Fesili Mai le ʻAufaitau

Sa talaʻi Iesu i le nuu o Isaraelu. E faapefea la ona faapea mai Peteru, ina ua fasiotia e tagata Iutaia ma o latou taʻitaʻi ia Iesu, sa latou “faia . . . ma le lē iloa”?—Galu. 3:17.

Ina ua talanoa atu i se vaega o tagata Iutaia e faatatau i le latou vaega na fai i le maliu o le Mesia, na faapea atu le aposetolo o Peteru: “Ua ou iloa na outou faia lenei mea ma le lē iloa e pei foʻi o o outou taʻitaʻi.” (Galu. 3:14-17) O isi tagata Iutaia atonu sa lē malamalama iā Iesu ma ana aʻoaʻoga. Ae o isi, o māfuaaga na latou gaoioi ai ma le lē iloa, e aofia ai le leai o se faanaunauga e faafiafia le Atua, faailoga tagata, matauʻa, ma le ʻinoʻino.

Seʻi o tatou iloilo pe faapefea i le leai o se faanaunauga e faafiafia Ieova, ona aafia ai manatu ma le vaaiga a le toʻatele o tagata e faatatau i aʻoaʻoga a Iesu. Sa masani ona faaaogā e Iesu talafaatusa i lana aʻoaʻo atu, lea sa ia faamatala atu iā i latou uma na naunau e fia aʻoaʻoina atili. Peitaʻi, o nisi o i latou na ō ese, e lē fia mananaʻo e malamalama. I se tasi o taimi, na oo lava i nisi o soo, sa lē logoleleia iā i latou se gagana faafaatusa na faaaogā e Iesu. (Ioa. 6:52-66) Sa leʻi iloa e na soo o talafaatusa a Iesu na tofotofoina ai lo latou nofosauni e suia o latou mafaufauga ma gaoioiga. (Isa. 6:9, 10; 44:18; Mata. 13:10-15) Sa latou lē amanaʻia le valoaga e faatatau i le faaaogā e le Mesia o talafaatusa e aʻoaʻo atu ai.—Sala. 78:2.

Ona o le faailoga tagata, na teena ai e isi ia aʻoaʻoga a Iesu. Ina ua ia aʻoaʻo atu i le sunako i totonu o lona nuu, i Nasareta, sa “taufaiofo” tagata. Ae nai lo le taliaina o Iesu o le Mesia, sa latou fesili e faatatau i lona talaaga: “O fea na maua mai ai e lenei tagata nei mea? . . . Pe lē o ia ea o le kamuta, o le tama a Maria ma o le uso o Iakopo, Iosefa, Iuta, ma Simona? Pe tatou te lē o faatasi ea foʻi ma ona tuafāfine?” (Mare. 6:1-3) I tagata Nasareta, o le faatauvaa o le tupuaga o Iesu na lē tāua ai iā i latou ana aʻoaʻoga.

Ae faapefea taʻitaʻi lotu? O le toʻatele o i latou sa lē taliaina Iesu ona o māfuaaga lava foʻi na. (Ioa. 7:47-52) Sa latou teena foʻi ana aʻoaʻoga ona na latou matauʻa iā Iesu, o lē sa uaʻi atu i ai tagata. (Mare. 15:10) Ma o le toʻatele o tagata lauiloa e mautinoa e leʻi tali lelei ane ina ua ia taʻusalaina i latou i lo latou faafiaamiotonu ma le taufaasesē. (Mata. 23:13-36) Sa taʻusalaina ma le saʻo e Iesu lo latou tetee ma le loto i ai, e ala i le faapea atu: “Oi talofa iā te outou o ē atamamai i le Tulafono, auā ua outou aveesea le ki o le malamalama, auā tou te lē ulu atu lava i ai [i le Malo], ua outou taofi foʻi iā i latou o le a ulu atu i ai!”—Luka 11:37-52.

Sa talaʻia e Iesu le tala lelei mo le umi e tolu ma le ʻafa tausaga. Sa ia aʻoaʻoina foʻi le toʻatele o isi ina ia auai i lenā galuega. (Luka 9:1, 2; 10:1, 16, 17) Sa matuā taulau le galuega a Iesu ma ona soo, ma o lea na māfua ai ona faitio le ʻau Faresaio e faapea: “Vaai foʻi! Ua mulimuli atu le lalolagi iā te ia.” (Ioa. 12:19) O lea la, e lē faapea o le toʻatele o tagata Iutaia na latou lē iloa moni se mea. Peitaʻi, sa tumau ona latou lē fia “iloa” o Iesu o le Mesia. Sa mafai ona faaloloto lo latou iloa ma le alofa mo le Mesia, peitaʻi e latou te leʻi faia faapea. O nisi sa auai i le fasiotia o Iesu. O lea na timaʻi atu ai le aposetolo o Peteru i le toʻatele o i latou e faapea: “O le mea lea, inā salamō ia ma liliu, ina ia soloiesea a outou agasala, ma ia oo mai ai le taimi e toe faafouina ai mai iā Ieova lava ia ma ia auina mai e ia le Keriso, ua tofia mo outou, o Iesu lea.” (Galu. 3:19, 20) O se mea e mataʻina ona o le faitau selau o tagata Iutaia na amata ona uaʻi atu, e aofia ai ma le ‘toʻatele o faitaulaga.’ E latou te leʻi toe gaoioi ma le lē iloa. Nai lo lea, na latou salamō ma maua le finagalo malie o Ieova.—Galu. 2:41; 4:4; 5:14; 6:7.