O le ā o Ta‘u Atu e Au Tatalo e Uiga iā te Oe?
O le ā o Taʻu Atu e Au Tatalo e Uiga iā te Oe?
“Le faafofoga tatalo e, e ō atu iā te oe tagata uma lava.”—SALA. 65:2.
1, 2. Aiseā e mafai ai e auauna a Ieova ona tatalo atu ma le mautinoa iā te ia?
E FAAFOFOGAINA pea e Ieova ōlega a ana auauna faamaoni. E tatou te mautinoa e faafofoga mai o ia iā i tatou. E tusa lava pe tatalo atu i le Atua le faitau miliona o Molimau a Ieova i le taimi e tasi, e mafai lava e Ieova ona faafofoga mai iā i latou taʻitoʻatasi.
2 I lona mautinoa na faafofoga mai le Atua i ana ōlega, na pese ai le faisalamo o Tavita e faapea: “Le faafofoga tatalo e, e ō atu iā te oe tagata uma lava.” (Sala. 65:2) Na taliina tatalo a Tavita ona o ia o se tagata tapuaʻi faamaoni o Ieova. E ao ona tatou fesili ifo iā i tatou lava: ʻPo o faaalia i aʻu ʻaiʻoiga ou te faamoemoe iā Ieova, ma manatu mamafa i le tapuaʻiga mamā? O le ā o taʻu atu e aʻu tatalo e uiga iā te aʻu?’
Tatalo Atu iā Ieova ma le Faamaulalo
3, 4. (a) Pe a tatou tatalo, o le ā le uiga e tatau ona iā i tatou? (e) O le ā e ao ona fai pe a tatou atuatuvale i le “manatunatu” i se agasala matuiā?
3 Pe afai tatou te mananaʻo e taliina a tatou tatalo, e ao ona tatou tatalo atu i le Atua ma le faamaulalo. (Sala. 138:6) E ao ona tatou ōle atu iā Ieova e suʻesuʻe mai i tatou, e pei ona faia e Tavita ina ua ia faapea atu: “Le Atua e, ia e suʻesuʻe mai iā te aʻu, ma ia e silafia loʻu loto; tofotofo mai ia iā te aʻu, ma ia e silafia oʻu manatunatu; ma ia e silafia po o iā te aʻu se ala e tigā ai; ma e taʻitaʻiina mai aʻu i le ala o le faavavau.” (Sala. 139:23, 24) Ia lē gata e tatou te tatalo, ae ia gauaʻi atu foʻi a o suʻesuʻeina i tatou e le Atua, ma gauaʻi i fautuaga a lana Afioga. E taʻitaʻia i tatou e Ieova i “le ala o le faavavau,” ma fesoasoani iā i tatou e tuliloa se ala e tau atu i le ola e faavavau.
4 Ae faapefea pe a tatou atuatuvale i le “manatunatu” i se agasala matuiā na faia? (Faitau le Salamo 32:1-5.) O le taumafai e onosaia se lotofuatiaifo ua ōia, e tatou te vaivai ai e pei o se laau ua mamae i se tau vevela. Ona o lana agasala, na mou atu ai le olioli o Tavita ma atonu na oo ai ina maʻi. Ae maʻeu se mapusaga na ia maua ina ua taʻutino atu lana agasala i le Atua! Seʻi manatu i le olioli o Tavita ina ua “faamagaloina lona solitulafono,” ma ua faamagalo o ia e Ieova. O le taʻutino o le agasala i le Atua e aumaia ai le mapusaga, ma o le fesoasoani a toeaina Kerisiano, e aogā e toe faafoʻisia ai le tulaga mālōlōina faaleagaga o se tagata fai mea sesē.—Faata. 28:13; Iako. 5:13-16.
Faatoga Atu i le Atua ma Faafetaia o Ia
5. O le ā le uiga o le faatoga atu iā Ieova?
5 Po o le ā lava le māfuaaga e tatou te popole ai, e ao ona tatou faatatauina le fautuaga a Paulo e faapea: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.” (Fili. 4:6) “O le faatoga,” o lona uiga “ia ōle atu ma le faamaulalo.” E ao ona tatou faatoga atu iā Ieova mo le fesoasoani ma le taʻitaʻiga, aemaise lava i tulaga e lamatia pe sauāina ai.
6, 7. O ā māfuaaga e ao ai ona faaaofia le faafetai i a tatou tatalo?
6 Pe afai e tatou te tatalo na o taimi e tatou te manaʻomia ai se mea, o le ā ua taʻu atu ai e uiga i uunaʻiga o loo iā i tatou? Na faapea mai Paulo e ao ona faailoa atu i le Atua o tatou manaʻoga, “atoa ma le faafetai.” E mautinoa ua iā i tatou māfuaaga e faafetai atu ai e pei o Tavita, o lē na faapea atu: “Ieova e, e ou le silisili ese, ma le malosi, ma le matagofie, ma le mamalu, ma le malualii; auā o iā te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava. . . . lo matou Atua e, ua matou faafetai atu iā te oe, ma vivii atu i lou suafa mamalu.”—1 No. 29:11-13.
7 Na faafetai atu Iesu i le Atua mo meaʻai ma le falaoa ma le uaina na faaaogā i le Talisuaga Afiafi a le Alii. (Mata. 15:36; Luka 22:18, 19) E lē gata ia faailoa atu se lotofaafetai faapena, ae e ao foʻi ona tatou “vivii atu . . . iā Ieova” ma le lotofaafetai mo “ona vavega na fai i le fanau a tagata,” o ana “faamasinoga tonu,” ma ana afioga po o feʻau o loo i le Tusi Paia.—Sala. 107:15; 119:62, 105.
Ia Tatalo mo Isi
8, 9. Aiseā e ao ai ona tatou tatalo mo uso Kerisiano?
8 E mautinoa e tatou te tatalo mo i tatou, ae e ao ona faaaofia ai isi i a tatou tatalo—e oo lava i Kerisiano e tatou te lē iloa o latou igoa. E ui lava e leʻi iloa e le aposetolo o Paulo uso talitonu uma i Kolose, ae na ia tusi e faapea: “Matou te faafetai e lē aunoa i le Atua le Tamā o lo tatou Alii o Iesu Keriso, pe a matou tatalo mo outou, talu ai na matou faalogo i lo outou faatuatua ona o Keriso Iesu, ma lo outou alofa mo le ʻaupaia uma.” (Kolo. 1:3, 4) Sa tatalo foʻi Paulo mo Kerisiano i Tesalonia. (2 Tesa. 1:11, 12) O na ituaiga tatalo e telē se mea e taʻu atu ai e uiga iā i tatou, ma le auala e tatou te manatu ai i o tatou uso ma tuafāfine i le faatuatua.
9 O a tatou tatalo mo Kerisiano faauuina ma a latou aumea, o “isi mamoe,” e taʻu atu ai lo tatou manatu mamafa i le faalapotopotoga a le Atua. (Ioa. 10:16) Na talosaga atu Paulo i uso tapuaʻi, ia tatalo ina ia ‘maua le fesoasoani e mafai ai ona ia tautala atu ina ia faailoa atu le mea lilo paia o le tala lelei.’ (Efe. 6:17-20) Po o tatou tatalo faapena mo isi Kerisiano?
10. O le ā le aafiaga iā i tatou pe a tatalo mo isi?
10 O le tatalo mo isi e mafai ona suia ai o tatou uiga iā i latou. Pe afai e tatou te lē o fiafia patino i se tagata ae o loo tatou tatalo mo ia, e faapefea la ona tatou lē alolofa i lenā tagata? (1 Ioa. 4:20, 21) O nei ituaiga tatalo e mafai ona atiaʻe ma faaleleia atili ai le autasi ma o tatou uso. E lē gata i lea, o na tatalo e faaalia ai o loo iā i tatou le alofa e pei ona sa iā Keriso. (Ioa. 13:34, 35) O lenā uiga o se vaega o le fua o le agaga o le Atua. Po o taʻitoʻatasi i tatou ma tatalo mo le agaga paia, ma talosaga atu iā Ieova e fesoasoani mai iā i tatou e faaalia le fua o le agaga, e iai le alofa, olioli, filemu, faapalepale, agalelei, mataalofa, faatuatua, agamalu, ma le amio pulea? (Luka 11:13; Kala. 5:22, 23) Pe afai o faia faapea, e faaalia atu i a tatou upu ma gaoioiga o loo tatou savavali ma ola e tusa ma le agaga.—Faitau le Kalatia 5:16, 25.
11. Aiseā e te faapea mai ai e talafeagai ona talosaga atu i isi e tatalo mo i tatou?
11 Pe a tatou iloa o loo tofotofoina a tatou fanau ia lē faamaoni i taimi o suʻega i le aʻoga, e ao ona tatou tatalo mo i latou ma faaaogā le Tusi Paia e fesoasoani ai iā i latou, ina ia latou faamaoni ma lē faia se mea sesē. Na taʻu atu e Paulo i Kerisiano i Korinito e faapea: “Matou te tatalo i le Atua ina neʻi o outou faia se mea sesē.” (2 Kori. 13:7) O tatalo faapena e faia ma le faamaulalo, e finagalo malie i ai Ieova ma taʻuleleia ai i tatou. (Faitau le Faataoto 15:8.) E mafai ona tatou talosaga atu i isi ia tatalo mo i tatou, e pei foʻi ona sa faia e le aposetolo o Paulo. Na tusi o ia e faapea, “Ia tatalo e lē aunoa mo i matou, auā ua matou talitonu ua iā i matou se lotofuatiaifo lelei, ona matou te mananaʻo ina ia faia mea uma ma le faamaoni.”—Epe. 13:18.
Isi Mea e Taʻu Atu e a Tatou Tatalo
12. O le ā e ao ona avea ma mataupu autū o a tatou tatalo?
12 Po o taʻu atu e a tatou tatalo, o i tatou o ni Molimau a Ieova e fiafia ma maelega? Po o taulaʻi patino atu a tatou faatoga i le faia o le finagalo o le Atua, le talaʻia o le feʻau o le Malo, le taʻutonuina o le pule silisili ese a Ieova, ma le faapaiaina o lona suafa? E tatau ona avea nei mea ma mataupu autū o a tatou tatalo, e pei ona taʻua i le tatalo faaaʻoaʻo a Iesu, lea e amata faapea: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.”—Mata. 6:9, 10.
13, 14. O le ā e faaalia atu e a tatou tatalo e uiga iā i tatou?
13 O a tatou tatalo i le Atua e faaalia ai uunaʻiga o o tatou loto, o mea e tatou te fiafia i ai, ma faanaunauga. E silafia e Ieova le ituaiga tagata e iai i tatou. Ua faapea mai le Faataoto 17:3: “E fai le ipu e tunu ai le ario, ma le ogaumu e tunu ai le auro; a o Ieova, na te tofotofoina loto.” E silafia e le Atua mea o loo i o tatou loto. (1 Samu. 16:7) E na te silafia o tatou lagona e faatatau i sauniga, la tatou faiva, ma o tatou uso ma tuafāfine faaleagaga. E silafia e Ieova o tatou manatu e faatatau i “uso” o Keriso. (Mata. 25:40) E na te silafia po o tatou naunau moni i mea o loo tatou tatalo atu ai, po o tau lava ina toe taʻua ni faaupuga masani. Na fetalai Iesu e faapea, “Pe a e tatalo, aua le faia soo au upu masani e pei o tagata o nuu ese, auā ua latou manatu [sesē] o le a faafofogaina i latou i le tele o upu.”—Mata. 6:7.
14 O faaupuga i a tatou tatalo, e faaalia ai foʻi po o le ā le tele o loo tatou faalagolago ai i le Atua. Ua faapea mai Tavita: “Ua fai oe [Ieova] moʻu malu, o le ʻolo malosi ai lē ua ita mai. Ou te nofo e faavavau lava i lou fale fetafaʻi; ou te faatuatua i le paolo o ou apaʻau.” (Sala. 61:3, 4) Pe a ‘fofola mai e le Atua lona faleʻie i luga iā i tatou’ i se tulaga faafaatusa, e tatou te olioli i le saogalemu ma lana puipuiga. (Faaa. 7:15) O se faamāfanafanaga le mafuta vavalalata atu iā Ieova i le tatalo, ma le mautinoa o loo iai o ia ‘iā i tatou’ i taimi o so o se tofotofoga o lo tatou faatuatua!—Faitau le Salamo 118:5-9.
15, 16. E faapefea ona fesoasoani le tatalo e iloa ai o tatou faanaunauga, e aapa atu ai i faaeaga i le auaunaga?
15 O tatalo faamaoni iā Ieova e tusa ai o uunaʻiga o o tatou loto, e mafai ona fesoasoani iā i tatou e iloa ai le mea moni e uiga i na uunaʻiga. O se faataʻitaʻiga, po o le naunau e auauna i tagata o le Atua i se tulaga e faatino ai le pule, o se faanaunauga moni ma le lotomaulalo e fesoasoani atu ma fai le mea sili e tatou te mafai, mo le faaauilumaina o manaʻoga o le Malo? Po o le mea ea e tatou te “fia muamua” pe fia “pulepuletutū” i isi? E lē o le auala lenā e fai ai mea i tagata o Ieova. (Faitau le 3 Ioane 9, 10; Luka 22:24-27.) Pe afai e sesē o tatou faanaunauga, o le tatalo ma le faamaoni iā Ieova le Atua, e iloa ai na faanaunauga sesē ma fesoasoani iā i tatou e suia a o leʻi oo ina mauaa.
16 E ono naunau avā Kerisiano e auauna a latou tane o ni auauna o le faiva, ma atonu e oo atu ai ina avea ma ovasia po o toeaina. Atonu e gaoioi nei tuafāfine e tusa ai ma o latou lagona o loo faaalia atu i a latou lava tatalo, e ala i le taumafai e avea ma faaaʻoaʻoga lelei i a latou amio. E tāua tele lenei tulaga, auā o le auala e tautatala ma amioaʻi ai le aiga o se tane, e telē sona aafiaga i le auala e manatu ai le faapotopotoga iā te ia.
Fai ma Sui o Isi i Tatalo i le Lautele
17. Pe a fai a tatou lava tatalo, aiseā e manaʻomia ai se siʻomaga toʻafimālie?
17 E masani ona alu ese Iesu mai le toʻatele o tagata, ina ia tatalo na o ia i lona Tamā. (Mata. 14:13; Luka 5:16; 6:12) E faapena foʻi i tatou, e manaʻomia se taimi e na o i tatou ai. O tatalo e faia i siʻomaga toʻafimālie, e mafai ai ona tatou faia filifiliga e finagalo malie i ai Ieova, ma aogā i lo tatou lelei faaleagaga. Ae peitaʻi, sa tatalo foʻi Iesu i nofoaga faitele, ma o se mea lelei le iloilo o le auala e faia ai i se tulaga talafeagai.
18. O ā nisi o manatu e ao ona manatua e uso pe a fai ma sui o le faapotopotoga i tatalo i le lautele?
18 I a tatou sauniga, e fai ai tane ma sui o le faapotopotoga i tatalo i le lautele. (1 Timo. 2:8) I faaiʻuga o na tatalo, e tatau i aumea talitonu ona faapea atu “amene,” o lona uiga “ia faia faapea.” Ae ina ia faia faapea, e tatau ona latou ioe i mea na taʻua. E leai se mea e faateʻia pe lē fiafia ai e faatatau i le tatalo faaaʻoaʻo a Iesu. (Luka 11:2-4) E lē gata i lea, e na te leʻi auʻiliʻilia manaʻoga uma po o faafitauli o tagata taʻitoʻatasi na iai. O popolega patino o le tagata, o mataupu na e talafeagai i tatalo a le tagata lava ia, ae lē o tatalo i le lautele. Ma pe a tatalo e fai ma sui o ni tagata, e ao ona tatou ʻalofia le faaaofia ai o mataupu e lē faalauaʻiteleina.
19. E ao faapefea ona tatou amioaʻi i taimi o tatalo i le lautele?
19 Pe a avea se tasi ma o tatou sui i tatalo i le lautele, e manaʻomia ona tatou faaalia le “matataʻu i le Atua.” (1 Pete. 2:17) Atonu e iai se taimi ma se nofoaga talafeagai mo nisi o gaoioiga e lē talafeagai i taimi o sauniga faa-Kerisiano. (Fai. 3:1) O se faataʻitaʻiga, seʻi faapea ua taumafai se tasi ina ia uulima uma tagata a o fai lenā tatalo. O lenei tulaga atonu e faatigā pe e lē fiafia ai nisi, e aofia ai ma tagata asiasi mai e lē tutusa o tatou talitonuga. O nisi o tagata faaipoipo atonu e uulima ma le faautauta, ae afai e fusi e le tasi le isi a o faia le tatalo i le lautele, e ono tausuai ai i latou e tau atu i ai le vaai. E latou te ono manatu ua taulaʻi atu le ulugalii i lo la alofa fetosinaaʻi, nai lo o le āva iā Ieova. Ona o le faaaloalo loloto iā te ia, o lea seʻi o tatou “faia mea uma lava ina ia faamamaluina ai le Atua,” ma ʻalofia amioga e faauaʻi ese ai, faateʻia ai, pe tautevateva ai se tasi.—1 Kori. 10:31, 32; 2 Kori. 6:3.
Tatalo mo le Ā?
20. E faapefea ona e faamatala le Roma 8:26, 27?
20 E iai taimi e tatou te ono lē iloa ai po o le ā le tala o le a fai i a tatou tatalo. Na tusi Paulo e faapea: “O le faafitauli, e tatou te lē iloa po o ā mea e ao ona tatou tatalo atu ai, a ua ʻaiʻoi atu le agaga [paia] mo i tatou ma le ōi e lē mafai ona faamatalaina. O lē [Atua] e suʻesuʻe i loto, ua ia silafia gaoioiga a le agaga.” (Roma 8:26, 27) O Ieova na pogai ai ona tusia le tele o tatalo i le Tusi Paia. E na te taliaina nei ōlega e pei o ni a tatou talosaga, ma e na te faataunuuina. E silafia e le Atua i tatou, ma le uiga o mea na ia faapogaia lona agaga e taʻua, e ala mai i tusitala o le Tusi Paia. E tali mai Ieova i a tatou faatoga, pe a “ʻaiʻoi” pe fautua le agaga mo i tatou. Ae a tatou iloa lelei le Afioga a le Atua, o le a malamalama foʻi i mea e ao ona tatou tatalo atu ai.
21. O le ā o le a tatou iloiloina i le mataupu o sosoo mai?
21 E pei ona tatou aʻoaʻoina, e telē se mea e taʻu atu e a tatou tatalo e uiga iā i tatou. O se faataʻitaʻiga, e ono faaalia ai po o le ā le vavalalata o loo tatou mafuta atu ai iā Ieova, ma le tele o lo tatou iloa o lana Afioga. (Iako. 4:8) I le mataupu o sosoo mai, o le a tatou iloiloina ai nisi o tatalo ma faaupuga o tatalo o loo faamauina i le Tusi Paia. O le ā se aafiaga o lenā iloiloga o le Tusi Paia, i le auala e tatou te faalatalata atu ai i le Atua i le tatalo?
E Faapefea Ona E Tali?
• O le ā le uiga e ao ona iā i tatou pe a faalatalata atu iā Ieova i le tatalo?
• Aiseā e ao ai ona tatou tatalo mo uso talitonu?
• O le ā e ono taʻu atu e a tatou tatalo e uiga iā i tatou ma uunaʻiga o o tatou loto?
• E ao faapefea ona tatou amioaʻi i taimi o tatalo i le lautele?
[Fesili mo le Suʻesuʻega]
[Ata i le itulau 4]
Po o e viia ma faafetaia Ieova e lē aunoa?
[Ata i le itulau 6]
O a tatou amioga i taimi o tatalo i le lautele e ao ona viia ai pea Ieova