Ua Faamaonia le Tonu o le Pule a Ieova!

“O le Silisili Ese o ia o le Pule i malo o tagata.”—TANI. 4:17.

1, 2. O ā nisi o māfuaaga ua iʻuvale ai pulega a tagata?

UA IʻUVALE pulega a tagata! O le mea moni lenā. O se tasi o māfuaaga autū, ona e lē o iai i tagata le atamai e pule ai ma le manuia. Ua manino le iʻuvale o pulega a tagata i aso nei, ona o le toʻatele o ē pule ua avea ma ‘ē e alolofa iā i latou lava, o ē mananaʻo i tupe, o ē fia tagata, o ē faamaualuluga, o ē lē faamaoni, e mumusu i maliega, o ē faia tala taufaaleaga, e lē amio pulea, e sauā, e lē fiafia i mea lelei, o ē faalata, ma o ē ua faafefeteina i le faamaualuga.’—2 Timo. 3:2-4.

² Na teena e o tatou uluaʻi mātua le pulega a le Atua i aso ua leva. O le faia faapea, atonu na la manatu ai e filifili e tutoʻatasi ese mai i le Atua. Peitaʻi, o le tulaga moni lava, ua la gauaʻi atu i le pulega a Satani. Ua ono afe tausaga o matuā taaʻina pulega lē lelei a tagata e “le pule o lenei lalolagi,” o Satani, ma ua māfua ai ona tatou iai i se tulaga paʻū maulalo i le talafaasolopito o le tagata. (Ioa. 12:31) E tusa ai o le tulaga o tagata i aso nei, ua faamatalaina i se tusi e faapea, e lē aogā ona “saʻili mo se lalolagi lelei atoatoa. E lē gata e lē mafai ona maua, ae o le taumafai foʻi e atiaʻe se lalolagi lelei atoatoa, e iʻu ai i  puapuaga, pulega tautalatasi, ma taua e pito sili ona leaga.” (The Oxford History of the Twentieth Century) Maʻeu se faamaoniga o le iʻuvale o pulega a tagata!

3. O le ā so tatou manatu, e faapeʻī le pulega a le Atua pe ana lē agasala Atamu ma Eva?

³ Pagā le leaga o le gaoioiga a o tatou uluaʻi mātua, ina ua la teena le pulega e sili ona lelei, o le pulega a le Atua! E moni e tatou te lē o iloa tonu le auala e pulea ai e Ieova le lalolagi, pe ana faapea e faamaoni atu pea Atamu ma Eva iā te ia. Peitaʻi, e tatou te mautinoa e mātaulia le pulega a le Atua lea e talia e tagata uma, i le alofa ma le lē faailoga tagata. (Galu. 10:34; 1 Ioa. 4:8) Pe a manatu i le atamai lē mafaatusalia o le Atua, e tatou te mautinoa foʻi pe ana tumau tagata i le pulega a Ieova, semanū e lē iai faafitauli uma ia e māfua mai i ē e fia pule. E mafai e le pulega a le Atua ona “faamalie le manaʻo o mea ola uma lava.” (Sala. 145:16) O le mea moni, o se pulega e atoatoa ona lelei. (Teu. 32:4) Pagā le lē atamai o le teena e tagata o lenā pulega!

4. O le ā le tele ua tuu atu iā Satani e pule ai?

⁴ Peitaʻi, e tāua ona manatua, e ui ua faataga e Ieova tagata e fai a latou lava pulega, ae e na te leʻi lafoaʻia ai lana aiā e pulea ai ana foafoaga uma. E oo lava foʻi i le tupu malosi o Papelonia na mulimuli ane ia iloa, “o le Silisili Ese o ia o le Pule i malo o tagata.” (Tani. 4:17) E mautinoa o le Malo o le Atua, o le a faia ai lona finagalo. (Mata. 6:10) Ioe, ua faataga e Ieova Satani e avea ma “atua o lenei faiga o mea a le lalolagi” mo se taimi puupuu, ina ia saunia ai se tali mautinoa i finauga na lāgā e lenā fili tetee. (2 Kori. 4:4; 1 Ioa. 5:19) Ae ui i lea, e lē mafai ona fai e Satani se mea e sili atu i lo mea ua faataga e Ieova. (2 No. 20:6; faatusatusa i le Iopu 1:11, 12; 2:3-6.) Ae e iai lava tagata ua filifili e gauaʻi atu i le Atua, e ui ua latou soifua i se lalolagi o loo pulea e le Fili sili o le Atua.

Le Pulega a le Atua i Isaraelu

5. O le ā le ioega na fai atu e Isaraelu i le Atua?

⁵ E amata mai i le taimi o Apelu seʻia oo mai i le taimi o augātamā, e iai nisi o tagata faamaoni na tapuaʻi atu iā Ieova ma usitaʻi i ana poloaʻiga. (Epe. 11:4-22) I aso o Mose, na osia ai e Ieova se feagaiga ma le fanau a le augātamā o Iakopo, ma na avea i latou ma nuu o Isaraelu. I le 1513 T.L.M., na ioe ai tagata Isaraelu mo i latou ma ē tupuga mulimuli ane iā i latou, o le a talia Ieova e avea ma o latou Pule, e ala i le faapea atu: “O mea uma ua fetalai mai ai Ieova ua matou malilie e fai.”—Eso. 19:8.

6, 7. O ā mea na aofia ai i le pulea e le Atua o Isaraelu?

 ⁶ Na iai se fuafuaga na māfua ai ona filifilia e Ieova tagata Isaraelu e avea ma ona tagata. (Faitau le Teuteronome 7:7, 8.) E sili atu mea na aofia ai i lenei filifiliga i lo le na o le lelei o tagata Isaraelu. Sa aofia ai foʻi le suafa ma le pule silisili ese a le Atua, ma o mea na e sili atu ona tāua. Sa tatau ona avea tagata Isaraelu ma molimau e faamaonia ai, o Ieova o le Atua moni e toʻatasi. (Isa. 43:10; 44:6-8) O lea, na fetalai atu Ieova i lenā nuu: “O oe o le nuu paia iā Ieova lou Atua, ma na filifilia oe e Ieova e fai ma ona nuu, o le oloa tāua mai i tagata uma i le fogāeleele.”—Teu. 14:2.

⁷ Ina ua pulea tagata Isaraelu e le Atua, na ia silafia ai lo latou lē lelei atoatoa. Ae sa lelei atoatoa ana tulafono, ma na faaatagia atu ai uiga o Lē na tuuina mai na tulafono. Na manino ona faamatilatila i poloaʻiga a Ieova lea na tuuina atu e ala iā Mose, le paia o le Atua, lona naunau i le faamasinotonu, lona finagalo malie e faamagalo, ma lona onosai. Mulimuli ane, i aso o Iosua ma lana tupulaga, na usiusitaʻi le nuu i poloaʻiga a Ieova ma maua ai le filemu ma faamanuiaga faaleagaga. (Iosua 24:21, 22, 31) Na faaalia ai i lenā vaitaimi o le talafaasolopito o Isaraelu, le taulau manuia o le pulega a Ieova.

Āuga Leaga o Pulega a Tagata

8, 9. O le ā le talosaga lē poto na faia e Isaraelu, ma o ā iʻuga?

⁸ Peitaʻi a o faagasolo taimi, sa fai ma liliu ese tagata Isaraelu mai i le pulega a le Atua ma latou lē maua ai lana puipuiga. O le iʻuga, e ala atu i le perofeta o Samuelu, na talosaga atu ai Isaraelu mo se tupu vaaia. Na fetalai atu Ieova iā Samuelu ia talia la latou talosaga. Ae na fetalai atili atu Ieova: “E lē o oe ua latou tetee i ai, a o aʻu ua latou teena mai i le avea ma o latou tupu.” (1 Samu. 8:7) E ui lava na faataga e Ieova Isaraelu e iai so latou tupu vaaia, ae na ia lapataʻia i latou i āuga leaga e oo i ai pe a pulea e se tagata.—Faitau le 1 Samuelu 8:9-18.

⁹ Ua faaalia i le talafaasolopito le moni o le lapataʻiga a Ieova. O le pulea e se tagata na iʻu ai i faafitauli mataʻutia i Isaraelu, aemaise lava ina ua lē faamaoni lenā tupu. I le manatuaina o lenā faataʻitaʻiga e uiga iā Isaraelu, e lē o se mea la e faateʻia ai, ua tele senituri e lē o mafai e pulega a tagata e lē iloa Ieova, ona aumaia ni iʻuga aogā ma tumau. Ioe, o nisi tagata o malo ua ōle atu mo le faamanuia a le Atua i a latou taumafaiga ia maua le filemu ma le saogalemu, ae e faapefea i le Atua ona faamanuia i ē e lē o gauaʻi atu i lana pule?—Sala. 2:10-12.

Se Nuu Fou i Lalo o le Pulega a le Atua

10. Aiseā ua lē toe avea ai Isaraelu ma nuu filifilia o le Atua?

¹⁰ E leʻi tumau ona auauna ma le faamaoni le nuu o Isaraelu iā Ieova. I le iʻuga, na latou teena le Mesia tofia a le Atua, ma na teena i latou e Ieova ma finagalo e sui i latou i se vaega o tagata o ē na faia aʻe ai se nuu fou. O lea la, i le tausaga e 33 T.A. na faavaeina ai le faapotopotoga Kerisiano o tagata tapuaʻi faauuina o Ieova. Ona avea lea o lenā faapotopotoga ma nuu fou i lalo o le pulega a Ieova. Na taʻua e Paulo lea nuu o “le Isaraelu a le Atua.”—Kala. 6:16.

11, 12. E tusa ai o le tulaga taʻimua, o ā mea e tutusa ai le nuu o Isaraelu ma “le Isaraelu a le Atua”?

¹¹ Pe a faatusatusa le nuu muamua o Isaraelu ma le “Isaraelu [fou] a le Atua,” e iai mea e eseese ai ma mea e tutusa ai. I le lē pei o Isaraelu anamua, e leai se tupu vaaia o le faapotopotoga Kerisiano, ma e lē manaʻomia foʻi ona ofo atu ni taulaga i manu mo ē agasala. Ae o se tasi o mea e tutusa ai le nuu o Isaraelu ma le faapotopotoga Kerisiano, o le faatulagaga i toeaina. (Eso. 19:3-8) O na toeaina Kerisiano e lē avea o ni pule i le lafu mamoe. Nai lo lea, e latou te leoleo le faapotopotoga  ma taʻimua ma le agalelei i gaoioiga faa-Kerisiano. E latou te feutagaʻi ma le alofa ma tagata taʻitoʻatasi i le faapotopotoga, e faaaloalo ma āva i tagata uma.—2 Kori. 1:24; 1 Pete. 5:2, 3.

¹² E ala i le manatunatu loloto i feutagaʻiga a le Atua ma Isaraelu, ua matuā talisapaia ai e sui o “le Isaraelu a le Atua” ma a latou aumea o “isi mamoe,” Ieova ma lana pulega. (Ioa. 10:16) O se faataʻitaʻiga, ua faaalia i le talafaasolopito le matuā taaʻina e tupu o Isaraelu o o latou tagatānuu, a lē i le lelei o le leaga. Ua faaalia ai i lea tulaga, e ui lava o i latou o loo taʻimua i Kerisiano e lē o ni tupu e pei o tupu anamua, ae e ao ona latou faataatia i taimi uma se faaaʻoaʻoga lelei i le faatuatua.—Epe. 13:7.

Le Auala o Loo Pule ai Ieova i Aso Nei

13. O le ā le mea mataʻina na tupu i le 1914?

¹³ O loo faalauiloa atu e Kerisiano i aso nei i le lalolagi, ua lata le iʻuga o pulega a tagata. I le 1914, na faavaeina ai e Ieova lona Malo i le lagi, i le taʻitaʻiga a lana Tupu tofia, o Iesu Keriso. I lenā taimi, na ia finagalo ai ia oo atu le pule a Iesu ia “manumalo, ma e oo ina manumalo aʻiaʻi.” (Faaa. 6:2) Na taʻu atu i le Tupu ua faatoʻā faanofotupuina e faapea: “Inā alu ia ma pule i totonu o ou fili.” (Sala. 110:2) O le mea e faanoanoa ai, ua faaauau pea ona lē gauaʻi atu atunuu i le pulega a Ieova. Ua faaauau pea ona latou gaoioi e pei “e leai se Ieova.”—Sala. 14:1.

14, 15. (a) E faapefea ona pulea i tatou i aso nei e le Malo o le Atua, ma o ā fesili e ao ona tatou fesili ifo ai iā i tatou lava? (e) Ua faapefea ona tatou iloa i aso nei, e sili mamao le pulega a le Atua?

¹⁴ O loo iai pea ni nai sui faauuina o “le Isaraelu a le Atua” o loo totoe, ma ona o i latou o uso o Iesu, o loo faaauau ona avea i latou ma “sāvali o sui o Keriso.” (2 Kori. 5:20) Ua tofia i latou e avea ma vasega o le pologa faamaoni ma le faautauta. E latou te tausia ma saunia meaʻai faaleagaga, mo ē faauuina ma le motu o tagata ua faatupulaʻia o Kerisiano, lea e iai nei le faitau miliona o i latou e faamoemoe e ola e faavavau i le lalolagi. (Mata. 24:45-47; Faaa. 7:9-15) E faamaonia le faamanuia a Ieova i lenā faatulagaga, ona o le tamaoaiga faaleagaga lea e maua e tagata tapuaʻi moni i aso nei.

¹⁵ E ao iā i tatou taʻitoʻatasi ona fesili ifo iā i tatou lava: ‘⁠Po o oʻu iloa lelei tiute tauave e ao ona ou tauaveina i le faapotopotoga Kerisiano? Po o oʻu matuā lagolagoina le pulega a Ieova? Po o oʻu mitamita i le avea ma  tagatānuu o le Malo o Ieova lea ua pulea nei? Po o oʻu naunau e faaauau ona taʻu atu i isi le Malo o le Atua i le tele ou te mafai ai?’ O i tatou uma e gauaʻi atu ma le lotomalilie i le taʻitaʻiga e ala mai i le Vaega Pule, ma lagolagosua atu i toeaina tofia i faapotopotoga. O le faia faapea, ua faaalia ai e tatou te talia le pulega a le Atua. (Faitau le Eperu 13:17.) O le lotomalilie e gauaʻi atu e iʻu ai i se autasi i le lalolagi aoao, lea e lē o maua i lenei lalolagi fevaevaeaʻi. E maua ai foʻi le filemu ma le amiotonu, e viia ai Ieova, ma faamaonia ai e sili mamao atu ona lelei lana pulega.

E Manumalo le Pule a Ieova

16. O le ā le filifiliga e ao ona fai e tagata uma i aso nei?

¹⁶ Ua lata le taimi e foʻia ai finauga na lāgā i Etena. O lea la, o le taimi lenei e ao ai i tagata ona fai se filifiliga. E ao i tagata taʻitoʻatasi ona filifili pe na te talia le pulega a Ieova, pe lagolagoina pea pulega a tagata. O lo tatou faaeaga le fesoasoani atu i ē agamalu ina ia fai le filifiliga saʻo. Ua toe o se aga, pe a oo mai Amaketo, ona suia lea e faavavau o malo a tagata ia o loo taʻitaʻia e Satani, i le pulega a Ieova. (Tani. 2:44; Faaa. 16:16) O le a faaiʻuina pulega a tagata, ae pulea e le Malo o le Atua le lalolagi aoao. Ioe, o le a matuā faamaonia le tonu o le pule a Ieova.—Faitau le Faaaliga 21:3-5.

17. O ā mea moni e fesoasoani i ē agamalu, ina ia faia ai se filifiliga lelei e tusa ai o le tulaga pule?

¹⁷ E ao iā i latou e leʻi faia lava se filifiliga e tutū i le itu a Ieova, ona tatalo ma manatunatu i aogā o le a aumaia e le pulega a le Atua i tagata. E lē o taulau ona foʻia e pulega a tagata faafitauli e pei o solitulafono, e aofia ai ma faiga faatupu faalavelave. O le a aveesea e le pulega a le Atua tagata amioleaga uma mai i le lalolagi. (Sala. 37:1, 2, 9) O pulega a tagata ua iʻu ai i faigātaua, ae o le pulega a le Atua o le a “faaiʻuina [ai] taua i tuluʻiga o le lalolagi.” (Sala. 46:9) O le pulega foʻi a le Atua o le a toe faafoʻisia ai le filemu i le va o tagata ma meaola. (Isa. 11:6-9) Ua avea le mativa ma le matelāina ma vala masani o pulega a tagata, peitaʻi o le a tafiesea e le pulega a le Atua nei mea uma. (Isa. 65:21) E ui lava e iai faanaunauga lelei o nisi o taʻitaʻi, ae e lē o mafai ona latou aveesea le maʻi ma le oti. Peitaʻi, i le pulega a le Atua, o le a fiafia ē matutua ma mamaʻi auā o le a toe faafoʻisia le malaulau o lo latou talavou. (Iopu 33:25; Isa. 35:5, 6) O le a avea foʻi le lalolagi ma parataiso lea o le a toe faatutūina mai ai ē ua maliliu.—Luka 23:43; Galu. 24:15.

18. E faaalia faapefea e tatou te talitonu e sili ona lelei le pulega a le Atua?

¹⁸ Ioe, o le a aveesea e le pulega a le Atua mea leaga uma na faapogaia e Satani, ina ua ia taaʻina o tatou uluaʻi mātua e liliu ese mai i Lē na faia i laʻua. Seʻi manatu foʻi, ua tusa ma le 6,000 tausaga o faatupuina e Satani mea leaga, ae e na o le 1,000 tausaga o le a aveesea ai e le Atua āuga leaga o na mea uma, e ala iā Keriso! Maʻeu se faamaoniga mataʻina o le silisili o le pule a le Atua! Ona o ni Molimau mo lo tatou Atua, e tatou te talia ai o ia o lo tatou Pule. O lea la, seʻi o tatou faaalia i aso taʻitasi ma itula taʻitasi o o tatou olaga, o tatou o tagata tapuaʻi o Ieova, o tagatānuu o lona Malo, ma e tatou te mitamita i le avea ma ana Molimau. Ma seʻi o tatou faaaogā avanoa uma e taʻu atu ai i so o se tasi e faalogo mai, o le pulega a Ieova o le pulega lea e pito sili ona lelei.

E Tusa ai o le Pulega a le Atua, o le ā ua Tatou Iloa Mai i le Faitauina o le . . .

• Teuteronome 7:7, 8?

• 1 Samuelu 8:9-18?

• Eperu 13:17?

• Faaaliga 21:3-5?

[Fesili mo le Suʻesuʻega]

[Ata i le itulau 29]

E faatumauina pea e Ieova lana pulega

[Ata i le itulau 31]

O le lotomalie e gauaʻi i le pulega a Ieova e iʻu ai i le autasi i le lalolagi aoao