Tapuaʻiga a le Aiga e Tāua Tele mo le Faasaoina!

SEʻI manatu i le mataʻutia o le a iai, “le taua o le aso tele o le Atua o Lē e ona le malosi uma lava”! (Faaa. 16:14) I ni faaupuga manino faafaatusa, na tusi le perofeta o Mika e faapea: “E liu suāvai mauga . . . , e māvaevae vanu, pei o le pulu i le afi, faapei o le vai ua tafe ifo i le tofē.” (Mika 1:4) O le ā se iʻuga mataʻutia e oo iā i latou e lē o auauna iā Ieova? Ua taʻua i le Afioga a le Atua e faapea: “O le fasi a Ieova i lea aso e āfua mai i le tasi pito lalolagi e oo atu i le tasi pito lalolagi.”—Iere. 25:33.

I le manatu atu i na lapataʻiga, o se mea lelei i ulu o aiga—o le toʻatele lava o mātua nofo toʻatasi—ona fesili ifo iā i latou lava e uiga i a latou fanau ua iloa fefulifulisaʻi, ʻPo o le a faasaoina i latou iā Amaketo?’ Ua faamautinoa mai e le Tusi Paia e faapea, pe a tusa ai ma le matutua o o latou tausaga, o le a faasaoina i latou pe afai e oo mai Amaketo, ae o loo ola ma malolosi faaleagaga.—Mata. 24:21.

Le Tāua o le Iai o se Taimi mo le Tapuaʻiga a le Aiga

I le avea o se matua, ia faamautinoa ua e faia mea uma e te mafaia e tausia aʻe ai lau fanau “i aʻoaʻiga ma apoapoaʻiga a Ieova.” (Efe. 6:4) E tāua tele le suʻesuʻeina o le Tusi Paia ma lau fanau. E tatou te mananaʻo ia pei a tatou fanau o Kerisiano i Filipi, lea na faamālō i ai Paulo i lo latou lotomalilie e usiusitai iā Ieova. Na ia tusi e faapea: “Aʻu pele e, e pei ona sa masani ona outou usiusitai, e lē na o taimi na ou faatasi ai ma outou, ae ua sili atu i le taimi ua ou lē iai, ia faaauau ona outou galulue mo lo outou faaolataga, i le mataʻu ma le gatete.”—Fili. 2:12.

Po o usitaia e lau fanau tulafono a Ieova pe a e lē iai? Ae faapefea pe a iai i le aʻoga? E faapefea ona e fesoasoani i lau fanau ia mautinoa le atamai o tulafono a Ieova, ma taʻitaʻia ai i latou i nei tulafono e tusa lava pe e te lē o iai?

E telē se vaega e faia e le tapuaʻiga a le aiga, e fesoasoani ai i fanau ia lava lo latou faatuatua e usitai ai iā Ieova, e tusa lava pe e lē o iai o latou mātua. O lea la, seʻi o tatou talanoaina mea tāua e tolu e fai, ina ia taulau manuia ai le suʻesuʻega faale-Tusi Paia a lou aiga.

Ia Faia e Lē Aunoa

Ua faaalia i le Tusi Paia e faapea, ua valaaulia atalii o le Atua i ona luma i taimi faatulagaina. (Iopu 1:6) Ia faia foʻi faapea i lau fanau. Ia faatulaga se aso patino ma se taimi mo la outou Tapuaʻiga a le Aiga i le afiafi, ma ia tausisi i ai. E lē gata i lea, ia faatulaga se isi taimi patino auā mea e tutupu faafuaseʻi mai.

A o faagasolo masina, ia ʻalofia le fai ma misi. Ia manatua, o lau fanau o au tagata aʻoga ia o le Tusi Paia e sili ona tāua. Peitaʻi, e manaʻo Satani e puʻea i latou. (1 Pete. 5:8) Pe afai e te lē faaaogāina lenei afiafi tāua mo le Tapuaʻiga a le Aiga, ae matamata ai le televise pe fai ai isi gaoioiga e lē tāua tele, o le a manumalo la Satani.—Efe. 5:15, 16; 6:12; Fili. 1:10.

Taumafai ia Aogā

E tatau ona avea le afiafi mo le Tapuaʻiga a le Aiga, e sili atu i lo le tau ina aʻoaʻoina o mea moni. Taumafai ia aogā. E faapefea? I nisi taimi, ia filifili mataupu e fesootaʻi ma tulaga o le a fesagaʻi ma lau tama i aso po o ni  vaiaso o le a sau. O se faataʻitaʻiga, aiseā e lē faaaofia ai ni vaega e aogā mo le talaʻiga? E fiafia lava le fanau iti e fai mea e lelei ai. O le faataʻitaʻi o taulimaga ma mafaufau i le auala e taulima ai teteega, o le a fesoasoani iā i latou e toʻa ai pea, a o auai i vala eseese o le galuega talaʻi o le Malo.—2 Timo. 2:15.

E mafai foʻi ona fai ni faataʻitaʻiga aogā, e fesoasoani i lau fanau e taulima ai omiga mai i aumea. Taumafai e faalaeiau ni talanoaga e maua ai ni avanoa mo lau tama, e fau aʻe ai ni tali e na te lagona e mafai ona ia faia atu. E ono aofia ai le fesili atu i lau fanau po o ā luʻi o loo latou fesagaʻia, o fea o loo tutupu ai nei luʻi, o le ā e tupu pe a latou lolo atu i ai, ae po o le ā foʻi e tupu pe a latou teena. Mai i lea taimi i lea taimi, aiseā e lē faataʻitaʻi ai auala e tali atu ai i luʻi o loo latou fesagaʻia?

O le tapuaʻiga a le aiga e saunia ai le avanoa mo mātua, e faamamafa atu ai aogā o le iai o ni sini faaleagaga. E tusa ai o lenei tulaga, o talaaga o soifuaga o tagata faamaoni o loo i a tatou mekasini, e saunia ai se faavae e sili ona lelei e fesoasoani ai i lau tama e talisapaia le manatu e faapea, o le taulaʻi atu o le olaga o se tasi i le auaunaga iā Ieova, o le ala sili lea e mulimuli ai. Ia fesoasoani i lau tama ia iai se faanaunauga e paeonia, auauna i le Peteli, auai i le Aʻoga mo Toleniga i le Faiva, pe auai i nisi vala o le auaunaga faataimi atoa.

O se upu lapataʻi: O nisi mātua o loo iai ni faanaunauga lelei, ua soona taulaʻi atu i mea e la te mananaʻo e faia e le la tama, a ua galo ai ona la faamālō atu i mea lelei o loo ia faia i le taimi nei. O se mea lelei le faalaeiau o lau fanau e faataatitia ni sini aogā, e pei o le auaunaga i le Peteli ma le galuega faamisionare. Ae peitaʻi, a o faia faapea, ia faaeteete aua e te faatigā i lau tama i mea o loo e faatalitalia, ma oo ai ina lotovaivai o ia. (Kolo. 3:21) Ia aua neʻi galo, e tatau ona alofa lou alo iā Ieova mai i lona lava loto—ae e lē o lou loto. (Mata. 22:37) O lea, ia vaai auala e faamālō atu ai i lau tama mo mea lelei ua ia faia, ae ʻalofia le taulaʻi atu i mea e na te lē o faia. Ia talisapaia mea uma ua faia e Ieova. Ona tuu atu lea i lau tama e tali atu ia lava i le agalelei o Ieova.

Ia Faia e Avea o se Mea e Fiafia Ai

O le vala lona tolu e tāua mo se Tapuaʻiga a le Aiga ia taulau manuia, o le faia lea e avea o se mea e fiafia ai. E faapefea ona e faia lenei mea? Atonu o se isi taimi e mafai ona tou faalogologo i se tala faale-Tusi Paia, pe matamata ma talanoaina se ata vitiō ua saunia e Molimau a Ieova. Ia pe tou te faitau faatasi foʻi se vaega o le Tusi Paia, ma tofia atu se vaega i sui taʻitasi o le aiga.

E iai vaega i Le Olomatamata ma le Ala Mai! o loo saunia mai ai se faavae lelei mo talanoaga a le aiga. O se faataʻitaʻiga, e te ono faaaogā le mataupu o loo i le itulau e 31 o Ala Mai! taʻitasi, e faamatua faapea, “O le ā Sau Tali?” I lomiga o Le Olomatamata mo le lautele, o loo iai le mataupu “Mo le  ʻAutalavou.” O loo feauauaʻi na mataupu ma le faasologa o mataupu mo tama ma teine talavou, “Ia Aʻoaʻo Lau Fanau.”

O faasologa o mataupu “Ua Fesili Mai Talavou” i le Ala Mai! o le a fiafia faapitoa i ai mātua o talavou ua matutua. E lē gata i lea, aua neʻi galo le pusa, “Mea e Mafaufau i Ai.” E mafai ona faaaogā lenā pusa mo isi talanoaga a le aiga.

Peitaʻi, ia faaeteete ia aua neʻi avea le suʻesuʻega a le aiga, ma mea e faamalosia ai se tamaitiiti e tali le anoanoaʻi o fesili. O se faataʻitaʻiga, ua fautuaina mātua e faalaeiau a latou fanau, ia iai se api e tusi ai o latou manatu ma lagona e faatatau i se mataupu o loo talanoaina e le aiga, ma le auala e latou te faatatauina ai ia manatu i o latou olaga. Peitaʻi, aua le taumafai e faamalosia lau tama e faitau leotele mai mea ua ia tusia i lana api. O le faia o lenā mea, o le a faalotovaivai ai lau tama e tusi i lalo mea moni o loo i lona loto. Ia tuu atu i lau tama sina avanoa e fai ai ana lava mea. Mulimuli ane, e ono mafai ona latou talanoa atu iā te oe e faatatau i mea na latou tusia i lalo.

Pe afai e faia e lē aunoa le tapuaʻiga a lou aiga, ia aogā, ma faia e avea o se mea e fiafia ai, o le a matuā faamanuia Ieova i au taumafaiga. O lenei taimi faapitoa mo le aiga, o le a fesoasoani i ē e pele iā te oe ia malolosi faaleagaga.

[Pusa i le itulau 31]

Ia Fai i se Auala e Faagaee ai le Fiafia

“Pe a matou suʻesuʻe ma la ma fanau teine talavou, e ma te talanoaina ma laʻu tane le mataupu e sauniuni ai mo le sauniga a le faapotopotoga, ona tuu atu lea i la ma fanau teine e la te tusia le ata e taaofaʻi ai le lesona. E iai taimi e matou te toe faataʻitaʻi ai vaaiga i le Tusi Paia, pe faataʻitaʻi foʻi ni taulimaga mo le auaunaga i le fanua. E ma te taumafai e fai le suʻesuʻega ia talafeagai ma le matutua, ia fiafia, ia mautinoa, ma ia mālie.”—J.M., Iunaite Setete.

“Ina ia fesoasoani i le tama tama a laʻu suʻesuʻega faale-Tusi Paia, e malamalama i le tulaga na iai le faaaogāina o se tusi taai i taimi o le Tusi Paia, na ma faia se kopi o le tusi o Isaia, ina ua uma ona tapē le mataupu ma numera o fuaiupu. Na ma faafesootaʻia itulau ma faapipii itu taʻitasi i se mea e pei o se paipa. Ona taumafai lea o le tama e fai le mea na faia e Iesu i le sunako i Nasareta. Ua faamatala mai i faamaumauga i le Luka 4:16-21 e faatatau iā Iesu e faapea, “ua ia tatala le tusi [o Isaia] ma maua ai” le vaega o le tusi lea na ia suʻeina. (Isa. 61:1, 2) Ae peitaʻi, ina ua taumafai le tama e faia foʻi faapena, na faigatā iā te ia ona maua le Isaia 61, i le faaaogāina o le tusi taai umī e leai ni ona mataupu ma ni fuaiupu. I le fiafia i le tomai tele o Iesu i le faaaogāina o tusi taai, na faapea mai ai le tama: ‘E ese le poto o Iesu!’”—Y.T., Iapani.

[Ata i le itulau 30]

O faataʻitaʻiga aogā e fesoasoani i lau fanau, e feagai ai ma omiga mai aumea

[Ata i le itulau 31]

Taumafai ia avea le Tapuaʻiga a le Aiga i le afiafi o se mea e olioli ai