Faasafua Atu o Tiute—Aiseā ma e Faapefea?

O LE faiga lenei o le faasafua atu o tiute, o se faiga ua leva ona iai a o leʻi faia lo tatou Lalolagi paneta. Na faia e Ieova lona Alo pele e toʻatasi, ona ia faaaogā lea o lona Alo e fai ma “tufuga” e faia le vateatea. (Faata. 8:22, 23, 30; Ioa. 1:3) Ina ua faia e le Atua le uluaʻi ulugalii, na ia fetalai atu iā i laʻua ia ‘faatumu le lalolagi ma faatoʻilalo i ai.’ (Kene. 1:28) Sa tuu atu e Lē na foafoaina mea i tagata le galuega ia faalautele atu le Parataiso o Etena ina ia soo ai le lalolagi atoa. Ioe, mai lava i le amataga, ua avea le faasafua atu o tiute i isi, o se vala o le faalapotopotoga a Ieova.

O le ā e aofia ai i le faasafua atu? Aiseā e tatau ai i toeaina Kerisiano ona faasafua atu tiute o le faapotopotoga i isi, ma e faapefea ona latou faia lenā tulaga?

O le ā le Uiga o le Upu Faasafua Atu?

“O le faasafua atu,” o lona uiga “ia tuuina atu i le isi; ia tofia se tasi e suitulaga iā te oe; ia tofia atu tiute tauave po o le pule.” (Merriam-Webster’s Collegiate Dictionary, Lomiga lona 11) O le faasafua atu la, e manaʻomia ai ona e faaaofia ai isi ina ia faataunuu ni sini. O lenā tulaga e masani lava ona iʻu ai i le tuuina atu o le pule.

Ua faatalitalia i latou ua tuu atu i ai se tiute i le faapotopotoga Kerisiano ia faataunuu, ia lipoti po o le ā le agaʻigaʻi i luma ua iai le galuega, ma i le tulaga masani, ia felogoaʻi ma lē na faasafuaina atu le tiute. O lea, o le tiute autū e paʻū i le uso ua tofia e faasafuaina atu le galuega. E manaʻomia ona ia faamautinoa o loo solosolo lelei le galuega, ma ia avatu fautuaga pe a manaʻomia. Peitaʻi, e ono fesili nisi e faapea, ‘Aiseā e faasafua atu ai i isi pe afai e te mafaia lava e oe ona fai le galuega?’

Aiseā e Faasafua Atu Ai?

Manatu i le foafoaina e Ieova o lona Alo pele e toʻatasi, ma tuu atu iā te ia e auai i le galuega  atoa o le foafoaga. Ioe, “na faia isi mea i le lagi ma le lalolagi e ala iā te ia, o mea e vaaia ma mea e lē vaaia.” (Kolo. 1:16) Sa mafai e Lē na foafoaina mea ona faia mea uma tau o ia, peitaʻi sa ia finagalo ia olioli foʻi lona Alo i le faataunuuina o galuega aogā. (Faata. 8:31) Sa fesoasoani lenei tulaga i le Alo e aʻoaʻoina atili ai e faatatau i uiga o le Atua. O lona uiga, sa faaaogā e le Tamā lenei avanoa ina ia toleni ai lona Alo pele e toʻatasi.

A o iai Iesu Keriso i le lalolagi, sa ia faaaʻoaʻo i lona tamā e ala i le faasafua atu o tiute i isi. Sa faasolosolo ona ia toleniina ona soo. Sa ia auina atu aposetolo e toʻasefululua, ma mulimuli ane o isi soo e toʻa fitusefulu ina ia taʻimua i le galuega talaʻi. (Luka 9:1-6; 10:1-7) Ina ua mulimuli ane taunuu atu Iesu i na nofoaga, ua iai se faavae lelei mo ia ina ia atiaʻe ai tagata. Ina o le a ia tuua le lalolagi, sa faasafua atu e Iesu avega tauave mamafa i ona soo ua uma ona toleniina, e aofia ai ma le galuega talaʻi i le lalolagi aoao.—Mata. 24:45-47; Galu. 1:8.

Sa avea le faasafua atu o tiute ma le aʻoaʻoina, o ni vala o le faapotopotoga Kerisiano. Na faapea atu le aposetolo o Paulo iā Timoteo: “Ia e avatu na mea i tane faamaoni, ona agavaa ai lea o i latou e aʻoaʻo atu i isi.” (2 Timo. 2:2) Ioe, e tatau i ē ua iai le agavaa ona toleniina isi, ma faapea foʻi ona aʻoaʻoina e i latou nei ia isi foʻi tagata.

E ala i le faasafua atu o nisi o galuega ua tofia atu iā te ia, e mafai ai e se toeaina ona olioli faatasi ma isi i le olioli lea e maua mai i le aʻoaʻo atu ma le leoleoina o tagata. O le iloaina faapea e tapulaa tomai o tagata, ua sili atu ai la ona alagatatau i toeaina ona talosaga atu i isi, ina ia fesoasoani i le taulimaina o tiute tauave i le faapotopotoga. Ua faapea mai le Tusi Paia: ‘E i ai le poto i ē faamaulalo.’ (Faata. 11:2) O le faamaulalo e aofia ai le iloaina o mea e gata mai ai le mafai o se tasi. Pe afai e te taumafai e fai mea uma lava na o oe, atonu o le a e vaivai ma lē maua ai le taimi, lea sa tatau ona e faaalu e faatasitasi ai ma lou aiga. O lona uiga la, o se faiga atamai le faasafua atu o tiute tauave i isi. O se faataʻitaʻiga, o le uso lea o loo galue o se sooupu a le ʻautoeaina. Atonu e talosaga atu o ia i isi toeaina e latou te suʻeina teugātupe a le faapotopotoga. E ala i le iloiloina o faamaumauga, atonu o le a mafai ai e na toeaina ona faamasani i le tulaga tau tupe a le faapotopotoga.

E lē gata o le faasafua atu o tiute i isi ua maua ai tomai tāua ma le poto masani, ae o le a mafai ai foʻi ona mātauina e lē o loo faasafuaina atu le tiute ia tomai o i latou ua tuuina atu i ai le galuega. O lea la, e ala i le faasafua atu i isi o tiute talafeagai i le faapotopotoga, e mafai ai e toeaina ona iloa “po ua agavaa” i latou e ono avea ma auauna o le faiva.—1 Timo. 3:10.

Ma le manatu faaiʻu, e ala i le faasafua atu o tiute, ua faaalia ai e toeaina lo latou maufaatuatuaina o isi. Sa toleni e Paulo Timoteo e ala i le galulue faatasi ma ia i le auaunaga faamisionare. Sa atiina aʻe se faiā māfana i le va o nei tane e toʻalua. Sa taʻua e Paulo Timoteo “o le atalii moni i le faatuatua.” (1 Timo. 1:2) I se tulaga talitutusa, sa atiina aʻe se faiā māfana i le va o Ieova ma Iesu a o la galulue faatasi i le foafoaina o isi mea uma. E ala i le tuuina atu o galuega i isi, e mafai ai e toeaina ona atiaʻe se faiā māfana ma i latou.

 Le Pogai ua Faatalatū ai Nisi

E ui lava ua latou iloa aogā, ae ua faigatā i nisi toeaina ona faasafua atu tiute i isi, atonu e ala i le taofiofi mamau i tiute ona latou te manatu o le a faaitiitia ai le pule iā i latou. Atonu latou te mafaufau faapea, o i latou lava e tatau ona faatonutonuina mea. Peitaʻi, ia manatua, a o leʻi afio aʻe Iesu i le lagi, sa ia tofia atu i ona soo se tofiga tāua e latou te tauaveina, ona sa ia silafia e sili atu galuega o le a latou faataunuuina nai lo o ia!—Mata. 28:19, 20; Ioa. 14:12.

O isi toeaina atonu i le taimi ua mavae sa latou faasafua atu tiute i isi, peitaʻi e latou te leʻi mauaina ni iʻuga e faamalieina ai. Atonu latou te manatu faapea e sili atu ona lelei pe a latou faia le galuega ma e vave atu foʻi. Peitaʻi, seʻi manatu i le faaaʻoaʻoga a Paulo. Sa ia iloa le tāua o le faasafua atu o tiute i isi, ae na ia iloa foʻi e lē o taimi uma o le a faataunuu ai e i latou na aʻoaʻoina ia o latou tiute e tusa ai o le mea o loo ia faatalitalia. I lana uluaʻi malaga faamisionare, sa toleni ai e Paulo lana aumea talavou na la femalagaaʻi faatasi, o Mareko. Na matuā lē fiafia Paulo ina ua tuua e Mareko lona tofiga ae toe foʻi i lona aiga. (Galu. 13:13; 15:37, 38) Peitaʻi, e leʻi taofia ai i lenā tulaga Paulo mai le toleniina o isi. E pei ona taʻua muamua, sa ia valaaulia le talavou Kerisiano o Timoteo e fai ma ana aumea femalagaaʻi. Ina ua mafai e Timoteo ona taulima tiute tauave e sili atu ona tāua, sa tuu e Paulo o ia i Efeso, ma tuuina atu iā te ia le pule e tofia ai ovasia o le faapotopotoga ma auauna o le faiva.—1 Timo. 1:3; 3:1-10, 12, 13; 5:22.

I se tulaga talitutusa, e lē tatau i toeaina i aso nei ona fiu i le toleniina o uso ona e faapea e lē o lelei ona tali mai se tasi o i latou. O se mea atamai ma e tāua foʻi le faatuatuaina o isi ma toleni i latou. Peitaʻi, o ā itu e tatau ona manatua e toeaina pe a faasafua atu tiute i isi?

Le Auala e Faasafua Atu Ai

I le faasafuaina atu o tiute tauave, ia iloilo agavaa o uso ua e mafaufau i ai. Ina ua tulaʻi se manaʻoga i Ierusalema mo le vaavaaia o le tufatufaina atu o meaʻai i aso fai soo, sa filifilia e le ʻauaposetolo ni “tagata agavaa se toʻafitu e tutumu i le agaga ma le poto.” (Galu. 6:3) Pe afai e te fai atu i se tagata e lē maufaatuatuaina e fai se galuega, e ono lē taulau ona ia faia lenā galuega. O lea la, ia tuu muamua atu i ai ni galuega faigofie. Pe a faamaonia le faamaoni o lenā tagata, atonu o le a mafai ona ia taulimaina isi tiute tauave.

Peitaʻi, e iai nisi mea e aofia ai. E eseese uiga ma tomai o tagata. E eseese foʻi poto masani o le isi tagata mai le isi tagata. O se uso e faaleuō ma tauagafau ona uiga, atonu e fetaui lelei ona avea ma tautua, ae o se uso e faamaopoopo mea ma iai le poto masani i le faagaoioiga o mea, atonu e talafeagai ona avea ma fesoasoani malosi i le failautusi o le faapotopotoga. O se tuafafine e iai sona tomai i le faia o teu fugālaau atonu e tuu atu e na te faia teu mo le Faamanatuga.

Pe a tofia atu tiute tauave, ia taʻu saʻo ma faamanino atu le mea o loo faatalitalia. A o leʻi auina atu e Ioane le Papatiso ia avefeʻau iā Iesu, sa ia faamatala atu iā i latou le mea na ia manaʻo e iloa, atoa ai ma le auala e faaupu atu ai le feʻau. (Luka 7:18-20) I le isi itu, ina ua faatonuina e Iesu ona soo e aoao mai mea na totoe o le meaʻai lea na saunia faavavega, sa tuu atu i le latou faitalia po o le ā le auala e faatino ai. (Ioa. 6: 12, 13) E tele lava ina faalagolago i le tulaga o le galuega ma agavaa o lē o loo fesoasoani. E tatau ona malamalama lē o loo faasafuaina atu le tiute ma lē e faatinoina le galuega, i iʻuga o loo faatalitalia ma le tele e logoina ai lē o loo faasafuaina atu le galuega a o faagasolo. E tatau ona la tau fai malamalama uma po o le ā le tele o mea e mafai ona tuu atu, i le faautautaga poto a lē o loo faatinoina le galuega. Pe afai e tatau ona māeʻa le galuega i se aso patino, atonu la e sili atu ona iai se uunaʻiga i le tagata e faia le galuega, pe afai e talanoaina le aso ma malilie uma i ai nai lo le faamalosia.

E tatau i lē ua tofia atu i ai le galuega ona iai tupe, mea e faatino ai le galuega, ma se fesoasoani pe a manaʻomia. Atonu e lelei foʻi pe a faailoa atu i isi le faatulagaga. Ina ua tuuina atu e Iesu iā Peteru ia “ki o le malo o le lagi,” sa ia tuu atu a o iai isi soo. (Mata. 16:13-19) I se tulaga tutusa, atonu i nisi tulaga o se mea lelei foʻi ona faailoa atu i le faapotopotoga po o ai lē ua tofia e faatinoina se tiute.

E manaʻomia foʻi ona faaeteete. Pe afai e tumau pea ona e taumafai e pulea le galuega lea ua e faasafuaina atu i se tasi, ua tutusa lenā ma lou faapea atu i le tagata, “Ou te lē o faatuatuaina oe.” O le mea moni, e iai taimi e ono lē tulaʻi mai ai le galuega i le tulaga tonu e pei ona e faatalitalia. Peitaʻi, afai e tuu atu i le uso lea ua faasafua atu i ai le tiute sina saʻolotoga, atonu la o le a iā te ia le mautinoa ma maua le tomai. Ae e lē o le uiga o lenei mea faapea o le a lē popole ai i le auala o loo ia faatino ai le galuega. E ui lava sa ia tuuina atu i lona Alo se matafaioi i le faagaoioiga o le foafoaga, ae sa aofia ai pea Ieova i le galuega. Na ia fetalai atu i le Tufuga: “Inā [ta] faia ia o le tagata i lo [ta] faatusa.” (Kene. 1:26) O lea la, e ala i au upu ma gaoioiga, ia lagolagosua atu i le galuega o loo fai ma ia faamālō atu i le tagata mo ana taumafaiga. E mafai foʻi ona fesoasoani iā te ia pe a talanoa puupuu i iʻuga o le galuega. Pe afai e leʻi māeʻa lelei le galuega, aua neʻi faatalatū e avatu ni fautuaga atili ma le fesoasoani. Ia manatua, o le tiute tauave faaiʻu o loo paʻū iā te oe o lē na faasafuaina atu le tiute.—Luka 12:48.

E toʻatele i latou ua maua aogā ona o le faasafua atu iā i latou o tofiga o le faapotopotoga, e toeaina o ē e naunau moni iā i latou. O lea la, e manaʻomia e toeaina uma ona iloa pe aiseā ma pe faapefea foʻi ona faasafua atu, ina ia faaaʻoaʻo ai iā Ieova.

[Pusa i le itulau 29]

O LE FAASAFUA ATU

• o se auala lea e tuu atu ai le avanoa i isi ina ia olioli i le faataunuuina o galuega

• o se auala e faataunuu ai ni mea e sili atu

• o se faailoaga o le poto ma le faamaulalo

• o se auala e toleni ai isi

• o se auala e faaalia ai le maufaatuatuaina o isi

[Pusa i le itulau 30]

LE AUALA E FAASAFUA ATU AI

• Ia filifili tagata taʻitoʻatasi e talafeagai mo le galuega

• Ia manino ona faamatala atu/ia talanoa

• Faamanino atu le mea e tatau ona faataunuu

• Ia saunia fesoasoani talafeagai

• Ia manatu mamafa i le galuega, ma faailoa atu lou maufaatuatuaina

• Ia lotomalie e faatino le tiute tauave faaiʻu

[Ata i le itulau 31]

O le faasafua atu e aofia ai le tofiaina atu o se galuega ma naunau i lona faagasologa