Sa Faasilisilia e Iopu le Suafa o Ieova

“Ia faamanūina le suafa o Ieova.”—IOPU 1:21.

1. O ai e foliga mai na ia tusia le tusi o Iopu, ma o anafea na tusia ai?

PE TUSA o le 40 o tausaga o Mose, na sola ese ai mai Aikupito ina ia sao mai le toʻatamaʻi o Farao, ma alu atu i Mitiana. (Galu. 7:23) A o nofo o ia i lenā nuu, atonu sa ia logotala ai e uiga i puapuaga na oo iā Iopu, lea sa nofo latalata ane i le nuu o Usa. I tausaga mulimuli ane, a o iai Mose ma le nuu o Isaraelu e latalata i Usa a o agaʻi atu i le iʻuga o le latou malaga i le vao, sa ono maua ai e Mose ni faamatalaga e uiga i tausaga faaiʻu o le soifuaga o Iopu. E talitonu tagata Iutaia na tusia e Mose le tusi o Iopu, i se vaitaimi ina ua mavae le maliu o Iopu.

2. O ā auala ua faamalosia ai e le tusi o Iopu le faatuatua o auauna a Ieova i aso nei?

² Ua faamalosia e le tusi o Iopu le faatuatua o auauna a le Atua i aso nei. I ā auala? Ua fesoasoani mai le tala iā i tatou ina ia malamalama ai i le uiga o mea e sili ona tāua lea sa tutupu i le lagi, ma faamamafa mai ai iā i tatou le finauga sili ona tāua i le pule silisili ese a le Atua i le aoao o mea. O le tala foʻi iā Iopu ua faaloloto atili ai lo tatou malamalamaga e uiga i mea e aofia ai i le tausisia o le faamaoni, ma ua fesoasoani iā i tatou ina ia malamalama ai i le māfuaaga e lē taofia ai e Ieova i nisi taimi mafatiaga mai ana auauna. E lē gata i lea, ua faamatalaina Satani le Tiapolo i le tusi o Iopu o le Fili sili o Ieova ma o le fili o tagata. Ua faaalia mai foʻi i le tusi e faapea e mafai e tagata lē lelei atoatoa e pei o Iopu, ona faamaoni iā Ieova e ui lava i tofotofoga ogaoga. Seʻi o tatou iloiloina nisi o mea na tutupu ua faamatala mai i le tusi o Iopu.

Tofotofoina Iopu e Satani

3. O le ā ua tatou iloa e faatatau iā Iopu, ma aiseā na taulaʻi atu ai osofaʻiga a Satani iā te ia?

³ O Iopu o se tagata e tamaoaiga ma lauiloa, o se tamā sa pulea lelei ma tausia lona aiga. E manino mai o ia o se faufautua sa matuā faaaloalogia, ma na fesoasoani atu i ē na manaʻomia le fesoasoani. Ae o le itu e sili ona tāua, sa mataʻu Iopu i le Atua. Ua faamatalaina Iopu o se tagata “na sao le amio . . . ma le amiotonu, sa mataʻu foʻi o ia i le Atua, ma ʻalo ese i mea leaga.” E lē o le tamaoaiga la o Iopu po o lona lauiloa, na māfua ai ona avea o ia ma taulaʻiga o osofaʻiga a Satani le Tiapolo—ae o lona faamaoni i le Atua.—Iopu 1:1; 29:7-16; 31:1.

4. O le ā lenei mea o le faamaoni?

⁴ O loo faamatalaina i le amataga o le tala a le tusi o Iopu, se faatasiga i le lagi lea sa tutū ai agelu i luma o Ieova. Sa iai foʻi ma Satani, ma na ia faia ai ni tuuaʻiga faasaga iā Iopu. (Faitau le Iopu 1:6-11.) E ui lava sa taʻua e Satani meatotino a Iopu, ae sa ia taulaʻi faapitoa lava i le luʻia o le faamaoni o Iopu. O le upu “faamaoni,” e uiga atu i le amio saʻo, lē mataʻuleagaina, amiotonu, ma le lē ponā. E pei ona faaaogā ai i le Tusi Paia, o le faamaoni o le tagata o lona uiga o le tuutoina atoatoa atu lea iā Ieova.

5. O ā tuuaʻiga lē saʻo a Satani e faatatau iā Iopu?

⁵ Na tuuaʻia e Satani e faapea o le tapuaʻiga a Iopu i le Atua e faavae i le manatu faapito, ae lē o le faamaoni. Na finau Satani e pau le māfuaaga o le a faamaoni ai Iopu iā Ieova, pe afai e faaauau ona tauia ma puipuia o ia e le Atua. Ina ia saunia se tali i tuuaʻiga a Satani, na faataga ai e Ieova Satani e osofaʻia lenā tane faamaoni. O le iʻuga, i le aso e tasi, na iloa ane ai e Iopu ua gaoia pe faatamaʻia ana lafumanu, ua fasiotia ana auauna, ma ua feoti foʻi lana fanau e toʻasefulu. (Iopu 1:13-19) Pe na aveesea ai le faamaoni o Iopu i osofaʻiga a Satani? Ua faamatalaina e faamaumauga faagaeeina le tali atu a Iopu i faigatā na oo iā te ia: “Na foaʻiina mai e Ieova, ua aveeseina foʻi e Ieova; ia faamanūina le suafa o Ieova.”—Iopu 1:21.

6. (a) O le ā na tupu i le taimi o le isi faatasiga i le lagi? (e) O ai sa mafaufau i ai Satani ina ua ia luʻia le faamaoni o Iopu iā Ieova?

 ⁶ Mulimuli ane, na toe faia foʻi se isi faatasiga i le lagi. Sa toe tuuaʻia ai foʻi e Satani Iopu e ala i le faapea atu: “O le paʻu e sui aʻi le paʻu; o mea uma foʻi ua i ai i le tagata, e avatua e ia e sui aʻi lona ola. A e peitaʻi ia e aapa atu lou aao, ma e tago atu i ona ivi ma ona aano, pe na te lē faifai ai ea iā te oe i ou lava luma?” Seʻi mātau foʻi, sa faaaofia ai ma isi i tuuaʻiga a Satani. E ala i le faapea atu, “O mea uma foʻi ua i ai i le tagata, e avatua e ia e sui aʻi lona ola,” na luʻia ai e le Tiapolo e lē gata o le faamaoni o Iopu, ae faapea foʻi le faamaoni o so o se “tagata” e tapuaʻi iā Ieova. Na uma lenā, ona faataga lea e le Atua o Satani e taia Iopu i se maʻi tigā. (Iopu 2:1-8) Ae e leʻi gata ai i inā puapuaga o Iopu.

Lesona Tatou te Aʻoaʻoina Mai i Uiga o Iopu

7. Na faapefea ona avatu e le avā a Iopu ma tane na asiasi ane ia omiga iā Iopu?

⁷ I le amataga o puapuaga o Iopu, sa mafatia ai foʻi ma lana avā. E mautinoa sa matuā mafatia le fafine ona o le maliliu o lana fanau ma le aveesea o le tamaoaiga o le aiga. Sa tatau foʻi ona mafatia i le vaai atu i lana tane o mafatia mai i se maʻi tigāina. Sa ia augani atu iā Iopu e faapea: “Ua e taofi mau pea ea i lau amiotonu? inā faifai ia e oe o le Atua, ma e oti ai.” Ona taunuu ane lea o tane e toʻatolu—o Elifasa, Pilitati, ma Sofara—o ē, na ala ona ō ane ina ia faamāfanafana iā Iopu. Nai lo lea, sa latou faaaogā ni faamatalaga lē saʻo ma na avea moni i latou ma “tagata faamāfanafana faasoesa.” O se faataʻitaʻiga, na faapea atu Pilitati sa fai e le fanau a Iopu ni mea sesē ma ua alagatatau le mea ua tupu iā i latou. Na lāgā e Elifasa le manatu sesē faapea o puapuaga o Iopu o se faasalaga mai ni agasala i le taimi ua mavae. Sa oo lava foʻi ina ia fesiligia pe faamata e aogā i le Atua i latou o ē tumau i le faamaoni! (Iopu 2:9, 11; 4:8; 8:4; 16:2; 22:2, 3) Sa tumau pea le faamaoni o Iopu i na omiga faigatā. E moni na sesē Iopu ina ua “taʻuamiotonuina e ia o ia, a e lē o le Atua.” (Iopu 32:2) Peitaʻi, sa tumau pea lona faamaoni i ia tulaga uma.

8. O le ā le faaaʻoaʻoga lelei na faia e Eliu mo i latou e ofoina atu fautuaga i aso nei?

⁸ Ona sosoo ai lea ma le tatou faitau e uiga iā Eliu, lea foʻi sa asiasi ane iā Iopu. Sa muamua ona faalogologo Eliu i finauga sa faia i le va o Iopu ma ana aumea e toʻatolu. E ui lava e laʻitiiti o ia nai lo o tane nei e toʻafā, ae sa faaalia e Eliu le sili atu o lona atamai. Sa ia tautala atu ma le faaaloalo iā Iopu. Sa faamālō atu Eliu iā Iopu ona o le tausi i lana amiotonu. Ae na ia faapea atu foʻi ua soona uaʻi atu Iopu i le taumafai e faamaonia lana lava amiotonu. Ona faamautinoa atu lea e Eliu iā Iopu e faapea, e tāua i taimi uma ona auauna ma le faamaoni i le Atua. (Faitau le Iopu 36:1, 11.) Maʻeu se faaaʻoaʻoga lelei mo i latou e manaʻomia ona ofoina atu fautuaga i aso nei! Sa faaalia e Eliu le onosai, faalogologo lelei, avatu le faamālō pe a  talafeagai, ma avatu fautuaga aogā.—Iopu 32:6; 33:32.

9. Na faapefea ona fesoasoani Ieova iā Iopu?

⁹ Mulimuli ane, na iai se mea mataʻina na tupu iā Iopu ina ua fetalai mai Ieova iā te ia! Ua taʻua i le faamaumauga e faapea: “Ona tali mai ai lea o Ieova iā Iopu mai le afā.” E ala i le faaaogā o ni fesili, na fautuaina ai ma le agalelei ma le maumauaʻi e Ieova Iopu ina ia toe faasaʻo ona mafaufauga. Sa talia ma le lotomalie e Iopu le aʻoaʻiga, e ala i le faapea atu: “Ua faatauvaa lava aʻu . . . ua ou salamō foʻi i le efuefu ma le lefulefu.” Ina ua uma ona fetalai Ieova iā Iopu, ona Ia faailoa mai lea o le tigā o Lona finagalo i aumea e toʻatolu a Iopu, ona latou te leʻi “tautalatala ma le tonu.” Sa tatau iā Iopu ona tatalo mo i latou. “Ua uma ona tatalo Iopu mo ana uō, ona faaaʻe ai lea e Ieova o lana tafeaga. Ua toe au mai foʻi e Ieova, o mea iā Iopu ua faateleina, ua lua mea i mea uma na muaʻi iā te ia.”—Iopu 38:1; 40:4; 42:6-10.

O le ā le Tele o lo Tatou Alofa iā Ieova?

10. Aiseā na lē tuufau ai e Ieova e aua le amanaʻia, pe faaumatia foʻi Satani?

¹⁰ O Ieova na Foafoaina le aoao o mea uma, ma o le Silisili Ese i foafoaga uma. Aiseā na lē tuufau ai e Ieova e aua le amanaʻia le luʻi a le Tiapolo? Sa silafia e le Atua e faapea, pe a tuufau e aua le amanaʻia Satani pe faaumatia foʻi o ia, o le a lē foʻia ai le finauga lea na lāgā. Na faapea mai le Tiapolo o le a lē tumau le faamaoni o Iopu, le auauna mataʻina a Ieova, pe afai e aveesea lona tamaoaiga. Sa tumau pea Iopu i le faamaoni e ui lava i tofotofoga. Ona faapea mai lea o Satani, so o se tagata lava e mafatia i le tino o le a liliu ese mai le Atua. Sa mafatia Iopu, ae sa tumau pea lona faamaoni. O lea la, sa faamaonia le avea o Satani ma pepelo i le mea na tupu i lenā tagata faamaoni e ui lava e lē lelei atoatoa. Ae faapefea isi tagata tapuaʻi o le Atua?

11. Na faapefea ona avatu e Iesu se tali atoatoa i le luʻi a Satani?

¹¹ O lona uiga la, o auauna taʻitoʻatasi a le Atua e tumau i lona faamaoni e tusa lava po o ā mea e faia e Satani iā te ia, ua faaalia mai ai i lona tulaga le sesē o tuuaʻiga a lenā fili lē alofa. Na afio mai Iesu i le lalolagi ma avatu se tali atoatoa i le luʻi a Satani. O Iesu o se tagata lelei atoatoa e pei o lo tatou uluaʻi tamā, o Atamu. O le faamaoni o Iesu seʻia oo i lona maliu, e mautinoa na faaalia ai le pepelo o Satani ma le sesē o ana tuuaʻiga.—Faaa. 12:10.

12. O le ā le avanoa ma le tiute tauave ua iai i auauna taʻitoʻatasi a Ieova?

¹² Ae ui i lea, o loo faaauau pea ona tofotofo e Satani tagata tapuaʻi o Ieova. Ua iā i tatou taʻitoʻatasi le avanoa ma le tiute tauave e faaalia atu ai e ala i lo tatou faamaoni, e faapea e māfua ona tatou auauna iā Ieova ona e tatou te alolofa iā te ia—ae lē ona o ni māfuaaga manatu faapito. O le ā lo tatou manatu i lenā tiute tauave? E tatou te vāai i ai o se faaeaga le faamaoni iā Ieova. E faamāfanafanaina foʻi i tatou i le iloa e aumai e Ieova iā i tatou le malosi e tumau ai, ma e pei o le tulaga o Iopu, e faatapulaa e Ieova tofotofoga e tatou te fesagaʻia.—1 Kori. 10:13.

Satani—O se Fili Faamaualuga ma ua Fulitua i le Upu Moni

13. O ā faamatalaga auʻiliʻili ua faaalia i le tusi o Iopu e faatatau iā Satani?

¹³ O loo aumaia i Tusitusiga Eperu faamatalaga auʻiliʻili e faatatau i le gaoioiga leaga a Satani e faalumaina ai, o le luʻia lea o Ieova ma le taʻitaʻisesēina o tagata. I Tusitusiga Eleni, tatou te maua atili ai isi faamatalaga e faatatau i le tetee a Satani iā Ieova, ma i le tusi o Faaaliga, ua tatou iloa mai ai ua lē o toe umi ona faamaonia lea o le pule silisili ese a Ieova ma o le a  faaumatia Satani. Ua tatou iloa atili i le tusi o Iopu isi faamatalaga e uiga i le ala fouvale o Satani. Ina ua auai Satani i faatasiga sa faia i le lagi, e leʻi auai ma se faanaunauga e vivii atu iā Ieova. Sa iai i le Tiapolo se uiga lotovale ma se faanaunauga leaga. Ina ua uma ona ia tuuaʻia Iopu ma maua le faatagaga e tofotofoina ai Iopu, “ona alu ese ai lea o Satani i luma o Ieova.”—Iopu 1:12; 2:7.

14. O le ā le uiga sa faaalia e Satani agaʻi iā Iopu?

¹⁴ I le tusi o Iopu, o loo faamatalaina ai Satani o le fili lē alofa o tagata. I le va o le faatasiga i le lagi lea e taʻua i le Iopu 1:6 ma le faatasiga lea e faamatalaina i le Iopu 2:1, o loo iai se vaitaimi e lē mailoa le umi, lea sa tofotofoina ai ma le lē alofa Iopu. O le faamaoni o Iopu na mafai ai ona fetalai atu Ieova iā Satani e faapea: “Ua taofi mau pea foʻi e [Iopu] lana amiotonu, sa e faaosoina aʻu iā te ia, ia ou faaoo fua le malaia iā te ia.” Peitaʻi, e leʻi ioe mai Satani e faapea e sesē ana tuuaʻiga. Nai lo lea, sa ia finau maumauaʻi ia toe tuu atu iā Iopu se isi tofotofoga ogaoga. O le ala lea na tofotofo ai e le Tiapolo Iopu i le taimi a o tamaoaiga o ia, ma i le taimi na lē tagolima ai. E manino mai, e oo lava foʻi i ē matitiva po o i latou e aafia i mala, e lē alofa i ai Satani. E ʻinoʻino Satani i tagata faamaoni. (Iopu 2:3-5) Ae ui i lea, o le faamaoni o Iopu ua faaalia ai le pepelo o Satani.

15. O ā mea e tutusa ai i latou ua fulitua i le upu moni i aso nei, ma Satani?

¹⁵ O Satani o le uluaʻi foafoaga lea na fulitua i le upu moni. Ua faaalia foʻi e i latou ua fulitua i le upu moni i aso nei uiga e pei o uiga o le Tiapolo. Atonu ua faaleagaina o latou mafaufau e se uiga faitio faasaga i ni tagata taʻitoʻatasi i faapotopotoga, o toeaina Kerisiano, po o le Vaega Pule. O nisi tagata fulitua i le upu moni ua latou teena le faaaogāina o le suafa o le Atua, o Ieova. E latou te lē fiafia e aʻoaʻoina atili mea e faatatau iā Ieova pe auauna foʻi iā te ia. I le pei o lo latou tamā, o Satani, e taulaʻi atu i latou ua fulitua i le upu moni e faaleaga le faatuatua o tagata faamaoni. (Ioa. 8:44) O le māfuaaga lea e ʻalofia ai e auauna a Ieova vala uma e fesootaʻi ai ma i latou!—2 Ioa. 10, 11.

Sa Faasilisilia e Iopu le Suafa o Ieova

16. O le ā le uiga sa faaalia e Iopu agaʻi iā Ieova?

¹⁶ Sa faaaogā e Iopu le suafa o Ieova ma viiviia foʻi. E oo lava foʻi i le taimi na matuā mafatia ai ina ua iloa le tala ua maliliu lana fanau, e leʻi taʻuvaleina pe taʻuleagaina e Iopu le Atua. E ui lava sa sesē le manatu o Iopu faapea o le Atua na ia aveesea ana meatotino, peitaʻi sa ia faasilisilia pea le suafa o Ieova. I se tasi o ana upu faa-faataoto i se taimi mulimuli ane, na taʻutino ai e Iopu e faapea: “Faauta, o le mataʻu i le Alii, o le poto lava lea; o le ʻalo ese i le amio leaga, o le mafaufau lea.”—Iopu 28:28.

17. O le ā sa fesoasoani iā Iopu e tausisia ai pea lona faamaoni?

¹⁷ O le ā sa fesoasoani iā Iopu e tausisia ai pea lona faamaoni? E manino mai, a o leʻi oo mai mala, ua uma ona ia atiaʻe se faiā vavalalata ma Ieova. E ui lava e leai se faamaoniga e tatou te faamaonia ai na iloa e Iopu sa luʻia e Satani ia  Ieova, ae sa maumauaʻi pea o ia e tumau i le faamaoni. Na ia faapea mai: “Seʻia oo lava i loʻu oti ou te lē faateʻaina lava laʻu amio saʻo.” (Iopu 27:5) Sa faapefea ona atiaʻe e Iopu lenei faiā vavalalata? O le mea moni, sa ia faatāuaina mea na ia faalogo ai e faatatau i feutagaʻiga a le Atua ma Aperaamo, Isaako, ma Iakopo, o ē o ni ona tauaiga. Ma e ala i le mātauina o le foafoaga, sa mafai ona aʻoaʻoina mai ai e Iopu le tele o uiga o Ieova.—Faitau le Iopu 12:7-9, 13, 16.

18. (a) Sa faaalia faapefea e Iopu lona tuutoina iā Ieova? (e) O ā auala e tatou te faaaʻoaʻo ai i le faaaʻoaʻoga lelei a Iopu?

¹⁸ Ona o mea na aʻoaʻoina e Iopu, na oso aʻe ai iā te ia le faanaunauga ia faafiafia Ieova. Ona na manatu faapea ina neʻi faia e tagata o lona aiga se mea e faatigā ai i le Atua, pe “faifai i le Atua i o latou loto,” o lea na ia ofo atu ai e lē aunoa taulaga. (Iopu 1:5) E oo lava foʻi i taimi na matuā tofotofoina ai Iopu, sa ia taʻuleleia pea Ieova. (Iopu 10:12) Maʻeu se faaaʻoaʻoga lelei! E ao foʻi ona tatou ave i fale e lē aunoa le poto saʻo e uiga iā Ieova ma ana fuafuaga. Ua iā i tatou se faasologa aogā o mea faaleagaga e pei o le suʻesuʻe, auai i sauniga, tatalo, ma le talaʻia o le tala lelei. E lē gata i lea, e tatou te taumafai malosi e faalauiloa atu le suafa o Ieova. Ma e pei ona faafiafiaina Ieova i le faamaoni o Iopu, ua faapena foʻi ona faafiafiaina le finagalo o Ieova i le faamaoni o ana auauna i aso nei. O le a talanoaina lenei manatu i le mataupu o sosoo mai.

Pe E te Manatua?

• Aiseā na uaʻi atu ai Satani le Tiapolo iā Iopu?

• O ā tofotofoga sa tumau ai Iopu, ma na faapefea ona ia tali atu i na tofotofoga?

• O le ā o le a fesoasoani iā i tatou ina ia tausisia ai le faamaoni, e pei ona sa faia e Iopu?

• O le ā ua tatou aʻoaʻoina mai le tusi o Iopu, e faatatau iā Satani?

[Fesili mo le Suʻesuʻega]

[Ata i le itulau 4]

Ua faamanatu mai e le tala iā Iopu iā i tatou, le finauga e sili ona tāua i le pule silisili ese a le Atua i le aoao o mea

[Ata i le itulau 6]

O ā tulaga e ono tofotofoina ai lou faamaoni?