Ia Faamamaluina le Atua i Aso Taʻitasi o Lou Olaga

NA TATALO le faisalamo o Tavita iā Ieova e faapea: “Ia ou faalogo i lou alofa faamaoni i le taeao, . . . Ia e faailoa mai iā te aʻu le ala ou te savali ai.” (Sala. 143:8) Pe a e ala aʻe i le taeao ma faafetai atu iā Ieova ua aulia le aso fou, pe e te pei o Tavita, e te ōle atu iā Ieova e taʻitaʻi oe i au filifiliga ma faia le mea e sili ona lelei? E lē taumatea e te faia faapea.

Talu ai o ni auauna tuuina atu a Ieova, “pe [tatou] te aai, pe inu, pe faia se tasi mea,” tatou te taumafai e “faia mea uma lava ina ia faamamaluina ai le Atua.” (1 Kori. 10:31) E tatou te iloa, o mea tatou te faia i aso taʻitasi, a lē faamamaluina, e faalumaina ai foʻi Ieova. E tatou te manatua foʻi ua taʻua i le Afioga a le Atua o loo molia e Satani uso o Keriso “i le ao ma le pō,” e aofia ai ma auauna uma a le Atua i le lalolagi. (Faaa. 12:10) O lea la, e tatou te taumafai malosi e avatu se tali i tuuaʻiga sesē a Satani, ma faafiafia le finagalo o Ieova e ala i le tuuina atu o le auaunaga paia i lo tatou Tamā i le lagi “i le ao ma le pō.”—Faaa. 7:15; Faata. 27:11.

Seʻi o tatou talanoaina puupuu auala tāua e lua, e mafai ona tatou faamamaluina ai le Atua i aso taʻitasi o le olaga. O le auala muamua, o le iloaina lea o mea e ao ona tatou faamuamua, ma lona lua, o le faaalia lea o le manatu mamafa i isi.

Ola e Tusa ai ma lo Tatou Tuuina Atu

E ala i le tuuina atu iā Ieova, ua tatou faailoa atu ai lo tatou faanaunauga mai le loto e auauna atu iā te ia. Ua tatou taʻutino atu foʻi iā Ieova o le a tatou savavali i ona ala “i lea aso ma lea aso” e oo i le faavavau. (Sala. 61:5, 8) E faapefea la ona tatou ola e tusa ai ma lenā taʻutinoga? E faapefea ona faaalia lo tatou alolofa ma le lotoatoa iā Ieova i aso taʻitasi?

O loo faaalia manino mai i le Afioga a le Atua mea e finagalo Ieova e tatou te faia. (Teu. 10:12, 13) O loo taʻua nisi mea i le pusa,  “Tiute Tauave Mai i le Atua,” i le itulau e 22. O nei tofiga uma e mai i le Atua ma e tāua. E faapefea ona tatou filifili po o lē fea mea e ao ona faamuamua, pe afai ua lua pe tolu ni mea e manaʻomia ona tatou faia i le taimi e tasi?

E tatou te faamuamua la tatou auaunaga paia, e aofia ai suʻesuʻega i le Tusi Paia, tatalo, sauniga faa-Kerisiano ma le talaʻiga. (Mata. 6:33; Ioa. 4:34; 1 Pete. 2:9) Peitaʻi, e lē o le aso atoa o le a tatou faia ai mea faaleagaga. E manaʻomia ona faigaluega, aʻoʻoga, ma fai le tele o galuega i le aiga. E ui i lea, e tatou te fai le mea sili ina ia faatulaga ai a tatou galuega totogi ma isi mea, ina ia lē faalavelavea ai la tatou auaunaga paia, e pei o le auai i sauniga faa-Kerisiano. O se faataʻitaʻiga, pe a fuafua mo se faiga mālōlōga, e tatou te faamautinoa o le a tatou lē misia le asiasiga a le ovasia matagaluega, se fonotaga e tasi le aso, se fonotaga matagaluega, po o se tauaofiaga itumalo. E iai taimi atonu e mafai ai ona fai faatasi nisi o a tatou tiute tauave. O se faaaʻoaʻoga, e mafai ona tatou galulue faatasi o se aiga i le faamamāina o le Maota mo Sauniga, pe faaaogā le taimi o le mālōlōga i le aoauli i le galuega po o le aʻoga, ina ia talaʻi atu ai i isi. O lea la, o so o se taimi lava e fia fai ai se filifiliga i o tatou olaga, e pei o le saʻilia o se galuega totogi, le aʻoga e aʻoga ai, po o le filifilia o ni uō, e tatou te mananaʻo ia taaʻina a tatou faaiʻuga i le mea e sili ona tāua i o tatou olaga—o le tapuaʻiga lea i lo tatou Tamā alofa, o Ieova.—Fai. 12:13.

 Ia Manatu Mamafa i Isi

E finagalo Ieova ia tatou faaalia le manatu mamafa i isi ma faia mea lelei iā i latou. Peitaʻi, ua faaauiluma e Satani le uiga manatu faapito. Ua tumu lana lalolagi i tagata “e alolofa iā i latou lava” ma “ē e pupū i mea faafiafia,” faapea i latou o ē e “lūlū e tusa ma le tino agasala.” (2 Timo. 3:1-5; Kala. 6:8) O le toʻatele lava o tagata e lē o mafaufau i aafiaga o a latou gaoioiga i isi. O so o se mea lava ua vaaia ai “galuega a le tino agasala.”—Kala. 5:19-21.

Ae ua matuā ese mai ai lava uiga o i latou o loo taʻitaʻia e le agaga paia o Ieova, e latou te alolofa, agalelei ma mataalofa i a latou feutagaʻiga ma isi. (Kala. 5:22) Ua taʻu mai e le Afioga a le Atua iā i tatou ia faamuamua manaʻoga o isi i lo o i tatou. O lea la, e tatou te faaalia le naunau o le tasi i le isi, ae e tatou te faaeteete ia lē isuisu fua i mataupu a isi. (1 Kori. 10:24, 33; Fili. 2:3, 4; 1 Pete. 4:15) E patino ona tatou faaalia le manatu mamafa i o tatou uso talitonu. E tatou te taumafai foʻi e fesoasoani i ē e lē talitonu. (Kala. 6:10) Pe mafai ona e faaalia le agalelei i se tasi e lua te feiloaʻi i lenei aso?—Tagaʻi i le pusa  “Ia Manatu Mamafa iā i Latou,” i le itulau e 23.

E lē tapulaa le faaalia o le manatu mamafa i se taimi faapitoa po o se tulaga patino. (Kala.  6:2; Efe. 5:2; 1 Tesa. 4:9, 10) Nai lo lea, e tatou te taumafai i aso uma ia iloa tulaga o isi ma nofosauni e fesoasoani atu pe a manaʻomia, e tusa lava pe e lē faigofie ona tatou faia faapea. E tatou te lotomalilie e faaaogā so se mea ua tatou maua—o lo tatou taimi, meafaitino, poto masani ma le atamai. Ua tatou iloa ua faamautinoa mai e Ieova, pe afai e tatou te limafoaʻi i isi, o le a ia limafoaʻi mai foʻi iā i tatou.—Faata. 11:25; Luka 6:38.

Auaunaga Paia “i le Ao ma le Pō”

Pe e mafai ona tatou avatu le auaunaga paia iā Ieova “i le ao ma le pō”? Ioe, e mafai, e ala i le auai e lē aunoa ma maelega i vala uma o la tatou tapuaʻiga. (Galu. 20:31) E mafai ona faapisi o tatou olaga i le auaunaga paia e ala i le faitau ma manatunatu loloto i le Afioga a le Atua i aso uma, tatalo e lē aunoa, taumafai e auai i sauniga uma, ma faaaogā avanoa uma e talaʻi atu ai.—Sala. 1:2; Luka 2:37; Galu. 4:20; 1 Tesa. 3:10; 5:17.

Po o tatou taʻitoʻatasi ma avatu lenā auaunaga paia iā Ieova? Afai o lea, o le a faaalia i vala uma o o tatou olaga i aso taʻitasi, lo tatou faanaunauga e faafiafia Ieova ma avatu se tali i tuuaʻiga a Satani. E tatou te taumafai e faamamaluina Ieova i mea uma e tatou te faia, ma so o se tulaga e tatou te oo i ai. E pulea la tatou tautala ma amioga i ana mataupu silisili, ma taʻitaʻia ai a tatou filifiliga e fai. E tatou te faaalia le talisapaia o lana tausiga alofa ma le fesoasoani, e ala i lo tatou faatuatua atoatoa iā te ia ma faaaogā lo tatou malosi i le auaunaga iā te ia. E tatou te talia foʻi ana fautuaga ma aʻoaʻiga, pe afai ua tatou lē ausia ana tapulaa ona o lo tatou tulaga lē lelei atoatoa.—Sala. 32:5; 119:97; Faata. 3:25, 26; Kolo. 3:17; Epe. 6:11, 12.

Seʻi faaauau ona tatou faamamaluina Ieova i aso taʻitasi o o tatou olaga. O le faia faapea, o le a faafouina ai i tatou ma faavavau ona maua le tausiga alofa a lo tatou Tamā i le lagi.—Mata. 11:29; Faaa. 7:16, 17.

[Pusa/Ata i le itulau 22]

 Tiute Tauave Mai i le Atua

• Tatalo e lē aunoa.—Roma 12:12.

• Faitau ma suʻesuʻe le Tusi Paia, ma faatatauina e le tagata lava ia.—Sala. 1:2; 1 Timo. 4:15.

• Tapuaʻi atu iā Ieova i le faapotopotoga.—Sala. 35:18; Epe. 10:24, 25.

• Saunia mea faaletino, faaleagaga, ma tau faalogona mo o tatou aiga.—1 Timo. 5:8.

• Talaʻi atu le tala lelei o le Malo, ma faia isi ma soo.—Mata. 24:14; 28:19, 20.

• Tausia lo tatou ola mālōlōina i le itu faaletino, faaleagaga, ma tau faalogona, lea e aofia ai le faia o ni faafiafiaga ma tafaoga mamā.—Mare. 6:31; 2 Kori. 7:1; 1 Timo. 4:8, 16.

• Tausia tiute tauave i le faapotopotoga.—Galu. 20:28; 1 Timo. 3:1.

• Tausia lelei o tatou fale ma le Maota mo Sauniga.—1 Kori. 10:32.

[Pusa/Ata i le itulau 23]

 Ia Manatu Mamafa iā i Latou

• Se uso po o se tuafafine ua matua le soifua.—Levi. 19:32.

• O se tasi o loo mafatia i se gasegase i le tino po o faalogona.—Faata. 14:21.

• O se tasi o le faapotopotoga ua manaʻomia vave se mea e mafai ona e faia.—Roma 12:13.

• Se sui o lou aiga.—1 Timo. 5:4, 8.

• Se uso po se tuafafine ua maliu lana paaga.—1 Timo. 5:9.

• Se toeaina e galue mamafa i lau faapotopotoga.—1 Tesa. 5:12, 13; 1 Timo. 5:17.