“Ia Maelega i la le Agaga”
“Ia Maelega i la le Agaga”
“Aua le faifaiaga i a outou galuega. Ia maelega i la le agaga. Ia outou pologa mo Ieova.”—ROMA 12:11.
1. Aiseā na faia ai e tagata Isaraelu taulaga e fai i manu ma isi taulaga?
E TALISAPAIA e Ieova faataulaga o loo faia e ana auauna, ina ia faaalia ai lo latou alofa mo ia ma lo latou gauaʻi atu i lona finagalo. I aso anamua, na ia taliaina taulaga eseese na faia i manu ma isi taulaga. Sa faia e tagata Isaraelu nei taulaga e tusa ai ma le Tulafono a Mose, ina ia maua ai le faamagaloga o agasala ma faaalia ai le lotofaafetai. I le faapotopotoga Kerisiano, e lē o finagalo Ieova e tatou te ofo atu na ituaiga taulaga. Ae peitaʻi, i le mataupu e 12 o lana tusi i Kerisiano i Roma, o loo faaalia ai e le aposetolo o Paulo e faapea, o loo faatalitalia pea i tatou e ofo atu taulaga. Seʻi o tatou vāai pe faapefea.
Le Taulaga Ola
2. I le avea ai o ni Kerisiano, o le ā le ituaiga olaga e tatou te ola ai, ma o le ā e aofia ai?
2 Faitau le Roma 12:1, 2. I le vaega muamua o lana tusi, o loo faamatala manino ai e Paulo e faapea, e taʻuamiotonuina e le Atua Kerisiano faauuina, po o se Iutaia po o se tagata o Nuu Ese, ona o le faatuatua ae lē o galuega. (Roma 1:16; 3:20-24) I le mataupu e 12, o loo faamatala ai e Paulo e faapea, e tatau i Kerisiano ona faaalia lo latou lotofaafetai e ala i le ola i se olaga faataulaga. Ina ia faia faapea, e ao ona toe fuataʻi o tatou mafaufauga ma manatu. Ona o le lē lelei atoatoa na tuufaasolo mai, ua tatou nonofo ai i “le tulafono a le agasala ma le oti.” (Roma 8:2) O lea la, e manaʻomia ona suia i tatou, “ia faafouina le malosi lea e pulea ai o [tatou] mafaufau,” e ala i le suia atoatoa o o tatou faanaunauga. (Efe. 4:23) E faatoʻā mafai ona faia lenā suiga atoatoa, e ala i le fesoasoani a le Atua ma lona agaga. E manaʻomia ai foʻi ni a tatou taumafaiga maumauaʻi, e ala i le faaaogā o lo tatou “mafaufau lelei.” O lona uiga, ia fai le mea sili e tatou te mafai ina ia lē “mulimuli [ai] i faiga o mea a lenei lalolagi” ma amioga lē tatau, faafiafiaga matagā, ma mafaufauga sesē.—Efe. 2:1-3.
3. Aiseā e tatou te auai ai i gaoioiga faa-Kerisiano?
3 Ua talosagaina foʻi i tatou e Paulo e faaaogā lo tatou “mafaufau lelei,” ina ia faamaonia ai e i tatou lava po o le ā “le finagalo o le Atua, lea e lelei, e mālie, ma le lelei atoatoa.” Aiseā e tatou te faitau ai le Tusi Paia i aso taʻitasi, manatunatu loloto i mea ua tatou faitau ai, tatalo, auai i sauniga, ma auai i le talaʻia o le tala lelei o le Malo? Pe ona ua uunaʻia i tatou e toeaina o le faapotopotoga e faia faapea? O le mea moni, e tatou te lotofaafetai ona o le fesoasoani ma le faamanatu mai a toeaina. Peitaʻi, ua māfua ona tatou auai i gaoioiga faa-Kerisiano, ona ua uunaʻia i tatou e le agaga o le Atua e faaalia lo tatou alofa loloto mo Ieova. E lē gata i lea, ua tatou faamaonia e i tatou lava, e finagalo Ieova ia tatou faia na mea. (Saka. 4:6; Efe. 5:10) E tatou te lagona le fiafia tele ma le faamalieina i le iloa, o le ola i se olaga moni faa-Kerisiano, e mafai ona tatou maua ai le finagalo malie o le Atua.
E Eseese Meaalofa
4, 5. E ao faapefea i toeaina Kerisiano ona faaaogā a latou meaalofa?
4 Faitau le Roma 12:6-8, 11. Ua faamatala e Paulo e faapea, “e eseese meaalofa ua tatou maua e tusa ma le agalelei faifua ua tuuina mai iā i tatou.” O nisi o meaalofa ua taʻua e Paulo, o le apoapoaʻi, o le pule—aemaise lava toeaina Kerisiano, o ē ua apoapoaʻia ia pule “ma le filigā.”
5 Ua taʻua e Paulo o lenā filigā e tatau ona manino mai i le auala e galulue ai ovasia o ni Roma 12:4, 5) O lenā auaunaga e talitutusa ma le auaunaga lea e taʻua i le Galuega 6:4, lea na faapea mai ai le ʻauaposetolo: “O le a matou faasaga i le tatalo ma le auaunaga e tusa ai ma le afioga a le Atua.” O le ā e aofia ai i lenā auaunaga? E faaaogā e toeaina a latou meaalofa e atiaʻe ai sui o le faapotopotoga. E faaalia o loo latou “faia lenei auaunaga,” pe a latou saunia ma le maumauaʻi taʻiala ma faatonuga i le faapotopotoga mai i le Afioga a le Atua, e ala i lo latou suʻesuʻe, saʻiliʻili, aʻoaʻo ma le galuega faaleoleo mamoe. E tatau i ovasia ona faaaogā ma le faamaoni a latou meaalofa ma ia tausia “ma le lotofiafia” le lafumamoe.—Roma 12:7, 8; 1 Pete. 5:1-3.
faiaʻoga ma le faia o le “auaunaga.” O le manatu o loo taʻua i le mau, e foliga mai o loo faasino atu Paulo i le “auaunaga” o loo faia i le faapotopotoga, po o le ‘tino e tasi.’ (6. E faapefea ona tatou mulimuli i le fautuaga o loo i le Roma 12:11, o le mau faavae o lenei mataupu?
6 Ua faapea atili mai Paulo: “Aua le faifaiaga i a outou galuega. Ia maelega i la le agaga. Ia outou pologa mo Ieova.” Pe afai ua tatou iloa ua iai se lagona faapalapala i la tatou auaunaga, atonu e manaʻomia ona toe iloilo a tatou masaniga i a tatou suʻesuʻega, ma tatalo ma le naunau mo le agaga o Ieova, lea e fesoasoani iā i tatou ina ia faafetaiaʻia ai so o se uiga faapalapala, ma toe faafouina ai lo tatou maelega. (Luka 11:9, 13; Faaa. 2:4; 3:14, 15, 19) Sa faamalosia e le agaga paia uluaʻi Kerisiano ina ia tautatala atu e uiga “i mea matagofie a le Atua.” (Galu. 2:4, 11) E faapena foʻi ona uunaʻia i tatou e le agaga paia ina ia naunau i le auaunaga, ma “ia maelega i la le agaga.”
Lotomaulalo ma le Faamaulalo
7. Aiseā e ao ai ona tatou auauna ma le lotomaulalo ma le faamaulalo?
7 Faitau le Roma 12:3, 16. O meaalofa ua tatou maua e mai i le “agalelei faifua” o Ieova. Ua faapea mai se isi faaupuga a Paulo: “Ua matou agavaa ona o le Atua.” (2 Kori. 3:5) O lea la, e lē tatau ona tatou viiviia i tatou lava. E tatau ona tatou iloa ma le lotomaulalo o so o se taulau manuia ua tatou maua i la tatou auaunaga, ua maua ona o le faamanuia a le Atua, ae e lē ona o so tatou tomai. (1 Kori. 3:6, 7) I le ōgatusa ai ma lenei manatu, ua faapea mai Paulo: “Ou te fai atu ai iā te outou taʻitoʻatasi, ina ia aua neʻi faasili le manatu o se tasi iā te ia lava, i lo o le mea e tatau ona manatu i ai.” E talafeagai ona tatou faaaloalogia i tatou lava, ma maua le olioli ma le lotomalie i la tatou auaunaga iā Ieova. Peitaʻi, o le faamaulalo, po o le iloaina o mea e gata mai ai lo tatou mafai, o le a taofia ai i tatou mai i le maumauaʻi i o tatou lava manatu. Nai lo lea, e tatou te mananaʻo ia “mafaufau lelei.”
8. E mafai faapefea ona tatou ʻalofia le “faafiapopoto”?
8 O se tulaga lē atamai mo i tatou le mitamitavale i mea ua tatou faataunuuina. Auā o 1 Kori. 3:7) Ua taʻua e Paulo e faapea, ua tuuina atu e le Atua i tagata taʻitoʻatasi o le faapotopotoga “le faatuatua.” Nai lo le manatu fiasili, e tatau ona tatou iloa mea ua faataunuuina e isi tagata e tusa ai ma le faatuatua ua iā i latou. Ua faapea atili mai Paulo: “Ia manatu i isi e pei ona outou manatu ifo iā te outou lava.” I se tasi o ana tusi, ua taʻu mai ai e le aposetolo iā i tatou ia aua lava neʻi faia “se mea ma le finauvale ma le faasausili, ae ia faia ma le lotomaulalo, i le manatu faapea ua sili isi iā te outou.” (Fili. 2:3) E manaʻomia le lotomaulalo moni ma taumafaiga, ina ia iloa ai e sili atu o tatou uso ma tuafāfine i nisi o auala, i lo o i tatou. O le lotomaulalo o le a taofia ai i tatou mai i le “faafiapopoto.” A o avea faaeaga o se auaunaga faapitoa ma mea e uaʻi mai ai tagata i nisi o i tatou, ae o le a maua e tagata uma le olioli i le faataunuuina ma le faamaulalo o galuega faatauvaa, lea e masani ona lē iloa mai e isi tagata.—1 Pete. 5:5.
“lē na te faatupuina, o le Atua lea.” (Lo Tatou Autasi Faa-Kerisiano
9. Aiseā ua faatusa ai e Paulo Kerisiano ua faauuina e le agaga, i vaega o se tino?
9 Faitau le Roma 12:4, 5, 9, 10. Ua faatusa e Paulo Kerisiano ua faauuina e le agaga, i vaega o se tino e galulue autasi i lalo o lo latou Ulu, o Keriso. (Kolo. 1:18) Ua faamanatu atu i Kerisiano faauuina e le agaga e faapea, e tele vaega o le tino ae e eseese galuega e latou te faatinoina, ma “e ui ina [latou] toʻatele, ae e tasi i le tino i lo [latou] autasi ma Keriso.” I se tulaga talitutusa, na timaʻia e Paulo Kerisiano faauuina i Efeso e faapea: “Ia tatou tutupu aʻe i le alofa iā te ia i mea uma, o le ulu lava ia, o Keriso lea. O ia ua fesootaʻi lelei ai le tino atoa, ma ua faia ina ia felagolagomaʻi sooga uma, ina ia maua ai le mea e manaʻomia e tusa ma galuega talafeagai a itutino taʻitasi, ua faia ina ia tupu aʻe ai le tino, ma atinaʻe ai o ia lava i le alofa.”—Efe. 4:15, 16.
10. O le ā le pule e tatau ona iloa e “isi mamoe”?
10 E ui “o isi mamoe” e lē o se vaega o le tino o Keriso, ae e tele ni mea e latou te aʻoaʻoina mai i lenei faataʻitaʻiga. (Ioa. 10:16) Ua taʻua e Paulo e faapea, ‘ua tuuina e Ieova mea uma lava i lalo o vae o Keriso, ma tofia o ia e fai ma ulu i mea uma lava mo le lelei o le faapotopotoga.’ (Efe. 1:22) I aso nei, ua avea isi mamoe ma vaega o “mea uma” ua tuuina e Ieova i lalo o le tulaga ulu o lona Alo. E aofia foʻi i latou i “mea” ua tuuina atu e Keriso i lana “pologa faamaoni ma le faautauta.” (Mata. 24:45-47) O lea la, e tatau iā i latou o loo iai le faamoemoe i le lalolagi, ona iloa o Keriso o lo latou Ulu, ma ia gauaʻi atu i le pologa faamaoni ma le faautauta ma lana Vaega Pule, ma tane ua tofia o ni ovasia i le faapotopotoga. (Epe. 13:7, 17) E saosaolaumea lenei tulaga i le autasi faa-Kerisiano.
11. O le ā e faavae ai lo tatou autasi, ma o le ā le isi fautuaga na avatu e Paulo?
11 O lenā autasi e faavae i le alofa, “o le fusi lea e atoatoa ona autasi ai.” (Kolo. 3:14) I le Roma mataupu e 12, ua faamamafa ai e Paulo lenei manatu i le faapea mai, e lē tatau ona tatou “faatagā” alofa, ae ia tatou “matuā alofa faapelepele le tasi i le isi i le alofa faaleuso.” O le faia faapea, e iʻu ai i le faaaloalo o le tasi i le isi. Ua faapea mai le aposetolo: “Ia tausolomua ona faaaloalo le tasi i le isi.” O le mea moni, e lē tatau ona tatou faafenumiaʻia le alofa ma le alofa e faavae i faalogona ootia. E tatau ona tatou faia mea e mafai ina ia faatumauina ai le mamā o le faapotopotoga. Ina ua avatu le fautuaga a Paulo e faatatau i le alofa, na ia toe faapea atu: “Ia ʻinoʻino i le leaga, ae pipii i le lelei.”
Le Agaga Talimālō
12. O le ā e tatou te aʻoaʻoina mai i Kerisiano i Maketonia anamua, e tusa ai o le limafoaʻi?
12 Faitau le Roma 12:13. O lo tatou alofa i o tatou uso o le a uunaʻia ai i tatou e “avatu i le ʻaupaia mea e tusa ai ma o latou manaʻoga,” ma le mea e tatou te mafai. E tusa lava pe tatou te matitiva, ae e mafai lava ona tatou tufa atu mea ua tatou maua. I le tusi atu e faatatau i Kerisiano i Maketonia, na taʻua e Paulo e faapea: “A o mafatia i latou ona o tofotofoga tigā. E ui i lo latou matuā matitiva ae ua tele lo latou olioli, auā ua faaalia lo latou mauʻoa, ona o le tele o lo latou lima foaʻi. E tusa ma mea latou te mafaia, e moni ou te taʻutino atu, na faia e sili atu i lo mea na latou mafaia, auā o lo latou lava lotomalilie, na matuā ʻaiʻoi mai ai iā i matou mo se avanoa e foaʻi atu ai ma le agalelei, e faia ai se sao e fesoasoani ai i le ʻaupaia [i Iutaia].” (2 Kori. 8:2-4) E ui lava e matitiva i latou, ae e ese le limafoaʻi o Kerisiano i Maketonia. Sa latou manatu i ai o se faaeaga le tufa atu o mea ua latou maua, i o latou uso o loo manaʻomia se fesoasoani i Iutaia.
13. O le ā le uiga o le faaupuga, “ia faaalia le agaga talimālō”?
13 O le faaupuga “ia faaalia le agaga talimālō,” e faaliliuina mai i se upu Eleni e uiga atu i le tausolomua. E faaliliu e le, The New Jerusalem Bible lea faaupuga i le “tulimataʻi o avanoa e faaalia ai le agaga talimālō.” O nisi taimi, e faaalia le agaga talimālō e ala i le valaaulia o se tasi mo se taumafataga, ma pe afai e faia ona o le alofa, o se mea lelei lea. Ae afai tatou te tausolomua, o le a tatou iloa ai le tele o isi auala e faaalia ai le agaga talimālō. Peitaʻi, pe afai o lo tatou tulaga tau tupe po o le faalētonu o le soifua mālōlōina ua lē mafai ai ona valaaulia nisi mo se taumafataga, e mafai lava ona faaalia le agaga talimālō e ala i le avatu o se ipu kofe, ipu ti, po o se vaiinu.
14. (a) O ā upu o loo faia aʻe ai le upu Eleni ua faaliliuina, “agaga talimālō”? (e) E faapefea ona tatou faaalia le “agaga talimālō” i tagata mai i isi atunuu?
14 O le agaga talimālō e aofia ai la tatou vaaiga i mea. O le upu Eleni e faaliliu mai ai le faaupuga “agaga talimālō,” e maua mai i upu autū e lua e uiga atu i le “alofa” ma le “tagata ese.” O ā o tatou lagona i tagata ese, po o tagata mai i isi atunuu? O se tasi auala e faaalia ai le agaga talimālō, o le taumafai lea e aʻoaʻoina se isi gagana ina ia talaʻi atu ai le tala lelei, i tagata mai i isi atunuu ua siitia mai i le oganuu a la tatou faapotopotoga. O le mea moni, o le toʻatele o i tatou e lē mafai ona aʻoaʻoina se isi gagana, ona o o tatou tulaga. Peitaʻi, e mafai e i tatou uma ona fai se sao e fesoasoani ai i tagata mai i isi atunuu, e ala i le faaaogā lelei o le tamaʻi tusi, Good News for People of All Nations, lea o loo iai se feʻau mai i le Tusi Paia i le tele o gagana. Pe na e maua ni iʻuga lelei i le faaaogāina o lenei tamaʻi tusi i lau auaunaga?
Ia Lagona Faalogona o Isi
15. Na faapefea ona faataʻitaʻia e Iesu le fautuaga o loo i le Roma 12:15?
15 Faitau le Roma 12:15. O le fautuaga a Paulo i lenei fuaiupu e mafai ona taaofaʻi i upu e lua: Tigā Alofa. E manaʻomia ona tatou malamalama ma lagona faalogona o le isi tagata, po o le olioli po o le faanoanoa. Pe afai e tatou te maelega i la le agaga, o le a faaalia atu o tatou lagona olioli po o le tigā alofa. Ina ua toe foʻi mai ma le olioli soo e toʻa 70 o Keriso mai la latou talaʻiga, ma taʻu mai iā Iesu iʻuga o la latou galuega, na “matuā fiafia ai o ia i le agaga paia.” (Luka 10:17-21) E tatou te lagonaina foʻi lenā olioli. I le isi itu, na ʻtagi foʻi Iesu faatasi ma ē na fetagisi’ ina ua oti lana uō o Lasalo.—Ioa. 11:32-35.
16. E faapefea ona tatou faaalia le tigā alofa, ma o ai patino e manaʻomia ona latou faia faapea?
16 E tatou te mananaʻo e mulimuli i le faataʻitaʻiga a Iesu i le faaalia o le tigā alofa. Pe a olioli se Kerisiano, e tatou te mananaʻo foʻi e olioli faatasi ma ia. I se tulaga faapena, e tatou te mananaʻo foʻi e lagona le tigā alofa i puapuaga, ma mea o loo faanoanoa ai o tatou uso ma tuafāfine. E masani lava ona tatou avatu se mapusaga tele i o tatou uso talitonu o loo pagatia i ni faalogona tigā, pe a tatou faalogologo lelei atu, ma taumafai e lagona o latou faalogona o loo iai. Ma e iai taimi, e tatou te lagona ai ua matuā pāʻia o tatou loto, lea e faailoa atu ai o tatou lagona i loimata maligi. (1 Pete. 1:22) E tatau faapitoa i toeaina, ona mulimuli i le fautuaga a Paulo i le faaalia o le tigā alofa.
17. O le ā ua tatou aʻoaʻoina mai i le vaega o le mataupu e 12 o le Roma lea ua uma ona talanoaina, ma o le ā o le a tatou iloiloina i le mataupu o loo sosoo mai?
17 O fuaiupu ia ua uma ona tatou talanoaina o le mataupu e 12 o le tusi o Roma, ua aumaia ai fautuaga lea e mafai ona faatatauina i o tatou lava olaga faa-Kerisiano, ma la tatou faiā ma o tatou uso. I le mataupu o loo sosoo mai, o le a tatou iloiloina ai fuaiupu o loo totoe o lenei mataupu, lea o loo talanoaina ai le auala e tatou te vāai ma feagai ai ma tagata i fafo atu o le faapotopotoga Kerisiano, e aofia ai tagata e tetee ma faasauā mai.
O se Autaluga
• E faapefea ona tatou faaalia ua tatou “maelega i la le agaga”?
• Aiseā e tatau ai ona tatou auauna i le Atua ma le lotomaulalo ma le faamaulalo?
• O ā auala e tatou te faaalia ai le tigā alofa i o tatou uso talitonu?
[Fesili mo le Suʻesuʻega]
[Ata i le itulau 4]
Aiseā e tatou te auai ai i nei gaoioiga faa-Kerisiano?
[Ata i le itulau 6]
E faapefea e i tatou taʻitoʻatasi ona fesoasoani i tagata mai i isi atunuu, e aʻoaʻoina mea e faatatau i le Malo?