Ia Tuputupu Pea le Alofa Faaleuso

“Ia savavali i le alofa e pei foʻi ona alofa o le Keriso iā te outou.”—EFE. 5:2.

1. O le ā le uiga tāua o ona soo na taʻua e Iesu?

UA ILOGA Molimau a Ieova i lo latou talaʻia o le tala lelei o le Malo o le Atua i lea fale ma lea fale. Peitaʻi, na taʻua e Iesu le uiga faa-Kerisiano o le a iloa ai ona soo moni. Na fetalai o ia: “Ua ou tuuina atu iā te outou le poloaʻiga fou, ina ia outou fealofani, e pei ona ou alofa atu iā te outou, ia fealofani foʻi outou. O le mea lea e iloa ai e tagata uma o oʻu soo outou, pe afai tou te fealofani.”—Ioa. 13:34, 35.

2, 3. E faapefea ona aafia i latou e auai iā tatou sauniga ona o lo tatou alofa faaleuso?

² E lē maua i se isi mea le alofa e pei ona iai i le ʻauuso Kerisiano moni. E pei ona maneta e le sila le uʻamea, e faapena ona autasia auauna a Ieova i le alofa, ma tosina mai ai tagata fiafia moni i le tapuaʻiga moni. O se faataʻitaʻiga, o se alii Cameroon e igoa iā Maselino, na tauaso ona o se mea na tupu i lana galuega. Na salalau le tala ua māfua ona tauaso ona o ia o se faataulāitu. E leʻi faamāfanafanaina o ia, ae na tuliesea e le faifeʻau ma le ʻaulotu. Na valaaulia o ia e se Molimau a Ieova e auai i se sauniga, ae sa popole o ia ina neʻi o latou lē fiafia foʻi iā te ia.

³ Na fiafia Maselino ina ua auai i le Maota mo Sauniga ona sa māfana le faafeiloaʻiga o ia ma faamāfanafanaina ai i upu moni o le Tusi Paia. E na te leʻi toe misia se sauniga, ma na agaʻigaʻi i luma lana suʻesuʻega ma sa papatisoina i le 2006. I le taimi nei, ua ia taʻu atu le upu moni i ona aiga ma tuaoi ma faia ni suʻesuʻega faale-Tusi Paia. O le faanaunauga o Maselino, ia maua e tagata suʻesuʻe le alofa ua ia maua i tagata o le Atua.

4. Aiseā e ao ai ona utagia le timaʻiga a Paulo “ia savavali i le alofa”?

⁴ Maʻeu le manaia o le alofa faaleuso, ae e ao lava ona faia la tatou vaega ina ia tumau ai. Seʻi faapea o loo mumū manaia se afi i le pō ma māfanafana ai tagata uma. Ae afai e lē lafoina e tagata ni fafie i le afi, o le a pē. O le a mou atu foʻi le alofa o loo fusia ai le faapotopotoga pe a lē taumafai Kerisiano uma ia faamalosia. O le ā e ao ona tatou faia? Ua tali mai le aposetolo o Paulo: “Ia savavali i le alofa e pei foʻi ona alofa o le Keriso iā te outou, ma foaʻi atu lona ola mo outou, o le taulaga ma le togiola i le Atua, o le mea e manogi lea.” (Efe. 5:2) O le fesili o le a tatou iloiloina, O ā auala e faaauau ai ona ou savali i le alofa?

“Ia Faalautele Atu o Outou Loto”

5, 6. Aiseā na faalaeiau ai e Paulo Kerisiano i Korinito “ia faalautele atu o outou loto”?

⁵ Na tusi le aposetolo o Paulo i Kerisiano i Korinito e faapea: “Kerisiano Korinito e, ua matou tautatala saʻo atu iā te outou, ma ua faalautele atu o matou loto iā te outou. Matou te lē o taofiofia lo matou alofa iā te outou, a o outou lava ua taofia le faaalia mai o lo outou alofa faapelepele. O lea, ou te tautala atu ai iā te outou e pei ona ou tautala i le fanau, ia outou faia e pei ona matou faia, ia faalautele atu o outou loto.” (2 Kori.  6:11-13) Aiseā na faalaeiau ai e Paulo le ʻauuso i Korinito ina ia faalautele atu lo latou alofa?

⁶ Seʻi mātau le amataga mai o le faapotopotoga i Korinito anamua. Na taunuu Paulo i Korinito i le tau e afu ai mea i le 50 T.A. Na faigatā le amataga o lana galuega talaʻi, ae e leʻi faavaivai ai. E leʻi umi ae toʻatele nisi na faatuatua i le tala lelei. E “tausaga ma masina e ono” o galue malosi Paulo i le aʻoaʻoina ma le faamalosia o le faapotopotoga fou. Na alofa tele o ia i Kerisiano i Korinito. (Galu. 18:5, 6, 9-11) Ma na latou alolofa ma faaaloalo iā te ia. Peitaʻi, sa leʻi māfana ane nisi iā te ia. Atonu e leʻi fia talia foʻi e nisi ana fautuaga tuusaʻo. (1 Kori. 5:1-5; 6:1-10) Ma o nisi atonu sa faalogo i tala taufaaleaga a “aposetolo silisili.” (2 Kori. 11:5, 6) Na manaʻo Paulo ia alolofa moni ona uso ma tuafāfine iā te ia. O lea na ia augani atu ai “ia faalautele o latou loto” e ala i le māfuta atu iā te ia ma isi uso talitonu.

7. E faapefea ona “faalautele atu o tatou loto” i le alofa faaleuso?

⁷ Ae faapefea i tatou? E faapefea ona “faalautele atu o tatou loto” i le alofa faaleuso? O le tulaga masani le fiafia i ē e tatou te tupulaga pe nuu faatasi. Ma e faifaimea faatasi i latou e tutusa mea e fiafia i ai. Ae afai ua faigatā ona tatou faamasani i isi ona e eseese mea e tatou te fiafia i ai, e ao ona “faalautele atu o tatou loto.” O se mea lelei le fesili ifo e faapea: ‘Po o seāseā ona matou talaʻi pe tafafao faatasi ma isi o le ʻauuso ona ou te lē masani tele ai? I le Maota mo Sauniga, pe e seāseā ona ou talanoa i ē e fou mai ona ou te manatu seʻi agaʻi i luma ona ou faauō lea i ai? Po o ou faafeiloaʻi atu i ē matutua ma ē iti i le faapotopotoga?’

8, 9. I le fautuaga a Paulo i le Roma 15:7 e uiga i le talia e le tasi o le isi, ua faapefea ona aogā ina ia tupu tele ai lo tatou alofa faaleuso?

⁸ E tusa ai o le faafeiloaʻia o isi, e aogā upu a Paulo o loo i le Roma e atiaʻe ai se vaaiga saʻo i o tatou uso talitonu. (Faitau le Roma 15:7.) O le upu Eleni ua faaliliuina i le “talia,” o lona uiga, “o le talia ma le agalelei i se uiga talimālō, e mafai ona auai iā tatou faatasiga ma faauōga.” I taimi o le Tusi Paia, pe a tali mālō se tagata, e faailoa atu lona fiafia e feiloaʻi ma i latou. I se uiga faafaatusa, ua faapena ona talia i tatou e Keriso ma ua uunaʻia ai i tatou ia faaaʻoaʻo iā te ia i le faafeiloaʻia o uso tapuaʻi.

⁹ Pe a tatou faafeiloaʻi le ʻauuso i le Maota mo Sauniga ma isi faatasiga, ia uaʻi atu i ē e seāseā feiloaʻi pe talanoa i ai. E lelei pe a faaalu sina taimi e talanoa ai ma i latou. I le sauniga e sosoo ai, ia faia foʻi faapea i isi. E lē umi lava ae lelei ma māfana a tatou talanoaga ma le tele o o tatou uso ma tuafāfine. Aua le popole pe afai e lē mafai ona talanoa i tagata uma. E lē tatau i se isi ona faaseā pe  a lē mafai ona tatou faafeiloaʻi atu iā i latou i sauniga uma.

10. O le ā le avanoa tāua ua iai i tagata uma o le faapotopotoga, ma e faapefea ona faaaogā lelei?

¹⁰ O le faafeiloaʻi atu i isi o le laasaga muamua lea i le talia o i latou, ona e maua ai talanoaga fiafia ma faauōga tumau. Pe a feiloaʻi ma talatalanoa le ʻauuso i fonotaga ma tauaofiaga, ua iai foʻi ma le faamoemoe ia toe feiloaʻi i le lumanaʻi. Ua masani ona lelei faauōga a ē e tauofo e fau Maota mo Sauniga po o ē e fesoasoani i taimi o mala ona ua latou vaaia uiga lelei o isi a o galulue faatasi. I le faalapotopotoga a Ieova e tele avanoa e tatou te maua ai ni uō e lelei ma tumau. Afai e “faalautele atu o tatou loto,” o le a tele a tatou uō e maua ma tupu tele ai le alofa o loo fusia ai i tatou i le tapuaʻiga moni.

Faaavanoa Le Taimi mo Isi

11. O le ā le faaaʻoaʻoga na faataatia e Iesu i le Mareko 10:13-16?

¹¹ Ia taumafai Kerisiano uma ia pei o Iesu i ona uiga faaleuō ma faigofie ona talanoa atu i ai. Seʻi mātau upu a Iesu i ona soo ina ua latou taofi mātua ia lē aumaia a latou fanau iā te ia. Na ia faapea atu: “Tuu ai pea tamaiti e ō mai iā te aʻu, ae aua le taofia i latou. Auā ua fai le malo o le Atua ma tofi o ē e pei o nei tamaiti.” Ona “ia tago atu lea ma fusi i tamaiti, ua faamanuia iā i latou ma paʻi atu ona lima iā i latou.” (Mare. 10:13-16) E mautinoa sa fiafia tele nei tamaiti ina ua faaalia e le Faiaʻoga Sili le alofa iā i latou!

12. O ā vala e taofia ai lo tatou talatalanoa i isi?

¹² E ao i Kerisiano uma ona fesili ifo, ‘Po o ou faaavanoa aʻu mo isi, po o foliga atu ou te pisi?’ E oo lava i mea e leai se leaga, ae e ono taofia ai le lelei o se talanoaga. O se faataʻitaʻiga, afai e masani ona tatou talanoa i telefoni feaveaʻi pe faalogo i pese i mea faalogo a o faatasitasi ma isi, atonu o le a manatu nisi e tatou te lē o fiafia atu. Afai e vāai mai isi o loo tatou pisi i se komepiuta, atonu e manatu ai e tatou te lē o fia talanoa. E moni, e iai taimi “e faalologo ai.” Ae a tatou faatasitasi loa ma isi, o le taimi lea “e tautala ai.” (Fai. 3:7) Atonu e faapea mai nisi, “Ou te fiafia lava aʻu na o aʻu” pe “Ou te lē o fia talanoa.” Peitaʻi, o le taumafai e talatalanoa i isi e ui e lē o fia talanoa, e faaalia ai o loo iā i tatou le alofa “e lē saʻili mo lona lava lelei.”—1 Kori. 13:5.

13. O le ā le uiga sa faalaeiau e Paulo Timoteo ia iai e faatatau i uso ma tuafāfine Kerisiano?

¹³ Na faalaeiau e Paulo Timoteo ia faaaloalo i tagata uma o le faapotopotoga. (Faitau le 1 Timoteo 5:1, 2.) E ao foʻi iā i tatou ona feagai ma Kerisiano matutua e pei o ō tatou mātua, ma Kerisiano talavou e pei o ō tatou uso ma tuafāfine moni. A iai lenā uiga iā i tatou, o le a lē lagona ai e o tatou uso ma tuafāfine e faapea, ua pei i latou o ni tagata ese.

14. O ā aogā o le talatalanoa ma isi i mea e atiaʻe ai?

¹⁴ A o tatou talanoa ma isi i mea e atiaʻe ai, ua fai ai so tatou sao i lo latou lelei faaleagaga ma o latou faalogona. E manatua ma le fiafia e se uso e galue i se lālā taimi o lona pōpōfou, ona sa masani i nisi o ē e matutua i Peteli ona talatalanoa atu iā te ia. O ā latou faalaeiauga na ia lagona ai le avea moni o ia ma se tasi o le aiga Peteli. Ua taumafai nei o ia e faaaʻoaʻo iā i latou ma talatalanoa ma isi o le aiga Peteli.

E Aogā le Lotomaulalo e Tausi ai le Filemu

15. E faapefea ona iloa e iai taimi e tatou te feeseeseaʻi ai ma isi?

¹⁵ E foliga mai na faigatā ona faalelei se feeseeseaʻiga a Evotia ma Sunetui, o ni tuafāfine Kerisiano i Filipi anamua. (Fili. 4:2, 3) Na iloa e isi le finauga a Paulo ma Panapa,  lea na la ō eseese ai mo sina taimi. (Galu. 15:37-39) Ua faaalia i nei faamaumauga, e iai taimi e tatou te feeseeseaʻi ai ma isi. Ua aumaia e Ieova le fesoasoani e toe faaleleia ai feeseeseaʻiga ma toe sologa lelei ai faauōga. Ae e iai se mea o loo ia manaʻomia mai iā i tatou.

16, 17. (a) E faapefea ona aogā le lotomaulalo e foʻia ai feeseeseaʻiga? (e) Ua faapefea ona faaalia le tāua o le lotomaulalo i le tala iā Iakopo ma Esau,?

¹⁶ Seʻi faapea o lea o le a lua malaga ma lau uō i se taavale. A o leʻi alu le malaga, e ao ona faaaogā le ki e faaola ai le taavale. E faapena foʻi le toe faalelei o se feeseeseaʻiga ma se isi, e iai le uiga e manaʻomia. O lea uiga, o le lotomaulalo. (Faitau le Iakopo 4:10.) Ua faaalia i le faataʻitaʻiga i le palakalafa o loo sosoo mai, o le lotomaulalo e uunaʻia ai i latou o feeseeseaʻi ina ia faatatau taʻiala mai le Tusi Paia.

¹⁷ Ua luasefulu tausaga talu ona maua e Iakopo le tofi o le ulumatua, ma na manaʻo ai lona uso o Esau e fasiotia o ia. Ua lata le taimi e feiloaʻi ai le ʻauuso, ma na ‘mataʻu tele ai Iakopo, ma ua atuatuvale,’ ona atonu lava o le a faaoolima Esau iā te ia. O lea, na faia ai e Iakopo se mea e leʻi faatalitalia e Esau. Ina ua lalata atu Iakopo i lona uso, na “ifo toʻele” iā te ia. O le ā le mea na tupu? “Ona momoʻe mai lea o Esau e faafetaiaʻi mai iā te ia, ua fusi iā te ia, ma punou i lona ua, ma feasogi ma ia; ona la fetagisi ai lea.” Ua uma foʻi le fia taui ma sui o Esau. Na teʻa lona ita ona o le faaalia e Iakopo o le lotomaulalo.—Kene. 27:41; 32:3-8; 33:3, 4.

18, 19. (a) Pe a tatou feeseeseaʻi ma isi, aiseā e tāua ai le tausolomua e faatatau le fautuaga a le Tusi Paia? (e) Aiseā e lē tatau ai ona tatou fiugofie pe a lē talia mai lo tatou faalelei atu i se isi?

¹⁸ O loo i le Tusi Paia fautuaga lelei e foʻia ai feeseeseaʻiga. (Mata. 5:23, 24; 18:15-17; Efe. 4:26, 27) * Ae e faigatā ona faalelei pe afai e lē lotomaulalo e faatatauina nei fautuaga. E lē foʻia se feeseeseaʻiga i le faatali ia muamua ona lotomaulalo le isi tagata, ae e ao foʻi ona tatou lotomaulalo.

¹⁹ Afai e lē taulau a tatou taumafaiga ia maua le filemu, aua le fiugofie. Atonu o loo tau faaleleia faalogona o le isi tagata. Na faalataina Iosefa e ona uso ma na mavae se taimi umi ona latou toe feiloaʻi lea, ae ua avea Iosefa ma palemia o Aikupito. Peitaʻi,  ua suia uiga o uso o Iosefa, ma na latou talosaga atu ia faamagaloina i latou. Na faia faapea e Iosefa, ma na maua e le fanau a Iakopo le faaeaga e avea ma nuu e tauaveina le suafa o Ieova. (Kene. 50:15-21) O le tausia o le filemu ma o tatou uso ma tuafāfine, e tatou te saosaolaumea ai i le autasi ma le fiafia o le faapotopotoga.—Faitau le Kolose 3:12-14.

Ia Tatou Alolofa “i Gaoioiga ma le Upu Moni”

20, 21. O le ā le lesona e tatou te aʻoaʻoina i le mulumuluina e Iesu o vae o ona aposetolo?

²⁰ Na fetalai atu Iesu i ona aposetolo a o lata i lona maliu: “Ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.” (Ioa. 13:15) Faatoʻā uma ona ia mulumuluina vae o le toʻa 12. E leʻi faia e Iesu lea mea ona o se tū masani po o lona agalelei. A o leʻi faamatalaina e Ioane le mulumuluina o o latou vae, na ia faapea mai: “Ua alofa Iesu i ona soo i le lalolagi, ma ua alofa iā i latou e oo i le gataaga.” (Ioa. 13:1) Na uunaʻia Iesu e faia se auaunaga sa masani ona faia e se pologa ona o lona alofa i ona soo. Sa tatau ai ona latou lotomaulalo e faia mea lelei mo le isi. Ioe, e ao ona uunaʻia i tatou e le alofa moni faaleuso e faaalia ai le alofa ma le manatunatu i o tatou uso ma tuafāfine Kerisiano uma.

²¹ Na malamalama le aposetolo o Peteru i le uiga o le mulumuluina e le Alo o le Atua o ona vae. O lea, na ia faapea mai: “Talu ai ua faamamāina o outou olaga e ala i le usiusitai i le upu moni, lea e iʻu ai i le alofa faamaoni o uso, ia matuā fealofani mai i o outou loto.” (1 Pete. 1:22) Na mulumuluina foʻi e le Alii vae o le aposetolo o Ioane, ma na faapea mai Ioane: “Le fanau e, aua neʻi o tatou alolofa tau o le upu ma le gutu, ae e ala foʻi i gaoioiga ma le upu moni.” (1 Ioa. 3:18) Ia uunaʻia foʻi i tatou e o tatou loto e faailoa atu lo tatou alofa i le ʻauuso e ala iā tatou mea e fai.

[Faaopoopoga i lalo]

Pe E te Manatua?

• O ā auala e “faalautele atu [ai] o tatou loto” i le alofa o le tasi i le isi?

• E faapefea ona faaavanoa lou taimi mo isi?

• E faapefea ona aogā le lotomaulalo ia tausia ai le filemu?

• Aiseā e uunaʻia ai i tatou ia alolofa i o tatou uso talitonu?

[Fesili mo le Suʻesuʻega]

[Ata i le itulau 21]

Ia faafeiloaʻi ma le māfana o tatou uso

[Ata i le itulau 23]

Ia faaavanoa lou taimi mo isi