atu i le talitonuga e faapea, o loo iloa pea e i latou ua maliliu mea, ma e mafai ona aafia ai i latou o loo ola. O na tū e pei o le leoleoina o le maliu, tausamiga ma fiafiaga pe a uma ona teu le maliu, talaga teu, taulaga mo ē ua oti, tū o le faanoanoa e faia e se fafine ua oti lana tane, o faiga uma na e lē mamā ma e lē fiafia i ai le Atua, ona e fesootaʻi i faiga e lē faavaea mai le Tusi Paia, ma aʻoaʻoga a temoni e faaauau pea ona ola le tagata po o le agaga. (Eseki. 18:4) E lē mafai e Kerisiano moni ona “aai i le laoai a Ieova ma le laoai a temoni,” e latou te lē auai i nei tū masani. (1 Kori. 10:21) E latou te usiusitai i le faatonuga: “Ia outou vavae ese . . . ma aua tou te toe papaʻi atu i se mea lē mamā.” (2 Kori. 6:17) E lē faigofie i taimi uma le uia o lenei laasaga.

I Aferika ma isi vaipanoa, ua talitonu le toʻatele, a lē mulimuli i tū ua masani ai, o le a lē fiafia agaga o latou tuaa. O le lē tausisi i na tū o se solitulafono matuiā lea e ono iʻu ai i le malaia o tagata po o ni mala. Ona o le lē auai i faiga o maliu ia e lē faavaea mai le Tusi Paia, e toʻatele tagata o Ieova ua faitioina, sauāina, ma faia e pei o se tagata ua faateʻa ese mai le nuu ma le aiga lautele. Ua tuuaʻia nisi faapea  e lē fia faatasitasi ma tagata ma e leai so latou faaaloalo mo ē ua maliliu. I nisi taimi, ua faamalosia ona faia e tagata lē talitonu fuafuaga o se maliu o se Kerisiano. Peitaʻi, e faapefea ona tatou ʻalofia ni finauga ma i latou e malolosi o latou faalogona e faia tū masani e lē fiafia i ai le Atua? Ae sili ona tāua atu, o le ā la tatou mea e mafai ona fai e ʻalofia ai le aafia i tū ma aga lē mamā, lea e mafai ona faaleagaina ai la tatou faiā ma Ieova?

Ia Faamanino Atu Lau Filifiliga

I nisi vaipanoa o le lalolagi, o se tū masani mo toeaiina o le aiga ma tauaiga i fafo atu o le aiga vavalalata ona fai manatu i le tanuina o le maliu. E tatau i se Kerisiano faamaoni ona faamanino atu, o fuafuaga ma le faiga o le maliu, o le a faia e Molimau a Ieova e tusa ai ma taʻiala o le Tusi Paia. (2 Kori. 6:14-16) O mea o le a faia i le maliu o se Kerisiano, e lē tatau ona faaleagaina ai lotofuatiaifo o uso talitonu, pe tausuai ai isi e iloa o tatou talitonuga ma aʻoaʻoga e faatatau i ē ua maliliu.

Pe a talosagaina se sui o le faapotopotoga Kerisiano e faatautaia se maliu, e mafai e toeaina ua tofia ona avatu ni fautuaga aogā ma tuuina atu se fesoasoani faaleagaga i le auala e fai ai fuafuaga, ina ia ōgatusa ma taʻiala o le Tusi Paia. Pe a mananaʻo ni tagata e lē o ni Kerisiano e faaofi atu ni faiga lē mamā, e matuā tāua lava ona maumauaʻi ma loto tetele e faamalamalama atu lo tatou tulaga o ni Kerisiano i se auala toʻafimālie ma faaaloalo. (1 Pete. 3:15) Ae faapefea pe a mananaʻo aiga lē talitonu e faia pea na tū lē mamā i fuafuaga o le maliu? Ona faamaamulu loa lea o le aiga talitonu mai fuafuaga o le maliu. (1 Kori. 10:20) Pe a tupu lenā mea, e mafai ona fai se sauniga o le maliu a lē i le Maota mo Sauniga o loo latalata ane, po o se isi nofoaga talafeagai ina ia faalogologo ai i latou o loo faavauvau i le maliu o sē e pele i ‘faamāfanafanaga mai le Tusi Paia.’ (Roma 15:4) E ui e lē o iai le tino maliu, ae o le a mamalu lenā fuafuaga ma talafeagai atoatoa. (Teu. 34:5, 6, 8) E ono faaopoopo atu i faanoanoaga le faasalavei mai o i latou e lē talitonu, ae e mafai ona tatou maua faamāfanafanaga i lo tatou iloa e lē galo i le Atua a tatou taumafaiga maumauaʻi, auā o le a ia tuuina mai le “mana lea e sili atu i le malosi o tagata.”—2 Kori. 4:7.

Ia Tusia Mea E te Manaʻo ai mo Lou Maliu

Pe a tusia e se tagata mea e manaʻo e fai e tusa ai ma fuafuaga o lona maliu, o le a faigofie ona talanoa ma aiga e lē o ni Molimau, auā atonu o le a latou faaaloalogia manaʻoga o lē ua maliu. O le auala e tatau ona faatautaia ai le maliu, o fea le nofoaga e fai ai, ma o ai o le a paʻū i ai le tele o le tiute tauave i mea e fai, o faamatalaga tāua uma nei e manaʻomia  ona tusitusia i lalo. (Kene. 50:5) E sili ona aogā se faamatalaga ua sainia ma e iai ni molimau. O i latou e fuafua mamao ma iai le utaga poto e faavae mai taʻiala o le Tusi Paia, e latou te iloa e lē manaʻomia ona faatalitali seʻi matutua pe e faatalitali seʻi oo ina mamaʻi ma ua lē o toe aogā i ai se togafiti ona faatoʻā uia lea o lenei laasaga.—Faata. 22:3; Fai. 9:12.

E lē faigofie i isi ona tusia faamatalaga o mea e latou te mananaʻo e fai. Peitaʻi, o le faia faapea e atagia atu ai lou taʻumatuaina o se Kerisiano ma lou alofa i isi. (Fili. 2:4) E sili atu ona lelei pe a faamanino e le tagata lava ia lenei mataupu, nai lo le tuu o na fuafuaga e fai e aiga o loo faavauvau, lea e ono uunaʻia ai i latou e talia ni tū e lē mamā, lea e lē talitonu pe lē talia foʻi e lē ua maliu.

Ia Faafaigofie le Faiga o le Maliu

I le tele o vaega o Aferika, e iai le talitonuga taatele e tatau ona faatelē ma mataʻina se maliu e ʻalofia ai le lē fiafia o agaga o tuaa. Ua faaaogā e nisi maliu e “faalialiavale” ai o latou tulaga ma tamaoaiga. (1 Ioa. 2:16) E tele taumafaiga ma le taimi e alu ina ia maua ai e lē ua oti se maliu “lelei” e pei ona latou manatu i ai. Ina ia iloa e le toʻatele o tagata na auai atu, e faapipii ata tetele o lē ua maliu i nofoaga eseese, ma ua faasalalau atu ai i le lautele le maliu. O mitiafu e iai ata o lē ua maliu ua tufa atu ina ia ofuina e i latou o loo faavauvau. O pusa oti e anagatā ma taugatā, ua faatauina e faaofo ai tagata. I se nuu i Aferika, ua maoaʻe nisi o pusa oti ua fausia e foliga i taavale, vaalele, vaa, ma isi fausaga e atagia atu ai le tele o le tamaoaiga, mamalu, ma le maumea. E mafai ona aveese le tino oti mai le pusa ma tuuina i se moega ua teuteuina faapitoa. E ono teuteuina se fafine i se ofu faaipoipo paʻepaʻe faatasi ai ma le tele o maa tāua ma vali. Pe e talafeagai mo tagata o le Atua ona auai i tū masani faapena?

E iloa e Kerisiano taʻumatuaina le atamai o le ʻalofia o na faiga soonafai e tagata e lē iloa ma e lē ano foʻi i mataupu silisili a le Atua. Ua tatou iloa o tū ma aga e lē talafeagai ma e lē faavaea mai le Tusi Paia, ‘e lē mai i le Atua ae e mai i le lalolagi lea o le a mavae atu.’ (1 Ioa. 2:15-17) E tatau ona nofouta ina neʻi o tatou aafia i le agaga lē faa-Kerisiano o le faatautavā, ma le taumafai e sili atu tatou i isi.  (Kala. 5:26) Ua atagia mai mea na tutupu, pe a mauaa le fefe i tagata oti i olaga o le toʻatele, e masani ona faatetelē maliu ma faigatā ai ona vaavaaia, ma e faigofie lava ona oo ai ina lē pulea ai. O le soona faaaloalo i ē ua maliliu e faigofie ai lava ona faaosoosoina tagata lē talitonu e faia ni gaoioiga lē mamā. I na maliu, atonu e iai ni auēga, le fusiina o le tino maliu, o le talanoa i ai e pei lava o loo ola, ma le tuuina i ai o tupe ma isi mea i luga o le tino. Pe a tupu lenei mea i le maliu o se Kerisiano, o le a faalumaina ai le suafa o Ieova ma ona tagata.—1 Pete. 1:14-16.

O lo tatou iloaina o le tulaga moni o i latou ua maliliu, e tatau ai ona tatou loto tetele e faia maliu e aunoa ma le aafia i so o se vala o le lalolagi. (Efe. 4:17-19) E ui o Iesu o le tagata silisili ma aupito i tāua na soifua mai, ae sa tanuina o ia i se auala e lē faaalialiavale ma talafeagai. (Ioa. 19:40-42) Mo i latou e iai le “manatu o Keriso,” e leai se faalumaina i lenā ituaiga maliu. (1 Kori. 2:16) E mautinoa lava, o le faafaigofie ma talafeagai o le auala e faia ai le maliu o se Kerisiano, o le auala sili lea e ʻalofia ai mea e lē mamā i le Tusi Paia, ma faatumauina ai se siʻomaga e mamalu, toʻafimālie, ma lelei mo i latou e alolofa i le Atua.

Pe Tatau Ona Faia ni Faafiafiaga?

Pe a māeʻa ona teu se maliu, atonu o tū masani mo aiga, tuaoi, ma isi e faatasitasi uma mo se ʻaiga ma sisiva i le musika leotele. E masani ona tupu ai le inu tele ma gaoioiga lē mamā i na faatasitasiga. Ua faapea mai manatu o nisi tagata, e fesoasoani nei fiafiaga e aveesea ai faanoanoaga o le maliu. Ae manatu isi ua na o se vaega o la latou aganuu. Peitaʻi, e talitonu isi o nei faatasitasiga pisapisaō e talafeagai ona o se tū e faamamaluina ma viiviia ai lē ua maliu, ma faasaʻolotoina ai le agaga o lē ua oti e faatasi ma ona tuaa.

E iloa e Kerisiano moni le atamai o le timaʻiga mai le Tusi Paia: “E sili ona lelei o le tigā, i le ʻataʻata; auā o le faanoanoa o mata e lelei ai le loto.” (Fai. 7:3) E lē gata i lea, e latou te iloa le aogā o le manatunatu i le puupuu o lenei olaga ma le faamoemoe o le toetū. O le mea moni, o i latou e iai sa latou faiā māfana ma Ieova, o “le aso e oti ai e sili i le aso e fanau mai ai.” (Fai. 7:1) O lea la, o le iloaina e fesootaʻi atu fiafiaga o maliu i talitonuga faataulāitu ma faiga lē mamā, ua matuā lē talafeagai ai mo se Kerisiano moni ona fai ni fuafuaga pe auai foʻi i na faafiafiaga. O le faatasitasi ma i latou i fiafiaga o maliu, o le a faaalia ai e leai se faaaloalo mo le Atua ma lotofuatiaifo o tagata tapuaʻi o Ieova.

Ia Iloa e Isi le Eseesega

Maeʻu lo tatou fiafia ona ua tatou saʻoloto mai le fefe i ē ua maliliu, e pei ona taatele i ē o loo pogisa faaleagaga! (Ioa. 8:32) I le avea ma “fanau o le malamalama,” e faaalia lo tatou faavauvau i se auala e atagia atu ai le malamalama faaleagaga, i se auala agamalu, faaaloalo, ma e uunaʻia e le faamoemoe mautinoa o le toetū. (Efe. 5:8; Ioa. 5:28, 29) O le a fesoasoani lenā faamoemoe iā i tatou e ʻalofia ai le soona faaalia o le faanoanoa e pei ona vaaia i ē e “leai so latou faamoemoe.” (1 Tesa. 4:13) O le a tatou maua ai le lototele e tutumau ai i le tapuaʻiga moni, ae lē lolo atu i le fefe i tagata.—1 Pete. 3:13, 14.

O lo tatou usiusitai ma le faamaoni i mataupu silisili o le Tusi Paia, o le a maua ai e tagata le avanoa e ‘iloa ai le eseese o lē auauna i le Atua, ma lē ua lē auauna iā te ia.’ (Mala. 3:18) O le a iai se aso o le a lē toe iai ai se oti. (Faaa. 21:4) A o tatou faatalitalia le faataunuuga o lenā folafolaga matagofie, ia silasila mai Ieova tatou te lē o pisipisia, lē ponā, ma e matuā vavae ese mai lenei lalolagi amioleaga ma ona gaoioiga e lē faamamaluina ai le Atua.—2 Pete. 3:14.

[Ata i le itulau 30]

O le tusia o o tatou manaʻoga mo fuafuaga o lo tatou maliu, o se gaoioiga atamai tele

[Ata i le itulau 31]

E tatau ona faafaigofie ma mamalu le maliu o se Kerisiano