Aiseā e Ao ai Ona Mulimuli i “le Keriso”?
Aiseā e Ao ai Ona Mulimuli i “le Keriso”?
“A fia mulimuli mai se tasi iā te aʻu, ia faafitia e ia o ia lava . . . ma mulimuli mai pea iā te aʻu.”—LUKA 9:23.
1, 2. Aiseā e tāua ai mo i tatou ona iloiloina māfuaaga e ao ai ona tatou mulimuli i “le Keriso”?
MAʻEU le olioli o Ieova i le silasila mai i le anoanoaʻi o ona tagata tapuaʻi i le lalolagi o loo faapotopoto faatasi ma outou, o tagata fou lotofiafia faapea ma ē talavou! A o faaauau pea ona e suʻesuʻeina le Tusi Paia, ma auai e lē aunoa i sauniga, ma tupu aʻe pea lou iloa o le upu moni faasaoola o loo i le Afioga a le Atua, e tatau ona teu i lou loto le valaaulia lenei a Iesu: “A fia mulimuli mai se tasi iā te aʻu, ia faafitia e ia o ia lava ma amo le laau e faapuapuagatia ai o ia i aso uma lava, ma mulimuli mai pea iā te aʻu.” (Luka 9:23) O loo tautala Iesu o le faafitia e le tagata o ia lava ma avea ma ona soo, o se mea e tatau ona e manaʻo e fai. E tāua tele la mo i tatou ona iloiloina māfuaaga e tatau ai ona tatou mulimuli i “le Keriso.”—Mata. 16:13-16.
2 Ae ā i latou o loo savavali i tulagāaao o Iesu Keriso? Ua faalaeiauina i tatou ina “ia saga savavali ai pea i lenā auala.” (1 Tesa. 4:1, 2) E tusa lava la pe e leʻi leva po ua leva foʻi ona tatou iai i le tapuaʻiga moni, e mafai ona fesoasoani le iloiloina o māfuaaga e mulimuli ai i le Keriso ina ia tatou faatatauina ai le timaʻiga a Paulo, ma atili ai pea ona tatou mulimuli iā Iesu i aso uma o o tatou olaga. Seʻi o tatou iloiloina la ni māfuaaga se lima e ao ai ona tatou mananaʻo e mulimuli i le Keriso.
E Māfana Atili ai ma Ieova
3. O ā auala e lua e mafai ai ona tatou iloa Ieova?
3 Ina ua tautala atu Paulo i tagata Atenai a o ‘tū i le ogatotonu o Areopako,’ sa ia faapea atu: ‘Ua tofia e le Atua le taimi atofaina ma tuaoi o mea ua latou nonofo ai, ina ia latou saʻili i le Atua, pe mafai ona latou tautagotago iā te ia ma maua o ia, ae peitaʻi e lē o mamao o ia mai iā i tatou taʻitoʻatasi.’ (Galu. 17:22, 26, 27) E mafai ona tatou saʻili i le Atua ma iloa lelei o ia. O se faaaʻoaʻoga, pe a tatou vāai i mea na faia e le Atua, e tatou te iloa ai ona uiga ma ona tomai. O le manatunatu loloto i ana galuega o le foafoaga, e tatou te iloa ai le tele o mea e faatatau i Lē na faia i tatou. (Roma 1:20) O loo faailoa mai foʻi e Ieova mea e uiga iā te ia i lana Afioga, le Tusi Paia. (2 Timo. 3:16, 17) O le tele tatou te ‘manatunatu ai i ana galuega uma’ ma ‘mafaufau i mea na ia faia,’ o le tele foʻi lenā o lo tatou iloa lelei o Ieova.—Sala. 77:12.
4. E faapefea ona fesoasoani le mulimuli iā Keriso e tatou te māfana atu ai iā Ieova?
4 O se tasi o auala lelei e mafai ai ona tatou māfana iā Ieova, o le mulimuli lea i le Keriso. Seʻi mafaufau foʻi i le mamalu sa iai Iesu i le taimi na la faatasi ai ma lona Tamā “a o leʻi faia tagata i le lalolagi”! (Ioa. 17:5) O ia “o le amataga o foafoaga a le Atua.” (Faaa. 3:14) Ona o ia o le “ulumatua o foafoaga uma,” ua leva la ona soifua o ia i le lagi faatasi ma lona Tamā o Ieova. A o leʻi avea o ia ma tagata, sa matuā māfana le la faiā ma lona Tamā. O ia o se fesoasoani sili a le Atua, ma sa la galulue faatasi ma le Silisili ese, ma e leai se faiā sili ona māfana nai lo le faiā a le Atua ma Iesu. E lē gata na mātauina e Iesu le auala na faia ai e lona Tamā mea, ma iloa Ona faalogona ma uiga, ae sa ia taofi mau foʻi ma faia mea uma na ia aʻoaʻoina mai lona Tamā. O le iʻuga, sa pei lava lenei Alo usiusitaʻi o lona Tamā, lea na faasino atu ai le Tusi Paia iā te ia o se tasi “ua foliga i le Atua e lē vaaia.” (Kolo. 1:15) E mafai ona tatou māfana atili atu iā Ieova, pe afai tatou te mulimulituʻi i le Keriso.
Ia Faaaʻoaʻo Atoatoa ai iā Ieova
5. O le ā o le a fesoasoani iā i tatou e faaaʻoaʻo atoatoa ai iā Ieova, ma aiseā?
5 Ona o i tatou ua ‘faia i le faatusa o le Atua ia foliga iā te ia,’ ua iā i tatou la agavaa e faaatagia atu ai uiga o le Atua. (Kene. 1:26) Na fautuaina e le aposetolo o Paulo ia Kerisiano ina “ia faaaʻoaʻo i le Atua e faapei o lana fanau pele.” (Efe. 5:1) O le a fesoasoani le mulimuli i le Keriso e tatou te faaaʻoaʻo ai i le Tamā i le lagi. Ua mafai ona faia faapea ona na faaatagia mai e Iesu le auala e mafaufau ai le Atua, ona faalogona, ma ona uiga, ma e sili atu foʻi ona ia faamatalaina atoatoa lona Tamā nai lo se isi lava tagata. A o iai Iesu i le lalolagi, e lē gata na ia faailoa mai le suafa o Ieova, ae sa ia faailoa mai foʻi le ituaiga o Atua e iai o ia. (Faitau le Mataio 11:27.) Sa faia e Iesu lenā tulaga e ala i ana upu ma gaoioiga, faapea ma ana aʻoaʻoga ma faaaʻoaʻoga.
6. O le ā ua faailoa mai e aʻoaʻoga a Iesu e faatatau iā Ieova?
6 Na faailoa mai e Iesu e ala i ana aʻoaʻoga, le mea o loo manaʻomia e le Atua mai iā i tatou ma ona faalogona e faatatau i ana auauna. (Mata. 22:36-40; Luka 12:6, 7; 15:4-7) Mo se faataʻitaʻiga, ina ua uma ona taʻua e Iesu se tasi o tulafono mai Tulafono e Sefulu—“Aua e te mulilua”—sa ia faamatala mai le silafaga a le Atua e faatatau i le mea ua leva ona iai i le loto o le tagata, a o leʻi faia le mulilua. Na ia faapea mai: “Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” (Eso. 20:14; Mata. 5:27, 28) Ina ua uma foʻi ona taʻua e Iesu le manatu sesē a le ʻau Faresaio e faatatau i le Tulafono—“Ia e alofa atu i lē lua te tuaoi, a ia ʻinoʻino i lou fili”—sa ia faailoa atu le mafaufau o Ieova i le faapea atu: “Ia alolofa atu pea i o outou fili ma tatalo mo ē ua sauāina outou.” (Mata. 5:43, 44; Eso. 23:4; Levi. 19:18) O le malamalama i le auala e mafaufau ai le Atua ma ona faalogona, faapea ma mea na te manaʻomia mai iā i tatou, o le a tatou faaaʻoaʻo atoatoa ai iā te ia.
7, 8. O le ā e tatou te aʻoaʻoina mai le faaaʻoaʻoga a Iesu e faatatau iā Ieova?
7 Na faailoa mai foʻi e Iesu le ituaiga o Atua e iai lona Tamā e ala mai i ana faaaʻoaʻoga. Pe a tatou faitau i tusi a Evagelia na faaalia e Iesu le alofa mutimutivale i ē na manaʻomia le fesoasoani, ma alofa atu i ē na mafatia, ma lē fiafia i ona soo ina ua latou vavao tamaiti e ō atu iā te ia, pe e lē o faalogona foʻi na o loo iai i le Tamā? (Mare. 1:40-42; 10:13, 14; Ioa. 11:32-35) Seʻi mātau le auala na faailoa mai ai e gaoioiga a Iesu uiga autū o le Atua. Pe lē o faailoa mai ea e vavega na faia e le Keriso le matuā tele o lona mana? Peitaʻi, sa lē taitai faaaogā e Iesu lenā mana mo lona lava lelei pe faia ina ia afāina ai isi. (Luka 4:1-4) Maʻeu se faailoaga manino o lona faamasinotonu ina ua ia tutuli i fafo tagata faatauʻoa matapeʻapeʻa mai le malumalu! (Mare. 11:15-17; Ioa. 2:13-16) Sa faaalia mai foʻi i ana aʻoaʻoga ma ana upu logolelei lea sa ia faaaogā e pāʻia ai loto o tagata, “e sili atu [lona atamai] iā Solomona.” (Mata. 12:42) Ae faapefea le auala mataʻina na faaalia ai e Iesu le alofa e ala i le faataulagaina o lona ola mo isi, lea o loo taʻua i le Tusi Paia “e leai lava se tasi e sili atu lona alofa nai lo o lenei”?—Ioa. 15:13.
8 Na matuā atoatoa ona faaatagia mai e le Alo o le Atua ia Ieova e ala i mea uma na ia tautala i ai ma faia, lea na ia faapea mai ai: “O lē ua vaai mai iā te aʻu, ua vaai foʻi o ia i le Tamā.” (Faitau le Ioane 14:9-11.) O le mulimuli atu iā Keriso, e tutusa lava lenā ma le faaaʻoaʻo iā Ieova.
O Iesu o Lē ua Faauuina e Ieova
9. O anafea ma na faapefea ona avea Iesu ma Lē ua Faauuina e le Atua?
9 Seʻi manatu i le mea na tupu i le tau e afu ai mea i le 29 T.A., ina ua alu atu Iesu lea ua 30 o ona tausaga, iā Ioane le Papatiso. “Ua uma ona papatisoina Iesu, ona maliu aʻe loa lea o ia mai le vai. Tagaʻi foʻi! Ua matala mai le lagi, ma ua iloa atu ai e Ioane le agaga o le Atua e pei o se lupe ua alu ifo i ona luga.” Sa avea ai o ia ma Keriso po o le Mesia i lenā taimi. Sa faailoa mai e Ieova lava ia o Iesu o Lē ua ia Faauuina i le faapea mai: “O loʻu Atalii pele lenā, o lē ua malie i ai loʻu loto.” (Mata. 3:13-17) Maʻeu se māfuaaga lelei tele e ao ai ona tatou mulimuli i le Keriso!
10, 11. (a) O ā auala o loo faaaogā ai le taʻu “Keriso” e faasino atu iā Iesu? (e) Aiseā e tatau ai ona tatou mulimuli iā Iesu?
10 I le Tusi Paia, o loo faaaogā ai le taʻu “Keriso” i faamaumauga e faatatau iā Iesu i ni auala eseese, o Iesu Keriso, Keriso Iesu, ma le Keriso. Na faaaogā muamua e Iesu lava ia le faaupuga “Iesu Keriso”—e muamua le igoa ona sosoo lea ma le suafa o loo faalupe ai. Na ia taʻua i lana tatalo i lona Tamā: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.” (Ioa. 17:3) O loo faaalia manino mai i lenā faaupuga lē na auina mai e le Atua ma avea ma Lē ua ia Faauuina. Pe afai e tuu le taʻu, po o le suafa o loo faalupe ai i luma o le igoa e pei o “Keriso Iesu,” ona ave lea o le faamamafaga i le tulaga po o le matafaioi o loo faia e Iesu, nai lo ia. (2 Kori. 4:5) O le faaaogāina o le faaupuga “le Keriso,” lea o loo muamua le upu faasino mautinoa o le “le” i le suafa o loo faalupe ai, o le isi lea auala e faamamafa ai le matafaioi a Iesu o le avea ma Mesia.—Galu. 5:42.
11 Po o le ā lava le auala e faaaogā ai le taʻu “Keriso” e faasino atu iā Iesu, ua faamatilatila mai ai le mea moni tāua lenei: E ui lava na afio mai le Alo o le Atua i le lalolagi o se tagata ma faailoa atu le finagalo o lona Tamā, ae ua lē na o se tagata po o se perofeta o ia; ae na auina mai o ia e avea ma Lē o le a faauuina e Ieova. E matuā tatau lava la ona tatou mulimuli atu iā te Ia.
Ua na o Iesu Lava le Ala i le Ola
12. O le ā le faamatalaga tāua na fai e Iesu i le aposetolo o Toma lea o loo tāua foʻi iā i tatou?
12 O le isi māfuaaga tāua e ao ai ona tatou mulimuli pea i le Mesia, o loo maua i fetalaiga a Iesu i ona aposetolo faamaoni i ni nai itula a o leʻi maliu. Ina ua ia tali atu i le fesili a Toma e faatatau i le faamatalaga a Iesu o le a alu ma saunia se nofoaga mo i latou, na faapea atu Iesu: “O aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.” (Ioa. 14:1-6) Sa fetalai atu Iesu i aposetolo faamaoni e toʻa 11. Na ia folafola atu iā i latou se nofoaga i le lagi, peitaʻi, o loo tāua foʻi upu a Iesu iā i latou o loo faamoemoe e maua le ola e faavavau i le lalolagi. (Faaa. 7:9, 10; 21:1-4) I le ā le itu?
13. O le ā le uiga o le avea o Iesu ma “ala”?
13 O Iesu Keriso o “le ala.” O lona uiga e na o ia lava e tatau ona ui atu ai, faatoʻā mafai lea ona tatou faalatalata atu i le Atua. O le tulaga moni lenā e tusa ai ma tatalo, auā e na o tatalo e ala atu iā Iesu e tatou te mautinoa o le a foaʻi mai ai e le Tamā so o se mea e tatou te ōle atu ai e ōgatusa ma lona finagalo. (Ioa. 15:16) Peitaʻi, e iai foʻi se isi uiga o le avea o Iesu ma “ala.” Ua faaesea tagata mai le Atua ona o le agasala. (Isa. 59:2) Ua ‘foaʻi mai e Iesu lona ola e fai ma togiola e sui aʻi tagata e toʻatele.’ (Mata. 20:28) O le iʻuga, o loo taʻua i le Tusi Paia: “E faamamāina foʻi i tatou mai agasala uma i le toto . . . o Iesu.” (1 Ioa. 1:7) Ioe, ua tatalaina e le Alo le avanoa e toe fai ai se leleiga ma le Atua. (Roma 5:8-10) E mafai ona tatou maua se faiā māfana ma le Atua, pe a tatou faatuatua ma usiusitai iā Iesu.—Ioa. 3:36.
14. Aiseā ua taʻua ai Iesu “o le upu moni”?
14 O Iesu o le “upu moni,” auā e lē gata sa ia tautala ma ola e tusa ma le mea moni, ae sa faataunuuina foʻi iā te ia le tele o valoaga na tusia e faatatau i le Mesia. Na tusi le aposetolo o Paulo e faapea, “Auā po o le ā lava le tele o folafolaga a le Atua, a ua Ioe uma ona o ia.” (2 Kori. 1:20) E oo lava i “le ata o mea lelei i le lumanaʻi” o loo i le tulafono a Mose, sa taunuu moni lava iā Keriso Iesu. (Epe. 10:1; Kolo. 2:17) Sa taulaʻi atu valoaga uma iā Iesu, ma ua fesoasoani e tatou te malamalama ai i lana matafaioi autū i le faataunuuina o le finagalo o Ieova. (Faaa. 19:10) Ina ia maua aogā mai faataunuuga o mea ua faafinagaloina e le Atua mo i tatou, e tatau la ona tatou mulimuli i le Mesia.
15. O le ā le itu ua avea ai Iesu o “le ola”?
15 O Iesu o “le ola” ona ua ia faatauina tagata i lona toto, ma o le ola e faavavau o se meaalofa na foaʻi mai e le Atua “e ala iā Keriso Iesu lo tatou Alii.” (Roma 6:23) O Iesu foʻi o “le ola” mo i latou ua maliliu. (Ioa. 5:28, 29) E lē gata i lenā, seʻi manatunatu foʻi i mea o le a ia faia o se Ositaulaga Sili a o faagasolo lana Pulega i le Afe Tausaga. O le a ia laveaʻia e faavavau ona tagata i le lalolagi mai le agasala ma le oti!—Epe. 9:11, 12, 28.
16. O le ā le māfuaaga o loo tatou maua e ao ai ona mulimuli iā Iesu?
16 O lea la, e aogā tele mo i tatou le tali a Iesu na fai iā Toma. O Iesu o le ala, le upu moni ma le ola. Na auina mai o ia e le Atua i le lalolagi ina ia faaola tagata e ala iā te ia. (Ioa. 3:17) E leai se tasi e mafai ona alu atu i le Tamā seʻiloga e ui atu iā Iesu. O loo faamanino mai i le Tusi Paia: “E leai foʻi se isi e mafai ona maua ai le faaolataga, auā e leai se isi igoa i lalo o le lagi ua tuuina mai e le Atua i tagata, e tatau ona faaolaina ai i tatou.” (Galu. 4:12) O lea la, po o ā lava mea na aʻoaʻoina ai i tatou i taimi ua mavae, ae o se ala atamai lo tatou talitonu iā Iesu, mulimuli iā te ia, ma taʻitaʻiina atu ai i le ola.—Ioa. 20:31.
Ua Faatonuina i Tatou ia Faalogo i le Keriso
17. Aiseā e tāua ai ona tatou faalogo i le Alo o le Atua?
17 Sa molimauina e Peteru, Ioane, ma Iakopo se liliuina faavavega. I lenā taimi, sa latou faalogo ai i se leo mai le lagi ua faapea mai: “O loʻu Atalii lenei, o lē ua ou filifilia. Ia faalogo iā te ia.” (Luka 9:28, 29, 35) O le usiusitai i le faatonuga ia faalogo i le Mesia, o se mea e ao ona manatu mamafa i ai.—Faitau le Galuega 3:22, 23.
18. E faapefea ona tatou faalogo iā Iesu?
18 O le faalogo iā Iesu, e aofia ai le ‘vaavaai totoʻa atu iā te ia, ma manatunatu lelei i lana faaaʻoaʻoga.’ (Epe. 12:2, 3) E manaʻomia tele la “ona tatou matuā uaʻi atu i mea” o loo tatou faitau i ai i le Tusi Paia e faatatau iā Iesu, atoa ma lomiga mai le “pologa faamaoni ma le faautauta,” faapea foʻi ma mea ua tatou faalogo i ai i sauniga e faatatau iā te ia. (Epe. 2:1; Mata. 24:45) I le avea ai o i tatou ma mamoe a Iesu, e ao ona tatou naunau e faalogo ma mulimuli atu iā te ia.—Ioa. 10:27.
19. O le ā e fesoasoani iā i tatou ina ia mulimuli atu pea i le Keriso?
19 Pe e mafai ona tatou mulimuli atu pea i le Keriso e tusa lava po o ā faigatā e tulaʻi mai? Ioe, e mafai, pe a tatou “taofimau pea i le faaaʻoaʻoga o upu aogā,” e ala i le faatatauina o mea ua tatou aʻoaʻoina “i le faatuatua ma le alofa e tusa ai ma Keriso Iesu.”—2 Timo. 1:13.
O le ā na E Aʻoaʻoina?
• E faapefea ona tatou māfana iā Ieova ona o le mulimuli i “le Keriso”?
• Aiseā e tutusa ai le faaaʻoaʻo iā Iesu ma le faaaʻoaʻo iā Ieova?
• E faapefea ona avea Iesu o “le ala, o le upu moni ma le ola”?
• Aiseā e tatau ai ona tatou faalogo i Lē ua Faauuina e Ieova?
[Study Questions]
[Ata le itulau 29]
Ua faaalia mai i aʻoaʻoga a Iesu le maualuga o le auala e mafaufau ai Ieova
[Ata le itulau 30]
E ao ona tatou mulimuli atu pea i Lē ua Faauuina e Ieova
[Ata le itulau 32]
Na fetalai Ieova: “O loʻu atalii lenei, . . . Ia faalogo iā te ia”