Ia Usitaʻi ma Lototele e Pei o Keriso

“Ia lototetele! Ua ou manumalo i le lalolagi.”—IOA. 16:33.

1. O le ā le tele na usiusitai ai Iesu i le Atua?

NA FAIA pea e Iesu Keriso le finagalo o le Atua. E aunoa ma se taimi na ia mafaufau ai e lē fia usitai i lona Tamā o i le lagi. (Ioa. 4:34; Epe. 7:26) Ae sa lē faigofie ona ia usiusitai ona o mea na tutupu iā te ia i le lalolagi. Mai lava i le amataga o le talaʻiga a Iesu, sa taumafai ai ona fili, e aofia ai ma Satani, e faatalitonu, faamalosi, ma faasesē o ia e lafoaʻi lona faamaoni. (Mata. 4:1-11; Luka 20:20-25) Na matuā mafatia Iesu i le mafaufau, faalogona, faapea lona tino ona o mea na faia e ona fili iā te ia. Na oo lava ina latou fasiotia o ia e ala i le tautauina o ia i le laau faaoosala. (Mata. 26:37, 38; Luka 22:44; Ioa. 19:1, 17, 18) E ui i na mea uma ma mafatiaga ogaoga na oo iā Iesu, ae sa tumau pea ona ia “usiusitai e oo i le oti.”—Faitau le Filipi 2:8.

2, 3. O le ā e tatou te aʻoaʻoina mai i le usitai o Iesu e ui i ona puapuaga?

² O mea sa oo iā Iesu a o avea ma tagata i le lalolagi, sa ia iloa ai ona usiusitai i tulaga faigatā e leʻi tofo muamua i ai. (Epe. 5:8) Atonu e foliga mai e lē toe manaʻomia ona aʻoaʻoina e Iesu se isi mea i le auaunaga iā  Ieova. Auā o le mea moni, sa olioli o ia i se faiā vavalalata ma Ieova i le tele o tausaga, ma sa fai o ia ma “tufuga” poto a le Atua a o foafoaina mea. (Faata. 8:30) Peitaʻi, o lona tumau ma le faatuatua a o avea ma tagata e ui i puapuaga, sa faamaonia ai lona faamaoni atoatoa. Sa atili ai ona māfana le la faiā ma lona Tamā. O le ā se lesona mo i tatou?

³ E ui lava e lelei atoatoa Iesu, ae e leʻi taumafai e faalagolago iā te ia lava. Na ia tatalo i le Atua mo le fesoasoani ina ia tumau ai ona usitai. (Faitau le Eperu 5:7.) Ina ia tumau ona tatou usitai, e manaʻomia ona tatou lotomaulalo ma tatalo pea mo le fesoasoani a le Atua. O le māfuaaga lenā na fautuaina ai e le aposetolo o Paulo Kerisiano e faapea: “Ia faaauau ona iā te outou le mafaufau o Keriso Iesu,” o lē na “faamaulalo iā te ia lava, ma iʻu ai ina usiusitai e oo i le oti.” (Fili. 2:5-8) Na faamaonia e Iesu e mafai ona usitai tagata e ui o loo ola i se lalolagi amioleaga. O le mea moni, e lelei atoatoa Iesu, ae faapefea i tatou o tagata lē lelei atoatoa?

Usiusitai e ui Ina Lē Lelei Atoatoa

4. O le ā le uiga o le iai iā i tatou o le saʻolotoga e filifili ai?

⁴ Na faia e le Atua Atamu ma Eva o ni foafoaga atamamai e fai a laʻua lava filifiliga. Ona na tatou tupuga mai iā i laʻua, o loo iai foʻi iā i tatou le saʻolotoga e filifili ai. O le ā le uiga o lenā manatu? O lona uiga, e tatou te iloa filifili e fai le mea lelei po o le mea leaga. I nisi faaupuga, ua tuuina mai e le Atua le saʻolotoga e filifili ai pe usiusitai iā te ia pe leai. E iai tiute tauave e ō mai faatasi ma le saʻolotoga. O lea la, o a tatou filifiliga i amioga tatau, a lē iʻu i le ola o le oti. E aafia ai foʻi isi i a tatou filifiliga e fai.

5. O ā faigatā o loo feagai ma i tatou uma, ma e faapefea ona tatou manumalo ai?

⁵ Ona o lo tatou tulaga lē lelei atoatoa, e lē otometi ai ona usitai. E lē faigofie i taimi uma ona usitai i tulafono a le Atua. Na feagai le aposetolo o Paulo ma lenā tulaga. Na ia tusi e faapea: “Ua ou iloa i loʻu tino se isi tulafono, o loo feteenaʻi ma le tulafono a loʻu mafaufau, ma ua faapologaina ai aʻu i le tulafono a le agasala o loo i loʻu tino.” (Roma 7:23) E moni, e lē faigatā ona usitai pe a sologa lelei mea uma ma fetaui ma oe. Peitaʻi, o le ā e fai pe a feteenaʻi lo tatou faanaunauga e usitai ma “tuʻinanauga o le tino, ma tuʻinanauga o mata”? O nei tuʻinanauga leaga, e mapuna mai i lo tatou lē lelei atoatoa, ma taaʻiga o le “agaga o le lalolagi,” ma e malolosi tele. (1 Ioa. 2: 16; 1 Kori. 2:12) Ina ia teena, e tatau ona ‘saunia o tatou loto’ a o leʻi fesagaʻi ma tulaga faigatā po o faaosoosoga, ma filifili o le a tatou usiusitai iā Ieova po o le ā lava le mea e tupu. (Sala. 78:8) O loo iai le tele o faaaʻoaʻoga i le Tusi Paia o ē na taulau ona na saunia o latou loto.—Esera 7:10; Tani. 1:8.

6, 7. Faamatala mai le auala e fesoasoani ai suʻesuʻega totino iā i tatou e faia filifiliga atamai.

⁶ O se tasi o auala e saunia ai o tatou loto, o le filigā lea e suʻesuʻe le Tusi Paia ma lomiga faale-Tusi Paia. Seʻi mafaufau e faapea o lea ua oo i le afiafi e fai ai au suʻesuʻega totino. Ua faatoʻā uma ona e tatalo iā Ieova mo lona agaga e fesoasoani iā te oe, e faatatau mea ua e aʻoaʻoina mai lana Afioga. Ae ua e fuafua e te matamata i se ata o le televise i le afiafi e sosoo ai. Ua tele tala lelei o lenā ata ua e faalogo i ai, ae ua e iloa foʻi, e iai ni vaaiga mataga ma sauā.

⁷ O loo e manatunatu i le fautuaga a Paulo i le Efeso 5:3: “O le faitaaga, ma amioga lē mamā uma, po o le matapeʻapeʻa, ia aua lava neʻi taʻua iā te outou e pei ona tatau i tagata paia.” O loo e manatua foʻi le fautuaga a Paulo i le Filipi 4:8. (Faitau.) A o e mafaufau loloto i lenā fautuaga faagaeeina, ua e fesili ifo e faapea, ‘Pe ou te tuu pea loʻu loto  ma loʻu mafaufau e aafia i na ata, pe ou te mulimuli i le faaaʻoaʻoga a Iesu o le usiusitai atoatoa i le Atua?’ O le ā lau mea o le a fai? Po o le a faaauau pea ona e matamata i lenā ata?

8. Aiseā e ao ai ona tatou tausisia pea tapulaa a Ieova?

⁸ O se mea sesē le lē tausisia pea o tapulaa a Ieova, atonu e tatou te manatu ua lava lo tatou malosi e tetee atu ai i taaʻiga a aumea leaga, e aofia ai faafiafiaga e iai faiga sauā ma faiga lē mamā. Nai lo lea, e ao ona puipuia i tatou ma a tatou fanau mai taaʻiga leaga o le agaga o Satani. O se faataʻitaʻiga, e pei lava ona taumafai malosi tagata e puipuia i latou mai faamaʻi pipisi, e ao foʻi ona tatou taumafai malosi ia puipuia i tatou mai “togafiti” leaga a Satani.—Efe. 6:11.

9. Aiseā e ao ai ona tatou maumauaʻi i aso uma ia usitai iā Ieova?

⁹ E toetoe o aso uma e tatou te filifili ai pe faia mea i le auala a Ieova pe leai. Ina ia tatou maua le faaolataga, e tatau ona tatou usitai i le Atua ma ola e tusa ma ana taʻiala amiotonu. E iloa le moni o lo tatou faatuatua, pe a mulimuli i le faaaʻoaʻoga a Keriso o le usiusitai “e oo i le oti.” O le a tauia e Ieova lo tatou faamaoni. Na folafola mai e Iesu e faapea: “O lē e tumau seʻia oo i le iʻuga, e faaolaina o ia.” (Mata. 24:13) O lea la, e manaʻomia ona atiaʻe le lototele moni, e pei ona faaalia e Iesu.—Sala. 31:24.

O Iesu le Faaaʻoaʻoga Sili o le Lototele

10. O ā omiga e tatou te ono fesagaʻia, ma e faapefea ona tatou tali atu i ai?

¹⁰ Ona o loo siʻomia i tatou e uiga ma amioga a lenei lalolagi, e tatou te manaʻomia le lototele ia lē aafia ai. E feagai Kerisiano ma omiga ona o amioga, le va feiloaʻi, tulaga tau tupe, ma lotu lea e ono mafai ona latou see ese ai mai ala amiotonu o Ieova. E toʻatele e feagai ma teteega i aiga. I nisi atunuu, ua faaauiluma e aʻoga maualuluga le aʻoaʻoga o le evolusione, ma ua faasolo ina talia e le toʻatele le talitonuga e leai se Atua. Pe a tulaʻi mai na omiga, ia aua le faatuutuu i ai ma lē amanaʻia. E ao ona tatou tetee atu ma puipuia ai i tatou. Ua faailoa mai i le faaaʻoaʻoga a Iesu le auala e tatou te taulau ai.

11. E faapefea ona tatou maua le lototele ona o le manatunatu i le faaaʻoaʻoga a Iesu?

¹¹ Na taʻu atu e Iesu i ona soo e faapea: “Ua puapuagatia outou i le lalolagi, ae ia lototetele! Ua ou manumalo i le lalolagi.” (Ioa. 16:33) E lē taitai lolo o ia i taaʻiga a le lalolagi. E na te leʻi tuuina atu se avanoa e taofia ai o ia e le lalolagi mai le faataunuuina o lana faiva, pe faapogaia o ia e lē tausisia tapulaa o le tapuaʻiga moni ma amioga tatau; ma e tatau foʻi ona tatou faapena. A o tatalo Iesu, na ia faapea atu i ona soo: “E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioa. 17:16) O le suʻesuʻe ma manatunatu loloto i le lototele o Keriso, o le a tatou lototetele ai ia tumau ona taumamao mai i le lalolagi.

 Lesona Mai le Lototele o Iesu

12-14. Ia faamatala mai faaaʻoaʻoga a Iesu i le faaalia o le lototele.

¹² Na faaalia e Iesu le lototele i lana auaunaga atoa. I le faaaogāina e Iesu o lana pule o le Alo o le Atua, sa lē fefe o ia e ‘ulufale i le malumalu ma tutuli i fafo ē uma ua fai fefaatauaʻiga i le malumalu, ma fuli laulau a tagata suitupe ma nofoa a le ʻaufaatau lupe.’ (Mata. 21:12) I le pō mulimuli o Iesu i le lalolagi ina ua ō atu fitafita e puʻe o ia, sa ia puipuia ma le lototele ona soo i le faapea atu: “Afai o aʻu lea o loo outou saʻilia, ia tuu atu i latou nei e ō.” (Ioa. 18:8) Mulimuli ane, na ia fetalai atu iā Peteru e tuu ese lana pelu, ma faaalia ai le faalagolago o Iesu iā Ieova ae lē o auupega a tagata.—Ioa. 18:11.

¹³ Sa leʻi fefe Iesu e taʻusalaina aʻoaʻo pepelo ma lē alolofa o ona aso ma a latou aʻoaʻoga sesē. Na faapea atu Iesu iā i latou, “Oi talofa iā te outou le ʻautusiupu ma le ʻau Faresaio faafiaamiotonu! auā ua outou punitia le malo o le lagi i tagata . . . ua outou manatu māmā i mataupu matuā tāua o le Tulafono, e pei o le faia o mea tonu, le alofa mutimutivale, ma le faamaoni. . . . auā ua outou faamamā i tua o le ipu ma le tanoa, a o totonu ua tumu i mea faoa ma le matapeʻapeʻa.” (Mata. 23:13, 23, 25) E manaʻomia foʻi e soo o Iesu se lototele faapena, auā o le a sauāina ma fasiotia nisi o i latou e taʻitaʻi o lotu sesē.—Mata. 23:34; 24:9.

¹⁴ Sa lototele Iesu e tetee atu i temoni. I se tasi taimi, na sau ai se tamāloa ua ulufia e temoni iā te ia, ma ona o lona malosi tele sa lē mafai ai ona saisaiina o ia i se filifili. Sa lē fefe Iesu e tuliesea temoni na puleaina le tamāloa. (Mare. 5:1-13) I aso nei, ua lē o toe tuuina mai e le Atua le mana i Kerisiano e faia ai vavega. Ae i la tatou talaʻiga ma le aʻoaʻo atu, e ao foʻi ona tatou tau i le taua faaleagaga faasaga iā Satani, o lē ua “faatauasoina” manatu o ē e lē talitonu. (2 Kori. 4:4) I le pei o Iesu, “e lē faaletino auupega o la [tatou] taua, ae e faamalosia e le Atua e lepetia ai mea ua matuā mautū,” o manatu faalotu sesē ua mauaa. (2 Kori. 10:4) E tele mea e tatou te aʻoaʻoina mai le faaaʻoaʻoga a Iesu, i le auala e faaaogā ai nei auupega faaleagaga.   

15. O le ā le faavae o le lototele o Iesu?

¹⁵ Na faavae le lototele o Iesu i lona faatuatua ae lē o sona fia malosi. E tatau foʻi ona faapena i tatou. (Mare. 4:40) E faapefea ona tatou maua le faatuatua moni? Seʻi toe tagaʻi i le faaaʻoaʻoga a Iesu. Sa faaalia e Iesu lona iloa lelei o Tusitusiga Paia, ma na ia talitonu atoatoa i ai. Na ia faaaogā le pelu faaleagaga, o le Afioga lea a le Atua. E tele taimi sa ia lagolagoina ai ana aʻoaʻoga e ala i le faasino atu i Tusitusiga Paia. E masani ona ia faatomua ana fetalaiga e faapea: “Ua tusia,” o lona uiga, ua tusia i le Afioga a le Atua. *

16. E faapefea ona tatou atiaʻe se faatuatua malosi?

¹⁶ Ina ia atiaʻe se faatuatua e mafai ona tatalia tofotofoga uma e mautinoa o le a oo mai ona o le avea ma soo, e ao ona tatou faitau i le Tusi Paia i aso uma ma auai e lē aunoa i sauniga, ma tāmau i mafaufau upu moni ua avea ma faavae o lo tatou faatuatua. (Roma 10:17) E ao foʻi ona manatunatu loloto i mea ua aʻoaʻoina, ma ia pāʻia ai o tatou  loto. E na o le faatuatua malosi e mafai ona uunaʻia i tatou e gaoioi ma le lototele. (Iako. 2:17) E ao ona tatou tatalo mo le agaga paia ona o le faatuatua o se vala lea o le fua o le agaga.—Kala. 5:22.

17, 18. Na faapefea ona faaalia e se tuafafine talavou le lototele i le aʻoga?

¹⁷ Na iloa e se tuafafine talavou e igoa iā Kita le auala e maua ai le lototele ona o le faatuatua moni. A o laʻitiiti o ia, sa ia iloa e lē tatau ona ia “mā i le tala lelei” i le aʻoga, ma sa ia manaʻo e avatu se molimau lelei i ē e latou te aʻoʻoga. (Roma 1:16) I tausaga uma, sa ia taumafai ai e talaʻi atu i isi, ae sa faatalatū ona o le fefe. Ina ua matua sa sui le mea e aʻoga ai. Sa ia mafaufau loa, “O le taimi la nei o le a ou faaaogā uma ai avanoa na ou misia muamua.” Na tatalo Kita mo le lototele ma le faautauta e pei o Keriso, ma ia maua se avanoa talafeagai.

¹⁸ I le aso muamua o le aʻoga, na faatonuina ai tamaiti e fai sina faamatalaga puupuu e uiga iā i latou. Na taʻua e nisi a latou lotu ma faapea mai e lē o ola e tusa ma o latou talitonuga. Na iloa e Kita o le avanoa lenei na ia tatalo ai. Ina ua fai lana faamatalaga na ia taʻu atu ma le lototele, “O aʻu o se Molimau a Ieova, ma ua avea le Tusi Paia ma taʻiala i laʻu tapuaʻiga ma laʻu amio.” A o fai atu lana tala, sa foliga aamu i ai isi tamaiti. Ae o isi, na latou faalogo lelei ma fai atu ni fesili. Na faaaogā e le faiaʻoga Kita e fai ma faaaʻoaʻoga lelei o le lototele e faailoa atu ona talitonuga. Sa matuā fiafia Kita ona o lona aʻoaʻoina o le lototele mai le faaaʻoaʻoga a Iesu.

Ia Faaalia le Faatuatua ma le Lototele e Pei o Keriso

19. (a) O le ā e aofia ai i le iai o se faatuatua moni? (e) E faapefea ona tatou faafiafiaina le finagalo o Ieova?

¹⁹ Na iloa foʻi e aposetolo e tatau ona faavae lo latou lototele i le faatuatua. Sa latou talosaga atu iā Iesu: “Ia e faatuputeleina lo matou faatuatua.” (Faitau le Luka 17:5, 6.) O le faatuatua moni, e sili atu nai lo le talitonu o loo soifua le Atua. E aofia ai le atiaʻe o se faiā māfana ma faalagolago iā Ieova, e leai se eseesega ma le faiā a se tamaitiiti ma lona tamā agalelei ma alofa. Na faagaeeina Solomona e tusi e faapea: “Loʻu atalii e, afai e poto lou loto, ona fiafia ai lea o loʻu nei lava loto; e olioli foʻi loʻu manatu, pe a tautala ou laugutu i mea ua tonu.” (Faata. 23:15, 16) E faapena foʻi ona faafiafiaina le finagalo o Ieova pe a tatou faamalolosi e lagolago ana mataupu silisili amiotonu, ma atili ai ona tatou lototetele. O lea la, ia tatou mulimuli pea i le faaaʻoaʻoga a Iesu, ma lototetele e lagolagoina le amiotonu!

[Faaopoopoga i lalo]

Pe Mafai Ona E Faamatala?

• O le ā e fesoasoani iā i tatou e tumau ai i le usitai e ui ina lē lelei atoatoa?

• O le ā le faavae o le faatuatua moni, ma e faapefea ona aogā ia tatou lototetele ai?

• O le ā e iʻu i ai pe a tatou usitai ma lototetele e pei o Keriso?

[Fesili mo le Suʻesuʻega]

[Ata i le itulau 13]

Po o ‘saunia lou loto’ e tetee atu i faaosoosoga?

[Ata i le itulau 15]

E tatou te maua le lototele ona o le faatuatua, e pei ona faia e Iesu