Ua Fesili Mai le ʻAufaitau

O anafea na lafo mai ai Satani mai le lagi?—Faaa. 12:1-9.

E ui e lē o taʻua i le tusi o Faaaliga le taimi patino na lafo ese ai Satani, ae o loo taʻua ni mea na tutupu e fesoasoani ai iā i tatou e fua ai le taimi na lafo ese ai o ia mai le lagi. E muamua lava i mea na tutupu, o le faavaeina lea o le Malo o le Mesia. Ae mulimuli ane, “ona tau ai lea o le taua i le lagi,” lea na faatoʻilaloina ai Satani ma lafo ese ai mai le lagi.

E manino faamatalaga mai le Tusi Paia, o le 1914 lea na faaiʻuina ai le “taimi atofaina o nuu ese,” ae faavaeina le Malo. * (Luka 21:24) O le ā le umi talu ona tupu lenā tulaga ae gapā loa le taua i le lagi, ma lafoina mai ai Satani i le lalolagi?

Ua faapea mai le Faaaliga 12:4, “A ua tū pea le tarako i luma o le fafine o le a fanau, ina ia ʻaina e ia lana tama pe a fanau mai.” O loo faaalia mai i inei le manaʻo tele o Satani e talepe le Malo fou, pe a mafai, i le taimi lava e faavaeina ai. E ui sa taofia e Ieova le faataunuuina o le faanaunauga leaga o Satani, ae sa tinoū ma lē fiu Satani i ana taumafaiga ina ia talepe le Malo fou ua faavaeina. O lea la, o le a lē faatuai “Mikaele ma ana agelu” e gaoioi e aveesea “le tarako ma ana agelu” mai le lagi, ina ia aua neʻi aafia ai le Malo. E talafeagai la ona faapea atu, o le faatoʻilaloina ma le lafoina ese mai o Satani mai le lagi, na tupu a o leʻi umi ona faavaeina le Malo i le 1914.

O se isi vala e tatau ona manatuaina, o le toe faatutūina o Kerisiano faauuina, e pei ona faamaonia mai e le Tusi Paia, na amata tupu a o leʻi leva talu ona faavae le Malo. * (Faaa. 20:6) Ona e lē o taʻua na faatasi se uso faauuina o Keriso ma Iesu i le taua ma le tarako ma ana agelu, ina ua māeʻa la le taua i le lagi ma le lafoina ese mai o Satani ma ana temoni, ona faatoʻā faagasolo loa lea o le faatutūina o uso o Keriso.

O lea la, e lē o taʻua patino mai e le Tusi Paia le taimi na lafo ese mai ai Satani ma ana temoni mai le lagi. E ui i lea, e tele faamaoniga e iloa ai, na sosoo nei mea uma i le māeʻa ona nofotupu o Iesu Keriso i le lagi i le 1914.

[Faaopoopoga i lalo]