Ia Faaaʻoaʻo i le Faamaoni o Itai

“IEOVA E, le Atua, o Lē e ona le malosi uma lava, e mataʻina ma ofoofogia au galuega. E tonu ma faamaoni ou ala, le Tupu o le vavau e. Ieova e, o ai sē e lē mataʻu iā te oe ma faamamaluina lou suafa?” O lenei pese, na usuina i le lagi e “ē ua manumalo i le manu feʻai ma lona faatusa,” lea e taulaʻi atu i le faamaoni o le Atua. (Faaa. 15:2-4) E finagalo Ieova i ana auauna ina ia faaaʻoaʻo iā te ia i le faaalia o lenei uiga lelei.—Efe. 4:24.

Ae i le isi itu, o loo taumafai foʻi Satani le Tiapolo e faia mea uma i lona malosi ina ia vavaeese ai auauna a le Atua i le lalolagi mai le alofa o le Atua, lea o loo latou tapuaʻi i ai. Peitaʻi, e toʻatele lava i latou o loo faamaoni pea i le Atua, e tusa lava pe latou te feagai ma tulaga ogaoga. O se mea e olioli ai lo tatou iloaina o loo faatāuaina e Ieova lenā tuutoina atu! Ua tatou mautinoa le mea moni e faapea: “E fiafia Ieova i le faamasinoga, na te lē tuua foʻi ona tagata amio Atua [faamaoni].” (Sala. 37:28) Ina ia fesoasoani iā i tatou  e tumau i le faamaoni, ua faamauina e le Atua i lana Afioga ia tala e faatatau i gaoioiga a le toʻatele o tagata faamaoni. O se tasi o nei tala, o le tala iā Itai le sā Katā.

‘O se Tagata Ese ma Lē Aumau’

O Itai atonu o se tagata na ola aʻe i Kata, le nuu taʻutaʻua o Filisitia, o le nuu o Koliata ma isi fili mataʻutia o Isaraelu. Na faatoʻā aliaʻe le tala e faatatau iā Itai i le Tusi Paia, i le taimi o le fouvalega a Apisaloma faasaga iā Tavita. O le taimi lenā na aumau ai Itai ma tagata Filisitia e toʻa 600 o ē na mulimuli iā te ia, i se vaipanoa e lata ane i Ierusalema.

E tusa ai ma le tulaga o Itai ma ē na mulimuli iā te ia, atonu na toe manatua ai e Tavita ia aso na avea ai o ia ma tagata ese a o latou aumau ma le toʻa 600 o tagata Isaraelu totoa i vaipanoa o Filisitia, ma ulu atu i laufanua o Akisa, le tupu o Kata. (1 Samu. 27:2, 3) O le ā sa faia e Itai ma ona tagata a o feagai Tavita ma le fouvalega a lona atalii o Apisaloma? Po o le a latou ʻau ea ma Apisaloma, pe e leai se isi e ʻau i ai, ia po o le a ʻau foʻi ma Tavita ma ona tagata?

Seʻi faaāta i lou mafaufau ia Tavita o loo sola ese mai Ierusalema, ua mālōlō i se vaipanoa e taʻu o Beth-merhak, o lona uiga o “le mea mamao.” Atonu o se fale mulimuli lava lea i Ierusalema i le agaʻi atu i le Mauga o Olive, a o leʻi sopoʻia le Alia o Ketarono. (2 Samu. 15:17) O i inā na siaki ai e Tavita lana ʻautau a o latou ui ane i ona luma. Faauta! E lē na o tagata Isaraelu faamaoni o loo iā te ia, ae o loo iai uma foʻi le ʻau Kereti ma le ʻau Peleti. Ae e lē gata i lea, na iai foʻi ma le ʻau sā Katā—o Itai ma ana tagata totoa e toʻa 600.—2 Samu. 15:18.

Na faapea atu ma le agaalofa Tavita iā Itai: “O le ā le mea e alu atu ai oe faatasi ma i matou? Foʻi ia, ma e nofo faatasi ma le tupu [o Apisaloma]; auā o le tagata ese oe, ma lē āumau i le mea e te nofo ai. Na e sau ananafi; e te fealuaʻi solo ea ona o aʻu i le asō i lo tatou ō ma i matou? A o aʻu, ou te soona alu atu lava aʻu; foʻi ia oe, tou te toe foʻi ma ou uso, ia iā te oe le alofa ma le faamaoni.”—2 Samu. 15:19, 20.

Na faailoa manino mai i le tali a Itai lona faamaoni atoatoa. Na ia tali atu: “O loo soifua Ieova, ua soifua foʻi loʻu alii le tupu, o le mea e i ai loʻu alii le tupu, po o le oti po o le ola, e i ai lava lau auauna.” (2 Samu. 15:21) Atonu na faamanatu atu e nei upu iā Tavita ia upu na faia e lona tuaa o Ruta. (Ruta 1:16, 17) Na pāʻia le loto o Tavita i le faamatalaga a Itai, ma na ia faapea atu: ‘Ō atu ia’ ma sopoʻia le Alia o Ketarono. “Ona alu ane lea o Itai le sā Katā, ma ona tagata uma, ma tama iti uma sa iā te ia.”—2 Samu. 15:22.

“E Faatonu ai i Tatou”

Ua taʻua i le Roma 15:4, “O mea uma na tusia i aso ua mavae, na tusia e faatonu ai i tatou.” Seʻi o tatou fesili ifo iā i tatou lava, O ā ni lesona e tatou te aʻoaʻoina mai le faaaʻoaʻoga a Itai? Mātau foʻi le māfuaaga na uunaʻia ai o ia ina ia faamaoni iā Tavita. E ui lava o ia o se tagata ese ma sē e aumau i Filisitia, sa iloa lelei e Itai o loo soifua Ieova le Atua ma na ia iloa foʻi o Tavita o lē ua faauuina e Ieova. Sa vaai Itai i talaatu o le feʻainaʻiga i le va o Isaraelu ma tagata Filisitia. Na ia vaai iā Tavita e lē na o sē na fasiotia Koliata, le siamupini a Filisitia, ma le tele o isi tagata o le nuu a Itai. (1 Samu. 18:6, 7) Na iloa e Itai o Tavita o se tagata e alofa iā Ieova, ma e mautinoa na ia mātauina uiga lelei o Tavita. O lea la na faatuatuaina ai loa e Tavita ia Itai. Auā sa oo lava ina tuu atu e Tavita le isi tasi vae tolu o lana ʻautau “i le pule a Itai le sā Katā,” a o latou fetauaʻi ma ʻautau a Apisaloma!—2 Samu. 18:2.

E tatau foʻi iā i tatou ona aua neʻi gata la tatou vaai i tulaga faaleaganuu, eseesega o lanu ma ituaiga tagata—ni tulaga faailoga lanu ma le feitagaʻi—ae ia mātau uiga lelei o  isi. O le faiā i le va o Tavita ma Itai, ua taʻu mai ai o le a fesoasoani lo tatou iloa, ma le alofa iā Ieova, e tatou te manumalo mai ai i na toʻatugā.

A o tatou faataʻitaʻi i le faaaʻoaʻoga a Itai, seʻi o tatou fesili ifo iā i tatou lava, ‘Po o oʻu faaalia lenā lava faamaoni i le Tavita Sili o Keriso Iesu? Po oʻu faaali atu loʻu faamaoni e ala i le maelega i le galuega talaʻi o le Malo ma le faia o isi ma soo?’ (Mata. 24:14; 28:19, 20) ‘O le ā le tele ou te tumau ai ina ia faamaonia ai loʻu faamaoni?’

E aʻoaʻoina mai foʻi e ulu o aiga se lesona mai le faaaʻoaʻoga o le faamaoni o Itai. O lona faamaoni iā Tavita ma lana faaiʻuga e ō faatasi ma le tupu ua faauuina e le Atua, na aafia ai tagata na iā Itai. E faapena foʻi ona aafia sui o le aiga i faaiʻuga o loo faia e le ulu o le aiga ina ia lagolago ai le tapuaʻiga moni, ma e ono aumaia ai ni faigatā mo sina taimi. Peitaʻi, ua tatou mautinoa lelei: “E te amio alofa oe [Ieova] i lē ua alofa.”—Sala. 18:25.

Ina ua uma le fetauaʻiga i le va o Tavita ma Apisaloma, e leʻi toe taʻua i Tusitusiga Paia ni mea e faatatau iā Itai. O le tala puupuu e uiga iā Itai o loo i le Afioga a le Atua, e mautinoa ua tatou malamalama ai i le ituaiga tagata e iai o ia a o feagai Tavita ma taimi sili ona faigatā o lona olaga. O le iai o le tala iā Itai i le Tusi Paia, ua faamaonia ai e silasila ma faamanuiaina e Ieova lenā faamaoni.—Epe. 6:10.