Ia Faatāua Lau Vaega i le Faapotopotoga
Ia Faatāua Lau Vaega i le Faapotopotoga
“Ua faatulaga e le Atua itutino taʻitasi uma o le tino, e pei ona ia finagalo i ai.”—1 KORI. 12:18.
1, 2. (a) E faapefea ona iloa e iai i tagata uma se vaega i le faapotopotoga e mafai ona ia faatāuaina? (e) O ā fesili o le a iloiloina i lenei mataupu?
TALU mai le taimi o Isaraelu anamua, ua faaaogāina e Ieova le faapotopotoga e tausia ai faaleagaga ona tagata ma faatonutonuina ai. O se faataʻitaʻiga, ina ua faatoʻilalo e Isaraelu le nuu o Ai, na “faitauina e [Iosua] upu uma o le tulafono, o le manuia ma le malaia; e pei o mea uma ua tusia i le tusi o le tulafono . . . i luma o le faapotopotoga uma o Isaraelu.”—Iosua 8:34, 35.
2 I le uluaʻi senituri T.A., na faapea atu le aposetolo o Paulo i le toeaina Kerisiano o Timoteo, o le faapotopotoga Kerisiano o le “aiga o le Atua” ma “o le poutū ma le lagolago o le upu moni.” (1 Timo. 3:15) I aso nei o le “aiga” o le Atua, o le ʻauuso o Kerisiano moni i le lalolagi aoao. I le mataupu e 12 o lana uluaʻi tusi faagaeeina i le ʻauuso i Korinito, ua faatusa ai e Paulo le faapotopotoga i le tino o le tagata. E ui ina eseese vaega fai a tagata taʻitoʻatasi, ae e tāua uma. Na faapea mai o ia: “Ua faatulaga e le Atua itutino taʻitasi uma o le tino, e pei ona ia finagalo i ai.” Na ia taʻua foʻi o “o tatou itutino ua manatu i ai e faalētāua, ua tatou faatāuaina.” (1 Kori. 12:18, 23) O lea, i le aiga o le Atua, e lē sili le vaega a le isi Kerisiano i lo le isi. Ae e eseese. E faapefea la ona iloa la tatou vaega i le faatulagaga a le Atua, ma faatāuaina? O ā vala e aafia ai lea tulaga? Ma e faapefea ona ‘iloa e tagata uma lo tatou agaʻigaʻi i luma’?—1 Timo. 4:15.
E Faapefea Ona Faatāua la Tatou Vaega?
3. O le ā se auala e iloa ai la tatou vaega i le faapotopotoga ma faaalia ai lo tatou faatāuaina?
3 O se tasi o auala e iloa ai la tatou vaega i le faapotopotoga ma faaalia ai lo tatou faatāuaina, o le galulue autasi ma le “pologa faamaoni ma le faautauta,” ma lona sui le Vaega Pule. (Faitau le Mataio 24:45-47.) Ia iloilo po o tatou usitaia faatonuga mai le vasega o le pologa. O se faataʻitaʻiga, a o faagasolo tausaga ua aumaia faatonuga manino e faatatau i lāʻei ma teuga, i faafiafiaga, ma le faaaogā tatau o le Initaneti. Po o tatou utagia nei fautuaga lelei ma puipuia ai faaleagaga? Ae ā timaʻiga ia fai se faasologa o tapuaʻiga a le aiga? Po o tatou talia fautuaga ma faatulaga se afiafi e fai ai? Afai e te nofofua, po o faatulaga se taimi e te suʻesuʻe ai i le Tusi Paia? O le a faamanuia e Ieova i tatou taʻitoʻatasi faapea ma aiga pe a tatou usitaia taʻiala a le vasega o le pologa.
4. O le ā e ao ona manatunatu i ai pe a filifili i mea e fitoitonu iā i tatou?
4 Atonu e manatu nisi, o filifiliga i faafiafiaga ma lāʻei ma teuga, e fitoitonu i le tagata lava ia. Ae o le Kerisiano tuuina atu e faatāuaina lana vaega i le faapotopotoga, e lē fuaina lana filifiliga i sona manaʻoga. E ao ona faatāua le finagalo o Ieova e pei ona faaalia mai i lana Afioga, le Tusi Paia. Ia avea manatu o iai ma ‘sulu i o tatou vae, ma le malamalama i o tatou ala.’ (Sala. 119:105) E lelei foʻi ona manatunatu pe faapefea ona aafia la tatou faiva faapea ma isi, e lē gata i le faapotopotoga ae faapea le lautele, ona o a tatou filifiliga i mea e fitoitonu iā i tatou.—Faitau le 2 Korinito 6:3, 4.
5. Aiseā e ao ai ona tatou faaeteete ia lē maua i le agaga fia tutoʻatasi?
5 Ua pei “le agaga lea o loo galue i fanau e lē usiusitai” o le ʻea o loo salalau atu, ma ua tatou mānavaina. (Efe. 2:2) O lea agaga e ono tupu mai ai se manatu e tatou te lē manaʻomia le taʻitaʻiga a le faalapotopotoga a Ieova. Ia aua neʻi pei o Tioterifi, o lē e ‘leʻi taliaina ma le faaaloalo se mea mai le aposetolo o Ioane.’ (3 Ioa. 9, 10) E ao ona faaeteete ia lē maua i le agaga fia tutoʻatasi. Ia aua lava neʻi o tatou faia se mea po o ni tala e faaalia ai le lē migao i le auala o loo faaaogā e Ieova e fesootaʻi mai ai i aso nei. (Nu. 16:1-3) Ae ia tatou faatāua le faaeaga o le galulue autasi ma le vasega o le pologa. Pe e lē tatau ea ona tatou taumafai ia usitaʻi ma gauaʻi i ē o loo taʻimua iā tatou faapotopotoga?—Faitau le Eperu 13:7, 17.
6. Aiseā e ao ai ona tatou iloilo o tatou tulaga o iai?
6 O se isi auala e faaalia ai le faatāuaina o la tatou vaega i le faapotopotoga, o le iloilo lea o o tatou tulaga ma faia le mea sili e ‘faamamaluina ai la tatou galuega’ ma viia ai Ieova. (Roma 11:13) O nisi ua paeonia sauatoa. O isi ua galulue i vala faapitoa o ni misionare, ovasia femalagaaʻi, po o aiga Peteli i le lalolagi aoao. O loo galulue le tele o uso ma tuafāfine i le fausia o Maota mo Sauniga. O le toʻatele o tagata o Ieova o loo galulue malolosi auā le tausia o o latou aiga i le itu faaleagaga ma ia tele se sao i le talaʻiga i vaiaso taʻitasi. (Faitau le Kolose 3:23, 24.) E tatou te mautinoa, afai e tatou te fiafia e ofoina atu i tatou e auauna i le Atua ma le lotoatoa, o le a iai pea sa tatou vaega i lana faatulagaga.
Vala e Faalagolago i Ai
7. Faamatala pe faapefea ona faalagolago la tatou vaega i le faapotopotoga i o tatou tulaga.
7 E tāua ona iloilo o tatou tulaga o iai, ona e faalagolago la tatou vaega i le faapotopotoga i mea e mafai ona tatou faia. O se faataʻitaʻiga, e ese le vaega a se uso mai le vaega a se tuafafine. E faalagolago foʻi mea e tatou te mafai i le auaunaga a Ieova i lo tatou matua, malosi, ma isi vala. Ua faapea mai le Faataoto 20:29: “O le matagofie o tauleleʻa, o lo latou malosi lea; o le mamalu foʻi o toeaina, o le ulusinā lea.” E tele mea e mafaia e talavou o le faapotopotoga ona o lo latou malosi, ae e tele aogā o ē matutua ona o lo latou tomai faapea le poto masani. Ae ia manatua, e faalagolago mea uma e tatou te mafaia i le faalapotopotoga, i le agalelei faifua o Ieova.—Galu. 14:26; Roma 12:6-8.
8. E faapefea ona uunaʻia e o tatou faanaunauga mea e tatou te fai i le faapotopotoga?
8 O le isi vala e faalagolago i ai la tatou vaega i le faapotopotoga, e manino mai i se faataʻitaʻiga e faatatau i se ʻauuso talavou i le faapotopotoga. Ua iʻu nei a la aʻoga ma e tutusa o la tulaga. Sa matuā faalaeiauina i laʻua e o la mātua e paeonia pe a iʻu aʻoga. Ae ina ua iʻu, na amata le paeonia a le isi, ae faigaluega le isi. Aiseā ua eseese ai a la filifiliga? E faalagolago lava i le faanaunauga o le tagata. Na fai lava e le teine ia le mea o loo faanaunau e fai. Pe lē o le tulaga foʻi lea o le toʻatele o i tatou? E ao ona tatou mafaufau lelei i mea e tatou te mananaʻo e fai i le auaunaga a le Atua. Pe e mafai ona faateleina so tatou sao, e ui e manaʻomia ai le faia o ni fetuutuunaʻiga?—2 Kori. 9:7.
9, 10. O le ā e ao ona fai pe afai e lē o iā i tatou se uunaʻiga e faateleina se sao i le auaunaga a Ieova?
9 Ae faapefea pe afai e lē o iā i tatou se uunaʻiga e faateleina la tatou auaunaga iā Ieova i le faapotopotoga? Na tusi le aposetolo o Paulo i le ʻauuso i Filipi: “Auā o le Atua, o lē o loo galue i totonu iā te outou, e tusa ma lona finagalo malie, ina ia outou lotomalilie ma galulue i ai.” Ioe, e mafai e Ieova ona uunaʻia o tatou loto ma faanaunauga.—Fili. 2:13; 4:13.
10 Pe e lē tatau ea la ona tatou ole atu iā Ieova ina ia iā i tatou le manaʻo e fai lona finagalo? O le mea lenā na faia e Tavita le tupu o Isaraelu. Na ole atu o ia e faapea: “Ieova e, ia e faailoa mai iā te aʻu ou ala; ia e aʻoaʻo mai iā te aʻu i ou magāala. Ia e taʻitaʻi mai iā te aʻu i le mea moni mai iā te oe, ma aʻoaʻo mai iā te au, auā o oe o le Atua o loʻu olataga; ou te faatalitali iā te oe i le aso atoa.” (Sala. 25:4, 5) Ia e faia faapea e ala i le ole atu iā Ieova ia uunaʻia i tatou ia mananaʻo e faafiafia o ia. O le manatunatu i le olioli o Ieova le Atua ma lona Alo ona o la tatou auaunaga mo i laʻua, o le a tele ai lo tatou talisapaia o i laʻua. (Mata. 26:6-10; Luka 21:1-4) Ma o le a uunaʻia ai i tatou e ole atu iā Ieova ia iai le manaʻo e agaʻigaʻi i luma faaleagaga. Ua faaaʻoaʻo mai e le perofeta o Isaia le uiga e ao ona tatou ati aʻe. Ina ua ia faalogo o fesili Ieova e faapea: “O ai ea ou te auina atu? o ai foʻi e alu atu mo i matou?” na ia tali atu: “O aʻu lenei, ina auina atu aʻu.”—Isa. 6:8.
Le Auala e Agaʻi ai i Luma
11. (a) Aiseā e manaʻomia ai ona aapa atu uso mo faaeaga i le faalapotopotoga? (e) E faapefea ona ausia e se uso faaeaga e auauna ai?
11 E 289,678 tagata na papatisoina i le tausaga faale-auaunaga 2008 i le lalolagi aoao, ma ua manaʻomia tele ai uso agavaa e taʻimua. E ao faapefea ona tali atu uso i lea manaʻoga? E ala i le taumafai malosi ia ausia agavaa o loo i le Tusi Paia mo auauna o le faiva ma toeaina. (1 Timo. 3:1-10, 12, 13; Tito 1:5-9) E faapefea ona ausia e se uso agavaa o loo i le Tusi Paia. E ala i le toʻaga e talaʻi, filigā e faatino ona tofiga i le faapotopotoga, taumafai e faaleleia ana tali i sauniga, ma naunau e fesoasoani i isi. Ua faaalia ai e na te faatāuaina lana vaega i le faapotopotoga.
12. E faapefea ona faaalia e talavou lo latou maelega mo le upu moni?
12 O le ā e faia e uso, aemaise ē e talavou, ia agaʻigaʻi ai i luma i le faapotopotoga? Ia taumafai e faateleina lo latou “poto uma ma le malamalama faaleagaga” e ala i le suʻesuʻe o le Tusi Paia. (Kolo. 1:9) O le toʻaga e suʻesuʻe le Afioga a le Atua ma faia se sao i sauniga e aogā i lea tulaga. E mafai foʻi e uso talavou ona agaʻi i luma e ala i le taumafai ia agavaa e ulu atu i ‘le avanoa telē ua tuuina mai e fai ai le galuega’ i vala eseese o le auaunaga faataimi atoa. (1 Kori. 16:9) Pe a avea le auaunaga iā Ieova ma sini, o le a matuā faamalieina ma faamanuiaina ai foʻi.—Faitau le Failauga 12:1.
13, 14. O le ā le auala e faaalia ai e tuafāfine e latou te faatāuaina la latou vaega i le faapotopotoga?
13 E mafai foʻi e tuafāfine ona latou faatāuaina le faaeaga e faataunuuina ai le Salamo 68:11. Ua faapea mai le mau: “Na tulei mai le afioga a le Alii; e tele ʻau [“o fafine,” NW ] o ē na talaʻiina.” O se tasi o auala iloga ua faaalia ai e tuafāfine le talisapaia o la latou vaega i le faapotopotoga, o le auai lea i le galuega o le faia ma soo. (Mata. 28:19, 20) O lea, o le faia o se sao atoatoa i le galuega talaʻi ma fiafia e faataulaga mo lea galuega, ua latou faamaonia ai le faatāuaina o la latou vaega i le faapotopotoga.
14 Na tusi Paulo iā Tito e faapea: “O fafine ua matutua, ia faapena foʻi ona pei a latou amio o tagata paia, . . . o ē e aʻoaʻo atu i mea lelei; ina ia fesoasoani i fafine talavou ia toe sagatonu o latou mafaufau, ina ia alolofa i a latou tane ma a latou fanau, ia mafaufau lelei, ia amio mamā, ia fai feʻau i le fale, ia amiolelei, ia gauaʻi atu i a latou lava tane, ina neʻi upuleagaina le afioga a le Atua.” (Tito 2:3-5) E tele taaʻiga lelei ua faia e tuafāfine taʻumatuaina i le faapotopotoga! Ua latou faia se faaaʻoaʻoga lelei e ala i le faaaloalo i uso o loo taʻimua, faapea le filifili lelei o lāʻei ma teuga ma faafiafiaga, ma faaalia ai e tāua tele iā i latou la latou vaega i le faapotopotoga.
15. O le ā e faia e se tuafafine nofofua e fesagaʻia ai lagona tuua toʻatasi?
15 I nisi taimi e faigatā i se tuafafine nofofua ona iloa lana vaega i le faapotopotoga. Na faapea mai se tuafafine ua iai lea faalogona: “Ou te lagona i nisi taimi le tuua toʻatasi ona ou te nofofua.” Na ia faamatala le auala ua ia fesagaʻia ai lea tulaga: “Na aogā iā te aʻu le tatalo ma le suʻesuʻe ia iloa ai laʻu vaega i le faapotopotoga. Ou te suʻesuʻe po o le ā le silafaga a Ieova iā te aʻu. Ona ou taumafai lea e fesoasoani i isi i le faapotopotoga, ma ou manatunatu ai i isi ae lē na o aʻu.” I le Salamo 32:8, na fetalai Ieova iā Tavita: “Ou te faatonu iā te oe, ma ou vaai iā te oe.” Ioe, o loo naunau mai Ieova i ana auauna uma e aofia ai ma tuafāfine nofofua, ma o le a ia fesoasoani i tagata uma ina ia iloa la latou vaega i le faapotopotoga.
Ia Tumau Ai!
16, 17. (a) Aiseā ua avea ai le taliaina o le valaaulia a Ieova ia fai ma vaega o lana faalapotopotoga, ma filifiliga sili ua tatou faia? (e) E faapefea ona tatou tumau i la tatou vaega i le faalapotopotoga a Ieova?
16 Ua tosina atu ma le alofa e Ieova ana auauna uma ina ia iai se faiā ma ia. Na faapea mai Iesu: “E lē mafai ona sau se tagata iā te aʻu pe a lē tosina mai o ia e le Tamā o lē na auina mai aʻu.” (Ioa. 6:44) Ua valaaulia e Ieova i tatou mai le faitau piliona o tagata i le lalolagi ina ia avea ma vaega o lana faapotopotoga i aso nei. O le talia o lenā valaau, o le filifiliga sili lea ua tatou faia. Ua tatou maua ai se olaga uigā. Maʻeu le olioli ma le faamalieina ua tatou maua ona ua iai sa tatou vaega i le faapotopotoga!
17 Na faapea mai le faisalamo: “Ieova e, ou te fiafia i le mea e tū ai lou maota.” Na pese foʻi o ia: “Ua tū oʻu vae i le mea laugatasi; ou te faamanū atu iā Ieova i totonu o faapotopotoga.” (Sala. 26:8, 12) Ua iai iā i tatou uma se vaega mai i le Atua moni, i lana faalapotopotoga. O le mulimuli pea i le taʻitaʻiga a le Atua ma ia tele mea e fai i lana auaunaga, e tatou te tumau ai i la tatou vaega tāua i le faatulagaga a Ieova.
Pe E te Manatua?
• Aiseā ua talafeagai ai ona faapea atu e iai se vaega a Kerisiano uma i le faapotopotoga?
• E faapefea ona faaalia e tāua iā i tatou la tatou vaega i le faalapotopotoga a le Atua?
• O ā vala e faalagolago i ai la tatou vaega i le faapotopotoga?
• E faaalia faapefea e talavou Kerisiano ma ē matutua e latou te faatāua la latou vaega i le faatulagaga a le Atua?
[Fesili mo le Suʻesuʻega]
[Ata i le itulau 16]
E faapefea ona aapa atu uso mo faaeaga i le faapotopotoga?
[Ata i le itulau 17]
E faapefea ona faaalia e tuafāfine e latou te faatāua la latou vaega i le faapotopotoga?