Faauuga o le Vasega Lona 125 a Kiliata

Na Faalaeiauina Misionare ia Pei o Ieremia

“O LE vasega lenei a Kiliata, o se matatiʻa mataʻina lea o le talafaasolopito,” o le faamatalaga lenā a Geoffrey Jackson o le sui o le Vaega Pule. Sa ia lauga atu i tagata e toʻa 6,156 sa auai i le faauuga o le vasega lona 125 o le Aʻoga Faale-Tusi Paia o le Olomatamata o Kiliata, iā Setema 13, 2008. Ua sili atu nei ma le 8,000 misionare ua auina atu e le Aʻoga a Kiliata i “tuluʻiga uma o le lalolagi,” pe a faaopoopo i ai ma le toʻa 56 o le ʻaufaauu mai le vasega lenei!—Galu. 1:8.

Na fesili atu le Uso o Jackson, ma o le taʻitaʻifono foʻi lea o le polokalame e faapea: “Pe e aogā i lau faiva le uiga lea o le faatuatuaina o oe e isi?” Ona ia taʻua loa lea o vala e fā e mafai ai ona maufaatuatuaina se tagata: ia iai se vaaiga saʻo, ia fai ma faaaʻoaʻoga lelei, ia faavae aʻoaʻoga a le tagata mai le Afioga a le Atua, ma ia taulaʻi atu i le faalauiloaina o le suafa o Ieova.

Sa tauaaoina e le uso o David Schafer, o lē o loo galue i le Komiti Tauaʻoaʻoga, le lauga e faamatuaina e faapea, “Po o le a E Malamalama i Mea Uma?” Na ia faamautinoa atu i le ʻauaʻoʻoga o Kiliata o le a latou “malamalama i mea uma” e manaʻomia mo le auaunaga o ni misionare, pe afai latou te faaauau pea ona saʻili atu iā Ieova ma iloa lelei le “pologa faamaoni ma le faautauta.”—Faata. 28:5; Mata. 24:45.

Na sosoo ai ma le lauga a John E. Barr, o se sui o le Vaega Pule, e faamatuaina e faapea, “Aua Neʻi Faataga se Mea e Faaesea Oe Mai le Alofa o le Atua.” E pei o le masani a se tamā alofa, na faalaeiauina e le Uso o Barr le ʻaufaauu ma o latou mātua, e tusa o mea e fia malamalama ai e uiga i tulaga e ono fesagaʻi ma misionare fou. Na ia faapea atu: “O se puipuiga le tumau ai i le alofa o le Atua, ma o se nofoaga lelei lea e tatau ona iai mo le olaga atoa.” E leai se mea e mafai ona vavaeesea misionare mai le alofa o le Atua, seʻi vaganā ua latou faaesea i latou lava mai le Atua.

Na faalaeiauina le aofia e Sam Roberson, o le sui o le Matagaluega o Aʻoga Faatiokarate, ina ia oofu “i laʻei silisili.” E ala i le suʻesuʻeina o fetalaiga a Iesu ma faatatau i o latou olaga, o le a mafai ai e le ʻaufaauu ona “oofu i le Alii o Iesu Keriso.” (Roma 13:14) Sosoo ai ma le faamatilatilaina e le uso o William Samuelson, o le ovasia o le Matagaluega o Aʻoga Faatiokarate, o mea e faamamaluina ai se tagata. E lē o le vaaiga faaletagata ae o le silafaga a le Atua, lea e mafai ona faamamaluina se tagata.

O Michael Burnett, o ia o se tasi o faiaʻoga o le aʻoga, na faatalanoaina le ʻauaʻoʻoga e uiga i mea na tutupu iā i latou i le faiva i le fanua. E ui o le toʻatele o le ʻauaʻoʻoga na tofia e galulue i oganuu e galueaʻiina soo, a o iai i le Aʻoga a Kiliata i Patterson, i Niu Ioka, ae sa latou maua pea tagata fiafia. Sa faatalanoaina e Gerald Grizzle o se sui o le Ofisa o Tauaofiaga, uso se toʻatolu sa auai i le Aʻoga mo Sui o le Komiti o le Lālā. Na fesoasoani manatu na faia e i latou nei ina ia tomatauina ai le ʻaufaauu i Kiliata, mo mea o le a feagai ma i latou i atunuu ese o le a tofia i ai.

 O le lauga “Ia Pei o Ieremia,” sa tauaaoina e le uso o David Splane o le sui o le Vaega Pule, ma o se tagata faauu o le vasega lona 42. E ui sa popole Ieremia i le faia o lona tofiga, ae sa avatu e Ieova le malosi iā te ia. (Iere. 1:7, 8) O le mea foʻi lenā o le a faia e Ieova i misionare fou. Na faapea atu le Uso o Splane, “Pe afai e iai se mea e te lē fiafia ai i se isi, nofo i lalo ma tusi uiga e sefulu e te fiafia ai i lenā tagata. Pe a lē atoa uiga e sefulu e te manatua, o lona uiga la e ao ona e taumafai ia faamasani atili i lenā tagata.”

Sa lē manatu faapito Ieremia. Ina ua manaʻo o ia e tuu le galuega, sa ia tatalo, ma na fesoasoani Ieova iā te ia. (Iere. 20:11) Na faapea atu le Uso o Splane, “Pe a e lagona le lotovaivai, ia taʻu atu iā Ieova. O le a e ofo i le auala o le a fesoasoani ai Ieova iā te oe.”

I le faaiʻuga o le polokalame o le faauuga, sa faamanatu atu e le taʻitaʻifono i le aofia, ua uma ona aʻoaʻoina e le ʻaufaauu auala eseese e avea ai i latou ma tagata maufaatuatuaina. Pe a maufaatuatuaina misionare e tagata, o le a atili ai ona aogā le feʻau o loo latou avatuina.—Isa. 43:8-12.

[Pusa i le itulau 22]

FAAMAUMAUGA O LE VASEGA

Aofaʻi o atunuu o loo iai o latou sui: 6

Aofaʻi o atunuu ua tofia i ai: 21

Aofaʻi o tagata aʻoʻoga: 56

Faatatauga o tausaga: 32.9

Faatatauga o tausaga i le upu moni: 17.4

Faatatauga o tausaga i le faiva faataimi atoa: 13

[Ata i le itulau 23]

Vasega Faauu Lona 125 o le Aʻoga Faale-Tusi Paia a le Olomatamata o Kiliata

I le lisi o i lalo, e faanumera laina mai i luma ma faasolo i tua, ma o suafa e lisi mai i le agavale e agaʻi i le taumatau.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.