O Agelu—‘O Agaga mo le Auaunaga’

“Pe e lē o agaga uma ea i latou mo le auaunaga, ua aauina atu e auauna mo i latou o ē o le a maua le faaolataga?”—EPE. 1:14.

1. O le ā le faamāfanafanaga e mafai ona tatou maua mai i le Mataio 18:10 ma le Eperu 1:14?

NA LAPATAʻIA e Iesu so o se tasi e ono tautevateva ai ona soo e faapea: “Vaai lelei ia aua neʻi outou ʻinoʻino i se tasi o ē itiiti, auā ou te fai atu iā te outou o loo vaavaai atu pea o latou agelu i le lagi, i fofoga o loʻu Tamā o i le lagi.” (Mata. 18:10) I le faasino atu i agelu amiotonu, na tusi le aposetolo o Paulo e faapea: “Pe e lē o agaga uma ea i latou mo le auaunaga, ua aauina atu e auauna mo i latou o ē o le a maua le faaolataga?” (Epe. 1:14) O na upu o se faamautinoaga faamāfanafanaloto lea e faapea, o loo faaaogā e le Atua agelu ina ia fesoasoani i tagata. O le ā ua taʻu mai e le Tusi Paia iā i tatou e faatatau i agelu? E faapefea ona latou fesoasoani mai iā i tatou? O le ā e mafai ona tatou aʻoaʻoina mai iā i latou?

2, 3. O ā nisi o tiute a foafoaga agaga faalelagi?

² E faitau miliona agelu faamaoni o loo i le lagi. O i latou uma e “malolosi tele, o ē faia lona finagalo.” (Sala. 103:20; faitau le Faaaliga 5:11.) O nei atalii agaga o le Atua e iai o latou uiga, o uiga faale-Atua, ma e iai foʻi le filifiliga saʻoloto. Ua faamaopoopoina lelei i latou ma iai ni tulaga tāua i faatulagaga a le Atua, ma o le agelu sili o Mikaele (le igoa faalelagi o Iesu). (Tani. 10:13; Iuta 9) O lenei “ulumatua o foafoaga uma,” o “le Upu,” po o le Fofoga Fetalai a le Atua, na faaaogā e Ieova i le foafoaina o isi mea uma.—Kolo. 1:15-17; Ioa. 1:1-3.

³ I lalo o le taʻitaʻiga a le agelu sili, ua iai serafi, o ē o loo faalauiloaina atu le paia o Ieova ma fesoasoani ina ia faatumau le mamā faaleagaga o ona tagata. O loo iai foʻi kerupi, lea o loo auauna o ni ē e lagolagoina le pule silisili ese a le Atua. (Kene. 3:24; Isa. 6:1-3, 6, 7) Ae o isi agelu, po o avefeʻau, o loo iai o latou tofiga eseese i le faataunuuina o le finagalo o le Atua.—Epe. 12:22, 23.

4. (a) Na faapefea ona tali atu agelu ina ua faavaeina le lalolagi? (e) O le ā e tupu pe ana faaaogā tatau le filifiliga saʻoloto?

⁴ Sa olioli agelu uma i le taimi na ‘faavaeina ai le lalolagi,’ ma auai ma le fiafia i a latou galuega na tofia i ai, a o sauniunia le lalolagi e avea ma aiga o tagata. (Iopu 38:4, 7) Na foafoaina e Ieova le tagata ‘e faamaulalo teisi i agelu,’ ae na  faia i Lona “faatusa,” ma o lea ua mafai ai e tagata ona faaatagia mai uiga mataʻina o Lē na faia mea. (Epe. 2:7; Kene. 1:26) Pe ana faaaogā tatau e Atamu ma Eva le meaalofa o le filifiliga saʻoloto, semanū e la te olioli ma ē e tupuga mai iā i laʻua i se olaga faaleaiga i le parataiso, o se vaega o le ʻauaiga o Ieova o ana foafoaga atamamai.

5, 6. O le ā le fouvalega na tupu i le lagi, ma na faapefea ona tali atu i ai le Atua?

⁵ E mautinoa sa tatau ona faateʻia agelu paia ina ua latou molimauina le amataga o le fouvalega i le ʻauaiga o le Atua. E iai se tasi o agelu na lē toe fia vivii atu iā Ieova, ae ua faanaunau e tapuaʻi atu tagata iā te ia. Sa ia faia o ia lava ma Satani (o lona uiga o “Lē e tetee”) e ala i le luʻia o le tonu o le pule a Ieova, ma taumafai ma le fiasili e faavae se pulega e faatautee i le pule silisili ese. Ina ua pepelo Satani, sa faatogafiti ona ia faaosoosoina le uluaʻi ulugalii ina ia faatasi ma ia e fouvale faasaga i Lē alofa na faia i latou.—Kene. 3:4, 5; Ioa. 8:44.

⁶ Sa vave ona faia e le Atua lana faamasinoga faasaga iā Satani e ala i le faapea atu i le uluaʻi valoaga o loo i le Tusi Paia: “Ou te faatupuina le feitagaʻi iā te oulua ma le fafine, o lau fanau foʻi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kene. 3:15) O le a faaauau ona iai le feitagaʻi i le va o Satani ma le “fafine” a le Atua. Ioe, sa silasila Ieova i le faalapotopotoga faalelagi o foafoaga agaga faamaoni, o se avā pele iā te ia. O lenei valoaga ua saunia mai ai se faavae mautinoa mo le faamoemoe, e ui lava e iai faamatalaga o loo avea pea ma “mea lilo paia” lea o loo faasolosolo ona faaalia mai. Na fuafuaina e le Atua e faapea, o le a iai se tasi mai le vaega faalelagi o lana faalapotopotoga o le a tuʻimomomoina ē uma e tetee, ma e ala iā te ia o le a faatasia ai “mea i le lagi ma mea i le lalolagi.”—Efe. 1:8-10.

7. O le ā na faia e nisi agelu i aso o Noa, ma o le ā na faia e Ieova iā i latou?

⁷ I aso o Noa, na tuua ai e le toʻatele o agelu “le mea na [latou] nonofo ai” ma liutino tagata ina ia faataunuu o latou faanaunauga manatu faapito i le lalolagi. (Iuta 6; Kene. 6:1-4) Ua lafoina e Ieova na agelu fouvale i le pogisa, ma o lea ua latou aufaatasi ai ma Satani i le avea ma “agaga leaga” ma fili sauā o auauna a le Atua.—Efe. 6:11-13; 2 Pete. 2:4.

E Faapefea Ona Fesoasoani Agelu iā i Tatou?

8, 9. Na faapefea ona faaaogā e Ieova agelu e fesoasoani i tagata?

⁸ Ua aofia ai Aperaamo, Iakopo, Mose, Iosua, Isaia, Tanielu, Iesu, Peteru, Ioane, ma Paulo iā i latou o ē na auauna i ai agelu. Sa faaoo mai e agelu amiotonu ia faamasinoga a le Atua ma tuuina mai valoaga ma faatonuga, e aofia ai ma le Tulafono a Mose. (2 Tu. 19:35; Tani. 10:5, 11, 14; Galu. 7:53; Faaa. 1:1) Talu ai ua iai iā i tatou i le taimi nei le Afioga atoa a le Atua, e ono lē manaʻomia ai la ni agelu e faaoo maia feʻau a le Atua. (2 Timo. 3:16, 17) Peitaʻi, e ese mai i lenā, o loo matuā pisi agelu i le faia o le finagalo o le Atua ma le lagolagoina o ana auauna.

⁹ Ua faamautinoa mai e le Tusi Paia iā i tatou e faapea: “E tō lauapi le agelu a Ieova e siʻosiʻomia ai ē o matataʻu iā te ia, e laveaʻi foʻi o ia iā te i latou.” (Sala. 34:7; 91:11) Ona na fesiligia e Satani po o le a tumau le faamaoni o tagata i le Atua pe a feagai ma puapuaga, o lea na faataga ai e Ieova o ia e aumaia ituaiga uma o tofotofoga iā i tatou. (Luka 21:16-19) Peitaʻi, e silafia e le Atua le umi o loo tatou mafai ai ona onosaia se tofotofoga, ma o le itu tāua, o lo tatou faamaoni iā te ia. (Faitau le 1 Korinito 10:13.) O loo mataala agelu ina ia gaoioi e ōgatusa ma le finagalo o le Atua. Sa latou laveaʻiina Sataraka, Mesako, Apeteniko, Tanielu, ma Peteru, ae latou te leʻi taofia le fili mai le fasiotia o Setefano ma Iakopo. (Tani. 3:17, 18, 28; 6:22; Galu. 7:59, 60; 12:1-3, 7, 11) Sa eseese tulaga ma mea na tutupu. I se tulaga talitutusa, o nisi o o tatou uso sa fasiotia i nofoaga mo faasalaga mamafa a le ʻau Nasi, ae sa fesoasoani Ieova i le toʻatele o i latou ina ia faasaoina.

10. E faaopoopo atu i le fesoasoani faa-agelu, o le ā se fesoasoani tatou te ono maua?

¹⁰ E lē o aʻoaʻoina i le Tusi Paia e faapea o tagata  taʻitoʻatasi i le lalolagi e iai se agelu e leoleoina o ia. E tatou te tatalo ma le mautinoa e faapea, “po o ā lava mea tatou te talosaga atu ai e tusa ma lona finagalo, e faafofoga mai lava [le Atua] iā i tatou.” (1 Ioa. 5:14) Ioe, e mafai e Ieova ona auina mai se agelu e fesoasoani iā i tatou, ae e ono ese se auala e aumai ai le fesoasoani. E ono uunaʻia uso Kerisiano e saunia mai se fesoasoani ma faamāfanafanaga. E ono aumai e le Atua iā i tatou le atamai ma le malosi e manaʻomia, ina ia fesagaʻia ai se “mea matuitui i le tino” lea tatou te aafia ai, e pei ua tā i tatou e se ‘agelu a Satani.’—2 Kori. 12:7-10; 1 Tesa. 5:14.

Faaaʻoaʻo iā Iesu

11. Sa faapefea ona fesoasoani agelu iā Iesu, ma o le ā na ia faataunuuina ona o lona tumau i le faamaoni i le Atua?

¹¹ Seʻi manatu i le auala na faaaogā ai e Ieova agelu i le tulaga o Iesu. Sa latou folafola mai lona fanau mai ma lona toetū, ma fesoasoani iā te ia a o iai i le lalolagi. Sa ono mafai e agelu ona taofia le puʻea faapagota o Iesu ma lona maliu tigā. Peitaʻi, nai lo le faia o lea tulaga, sa auina mai se agelu e faamalosi iā te ia. (Mata. 28:5,6; Luka 2:8-11; 22:43) Ina ia ōgatusa ai ma le fuafuaga a Ieova, sa maliu Iesu i se maliu faataulagaina ma faamaonia ai e mafai e se tagata lelei atoatoa, ona tumau i le faamaoni i le Atua e ui lava i tofotofoga mataʻutia. O lea la, na toe faatūina e Ieova Iesu i le soifuaga i le lagi e lē oo i ai le oti, ma tuuina atu iā te ia le “pule uma” ma ua faia agelu ina ia gauaʻi atu iā te ia. (Mata. 28:18; Galu. 2:32; 1 Pete. 3:22) O lea na faamaonia ai, o Iesu o le vaega autū o le “fanau” a le “fafine” a le Atua.—Kene. 3:15; Kala. 3:16.

12. I le ā le auala e tatou te faaaʻoaʻo ai i le faaaʻoaʻoga paleni a Iesu?

¹² Sa silafia e Iesu e sesē ona ia tofotofoina Ieova, e ala i le faatalitalia o agelu e laveaʻiina o ia pe afai e na te faia se gaoioiga lē atamai. (Faitau le Mataio 4:5-7.) O lea la, seʻi o tatou faaaʻoaʻo i le faaaʻoaʻoga a Iesu e ala i le ola ma le “mafaufau lelei,” e ala i le lē tuua o oe i lamatiaga e lē manaʻomia, ae ia fesagaʻia sauāga ma le mafaufau lelei.—Tito 2:12.

Mea Tatou te Aʻoaʻoina Mai i Agelu Faamaoni

13. O le ā e tatou te aʻoaʻoina mai i le faaaʻoaʻoga a agelu amiotonu lea e taʻua i le 2 Peteru 2:9-11?

¹³ I le aʻoaʻia o i latou o ē “fai upuleaga” i auauna faauuina a Ieova, ua faasino atu ai le aposetolo o Peteru i le faaaʻoaʻoga lelei a agelu amiotonu. E ui lava e iai lo latou mana e matuā malosi, ae ua latou lotomaulalo e ʻalofia le faia o ni tuuaʻiga ma faamasinosino, “ona o le faaaloalo iā Ieova.” (Faitau le 2 Peteru 2:9-11.) Seʻi o tatou taumamao foʻi mai le faamasinosino lē talafeagai, ae ia faaaloalo iā i latou ua faatuatuaina e vaavaaia le faapotopotoga, ma ia tuu atu le mataupu i aao o Ieova, le Faamasino Sili.—Roma 12:18, 19; Epe. 13:17.

14. O ā mea e tatou te aʻoaʻoina mai i le auaunaga ma le lotomaulalo o loo faia e agelu?

¹⁴ Ua saunia e agelu a Ieova se faaaʻoaʻoga lelei mo i tatou, o le auauna lea ma le lotomaulalo. E leʻi taʻuina atu e nisi o agelu o latou igoa  i tagata. (Kene. 32:29; Faama. 13:17, 18) E ui lava e faitau miliona foafoaga agaga i le lagi, ae e pau igoa o loo o faaalia mai i le Tusi Paia o Mikaele ma Kaperielu. O lenei tulaga ua avea o se puipuiga mo i tatou, e faatatau i le avatu o le faaaloalo lē tatau i agelu. (Luka 1:26; Faaa. 12:7) Ina ua faapaʻū le aposetolo o Ioane e tapuaʻi atu i se agelu, sa lapataʻia o ia e faapea: “Ia e faaeteete! Aua e te faia lenā mea! Ua na o aʻu o se uso a pologa iā te oe, ma o se tasi o ou uso.” (Faaa. 22:8, 9) O la tatou tapuaʻiga, e aofia ai ma a tatou tatalo, ua na o le Atua e tatau ona avatu i ai.—Faitau le Mataio 4:8-10.

15. Ua faapefea ona faataatia e agelu se faaaʻoaʻoga mo i tatou o le onosai?

¹⁵ Ua faataatia foʻi e agelu se faaaʻoaʻoga o le onosai. E ui i lo latou matuā naunau e fia iloa mea lilo paʻia a le Atua, ae ua lē taʻuina atu iā i latou mea uma. Ua taʻua i le Tusi Paia e faapea, “E naunau tele agelu e vaavaai i nei mea.” (1 Pete. 1:12) O le ā la ua latou faia? O loo latou faatalitali ma le onosai seʻia oo i le taimi atofaina a le Atua e ‘iloa ai le matalasi o lona poto,’ “e ala i le faapotopotoga.”—Efe. 3:10, 11.

16. E faapefea i a tatou amioga ona aafia ai agelu?

¹⁶ O Kerisiano o loo fesagaʻi ma tofotofoga ua avea ‘ma mataaga i agelu.’ (1 Kori. 4:9) O loo matuā fiafia agelu e mātau mai a tatou galuega faamaoni, ma e olioli foʻi pe a salamō se tagata agasala. (Luka 15:10) O loo mātauina foʻi e agelu amioga faale-Atua a fafine Kerisiano. Ua faaalia i le Tusi Paia e faapea “e tatau . . . i le fafine ona ufiufi lona ulu e fai ma faailoga o lona gauaʻi i lana tane, ona o agelu.” (1 Kori. 11:3, 10) Ioe, e fiafia agelu e vāai mai i fafine Kerisiano ma isi auauna uma a le Atua i le lalolagi, o usitaia faatulagaga a le Atua faapea ma le tulaga ulu. O lenā usiusitai o se faamanatuga talafeagai lea mo nei atalii faalelagi o le Atua.

O Loo Lagolagoina e Agelu le Galuega Talaʻi

17, 18. Aiseā e mafai ai ona tatou faapea atu o loo lagolagoina e agelu la tatou talaʻiga?

¹⁷ Ua aofia ai agelu i nisi o mea mataʻina ua tutupu i “le aso o le Alii.” E aofia ai i nei mea le fanau mai o le Malo i le 1914 ma le lafoina ese mai o Satani ma ana temoni mai le lagi, e “Mikaele ma ana agelu.” (Faaa. 1:10; 11:15; 12:5-9) Sa iloa e le aposetolo o Ioane se “agelu o loo lele i le lagi, ua iā te ia le tala lelei e faavavau  e folafola atu, o se tala fiafia i ē o loo nonofo i le lalolagi.” Na folafola atu e le agelu e faapea: “Ia matataʻu i le Atua ma ia faamamaluina o ia, auā ua oo mai le itula o lana faamasinoga, ma ia tapuaʻi i Lē na faia le lagi, ma le lalolagi, ma le sami, ma vaipuna.” (Faaa. 14:6, 7) Ua mautinoa foʻi la e auauna a Ieova, le fesoasoani faa-agelu a o latou talaʻi atu le tala lelei o le Malo ua faavaeina, e ui i teteega ogaoga a le Tiapolo.—Faaa. 12:13, 17.

¹⁸ I aso nei, e lē o taʻitaʻia i tatou e agelu i tagata loto faamaoni e ala i le talanoa mai iā i tatou, e pei ona talanoa atu se agelu iā Filipo ma taʻitaʻi o ia i le eunuka Aitiope. (Galu. 8:26-29) Peitaʻi, e tele mea ua tutupu i aso nei e faamaonia ai e ui e tatou te lē o vāai i agelu, ae o loo latou lagolagoina la tatou galuega talaʻi o le Malo ma faasino i tatou i ē “ua saunia o latou loto mo le ola e faavavau.” * (Galu. 13:48) Maʻeu le tāua o le auai e lē aunoa i le faiva ina ia mafai ai ona fai la tatou vaega, i le saʻilia o i latou o loo faanaunau e “tapuaʻi i le Tamā i le agaga ma le upu moni”!—Ioa. 4:23, 24.

19, 20. O le ā le vaega o loo fai e agelu i mea o loo tutupu, e faailogaina ai “le iʻuga o le faiga o mea a le lalolagi”?

¹⁹ I le faasino mai i o tatou aso, na fetalai ai Iesu e faapea “i le iʻuga o faiga o mea a le lalolagi,” o le a “tuueseese [e agelu] tagata amioleaga mai i tagata amiotonu.” (Mata. 13:37-43, 49) O loo faia se matafaioi a agelu i le aoaoina faaiʻu ma le faamaufaailogaina o le ʻaufaauuina. (Faitau le Mataio 24:31; Faaa. 7:1-3) E lē gata i lea, e faatasi Iesu ma agelu pe a ia “tuueseeseina . . . mamoe ma ʻoti.”—Mata. 25:31-33, 46.

²⁰ “I le faaaliga o le Alii o Iesu mai le lagi faatasi ma ana agelu malolosi,” o le a faaumatia ai i latou uma o “ē e lē iloa le Atua, ma ē e lē usiusitai i le tala lelei a lo tatou Alii o Iesu.” (2 Tesa. 1:6-10) Ina ua vaaia e Ioane le mea lava foʻi lenā i se faaaliga, sa ia faamatalaina Iesu ma ʻau faalelagi o agelu e faapea, o loo tiʻetiʻe atu i solofanua papaʻe ina ia tau i le amiotonu.—Faaa. 19:11-14.

21. O le ā le gaoioiga o le a faia e le agelu ‘ua i ai le ki o le tō, ma ua i lona lima foʻi se filifili uʻamea tele,’ iā Satani ma ana temoni?

²¹ Sa ‘iloa foʻi e Ioane se agelu ua sau mai le lagi ma le ki o le tō, ua i lona lima foʻi se filifili uʻamea tele.’ O ia lenei o le agelu sili o Mikaele, o lē o le a saisaia le Tiapolo ma temoni, ma lafo i le tō. O le a toe tatalaina mai i latou mo se taimi puupuu i le iʻuga o le Pulega a Keriso i le Afe Tausaga, pe a feagai tagata lelei atoatoa ma le tofotofoga faaiʻu. Mulimuli ane, o le a faaumatia Satani ma i latou uma o ē tetee. (Faaa. 20:1-3, 7-10; 1 Ioa. 3:8) O i latou uma o ē fouvale pe tetee i le Atua o le a tafiesea.

22. Ua faapefea ona aafia agelu i mea ua lata ona tutupu, ma o ā o tatou lagona e tatau ona iai e faatatau i la latou matafaioi?

²² Ua lata le taimi e laveaʻiina ai mai le faiga amioleaga o mea a Satani. O le a iai se matafaioi patino a agelu i nei mea mataʻina o le a tutupu, lea o le a faamaonia ai le tonu o le pule silisili ese a Ieova, ma aumaia ai le faataunuuga atoatoa o lana fuafuaga mo le lalolagi ma tagata. Ioe, o agelu amiotonu o “agaga . . . mo le auaunaga, ua aauina atu e auauna mo i latou o ē o le a maua le faaolataga.” O lea la, seʻi o tatou faaalia le lotofaafetai iā Ieova le Atua mo le auala ua ia faaaogā ai agelu, e fesoasoani mai iā i tatou e fai lona finagalo ma maua ai le ola e faavavau.

[Faaopoopoga i lalo]

O le ā Lau Tali?

• Ua faapefea ona faamaopoopo foafoaga agaga faalelagi?

• O le ā na faia e nisi agelu i aso o Noa?

• Ua faapefea ona faaaogā e le Atua agelu ina ia fesoasoani mai iā i tatou?

• O le ā le matafaioi o loo fai e agelu amiotonu i o tatou taimi?

[Fesili mo le Suʻesuʻega]

[Ata le itulau 21]

E olioli agelu i le faataunuuina o le finagalo o le Atua

[Ata le itulau 23]

E pei lava ona iai i le tulaga o Tanielu, e mataala agelu e gaoioi ina ia ōgatusa ma le finagalo o le Atua

[Ata le itulau 24]

Ia lototetele, auā o loo fesoasoani agelu i le galuega talaʻi o le Malo!

[Ē Ana le Ata]

Le Lalolagi: Le ata mai le NASA