Fesili Mai le ʻAufaitau

Pe e talafeagai mo se tuafafine ona fai se ufiulu, pe a faaliliu mo se lauga faale-Tusi Paia i le gagana e faaaogā ai taga i sauniga faa-Kerisiano, fonotaga, po o tauaofiaga?

I le tulaga masani, e ao i se tuafafine Kerisiano ona fai sona ufiulu pe a ia taulimaina tiute tauave e masani ona faia e lana tane, po o se uso i le faapotopotoga. E ōgatasi lea ma le mataupu silisili o loo taʻua e le aposetolo o Paulo e faapea, “o se fafine e tatalo pe na te faia valoaga ae e lē ufiufia lona ulu, ua faamāina e ia lona ulu,” ona “o le ulu o le fafine o le tane.” (1 Kori. 11:3-10) Pe a fai e se tuafafine se ufiulu talafeagai i na tulaga, e avea lea o se faailoga o lona gauaʻi i le faatulagaga faatiokarate i totonu o le faapotopotoga Kerisiano.—1 Timo. 2:11, 12. *

Ae faapefea tulaga ia e faaliliu ai se tuafafine i le gagana e faaaogā ai taga, mo se uso o loo tauaaoina se lauga? O le mea moni, ua na ona ia faaliliuina faamatalaga mai le failauga i le aofia. O lona uiga, o aʻoaʻoga o loo ia avatu e lē mai iā te ia, ae e mai le uso lea o loo ia faaliliuina lana lauga. Ae peitaʻi, o le faaliliu i le gagana e faaaogā ai taga, e matuā ese lava mai le faaliliu mai le tasi gagana tautala i le isi gagana tautala. O gagana tautala, e taulaʻi atu le aofia i le failauga ae faalogo atu lava i le tagata faaliliu. E lē gata i lea, e ese mai i le faaliliu i le gagana e faaaogā ai taga, o tuafāfine e faaliliu i gagana tautala, e masani lava ona faatulaga ia lē avea ma taulaʻiga o tagata. I nisi taimi, e mafai ona latou filifili pe nofo i se nofoa a o faaliliu atu, ae afai e tū, e faasaga atu i le failauga nai lo le aofia. O lea la, e lē tau manaʻomia ai i se tuafafine o loo faaliliu i se gagana tautala ona fai sona ufiulu.

E lē gata i lea, ona o le suiga o le poto faaonapōnei  ua faaaogā, o lea la, pe a faaliliu lauga i le gagana e faaaogā ai taga, o le a sili atu ona matilatila mai le matafaioi a le tagata faaliliu. E masani ona faaalia mai foliga o le tagata faaliliu i se ʻie telē, ae atonu ua lē toe iloa atu foliga o le failauga. O le manatuaina o nei vala, e foliga mai ai ua talafeagai i se tuafafine o loo faaliliu i le gagana e faaaogā ai taga, ona iloa lona tulaga maulalo ifo o se tagata faaliliu e ala i le fai o sona ufiulu.

E faapefea i lenei toe teuteuga o taʻiala, ona aafia ai le faaliliu i le gagana e faaaogā ai taga, o vaega o le Aʻoga o le Faiva Faatiokarate, faataʻitaʻiga, ma tali a o faagasolo le Suʻesuʻega Faale-Tusi Paia a le Faapotopotoga, Sauniga o le Auaunaga, ma le Suʻesuʻega o le Olomatamata? Pe e tatau i se tuafafine o loo faaliliu i na vaega ona fai sona ufiulu? E foliga mai i nisi o tulaga, e lē manaʻomia ona faaaogā e se tuafafine se ufiulu, ona o tagata uma o loo i le aofia e malamalama, e lē o ia lea e faia le mataupu o le sauniga. O le tulaga lea, mo se faataʻitaʻiga, pe a ia faaliliuina tali mai le aofia, lauga a tuafāfine, po o ni faataʻitaʻiga. Ae peitaʻi, pe afai e na te faaliliuina lauga a uso a o faia sauniga, pe faaliliu mo le fai Suʻesuʻega o le Olomatamata po o le faisuʻesuʻega o le Suʻesuʻega Faale-Tusi Paia a le Faapotopotoga, pe e taulamua i le usuina o pese, e tatau ona fai sona ufiulu. A o faagasolo se sauniga, atonu e ono faaliliu se tuafafine mo uso, tuafāfine, fanau, ma toeaina. I le vaai atu i lenei tulaga, e sili atu ona talafeagai ona fai sona ufiulu i le sauniga atoa.

[Faaopoopoga i lalo]