Po o Taaʻina Au Tatalo i Fetalaiga a Iesu?

“Ua māeʻa fetalaiga a Iesu, ona matuā ofo ai lea o le motu o tagata i lana aʻoaʻo atu.”—MATA. 7:28.

1, 2. Aiseā na ofo ai le motu o tagata i le auala na aʻoaʻo atu ai Iesu?

E AO ona tatou talia fetalaiga a le Alo pele e toʻatasi o le Atua, o Iesu Keriso, ma faatatau na fetalaiga i o tatou olaga. O le mea moni, e leai se tagata na tautala e pei o le auala na ia fetalai ai. O le māfuaaga lenā na ofo tele ai tagata i le auala na ia aʻoaʻo atu ai i le Lauga i le Mauga!—Faitau le Mataio 7:28, 29.

² E leʻi pei le auala na aʻoaʻo atu ai le Alo o Ieova o le auala na aʻoaʻo atu ai le ʻautusiupu, o ē na faavae a latou lauga e tele naʻuā upu i aʻoaʻoga a tagata lē lelei atoatoa. Sa aʻoaʻo atu Keriso “e pei o sē ua iai le pule,” auā o mea na ia fetalai atu ai e mai le Atua. (Ioa. 12:50) O lea la, seʻi o tatou vāai pe faapefea, ma e ao faapefea i isi fetalaiga a Iesu i le Lauga i le Mauga, ona taaʻina ai le auala e fai ai a tatou tatalo.

Ia Aua Neʻi Tatalo e Pei o Tagata Faafiaamiotonu

3. Ia oto mai le manatu autū o fetalaiga a Iesu o loo faamauina i le Mataio 6:5.

³ O le tatalo o se vaega tāua o le tapuaʻiga moni, ma e ao ona tatou tatalo e lē aunoa iā Ieova. Peitaʻi, e ao ona aogā fetalaiga a Iesu i le Lauga i le Mauga e taaʻina ai le auala e fai ai a tatou tatalo. Na fetalai o ia e faapea: ‘⁠Pe a outou tatalo, aua neʻi pei outou o tagata faafiaamiotonu, auā latou te tutū ma tatalo i sunako ma magāala o ala tetele, ina ia iloa ai i latou e tagata. E moni ou te fai atu iā te outou, Ua maua e i latou lo latou taui atoatoa.’—Mata. 6:5.

4-6. (a) Aiseā na mananaʻo ai le ʻau Faresaio e “tutū ma tatalo i sunako ma magāala o ala tetele”? (e) Na faapefea i na tagata faafiaamiotonu ona “maua e i latou lo latou taui atoatoa”?

⁴ Pe a tatalo soo o Iesu, sa lē tatau ona latou faataʻitaʻi i “tagata faafiaamiotonu” e pei o le ʻau Faresaio, o ē na faafoliga atu e amioatua. (Mata. 23:13-32) Sa mananaʻo na tagata faafiaamiotonu e “tutū ma tatalo i sunako ma magāala o ala tetele.” Aiseā? Ina ia mafai ona “iloa ai i latou e tagata.” I le uluaʻi senituri, e masani ona tatalo faatasi se faapotopotoga o tagata Iutaia i le taimi e fai ai taulaga mū i le malumalu (pe tusa o le iva i le taeao ma le tolu i le aoauli). O le toʻatele o tagata e nonofo i Ierusalema sa tatalo faatasi ma isi tagata tapuaʻi i lotoā o le malumalu. I fafo atu o le aai, e masani lava ona tatalo faalua i le aso tagata Iutaia o ē faamaoni i le Atua, a o ‘⁠tutū i sunako.’—Faatusatusa i le Luka 18:11, 13.

⁵ Ona o le toʻatele o tagata sa mamao ese mai le malumalu po o le sunako i taimi e fai ai tatalo lea na taʻua i luga, po o fea lava la sa latou iai i taimi o talosaga, atonu e faia ai lava i  inā a latou tatalo. O nisi sa mananaʻo ia oo ifo i taimi o talosaga o loo latou iai i “magāala o ala tetele.” Sa latou mananaʻo ia “iloa ai i latou e tagata” o loo feoaʻi ane i na magāala. Sa mananaʻo tagata faafiaamioatua e “faaumiumi a latou tatalo ona o le faalialiavale,” ina ia viiviia ai i latou e tagata na matamata ane. (Luka 20:47) E lē tatau ona iā i tatou lenā uiga.

⁶ Na taʻua e Iesu e faapea o na tagata faafiaamiotonu e “maua e i latou lo latou taui atoatoa.” Sa latou matuā naunau ia lauiloa ma viiviia mai e tagata, ma o mea uma na na latou maua. Ma na atoatoa ai i inā lo latou taui, auā e leʻi taliaina e Ieova a latou tatalo pepelo. I le isi itu, o le a tali mai le Atua i tatalo a soo moni o Keriso, e pei ona faaalia mai i isi fetalaiga a Iesu i lenei mataupu.

7. O le ā le uiga o le fautuaga ia tatalo i o tatou “potu”?

⁷ “A o oe, pe a e tatalo, ia ulu atu i lou potu, ma tapuni le faitotoʻa, ma tatalo atu i lou Tamā o loo i le mea lilo. Ona tauia ai lea o oe e lou Tamā, o lē o loo silasila mai iā te oe mai le mea lilo.” (Mata. 6:6) E lē o le uiga o le apoapoaʻiga a Iesu ia tatalo i se potu ua tapuni le faitotoʻa, e faapea e lē mafai e se isi ona faia le tatalo mo le faapotopotoga i sauniga. Ae o le uiga o lenei fautuaga, ia aua le faia tatalo i luma o le lautele e faauaʻi mai ai tagata i lē o loo faia le tatalo, ma viiviia ai o ia. E ao ona tatou manatua lenei mea pe afai ua tofia i tatou e fai ma sui o tagata o le Atua e faia se tatalo i le lautele. Seʻi o tatou usitaia foʻi le isi apoapoaʻiga a Iesu o loo sosoo mai e tusa ai o le tatalo.

8. E tusa ai o le Mataio 6:7, o ā tatalo e ao ona tatou ʻalofia?

⁸ “Pe a e tatalo, aua le faia soo au upu masani e pei o tagata o nuu ese, auā ua latou manatu o le a faafofogaina i latou i le tele o upu.” (Mata. 6:7) Sa taʻua e Iesu se isi auala e lē tatau ona faia ai tatalo—o le tautū i upu masani. E leʻi uiga o ia e faapea e lē tatau ona tatou taʻua pea i tatalo manaʻoga mai le loto ma upu faafetai. I le faatoʻaga o Ketesemane i le pō a o leʻi maliu Iesu, na toe taʻua ai i lana tatalo “upu lava na” na ia taʻua muamua.—Mare. 14:32-39.

9, 10. I le ā le uiga e lē tatau ai ona tatou faia ni tatalo e tautū i upu masani?

⁹ E lē tatau ona tatou faataʻitaʻi i tatalo a “tagata o nuu ese,” lea sa tele naʻuā upu. Sa latou “faia soo” faaupuga ua uma ona tauloto, e aofia ai ma le tele o upu e lē manaʻomia. Sa leʻi aogā i tagata tapuaʻi o Paala lo latou valaau atu pea i le igoa o lenā atua sesē, lea “na amata i le taeao ua oo i le tutonu o le lā, ua faapea atu, ‘Paala e, ia e faafofoga mai iā te i matou.’” (1 Tu. 18:26) E faitau miliona tagata i aso nei o loo faia tatalo e faatauloto ona fai, ma le manatu “o le a faafofogaina” ai i latou. Ae ua fesoasoani mai Iesu iā i tatou ina ia iloa, e lē tāua iā Ieova le “tele o upu” i tatalo uumi ma fai faatauloto. Na fetalai atili Iesu e faapea:

¹⁰ “O lea, aua neʻi outou pei o i latou, auā ua silafia e le Atua, o lo outou Tamā o i le lagi mea o loo outou manaʻomia, ae tou te leʻi talosaga atu.” (Mata. 6:8) O le toʻatele o taʻitaʻi lotu Iutaia, sa pei a latou tatalo o tatalo a tagata o nuu ese, ona o le tele naʻuā o upu. O tatalo e faia mai le loto lea e aofia ai tatalo faamanū, faafetai, ma faatoga, o se vaega tāua o le tapuaʻiga moni. (Fili. 4:6) Peitaʻi, e lē tatau ona tatou taʻua soo mea po o upu masani ma le manatu faapea, e ao lava ona tatou faamanatu atu pea i le Atua mea o loo tatou manaʻomia. Pe a tatou tatalo, e ao ona tatou manatua o loo tatou talanoa atu i Lē na te ‘silafia mea o loo tatou manaʻomia a o tatou le ‘i talosaga atu.’

11. O le ā e ao ona tatou manatua pe afai ua tatou maua le faaeaga e faia ai se tatalo i le lautele?

¹¹ Ua tatau ona faamanatu mai ai iā i tatou i fetalaiga a Iesu e faatatau i tatalo e lē taliaina e le Atua, e lē fiafia o ia i tatalo e faia i upu faigatā ma maotua. E ao foʻi ona tatou iloa o tatalo i le lautele e lē o se avanoa lea e faaofo ai tagata o loo faalogologo mai, pe faapogaia ai i latou e tau mafaufau po o afea o le a uma ai le tatalo ma faapea mai ai “Amene.” O le faaaogāina o tatalo e fai atu ai ni faasilasilaga pe fautuaina ai le aofia, e lē talafeagai foʻi ma le agaga o fetalaiga a Iesu o loo i le Lauga i le Mauga.

 Ua Aʻoaʻo Mai e Iesu le Auala e Tatalo Ai

12. O le ā le uiga o le talosaga atu, “ia faapaiaina lou suafa”?

¹² Na aʻoaʻo e Iesu ona soo i le auala e tatalo ai, ae na ia lapataʻia foʻi i latou i le auala e lē tatau ona faia ai lenei faaeaga tāua. (Faitau le Mataio 6:9-13.) E lē tatau ona aʻoina le tatalo faaaʻoaʻo na ia tuu mai, ina ia fai mai lea taimi i lea taimi. Nai lo lea, ua aumaia ai se faaaʻoaʻoga mo a tatou tatalo. O se faataʻitaʻiga, na faamuamua e Iesu le Atua i ana upu amata e faapea: “Lo matou Tamā e o i le lagi, ia faapaiaina lou suafa.” (Mata. 6:9) Ua talafeagai ona tatou taʻua Ieova o ‘lo tatou Tamā,’ auā o ia o Lē na Faia i tatou, o lē e afio “i le lagi” e sili mamao aʻe i le lalolagi. (Teu. 32:6; 2 No. 6:21; Galu. 17:24, 28) O le faaaogāina o le upu numera tele o le “matou,” e tatau ona faamanatu mai ai iā i tatou e faapea, o loo iai foʻi se faiā māfana a le Atua ma o tatou uso talitonu. O le faaupuga “ia faapaiaina lou suafa,” o se talosaga iā Ieova ia faapaiaina o ia e ala i le faaeaina o lona suafa mai auala eseese ua faalumaina ai, talu mai le fouvalega i Etena. Ina ia tali mai i lenā tatalo, o le a aveesea e Ieova le amioleaga mai le lalolagi, ona faapaiaina ai lea o ia.—Eseki. 36:23.

13. (a) O le a faapefea ona faataunuu le talosaga, “ia oo mai lou malo”? (e) O le ā o le a aofia ai i le faia o le finagalo o le Atua i le lalolagi?

¹³ “Ia oo mai lou malo. Ia faia lou finagalo i le lalolagi, e pei ona faia i le lagi.” (Mata. 6:10) E tusa ai o lenei talosaga i le tatalo faaaʻoaʻo, e ao ona tatou manatua o le “malo” o le malo faa-Mesia lea i le lagi, ua i aao o Keriso ma le “ʻau paia” ua toe faatutūina ma ua faatasi ma ia. (Tani. 7:13, 14, 18; Isa. 9:6, 7) O le tatalo ina ia “oo mai” le Malo, o se talosaga lea ina ia faaumatia e le Malo o le Atua i latou uma i le lalolagi e tetee i le pulega a le Atua. Ua lē o toe umi ona tupu lea o lenā tulaga, ma saunia ai le auala mo se lalolagi parataiso o le amiotonu, filemu, ma le tamaoaiga. (Sala. 72:1-15; Tani. 2:44; 2 Pete. 3:13) O loo faia le finagalo o Ieova i le lagi, ma o le talosaga atu ia faia lona finagalo i le lalolagi, o se ōlega ina ia faataunuu e le Atua ana fuafuaga mo lo tatou lalolagi, e aofia ai le aveesea o tagata o loo tetee iā te ia i aso nei, e pei ona sa ia faia i taimi anamua.—Faitau le Salamo 83:1, 2, 13-18.

14. Aiseā e talafeagai ai ona tatalo atu mo “a matou meaʻai mo le asō”?

¹⁴ “Ia e foaʻi mai i le aso nei a matou meaʻai mo le asō.” (Mata. 6:11; Luka 11:3) Pe a tatou talosaga atu mo lenei manaʻoga, o loo tatou ōle atu i le Atua ina ia saunia mai meaʻai tatau “mo le asō.” E faaalia ai lo tatou faatuatua, e mafaia e Ieova ona foaʻi mai mea tatou te manaʻomia i aso taʻitasi. Ae e lē o se ōlega mo nisi mea e sili atu nai lo lenā. E ono faamanatu mai ai iā i tatou e lenei talosaga e faapea, na faatonu e le Atua tagata Isaraelu ina ia faaputu le manai “o le aso ma ana mea e tusa ai.”—Eso. 16:4.

15. Faamatala mai le uiga o le manaʻoga ia “faamagalo mai i a matou agasala e pei foʻi ona matou faamagalo atu i ē o agasala mai iā i matou.”

 ¹⁵ O le talosaga o loo sosoo ai i le tatalo faaaʻoaʻo, ua taʻu mai ai iā i tatou se mea e manaʻomia ona tatou faia. Na fetalai Iesu e faapea: ‘Ia faamagalo mai i a matou agasala e pei foʻi ona matou faamagalo atu i ē o agasala mai iā i matou.’ (Mata. 6:12) E pau le auala e tatou te faatalitalia ai le faamagaloga a Ieova, o lo tatou “faamagalo atu” lea i ē agasala mai iā i tatou. (Faitau le Mataio 6:14, 15.) O lea la, e ao ona tatou faamagalo atu i isi ma le lotoatoa.—Efe. 4:32; Kolo. 3:13.

16. O le ā le uiga o ʻaiʻoiga e faatatau i faaosoosoga, ma ia laveaʻiina mai lē o loo leaga?

¹⁶ “Aua foʻi neʻi tuua i matou e lolo atu i faaosoosoga, ae ia e laveaʻi i matou mai lē o loo leaga.” (Mata. 6:13) I le tatalo faaaʻoaʻo a Iesu, o le ā le uiga o nei ʻaiʻoiga? O le mea ua mautinoa ai: E lē faaosoosoina i tatou e Ieova e fai le agasala. (Faitau le Iakopo 1:13.) O Satani—o “lē o loo leaga”—o ia moni lava o “Lē faaosooso” mai. (Mata. 4:3) Peitaʻi, ua taʻua i le Tusi Paia e faapea o mea e lē o taofia e le Atua, e peiseaʻī o ia ua māfua ai ona tutupu. (Ruta 1:20, 21; Fai. 11:5) O lea la, o le faapea atu la ia “aua foʻi neʻi tuua i matou e lolo atu i faaosoosoga,” o se talosaga iā Ieova ina ia aua neʻi tuu i tatou e lolo atu i taimi e faaosoosoina ai ia lē usiusitai atu iā te ia. Mulimuli ane, o le ʻaiʻoiga ia “laveaʻi i matou mai lē o loo leaga,” o se talosaga iā Ieova ina ia aua neʻi faataga Satani e manumalo iā i tatou. Ma e tatou te mautinoa ‘⁠o le a lē tuua e le Atua i tatou i se faaosoosoga e sili atu nai lo o le mea tatou te mafaia.’—Faitau le 1 Korinito 10:13.

‘⁠Ia Talosaga Atu Pea, Saʻili Atu Pea, Tuʻituʻi Atu Pea’

17, 18. O le ā le uiga, ia ‘talosaga atu pea, saʻili atu pea, ma tuʻituʻi atu pea’?

¹⁷ Na uunaʻia e le aposetolo o Paulo uso talitonu e faapea: “Ia finafinau i le tatalo.” (Roma 12:12) Na aumaia e Iesu se faatonuga e talitutusa ma lenā manatu ina ua ia folafola mai e faapea: “Ia talosaga atu pea, ona foaʻiina mai ai lea iā te outou. Ia saʻili atu pea, ona outou maua ai lea. Ia tuʻituʻi atu pea ona tatalaina mai ai lea iā te outou. Auā o ē uma e talosaga atu, e foaʻiina mai iā i latou. O ē uma e saʻili atu, e maua e i latou. O ē uma e tuʻituʻi atu, e tatalaina mai iā i latou” (Mata. 7:7, 8) Ua talafeagai ona “talosaga atu pea” mo so o se mea e ōgatusa ma le finagalo o le Atua. Na tusi le aposetolo o Ioane e tusa ai ma fetalaiga a Iesu e faapea: “O le mea lenei ua tatou mautinoa ai i le Atua, po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.”—1 Ioa. 5:14.

¹⁸ O le fautuaga a Iesu e faapea ia ‘talosaga atu pea ma saʻili atu pea,’ o lona uiga e ao ona tatou tatalo faatauanau atu ma ia aua neʻi fiu. E tāua foʻi mo i tatou ona “tuʻituʻi atu pea” ina ia ulu atu i le Malo ma olioli ai i faamanuiaga, o aogā, ma taui e maua mai ai. Ae pe mafai ona tatou mautinoa o le a tali mai le Atua i a tatou tatalo? Ioe, e mafai pe afai e tatou te faatuatua iā Ieova, auā na fetalai Keriso: “O ē uma e talosaga atu, e foaʻiina mai iā i latou. O ē uma e saʻili atu, e maua e i latou. O ē uma e tuʻituʻi atu, e tatalaina mai iā i latou.” Ua tele mea na tutupu na olioli ai auauna a Ieova, ua faamaonia ai e moni lava o le Atua o ia o le “faafofoga tatalo.”—Sala. 65:2.

19, 20. E tusa ai ma upu a Iesu o loo i le Mataio 7:9-11, e faapefea ona pei Ieova o se tamā alofa?

¹⁹ Na faatusa e Iesu le Atua i se tamā alofa e na te saunia mea lelei mo lana fanau. Seʻi  faapea o lea sa e iai i le taimi na fai ai le Lauga i le Mauga, ma e faalogo atu o fetalai Iesu e faapea: “Po o ai se isi o outou e avatu i lona atalii se maa pe a talosaga mai i se falaoa? Pe e avatu ea iā te ia se gata pe afai e talosaga mai mo se iʻa? E ui o outou o tagata leaga, ae e mafai lava ona outou avatu meaalofa lelei i a outou fanau. E sili atu la ona foaʻi mai e lo outou Tamā o i le lagi mea lelei i ē e talosaga atu iā te ia!”—Mata. 7:9-11.

²⁰ E ui lava ua faatusaina se tamā i se “tagata leaga” ona o le agasala tuufaasolo, ae e iai lava ona lagona alofa mo lana fanau. E na te lē ʻolegia lona alo, ae e taumafai e saunia “meaalofa lelei” mo ia. Ua iai i lo tatou Tamā alofa i le lagi se lagona faatamā mo i tatou, ma ua ia saunia mai “mea lelei,” e pei o lona agaga paia. (Luka 11:13) E faamalosia ai i tatou ina ia tuuina atu le auaunaga e talileleia mai e Ieova, o Lē Foaʻi maia “meaalofa lelei uma ma mea uma e atoatoa ona lelei.”—Iako. 1:17.

Ia Faaauau Pea Ona Maua Aogā Mai Fetalaiga a Iesu

21, 22. O le ā le mea mataʻina e faatatau i le Lauga i le Mauga, ma o ā ni ou lagona e faatatau i nei fetalaiga a Iesu?

²¹ O le mea moni, o le Lauga i le Mauga o le lauga silisili lea ua faia i le lalolagi. E mataʻina ona o mea faaleagaga, atoa ai ma le malamalamaga o loo iai. E pei ona faaalia mai i manatu na maua mai i lenei faasologa o mataupu, e mafai ona matuā aogā iā i tatou pe afai tatou te faatatauina fautuaga o loo iai i lenei lauga. E mafai e nei fetalaiga a Iesu ona faaleleia ai o tatou olaga i le taimi nei, ma aumaia ai iā i tatou le faamoemoe o se lumanaʻi fiafia.

²² Ua na o ni nai mea tāua faaleagaga i le Lauga a Iesu i le Mauga, ua tatou talanoaina i nei mataupu. E lētioa i latou na faalogologo i lana lauga a ‘matuā ofo i lana aʻoaʻo atu.’ (Mata. 7:28) E lē taumatea o le a tatou tali atu foʻi faapena pe a faatumu o tatou mafaufau ma loto i nei fetalaiga ma isi fetalaiga tāua a le Faiaʻoga Sili, o Iesu Keriso.

O ā Au Tali?

• O le ā na taʻua e Iesu e faatatau i tatalo e faia ma le fiaamioatua?

• Aiseā e ao ai ona tatou ʻalofia le tautū i upu masani pe a tatou tatalo?

• O ā manaʻoga o loo aofia ai i le tatalo faaaʻoaʻo a Iesu?

• E mafai faapefea ona tatou ‘⁠talosaga atu pea, saʻili atu pea, ma tuʻituʻi atu pea’?

[Fesili mo le Suʻesuʻega]

[Ata i le itulau 15]

Sa taʻusalaina e Iesu tagata faafiaamiotonu o ē na tatalo ina ia vāai atu i ai tagata ma faalogo atu i ai

[Ata i le itulau 17]

Pe e te iloa aiseā e tāua ai ona tatalo mo a tatou meaʻai i aso taʻitasi?