Pisi ma Fiafia i le Auaunaga i le Atua

E FINAGALO Ieova ia e fiafia. (Sala. 100:2) I le avea ai ma ana auauna, atonu o loo e pisi, ae e leʻi faapea lou pisi ina ua faatoʻā tuuina atu lou ola i le Atua, ma i le taimi nei ua omia lava oe ona o le tele o avega tauave faaletino ma le faaleagaga. Atonu foʻi e lē o lelei ou faalogona ona e lē o mafai ona fai uma mea e ao ona fai. E faapefea ona e maua le paleni ma tumau ai le “fiafia iā Ieova”?—Nee. 8:10.

Ua e ola i aso faigatā ma ua tele omiga, ae e ao ona faamaopoopo lelei lou olaga. Ua sili ona talafeagai le fautuaga faagaeeina a le aposetolo o Paulo: “Ia outou matuā faautauta ina neʻi outou savavali e pei o ē vālea, ae ia pei o ē popoto, ia outou faaaogā tatau le taimi, auā o aso nei ua leaga.”—Efe. 5:15, 16.

Pe a fua i lea fautuaga poto, e faapefea ona e faia ni sini e fetaui ma oe ma paleni ai lau faasologa o suʻesuʻega, tausia o le aiga, galuega talaʻi, galuega totogi, ma isi galuega masani?

Po o e manatua lou fiafia na iai ina ua tuuina atu lou ola i le Atua ma papatisoina? Na e fiafia ina ua e iloa Ieova ma lona finagalo. Atonu e tele ni masina o e toʻaga e suʻesuʻe ia maua ai le malamalama ma le fiafia. Ae na aogā tele lenā taumafaiga, ona na faaleleia ai lou olaga.

Ina ia tumau pea lou fiafia, e ao ona e taumafa pea faaleagaga. Afai e faigatā ona maua sou avanoa e faitau ma suʻesuʻe ai i le Tusi Paia, ia toe iloilo lau faasologa. O le a sili atu ona māfana la lua faiā ma Ieova pe a faaalu ni nai minute i aso taʻitasi e suʻesuʻe ma mafaufau loloto ai, ma e mautinoa o le a atili ai ona e fiafia.

E mafai e le toʻatele o auauna a le Atua ona sema se taimi mai mea e lē tāua mo mea e tāua. Ia fesili ifo, ‘O le ā le tele o loʻu taimi e faaalu e faitau ai mekasini ma nusipepa, matamata i le TV, faalogologo i musika, ma fai isi mea ou te fiafia i ai?’ E maua le fiafia i na mea pe afai e paleni. (1 Timo. 4:8) Afai e lē o lelei ona faaaogā lou taimi, ia toe fetuunaʻi lau faasologa.

 O Atamu, e toʻatolu lana fanau ma o se toeaina, na ia taʻua le mea na aogā iā te ia: “Ou te taumafai e faafaigofie loʻu olaga. Ou te lē fiafia e fai mea e faamaʻimau ai le taimi. E lē faapea ou te lē fiafia i na mea, ae e sili ona ou fiafia pe a lē tele se taimi e alu ai.”

O le manatunatu loloto i iʻuga lelei o au faaiʻuga e toe faafouina ai lou fiafia ma fesoasoani e tumau ai lau vaaiga mautinoa. O se faataʻitaʻiga, ua fai mai Mariusz, o se toeaina e toʻatolu lana fanau: “Ina ua amata ona ou suʻesuʻe i le Tusi Paia, na ou maua se faamoemoe mo le lumanaʻi. E iai lava taimi ou te fesagaʻi ai ma faigatā, ma o le tele o na mea e na o Ieova e silafia. Ae ou te faafetai i lana fesoasoani mai ona ua mafai ona ou vaai i le lumanaʻi ma le fiafia.”

I le pei o Mariusz, e lē teʻa ese uma o tatou popolega ona ua iai se faamoemoe. Ae e aogā e faaleleia ai ou faalogona ma taulau ai pe a fesagaʻi ma luʻi o le olaga. Ua faapea mai le Tusi Paia: “O aso uma o lē ua tigāina, ua leaga ia; a o le loto fiafia, o le tausamiga e lē aunoa lea.” (Faata. 15:15) Ia manatunatu foʻi i le alofa o le Atua ua faaalia iā te oe. E tupu tele ai lou alofa iā te ia ma e olioli ai i le Atua.—Mata. 22:37.

O le faamuamua o Ieova ma lona finagalo i le olaga, e tupu tele ai le fiafia o le aiga. O le faaalia o uiga faa-Kerisiano e faaitiitia ai faafitauli ma atili māfana ai faiā a le aiga. Ona avea ai lea o lou aiga ma mapusaga moni o le filemu ma le autasi mo le aiga atoa.—Sala. 133:1.

O le a maua le fiafia moni o le aiga pe a auai i galuega faaleagaga. Na fai mai Mariusz: “E tāua iā te aʻu le taimi e matou te faatasitasi ai ma loʻu aiga. E fesoasoani mai si aʻu avā i so o se taimi, e ma te galulue faatasi ai i le talaʻiga, pe faamamā le mea e fai ai tauaofiaga, pe ma te ō faatasi foʻi e fai saʻu lauga i se isi faapotopotoga. E faalaeiauina ai lava aʻu.”

Ua faatonuina Kerisiano e le Tusi Paia ina ia tausia manaʻoga faaletino o o latou aiga. (1 Timo. 5:8) Ae afai e alu uma ai le taimi ma le malosi i galuega, o le a mou atu ai lou fiafia i le auaunaga i le Atua. Ia tuu atu ou popolega iā Ieova. (Sala 55:22) Ua iloa e nisi e ao ona suʻe se isi galuega pe a mananaʻo e faamuamua le malo o le Atua. E lē tatau i se Kerisiano ona faamuamua le galuega e totogi lelei, ae alu uma ai le taimi ma galo ai mea faaleagaga e sili ona tāua—Faata. 22:3.

Atonu e lelei pe a fai sau lisi o vala ē lelei ma e lē lelei ai lau galuega. E moni e manaʻomia se galuega e totogi lelei ma fiafia ai. Ae po o aogā lau galuega i le tulaga faaleagaga o lou aiga? Ia iloilo totoʻa uma vala eseese ma faia se faaiʻuga e faamuamua ai la lua faiā ma Ieova.

Afai e lē o fesoasoani lau galuega o loo e iai i le taimi nei i lou itu faaleagaga, e manʻomia ona sui lou tulaga. E toʻatele Kerisiano ua faia ni suiga tetele ina ia maua ai le taimi mo mea faaleagaga. Na fai mai se uso mai Polani: “Na ou tuua le kamupani na ou faigaluega ai, ona e masani ona ou malaga ona o le galuega. Sa leai se taimi mo loʻu aiga ma mea faaleagaga.” Ua faigaluega nei o ia i se galuega e itiiti le taimi ma le malosi e alu ai.

Ia Fiafia e Fesoasoani i Isi

Na faapea mai Iesu: “E sili le fiafia e maua i le foaʻi atu i lo o le talia mai.” (Galu. 20:35) Ua tele avanoa e faia ai e Kerisiano foaʻi. I nisi taimi ua lava si ataata māfana, po o se lūlū lima, po o se faafetai atu ma le loto atoa ona o le galue mamafa o se tagata e faatino lona tofiga, e maua ai e oulua uma le olioli.

Na faalaeiau e le aposetolo o Paulo ona uso Kerisiano: “Ia faamāfanafana i ē mafatia, ia fesoasoani i ē vaivai.” (1 Tesa. 5:14) Atonu e lagona e i latou o loo mafatia, e lē mafai ona latou faafesagaʻia faafitauli i lo latou lava malosi. Pe e mafai ona e faalaeiau iā  i latou? Pe afai ua e iloa le mou atu o le fiafia o se uso i lana auaunaga iā Ieova, ia faalaeiau i ai. O le a faamalosia ai foʻi ma oe. E iai faafitauli e lē mafai e se tagata ona foʻia. Peitaʻi, e mafai ona e faalaeiau ma le alofa ma uunaʻia lou uso talitonu ia faalagolago i le fesoasoani e lē uma mai iā Ieova. O ē e faia faapea, e latou te lē faanoanoa ai.—Sala. 27:10; Isa. 59:1.

O se isi auala aogā, o le valaaulia lea o lē ua tau mou atu le fiafia e lua te galulue i le faiva. Ina ua auina atu e Iesu ona soo e toʻa 70, na ia auina atu e ō “taʻitoʻalua.” (Luka 10:1) Atonu e te ioe, o le mea na faia e Iesu na mafai ai ona faalaeiau le tasi i le isi. Pe e mafai ona e faia faapea i aso nei ina ia fesoasoani ai i se isi e toe maua le fiafia?

E tele māfuaaga ua tumu ai le olaga i popolega. Peitaʻi ua timaʻi mai Paulo: “Ia olioli e lē aunoa i le Alii. Ou te toe fai atu foʻi, Ia olioli!” (Fili. 4:4) Ua iai se fuafuaga i lou olaga ona ua e alofa i le Atua, usitai iā te ia, ma maelega pea i le galuega ua ia tuuina mai. Ua e maua ai le fiafia. E lē gata i lea e fesoasoani Ieova iā te oe e fesagaʻia omiga ma faafitauli.—Roma 2:6, 7.

Ua tatou mautinoa ua lalata mai le lalolagi fou a Ieova e pei ona folafolaina. E maʻeu le tele o faamanuiaga ma māfuaaga o le a tatou fiafia ai! (Sala. 37:34) O lea, ia tatou olioli ma aua neʻi galo le tele o vala o loo faamanuiaina ai i tatou e Ieova i le taimi nei. Ona mafai ai lea ona tatou “auauna atu ia Ieova ma le fiafia.”—Sala. 100:2.

[Siata i le itulau 8]

(Tagaʻi i le lomiga mo le ata atoa)

Atonu e manaʻomia ona fetuunaʻi le auala o faaaogā ai lou taimi ina ia tumau pea lou fiafia

TAFAOGA ma FAAFIAFIAGA

FEʻAU I LE FALE ma le TAUSIGA O AIGA

GALUEGA TOTOGI

SAUNIGA

SUʻESUʻEGA TOTINO

LE TALAʻIGA

[Ata i le itulau 10]

Pe e mafai ona e fesoasoani i isi ina ia toe maua lo latou fiafia?