Pe E te Manatua?

Pe na e fiafia i le faitauina o lomiga fou o Le Olomatamata? Seʻi taumafai pe e mafai ona e taliina fesili o loo mulimuli mai:

• Aiseā e tāua tele ai ona tausisia pea la tatou amio saʻo o ni Kerisiano?

O le tausisia pea o la tatou amio saʻo e mafai ai ona tatou lagolagoina le pule silisili ese a Ieova ona o le alofa, ma faamaonia atu ai le pepelo o Satani. O la tatou amio saʻo foʻi ua saunia ai le faavae lea e mafai ona faamasinoina ai i tatou e le Atua, o lona uiga la, e tāua tele foʻi mo lo tatou faamoemoe i le lumanaʻi.—12/15, itulau e 4-6.

• O ā nisi o taʻu e mātaulia ai le matafaioi a Iesu i fuafuaga a le Atua?

O le Alo e toʻatasi. O le Upu. O le Amene. O le Puluvaga o le Feagaiga Fou. O le Ositaulaga Sili. O le Fanau Folafolaina.—12/15, itulau e 15.

• Aiseā e mataʻina ai le fai o Elia i lana auauna e vaavaai i tai i le sami, a o tatalo le perofeta mo le timu? (1 Tu. 18:43-45)

Sa faaalia e Elia lona malamalama i le faataamilosaga o le vai. O ao ia sa iai i luga aʻe o le sami o le a agaʻi mai i luga aʻe o le laueleele, ma mafai ai ona maua le timu.—1/1, itulau e 15-16.

• E mafai faapefea ona tatou faateleina le olioli lea e maua mai i la tatou faiva?

E mafai ona tatou saunia o tatou loto, e ala i le taulaʻi atu i le tele e mafai ai ona tatou fesoasoani i isi. E mafai ona tatou talaʻi ma se sini ia amata ni suʻesuʻega faale-Tusi Paia. Pe a tatou fesagaʻi ma le lē ano mai, e mafai ona fetuunaʻi la tatou talanoa e fua i mea e fiafia i ai tagata o la tatou oganuu.—1/15, itulau e 8-10.

• Pe tutusa le lepela o loo taʻua i le Tusi Paia ma le lepela i le taimi nei?

I taimi o le Tusi Paia sa iai le maʻi e taʻu o le lepela, e māfua mai i se siama. (Levi. 13:4, 5) O loo talanoa foʻi le Tusi Paia e faatatau i le lepela lea e tupu i ofu ma fale. O lenā “lepela” atonu e faasino atu i se lega po o le taetaepalaloa. (Levi. 13:47-52)—2/1, itulau e 19.

• E ao faapefea i aʻoaʻoga a le Tusi Paia ona aafia ai manatu ma tū masani a se Kerisiano e tusa ai o sauniga o maliu?

E ui lava atonu e faavauvau se Kerisiano ona o le maliu o sē pele, ae ua ia iloa o i latou ua maliliu e latou te lē o toe iloa se mea. E tusa lava foʻi pe faitioina o ia e tagata lē talitonu, ae e na te ʻalofia tū ma aganuu e fesootaʻi i le talitonuga e faapea, e mafai e le tagata ua oti ona aafia ai i latou o loo feola. Ina ia ʻalofia faafitauli e tulaʻi mai, o nisi Kerisiano ua latou tusia faamatalaga e faatatau i mea e latou te mananaʻo e fai pe a faatulaga sauniga o o latou maliu.—2/15, itulau e 29-31.

• E tusa ai o le Salamo 1:1, o ā mea e tolu e ao ona tatou ʻalofia pe afai e tatou te fia maua le fiafia?

O loo taʻua i le mau “le filifiliga a ē amio leaga,” “le ala o ē agasala,” ma “le nofoa o ē tauemu.” Ioe, ina ia maua le fiafia, e manaʻomia ona tatou ʻalofia i latou o ē tauemu pe e lē amanaʻia tulafono a le Atua. Nai lo lea, e ao ona tatou naunau pe fiafia i le tulafono a Ieova.—3/1, itulau e 17.

• Po o “le tusi a Iasera” ma “le tusi o taua a Ieova,” o ni tusi o le Tusi Paia ua leiloloa? (Iosua 10:13; Nu. 21:14)

E leai. E foliga mai o nei tusi o ni tusitusiga e lē faagaeeina, lea na maua i taimi o le Tusi Paia ma sa faasino atu i ai tusitala o le Tusi Paia.—3/15, itulau e 32.

• O le ā le suiga mataʻina na faia i se faaliliuga faaonapōnei o le Tusi Paia i le faa-Latina?

I le 1979, na faamaonia ai e Pope John Paul II le Nova Vulgata, o se faaliliuga i le faa-Latina. I le lomiga muamua, sa maua ai le suafa o le Atua, Iahveh (Ieova), i nisi o vaega. (Eso. 3:15; 6:3) Peitaʻi, ina ua lomia le lomiga lona lua i le 1986, sa suia le suafa Iahveh (Ieova) i le igoa Dominus [Alii].—4/1, itulau e 22.