Talia ma le Fiafia Foaʻi ma le Lotoatoa

E MANATU mai Ieova lo tatou Tamā alofa i le lagi iā i tatou uma. Ua faamautinoa mai e le Afioga a le Atua lona manatu mamafa mai i ana auauna uma. (1 Pete. 5:7) O se tasi o auala e faaalia ai le manatu mai o Ieova, o lona fesoasoani mai lea iā i tatou i vala eseese ina ia auauna atu ai ma le faamaoni iā te ia. (Isa. 48:17) E finagalo Ieova ia tatou faaaogā lelei le fesoasoani ua ia saunia, aemaise lava i taimi e tatou te feagai ai ma faafitauli e mafatia ai. O loo faataʻitaʻi mai e le Tulafono a Mose lenā mea moni.

E tusa ai ma le Tulafono, na saunia ai ma le alofa e Ieova se fesoasoani mo “ē matitiva,” e pei o lē ua mātuaoti, o le fafine ua oti lana tane, ma le tagata ese. (Levi. 19:9, 10; Teu. 14:29) O loo silafia e Ieova o le a manaʻomia e nisi o ana auauna se fesoasoani mai i o latou uso tapuaʻi. (Iako. 1:27) O lea la, e lē tatau i ana auauna ona matamumuli e talia le fesoasoani mai i ē o loo uunaʻia e Ieova e fesoasoani atu. E ui i lea, e ao ona saʻo le vaai pe a tatou taliaina le fesoasoani mai i isi.

I le taimi e tasi, o loo faamamafa mai i le Afioga a le Atua e faapea, o loo iai foʻi le avanoa i tagata o le Atua e foaʻi atu ai. Manatu foʻi i le tala i le “fafine mativa ua oti lana tane,” lea na mātauina e Iesu i le malumalu i Ierusalema. (Luka 21:1-4) E foliga mai sa ia maua ni aogā mai i sauniuniga alofa a Ieova mo fafine ua oti a latou tane, e pei ona faatonuina i le Tulafono. Peitaʻi, e ui ina mativa o ia, ae o loo manatua lenā fafine ua oti lana tane e lē o sē na mauaina se fesoasoani, ae o sē na foaʻi atu. E lē taumatea sa ia maua le fiafia ona o lona uiga o le foaʻi atu, auā na fetalai Iesu e faapea, “e sili le fiafia e maua i le foaʻi atu i lo o le talia mai.” (Galu. 20:35) E tusa ai o lenā mea moni, e faapefea ona e “foaʻi atu pea” ma maua ai le fiafia?—Luka 6:38.

‘Se ā se Mea ou te Taui Atu iā Ieova?’

Na taumānatu le faisalamo e faapea: ‘Se ā se mea ou te taui atu iā Ieova ona o lona agalelei mai uma lava iā te aʻu?’ (Sala. 116:12) O ā aogā na ia maua? Sa lagolagoina o ia e Ieova i taimi o “puapuaga ma le faanoanoa.” E lē gata i lea, sa “laveaʻi mai [o ia e Ieova] nai le oti.” Ae o lea ua ia manaʻo e “taui” atu iā Ieova. O le ā e mafai ona fai e le faisalamo? Na ia faapea mai: “Ou te avatu iā Ieova mea na ou tautō ai.” (Sala. 116:3, 4, 8, 10-14) Sa ia filifili e tausia folafolaga uma na ia faia iā Ieova, ma faataunuu uma ona tiute i le auaunaga iā te ia.

E mafai foʻi ona e faia lenā mea. E faapefea? E ala i le mulimuli i se ala e ōgatusa ma tulafono ma taʻiala a le Atua i taimi uma. O lea la, ia faamautinoa o loo avea lau tapuaʻiga iā Ieova ma mea e sili ona tāua i lou olaga, ma ia taʻitaʻia oe e le agaga o le Atua i mea uma e te faia. (Fai. 12:13; Kala. 5:16-18) I le tulaga moni lava, e lē mafai ona e tauia atoatoa Ieova mo mea uma ua ia faia mo oe. Peitaʻi, e ‘fiafia le finagalo o Ieova’ pe a silasila mai o loo e foaʻi atu ma le lotoatoa i le auaunaga iā te ia. (Faata. 27:11) Maʻeu se faaeaga matagofie o le faafiafiaina o Ieova i lenei auala!

 Saosaolaumea i le Lelei o le Faapotopotoga

E mautinoa e te ioe e tele auala ua e mauaina ai aogā mai le faapotopotoga Kerisiano. E anoanoaʻi meaʻai faaleagaga ua saunia mai e Ieova e ala mai i le faapotopotoga. Ua e maua ai le upu moni lea ua tuusaʻoloto ai oe mai i aʻoaʻoga sesē a lotu ma le pogisa faaleagaga. (Ioa. 8:32) E ala mai i sauniga a le faapotopotoga, fonotaga, ma tauaofiaga ua faatulaga mai e le “pologa faamaoni ma le faautauta,” ua e maua ai le poto lea e taʻitaʻia ai i le ola e faavavau, ma ola ai i se lalolagi parataiso e aunoa ma ni tigā ma puapuaga. (Mata. 24:45-47) E lē mafaitaulia le anoanoaʻi o aogā ua e maua, ma o le a e maua, e ala mai i le faapotopotoga a le Atua. O le ā se mea e te taui atu ai le faapotopotoga?

Na tusi le aposetolo o Paulo e faapea: ‘Ua fesootaʻi lelei le tino atoa, ma ua faia ina ia felagolagomaʻi sooga uma, ina ia maua ai le mea e manaʻomia e tusa ma galuega talafeagai a itutino taʻitasi, ua faia ina ia tupu aʻe ai le tino, ma atinaʻe ai o ia lava i le alofa.’ (Efe. 4:15, 16) O loo faasinotonu lenei mau i le vaega o Kerisiano faauuina, ae e faatatau foʻi lea taʻiala i Kerisiano uma i aso nei. Ioe, e saosaolaumea tagata uma o le faapotopotoga i le lelei ma le olaola o le faapotopotoga. O ā auala e faia ai faapea?

E ala i le tatou taumafai i taimi uma e faalaeiau ma atiaʻe isi i le itu faaleagaga. (Roma 14:19) E mafai foʻi ona fai so tatou sao i le ‘tupu aʻe o le tino,’ e ala i le atiaʻe o le fua o le agaga o le Atua i a tatou feutagaʻiga uma ma le ʻauuso. (Kala. 5:22, 23) E lē gata i lea, ia tatou saʻili ni avanoa e ‘faia ai mea lelei i tagata uma, aemaise i ē tatou te aiga i le faatuatua.’ (Kala. 6:10; Epe. 13:16) E mafai e tagata uma i le faapotopotoga, o uso ma tuafāfine, o ē matutua ma ē lāiti, ona fai se sao i le ‘atinaʻe o le tino i le alofa.’

E faaopoopo atu i lenā, ia faaaogā o tatou taleni, malosi, ma mea ua tatou maua, e faia ai se sao i le galuega faasaoola lea o loo faia e le faapotopotoga. Na fetalai Iesu Keriso, “Ua outou maua fua.” O le ā le auala e tatou te tali atu ai? Na ia faapea mai: “Ia outou avatu fua.” (Mata. 10:8) O lea la, ia faia se sao atoatoa i le galuega e sili ona tāua o le talaʻia o le Malo ma le faia o isi ma soo. (Mata. 24:14; 28:19, 20) Po o iai se mea ua gata ai mea e te mafaia i lea galuega? Ia manatua le fafine mativa ua oti lana tane lea na faamatala e Iesu. E itiiti lava se mea na ia foaʻi. Peitaʻi, na taʻua e Iesu, na sili lana foaʻi i lo isi. Na ia foaʻi mea uma e tusa ai ma lona tulaga.—2 Kori. 8:1-5, 12.

Ia Saʻo le Vaaiga i Fesoasoani

Ae ui i lea, atonu e iai taimi e te manaʻomia ai le fesoasoani mai le faapotopotoga. I taimi e te tauivi ai ma faigatā mai i lenei faiga o mea, ia aua neʻi faatalatū e talia so o se fesoasoani e avatu e le faapotopotoga. Ua tofia e Ieova tane e agavaa ma alolofa e “leoleo le faapotopotoga,” ina ia fesoasoani iā te oe i taimi e feagai ai ma tofotofoga ma puapuaga. (Galu. 20:28) E mananaʻo toeaina ma isi i le faapotopotoga ina ia faamāfanafana, fesoasoani, ma puipui iā te oe i taimi faigatā.—Kala. 6:2; 1 Tesa. 5:14.

Peitaʻi, pe a e maua se fesoasoani, ia faamautinoa o loo saʻo lau vaai e tusa ai o lenā fesoasoani. Ia talia ma le fiafia i taimi uma le fesoasoani ua e maua. Ia vaai i lenā fesoasoani na avatu e uso, o se faailoaga lenā o le agalelei faifua o le Atua. (1 Pete. 4:10) Aiseā e tāua ai lenā tulaga? Talu ai, pe a maua se fesoasoani, e tatou te lē mananaʻo e tali atu i le auala o loo tali atu ai le toʻatele i le lalolagi, e leai se lotofaafetai.

Ia Paleni ma Magafagafa

Na taʻua e Paulo e faatatau iā Timoteo, i lana tusi i le faapotopotoga i Filipi e faapea: “E lē o iā te aʻu se tasi e mafaufau lelei e pei o  ia o lē e manatu mamafa iā te outou.” Peitaʻi na toe faapea mai Paulo: “Ua saʻili e isi uma o latou lava lelei, ae lē o mea e faatatau iā Keriso Iesu.” (Fili. 2:20, 21) Pe a fua i le tāua o le faamatalaga a Paulo, e faapefea ona tatou ʻalofia i aso nei le soona pupū i lo tatou “lava lelei”?

E lē tatau ona tatou tagisā pe a talosaga atu i isi i le faapotopotoga e fesoasoani mai i o tatou faafitauli, lea e alu ai lo latou taimi ma le malosi. Aiseā? Seʻi manatu foʻi i le tulaga lenei: E mautinoa lava e tatou te matuā faafetaia se fesoasoani faaletino e aumaia e se uso pe a oo i taimi e manaʻomia vave ai. Ae pe ao ona tatou fai saʻo atu lava i se uso e tatau ona fesoasoani mai? E leai. E alolofa o tatou uso ma e fiafia pea e fesoasoani mai, ae e manaʻomia ona iā i tatou le paleni ma le magafagafa i mea e tatou te faatalitalia, e mafai ona latou faia mo i tatou. O le mea moni, po o ā lava mea e faia e o tatou uso mo i tatou i taimi faigatā, e tatou te mananaʻo ia latou faia ma le lotomalie.

E lē taumatea e nofosauni ma lotomalilie pea o tatou uso ma tuafāfine e fesoasoani atu iā te oe. Peitaʻi, atonu e iai taimi e lē mafai ai ona latou fesoasoani atu. Pe a tupu lenā mea, ia e mautinoa o le a fesoasoani atu Ieova iā te oe i taimi faigatā, e pei ona ia faia i le faisalamo.—Sala. 116:1, 2; Fili. 4:10-13.

O lea la, ia aua le faatalatū e talia ma le fiafia so o se fesoasoani ua saunia e Ieova mo oe, aemaise lava i taimi o mafatiaga ma faafitauli. (Sala. 55:22) E finagalo Ieova ia e faia faapea. Peitaʻi, e finagalo foʻi o ia ina ia e “foaʻi ma le lotofiafia.” E ao la ona e matuā “filifili i [lou] loto” e avatu so o se mea e lagolagoina ai le tapuaʻiga moni, e tusa ai ma lou tulaga. (2 Kori. 9:6, 7) O le faia faapea, e lē gata o le a mafai ai ona e talia ma le fiafia se fesoasoani, ae o le a e foaʻi atu ai foʻi ma le lotoatoa.

[Pusa/Ata i le itulau 31]

‘Se ā se mea ou te taui atu iā Ieova ona o lona agalelei mai uma lava iā te aʻu?’—Sala. 116:12

▪ Ia saʻili ni avanoa e ‘faia ai mea lelei i tagata uma’

▪ Ia avea ma sē e faalaeiau ma atiaʻe i isi i le itu faaleagaga

▪ E tusa ai ma lou tulaga, ia faia se sao atoatoa i le galuega o le faia o isi ma soo