Ua Latou “Mulimuli Atu i le Tamaʻi Mamoe”

“O i latou foʻi nei ua mulimuli atu i le Tamaʻi Mamoe i mea uma e alu i ai o ia.”—FAAA. 14:4.

1. Sa faapeʻī lagona o soo moni o Iesu e faatatau i le mulimuli atu iā te ia?

E TUSA o le lua ma le afa tausaga talu ona fai le faiva a Iesu, sa ia “aʻoaʻo atu i tagata o loo potopoto i Kapanaumi.” I le faateʻia i le mataʻutia o ana upu, na “toe foʻi ai le toʻatele o ona soo i mea na latou tuua, ma lē toe savavali ai ma ia.” Ina ua fesili atu Iesu i ona aposetolo e toʻa 12 pe latou te fia ō foʻi ma latou, ae na tali mai Simona Peteru e faapea: “Le Alii e, o ai a matou ō i ai? Ua iā te oe upu o le ola e faavavau. Ua matou talitonu ma matou iloa o oe o Lē e Paia a le Atua.” (Ioa. 6:48, 59, 60, 66-69) Sa lē fia mananaʻo soo moni o Iesu e taofia lo latou mulimuli atu iā te ia. Ina ua uma ona faauuina i le agaga paia, sa faaauau ona latou gauaʻi atu i le taʻitaʻiga a Iesu.—Galu. 16:7-10.

2. (a) O ai le “pologa faamaoni ma le faautauta,” po o le “auauna pule e faamaoni”? (e) Ua faapefea ona maua e le pologa se talaaga lelei o le “mulimuli atu i le Tamaʻi Mamoe”?

² Ae faapefea Kerisiano faauuina i aso nei? I lana valoaga e faatatau i le “faailoga o [lona] faatasi mai, ma le iʻuga o faiga o mea a le lalolagi,” sa taʻua ai e Iesu le vaega o ona soo faauuina o loo soifua i le lalolagi, o le “pologa faamaoni ma le faautauta,” po o le “auauna pule e faamaoni.” (Mata. 24:3, 45; Luka 12:42) I le avea ai o se vaega, ua faia e le vasega o le pologa se talaaga e sili ona lelei o le “mulimuli atu i le Tamaʻi Mamoe i mea uma e alu i ai o ia.” (Faitau le Faaaliga 14:4, 5.) Ua tumau pea ona avea ona sui o ni taupou i le itu faaleagaga, e ala i le lē pisipisia i talitonuga ma faiga a “Papelonia Tele,” le emepaea o lotu sesē a le lalolagi. (Faaa. 17:5) E lē “maua i o latou gutu” se aʻoaʻoga pepelo, ma ua tumau ona latou “lē ponā” mai le lalolagi a Satani. (Ioa. 15:19) I le lumanaʻi, o le a mulimuli atu le vaega totoe faauuina o i le lalolagi, i le Tamaʻi Mamoe i le lagi.—Ioa. 13:36.

3. Aiseā e tāua ai ona tatou faatuatuaina le vasega o le pologa?

³ Ua tofia e Iesu le pologa faamaoni ma le faautauta e “vaavaaia lana ʻaufaigaluega,” po o sui taʻitasi o le vasega o le pologa, “e avatu a latou meaʻai i le taimi tatau.” Ua ia tofia foʻi le pologa e “vaavaaia ana mea uma.” (Mata. 24:45-47) E aofia ai i nei “mea” le numera faatupulaʻia o le “motu o tagata e toʻatele” o “isi mamoe.” (Faaa. 7:9; Ioa. 10:16) Po ua lē tatau ai ea la i sui taʻitasi o Kerisiano faauuina ma “isi mamoe,” ona faatuatuaina le pologa ua tofia e vaavaaia i latou? E tele māfuaaga e tatau ai ona tatou faatuatuaina le vasega o le pologa. O māfuaaga mataʻina e lua: (1) E faatuatuaina e Ieova le vasega o le pologa. (2) E faatuatuaina foʻi e Iesu le pologa. Seʻi o tatou iloiloina le faamaoniga e iloa ai le faatuatuaina atoatoa e Ieova le Atua ma Iesu, o le pologa faamaoni ma le faautauta.

E Faatuatuaina e Ieova le Pologa

4. Aiseā e tatou te talitonuina ai meaʻai faaleagaga lea e saunia mai e le pologa faamaoni ma le faautauta?

⁴ Seʻi manatu i le pogai ua mafai ai e le pologa faamaoni ma le faautauta, ona saunia mai meaʻai faaleagaga susua mo i tatou i le taimi e tatau ai. Ua fetalai Ieova e faapea, “Ou te aʻoaʻo iā te oe, ma faasino iā te oe i lea lava ala e te savali ai.” Ua ia fetalai atili e faapea: “Ou te faatonu iā te oe, ma ou vaai iā te oe.” (Sala. 32:8) Ioe, e saunia e Ieova taʻiala mo le pologa. O lea la, e mafai ona tatou talitonu  atoatoa i le atamai faale-Tusi Paia, le malamalama, ma le taʻitaʻiga lea tatou te maua mai le pologa.

5. O le ā e faaalia ai o loo faamalosia e le agaga o le Atua le vasega o le pologa?

⁵ E faamanuia foʻi e Ieova le vasega o le pologa i lona agaga paia. E ui ina e lē o vaaia le agaga o Ieova, ae o loo vaaia galuega ma le fua o le agaga iā i latou o loo iai. Seʻi manatu i mea ua mafai ona faatino e le pologa faamaoni ma le faautauta, i le avatuina o se molimau i le lalolagi aoao e faatatau iā Ieova le Atua, o lona Alo, ma le Malo. O loo folafola atu ma le tiotio e tagata tapuaʻi o Ieova le feʻau o le Malo i atunuu ma atumotu e sili atu ma le 230. Pe e lē o se faamaoniga mautinoa lea o le faamalosia o le pologa e le agaga o le Atua? (Faitau le Galuega 1:8.) Ina ia saunia mai taumafa faaleagaga e tatau ai mo tagata o Ieova i le lalolagi aoao, e tatau i le vasega o le pologa ona fai ni faaiʻuga tāua. Pe a faia ma tuuina atu na faaiʻuga, e faaalia e le pologa le alofa, agamalu, ma isi vala o le fua o le agaga.—Kala. 5:22, 23.

6, 7. O le ā le tele ua faatuatuaina ai e Ieova le pologa faamaoni?

⁶ Ina ia malamalama i le tele o le faatuatuaina e Ieova o le pologa faamaoni, manatu i le mea ua folafola atu e Ieova i sui o le pologa. Na tusi le aposetolo o Paulo e faapea: “E ilia le pū, ona toetutū mai ai lea o ē ua oti ma tino e lē pala, ma e suia i tatou. O le tino e pala, e suia lea i le tino e lē pala, ma o le tino e mafai ona oti, e suia foʻi i le tino e lē mafai ona oti.” (1 Kori. 15:52, 53) O soo faauuina o Keriso, o ē auauna ma le faamaoni i le Atua ma maliliu i o latou tino e pala, e toe faatutūina o ni ē e sili atu i foafoaga agaga, ma maua le ola e faavavau. E tuuina atu iā i latou le ola e lē mafai ona oti—o le ola e faavavau ma e lē mafai ona faaumatia. E lē gata i lea, e latou te maua le tino e lē pala, i le tuuina atu i ai o tino e lē mafai ona faaleagaina ma foliga mai o loo ola iā i latou lava. Ua faamatalaina e le Faaaliga 4:4 i latou nei ua faatutūina, o loo nonofo i nofoālii ma ua iai pale auro i o latou ulu. O loo taatia mai mo Kerisiano faauuina le tofi mamalu o le avea ma tupu. Ae e iai nisi faamaoniga atili o le faatuatuaina e le Atua o Kerisiano faauuina.

⁷ Ua taʻua i le Faaaliga 19:7, 8 e faapea: “Ua oo mai le aso o le faaipoipoga a le Tamaʻi Mamoe, ma ua saunia foʻi e le tamaʻitaʻi o ia mo le faaipoipoga. Ioe, ua tuuina atu iā te ia ina ia ofu i le ʻie lino sesega, e mamā ma lelei, auā o le ʻie lino lelei e faasino atu i galuega amiotonu a le ʻaupaia.” Ua filifilia e Ieova Kerisiano faauuina e avea ma faatoʻānofotane mo lona  Alo i le lumanaʻi. O le tino e lē pala, o le ola e lē mafai ona oti, o le avea ma tupu faapea ma le ‘faaipoipo ma le Tamaʻi Mamoe’—o meaalofa matagofie uma nei mo i latou. O faamaoniga faagaeeloto na o le faatuatuaina e le Atua o Kerisiano faauuina, o ē o loo “mulimuli atu i le Tamaʻi Mamoe i mea uma e alu i ai o ia.”

E Maufaatuatuaina e Iesu le Pologa

8. Ua faaalia faapefea e Iesu e na te faatuatuaina ona soo ua faauuina i le agaga?

⁸ O le ā le faamaoniga o le matuā faatuatuaina e Iesu o ona soo ua faauuina i le agaga? I le pō mulimuli o lona soifuaga i le lalolagi, na faia ai e Iesu se folafolaga i ona aposetolo faamaoni e toʻa 11. Na ia taʻu atu iā i latou e faapea: “O outou foʻi, ua outou tumau iā te aʻu i taimi o oʻu puapuaga; ma ua ou osia ai se feagaiga ma outou, e pei lava ona osia e loʻu Tamā se feagaiga ma aʻu mo se malo, ina ia outou aai ma inu i laʻu laoai i loʻu malo, ma nonofo i nofoālii ma faamasino atu i ituaiga e sefulu lua o Isaraelu.” (Luka 22:28-30) O le a faalautele atu i Kerisiano faauuina uma e 144,000, le feagaiga lea sa faia i lenā taimi ma soo e toʻa 11. (Luka 12:32; Faaa. 5:9, 10; 14:1) Pe ana faapea e lē faatuatuaina e Iesu i latou, semanū e na te lē faia se feagaiga e avea ai i latou ma pule faatasi ma ia i lona Malo.

9. O ā mea e aofia ai i “mea uma [a Keriso]”?

⁹ E lē gata i lea, ua tofia e Iesu Keriso le pologa faamaoni ma le faautauta “e vaavaaia ana mea uma,” po o mea uma a le Malo i le lalolagi. (Mata. 24:47) E aofia ai i nei mea, fale o le ofisa ulu o Molimau a Ieova, i ofisa o lālā i atunuu eseese, ma i Maota mo Fonotaga ma Maota mo Sauniga i le lalolagi aoao. E aofia ai foʻi le galuega o le talaʻia o le Malo ma le faia o isi ma soo. E lē mafai e se tasi ona ia tofia se tagata e na te lē faatuatuaina, e tausia ma vaavaaia ni mea e tāua iā te ia.

10. O le ā e faaalia ai o loo faatasi Iesu Keriso i ona soo faauuina?

¹⁰ A o toeitiiti oo i le taimi e toe afio ai i le lagi, na faaali atu ai Iesu o lē ua toetū mai, i ona soo faamaoni ma fai atu se folafolaga e faapea: “Vaai foʻi! Ou te faatasi ma outou i aso uma lava seʻia oo i le iʻuga o faiga o mea a le lalolagi.” (Mata. 28:20) Pe na taunuu lenei folafolaga? I le 15 tausaga talu ai nei, ua faatupulaʻia ai le aofaʻi o faapotopotoga a Molimau a Ieova i le lalolagi aoao mai le 70,000 i le silia i le 100,000—o se faatelega e silia ma le 40 pasene.  Ae toʻa fia soo fou ua faaopoopo? E lata i le 4.5 miliona soo na papatiso i le 15 tausaga ua mavae—o se faatatauga e silia i le 800 tagata e papatiso i le aso. O nei faatelega mataʻina o le faamaoniga manino lea o le faatonutonuina e Keriso o ona soo faauuina i a latou sauniga i le faapotopotoga, ma o loo ia lagolagoina i latou i la latou galuega o le faia o isi ma soo.

E Faamaoni ma Faautauta le Pologa

11, 12. Ua faaalia faapefea le faamaoni ma le faautauta o le pologa?

¹¹ Ona o le matuā faatuatuaina e Ieova le Atua ma Iesu Keriso o le pologa faamaoni ma le faautauta, pe lē tatau ea foʻi la ona tatou faia faapea? Aemaise ai, ua faaalia le faamaoni o le pologa i le faatinoina o lana galuega ua tofia e fai. O se faaaʻoaʻoga, ua 130 tausaga o lomia le mekasini o le Olomatamata. O loo faaauau pea ona faia sauniga, fonotaga, ma tauaofiaga a Molimau Ieova, ina ia faamalosia faaleagaga ai i tatou.

¹² E faautauta foʻi le pologa faamaoni ona e lē fia pule pe fia muamua iā Ieova, pe faatalatū foʻi i le usitaia o se mataupu pe a manino mai taʻiala a le Atua. O se faaaʻoaʻoga, a o manatu māmā pe lē amanaʻia e taʻitaʻi o lotu sesē, amioga manatu faapito ma le lē mataʻu i le Atua a tagata o le lalolagi, ua saunia mai e le pologa lapataʻiga e uiga i mailei mai lenei faiga amioleaga o mea a Satani. Ua mafai ona saunia mai e le pologa lapataʻiga atamai ma talafeagai, auā o loo faamanuiaina e Ieova le Atua ma Iesu Keriso. O lea ua alagatatau ai ona tatou matuā faatuatuaina le pologa. E faapefea la ona faaalia e tatou te faatuatuaina le pologa faamaoni ma le faautauta?

Ia “Ō ma” le ʻAufaauuina a o Latou Mulimuli Atu i le Tamaʻi Mamoe

13. E tusa ai o le valoaga a Sakaria, e mafai faapefea ona tatou faaalia e tatou te faatuatuaina le pologa faamaoni ma le faautauta?

¹³ O loo taʻua i le tusi o Sakaria “tagata e toʻatinoagafulu” ua faalatalata atu i le “sa Iutā” ma faapea atu: “Tatou te ō ma outou.” (Faitau le Sakaria 8:23.) Talu ai ona o loo faasino le “outou,” i le “sa Iutā,” o loo ia faaataina mai la se vaega o tagata. I o tatou taimi, o loo ia faaāta mai le vaega totoe o Kerisiano ua faauuina i le agaga—le vaega o “le Isaraelu a le Atua.” (Kala. 6:16) Ua faaāta mai e “tagata e toʻatinoagafulu ai gagana uma o nuu ese,” le motu o tagata e toʻatele o isi mamoe. E pei lava ona mulimuli atu Kerisiano faauuina iā Iesu i mea uma e alu i ai o ia, ua faapena foʻi ona “ō” pe faatasi le motu o tagata e toʻatele ma le pologa faamaoni ma le faautauta. E lē tatau iā i latou o le motu o tagata e toʻatele ona matamumuli, e mātaulia i latou o ni aumea a i latou “ua tofutofusia i le valaau mo le lagi.” (Epe. 3:1) Auā e lē o matamuli Iesu e taʻua le ʻaufaauuina o ona “uso.”—Epe. 2:11.

14. E faapefea ona tatou lagolagosua ma le faamaoni i uso o Keriso?

¹⁴ Na fetalai Iesu a tatou lagolagosua ma le faamaoni i ona uso, ua tatou lagolagosua atu foʻi iā te ia. (Faitau le Mataio 25:40.) O le ā la le auala ua lagolagoina ai e i latou ua iai le faamoemoe i le lalolagi, ia uso o Keriso ua faauuina i le agaga? O le auala sili lava, e ala lea i le  fesoasoani atu iā i latou i le talaʻia o le Malo. (Mata. 24:14; Ioa. 14:12) A o faagasolo tausaga, ua faaitiitia le aofaʻi o le ʻaufaauuina i le lalolagi, ae ua faateleina le aofaʻi o isi mamoe. Pe a auai i latou ua iai le faamoemoe mo le lalolagi i le galuega o le molimau atu, i le auauna o ni tagata talaʻi faataimi atoa pe a mafai, ua latou lagolagosua atu i le ʻaufaauuina i le faataunuuina o le tofiga ia faia isi ma soo. (Mata. 28:19, 20) Aua foʻi neʻi galo, o isi avanoa e lagolagosua ai i lenei galuega, o le faia lea o foaʻi tautupe i so o se auala.

15. E ao faapefea i Kerisiano taʻitoʻatasi ona tali atu i meaʻai faaleagaga e tatau ai mai le pologa, ma faaiʻuga faalefaalapotopotoga ua faia mai e le pologa?

¹⁵ I le avea ai ma Kerisiano taʻitoʻatasi, e faapefea ona tatou manatu i meaʻai faaleagaga e tatau ai lea e tufatufa mai e le pologa faamaoni, e ala mai i lomiga faale-Tusi Paia ma faatasiga faa-Kerisiano? Po o tatou talia ma le faafetai ma lē faatalatū e faatatau mea ua tatou aʻoaʻoina? O le ā la tatou tali atu i faaiʻuga faalefaalapotopotoga ua faia e le pologa? Pe a tatou usitaʻi ma le loto i ai i le taʻitaʻiga ua saunia mai, ua faamaonia ai lo tatou faatuatuaina o faatulagaga a Ieova.—Iako. 3:17.

16. Aiseā e ao ai ona faalogo Kerisiano uma i uso o Keriso?

¹⁶ Na fetalai Iesu e faapea: “E faalogo aʻu mamoe i loʻu leo, ua latou iloa aʻu, ma ua latou mulimuli mai iā te aʻu.” (Ioa. 10:27) O le mea moni lenā e faatatau i Kerisiano faauuina. Ae faapefea i latou o ē “ō ma” i latou? E ao iā i latou ona faalogo iā Iesu. E tatau foʻi ona latou faalogo i ona uso. Aemaise ona ua tuuina atu iā i latou le matafaioi autū, o le tausia lea o le lelei faaleagaga o tagata o le Atua. O le ā e aofia ai i le faalogo i le leo o uso o Keriso?

17. O le ā e aofia ai i le faalogo atu i le vasega o le pologa?

¹⁷ O le pologa faamaoni ma le faautauta i aso nei, o loo fai ma ona sui le Vaega Pule, o ē o loo taʻimua ma faamaopoopoina le galuega talaʻi o le Malo i le lalolagi aoao. O sui o le Vaega Pule o toeaina ua iai le tomai ma ua faauuina i le agaga. E mafai ona faapitoa iā i latou le faaupuga o ‘i latou o loo taʻitaʻia i tatou.’ (Epe. 13:7) O loo “tele pea mea e fai i le galuega a le Alii” e nei ovasia faauuina, i le vaavaaia o le toetoe 7,000,000 o tagata talaʻi o le Malo i faapotopotoga e sili atu ma le 100,000. (1 Kori. 15:58) O le faalogo atu i le vasega o le pologa, o lona uiga o le tuuina atu lea o la tatou lagolagosua atoatoa i lana Vaega Pule.

E Manuia i Latou o Ē Faalogo i le Pologa

18, 19. (a) E faapefea ona manuia i latou e faalogo i le pologa faamaoni ma le faautauta? (e) O le ā e ao ona tatou maumauaʻi e fai?

¹⁸ Talu mai ona tofiaina le pologa faamaoni ma le faautauta, ua ia ‘⁠faaliliuina tagata e toʻatele ia amiotonu.’ (Tani. 12:3) E aofia ai ma i latou e faamoemoe e faasaoina atu i le faaumatiaga o lenei faiga tuai o mea. O se faamanuiaga tele lenei tulaga amiotonu i luma o le Atua!

¹⁹ I le lumanaʻi, pe a ‘sau mai le lagi mai le Atua le aai paia o Ierusalema Fou [lea e faia aʻe i le 144,000], ua saunia e faapei o se tamaʻitaʻi faaipoipo ua teuteuina mo lona alii,’ o le ā o le a tupu iā i latou na faalogo i le leo o le pologa? Ua taʻua i le Tusi Paia e faapea, “E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.” (Faaa. 21:2-4) O lea la, seʻi o tatou faalogo atu i le Keriso ma ona uso faamaoni e faatuatuaina, ua faauuina i le agaga.

O le ā na E Aʻoaʻoina?

• O le ā e faamaonia ai le faatuatuaina e Ieova o le pologa faamaoni ma le faautauta?

• O le ā e faaalia ai le matuā faatuatuaina o le vasega o le pologa e Iesu Keriso ?

• Aiseā e ao ai ona tatou faatuatuaina le auauna pule e faamaoni?

• E faapefea ona faaalia e tatou te faatuatuaina le pologa?

[Fesili mo le Suʻesuʻega]

[Ata i le itulau 25]

Pe e te iloa po o ai ua filifilia e Ieova e avea ma faatoʻānofotane mo lona Alo i le lumanaʻi?

[Ata i le itulau 26]

Ua tuuina atu e Iesu Keriso ana “mea” i le pologa faamaoni ma le faautauta

[Ata i le itulau 27]

Pe a tatou auai i le galuega o le molimau atu, ua tatou lagolagosua i le ʻaufaauuina