Ia Faaauau ai Pea i le Olaga e Sili Ona Lelei!

“Pe tatou te ola pe e tatou te oti, o i tatou lava o auauna a Ieova.”—ROMA 14:8.

1. O le ā na aʻoaʻo e Iesu e uiga i le olaga e sili ona lelei?

E FINAGALO Ieova ina ia tatou ola i le olaga e sili ona lelei. E eseese auala e ola ai tagata, ae e na o le tasi lava le auala e ola ai e sili ona lelei. E leai se mea e sili ona lelei mo i tatou nai lo o le ola e tusa ai ma le Afioga a le Atua, ma aʻoaʻo mai lona Alo o Iesu Keriso. Na aʻoaʻo e Iesu ona soo ina ia tapuaʻi i le Atua i le agaga ma le upu moni, ma faatonuina i latou ia faia isi ma soo. (Mata. 28:19, 20; Ioa. 4:24) O le ola e tusa ai ma aʻoaʻoga a Iesu, e tatou te faafiafia ai Ieova ma maua Lana faamanuiaga.

2. O le ā le tali mai a le toʻatele i le feʻau o le Malo i le uluaʻi senituri, ma o le ā le uiga o le faaupuga, ʻau i “Le Ala”?

² Pe a talitonu i latou “ua saunia o latou loto mo le ola e faavavau” ma papatisoina, ua iā i tatou la māfuaaga lelei e faalaeiauina ai i latou, “Ia faaauau ai pea i le olaga e sili ona lelei!” (Galu. 13:48) A o faagasolo le senituri muamua o o tatou aso taatele, e faitau afe tagata mai atunuu eseese ua talia le upu moni ma papatisoina e faailoga ai i le lautele lo latou tuuina atu i le Atua. (Galu. 2:41) O na uluaʻi soo, na ʻau i “Le Ala.” (Galu. 9:2; 19:23) Na talafeagai lenei taʻu auā o ē na avea ma soo o Keriso, na tausisia se olaga e faaautū i le faatuatua iā Iesu Keriso, ma mulimuli i lana faaaʻoaʻoga.—1 Pete. 2:21.

3. Aiseā e papatisoina ai tagata o Ieova, ma e toʻafia na papatiso i le sefulu tausaga ua teʻa?

³ I nei aso e gata ai, ua faavavevave ai ona faia le galuega o le faia o soo, i le silia ma le 230 atunuu. A o faagasolo le sefulu tausaga ua mavae, e silia ma le 2,700,000 tagata ua filifili e auauna iā Ieova, ma papatisoina e faailoga ai lo latou tuuina atu iā te ia. O se faatatauga e sili atu i le 5,000 tagata e papatiso i vaiaso taʻitasi! O le filifiliga e papatisoina, e faavae i le alofa i le Atua, malamalama i le Tusi Paia, ma faatuatua i mea ua aʻoaʻoina ai. Ua avea le papatisoga o se matatiʻa tāua ua ausia i o tatou olaga, auā ua faailogaina ai le amataga o se faiā māfana ma Ieova. E faaalia ai foʻi le mautinoa, o le  a fesoasoani mai o ia iā i tatou e auauna faamaoni iā te ia, e pei ona ia fesoasoani i ana auauna anamua e savavali i lona ala.—Isa. 30:21.

Aiseā e Tāua ai le Papatisoina?

4, 5. Taʻu mai ni faamanuiaga ma ni aogā o le papatisoina.

⁴ E lē taumatea ua e ave i fale le poto e uiga i le Atua, faia suiga i lou olaga, ma ua avea nei o se tagata talaʻi e leʻi papatisoina. E faamālō atu ona o na taumafaiga. Ae, po ua faia sou tuuina atu i le Atua e ala i le tatalo, ma po o e manaʻo ia e papatisoina? E lē taumatea ua e iloa mai i le suʻesuʻeina o le Tusi Paia, e tatau ona taulaʻi atu lou olaga i le viiaina o Ieova, ae lē o le faamalieina o oe lava po o le mauaina o mea faitino. (Faitau le Salamo 148:11-13; Luka 12:15) O lea, o ā ni faamanuiaga ma ni aogā e maua pe a e papatiso?

⁵ I le avea o se Kerisiano tuuina atu, ua sili ona lelei le fuafuaga ua iai i lou olaga. Ua e fiafia auā ua e faia le finagalo o le Atua. (Roma 12:1, 2) Ua e faaalia uiga o Ieova e pei o le filemu ma le faatuatua, ona o lona agaga paia. (Kala. 5:22, 23) O le a tali mai le Atua i au tatalo ma faamanuia au taumafaiga ina ia ōgatusa lou olaga ma lana Afioga. O le a e olioli ai i lau faiva, ma o le a faamalosia lou faamoemoe i le ola e faavavau ona o lou ola i le auala e fiafia i ai le Atua. E lē gata i lea, o le a faaalia i lou tuuina atu ma papatisoina, ua e manaʻo moni e avea ma Molimau a Ieova.—Isa. 43:10-12.

6. O le ā ua faailoa atu i lo tatou papatisoga?

⁶ O le tuuina atu o i tatou i le Atua ma papatisoina, ua faailoa atu ai o Ieova e ona i tatou. Na tusi le aposetolo o Paulo: “O le mea moni, e leai se tasi o i tatou e ola mo ia lava, ma e leai foʻi se tasi e oti mo ia lava; auā afai tatou te ola, e tatou te ola mo Ieova, ma afai tatou te oti, e tatou te oti mo Ieova. O lea la, pe tatou te ola pe e tatou te oti, o i tatou lava o auauna a Ieova.” (Roma 14:7, 8) Ua faaalia mai e le Atua e tāua i tatou iā te ia e ala i le tuuina mai o le saʻolotoga e filifili ai. Pe a tatou filifili e mulimuli i lenei ala o le ola ona o le alofa i le Atua, ua tatou faafiafiaina ai lona finagalo. (Faata. 27:11) O lo tatou papatisoga, ua faailoga ai lo tatou tuuina atu i le Atua ma faailoa ai i le lautele o Ieova lo tatou Pule. Ua faaalia ai lo tatou lagolagoina o lana itu o le finauga i le pule silisili ese o le aoao o mea. (Galu. 5:29, 32) Ma, e ʻau Ieova ma i tatou. (Faitau le Salamo 118:6.) E ala foʻi i le papatisoga, ua tatou maua ai le avanoa mo le tele o faamanuiaga faaleagaga i le taimi nei faapea ma le lumanaʻi.

Faamanuiaina i se ʻAuuso Alolofa

7-9. (a) O le ā le faamautinoaga na tuuina atu e Iesu iā i latou ua tuua mea uma ae mulimuli atu iā te ia? (e) Ua faapefea ona faataunuuina le folafolaga a Iesu o loo faamauina i le Mareko 10:29, 30?

⁷ Na faapea atu le aposetolo o Peteru iā Iesu:  “Faauta! Ua matou tuua mea uma ae mulimuli atu iā te oe, o le ā la se mea e matou te maua?” (Mata. 19:27) Sa fia iloa e Peteru, po o le ā se lumanaʻi mo ia ma isi soo o Iesu. Ua tele mea tāua ua latou tuua ae tuuina atu o latou ola atoa i le talaʻia o le Malo. (Mata. 4:18-22) O le ā na faamautinoa atu e Iesu iā i latou?

⁸ E tusa ai ma le tusi a Mareko i lea lava mataupu, na taʻua e Iesu o le a avea ona soo ma vaega o se ʻauuso faaleagaga. Na fetalai o ia: “O so o se tasi na te tuua le fale, po o uso, o tuafāfine, o le tinā, o le tamā, o le fanau, po o fanua, ona o aʻu ma le tala lelei, e maua e ia e taʻiselau i le taimi nei, o fale, o uso, o tuafāfine, o tinā, o fanau, ma fanua, faatasi ai ma sauāga, ma le ola e faavavau i le lumanaʻi.” (Mare. 10:29, 30) E pei ona folafola e Iesu, o Kerisiano e pei o Litia, Akula, Pisila ma Kaio, na avea i latou e pei o ni ‘uso, tuafāfine, ma tinā’ i uso talitonu, ona sa latou talimālō i o latou “fale.”—Galu. 16:14, 15; 18:2-4; 3 Ioa. 1, 5-8.

⁹ I aso nei, ua iai le faataunuuga tele o le fetalaiga a Iesu. O “fanua” na tuua e ona soo, e faasino i mea na tausi ai ola o le toʻatele ae ua latou filifili e tuu ina ia auauna o ni misionare, sui o le aiga Peteli, o auauna faavaomalo ma isi vala, auā le faaauilumaina o manaʻoga o le Malo i atunuu eseese. Ua tuua e le toʻatele o uso ma tuafāfine o latou aiga ae faafaigofie o latou olaga, ma ua tatou fiafia e faalogo atu i tala o mea ua tutupu iā i latou, e faaalia ai le tausia o i latou e Ieova ma ua latou fiafia ona o le auaunaga iā te ia. (Galu. 20:35) E lē gata i lea, ua iai i auauna papatiso uma a Ieova le faamanuiaga o le ‘saʻili muamua o le malo ma le amiotonu a le Atua’ ona o i latou o se vaega o le ʻauuso Kerisiano i le lalolagi atoa.—Mata. 6:33.

Malupuipuia i le “Mea Lilo”

10, 11. O le ā le “mea lilo o iai Lē e Silisili Ese,” ma e faapefea ona tatou ulu atu i ai?

¹⁰ E iai foʻi se isi faamanuiaga e ala mai i le tuuina atu ma le papatisoina, o le faaeaga lea o le nofo i le “mea lilo o iai Lē e Silisili Ese.” (Faitau le Salamo 91:1.) O lenei nofoaga e faafaatusa, e malupuipuia ma saogalemu ai—o se tulaga  e puipuia ai mai le afāina faaleagaga. Ua taʻu o le “mea lilo,” auā o tagata e lē o iai le vaaiga i mea e pei o le Atua ma e lē faatuatua iā te ia, e latou te lē iloa. O le ola e tusa ai ma lo tatou tuuina atu ma talitonu atoatoa iā Ieova, e tusa ua tatou faapea atu iā te ia: “O oe o loʻu sulufaʻiga ma o loʻu ʻolo malosi, o loʻu Atua o lē ou te faatuatua i ai.” (Sala. 91:2) Ua avea Ieova le Atua ma o tatou nofoaga saogalemu. (Sala. 91:9) Pe e iai se isi mea e sili atu i lo lenā?

¹¹ O le ulu atu i le “mea lilo” o iai Ieova, e faaalia ai ua iā i tatou le faaeaga o le mauaina o se faiā māfana ma ia. E amata i le tuuina atu ma le papatisoga. Mulimuli ane, e faamalosia atili la tatou faiā ma le Atua i le faalatalata atu pea iā te ia e ala i le suʻesuʻeina o le Tusi Paia, tatalo mai le loto, ma usiusitaʻi atoatoa iā te ia. (Iako. 4:8) E leai se isi e sili ona māfana le mafutaga ma Ieova nai lo o Iesu, o lē e le taitai ona faaitiitia lona mautinoa i Lē na faia mea. (Ioa. 8:29) O lea, aua lava neʻi o tatou masalosalo iā Ieova, faapea lona naunau ma lona tomai e fesoasoani mai e faataunuu lo tatou tuuina atu. (Fai. 5:4) O sauniuniga faaleagaga mai i le Atua mo ona tagata, o faamaoniga mautinoa e iloa ai lona alofa moni ma lona finagalo ia taulau la tatou auaunaga iā te ia.

Faatāua lo Tatou Parataiso Faaleagaga

12, 13. (a) O le ā le parataiso faaleagaga? (e) E mafai faapefea ona tatou fesoasoani i ē fou?

¹² O le tuuina atu ma le papatisoga, ua tatou maua ai foʻi le avanoa e mau ai i le parataiso faaleagaga matagofie. O se siʻomaga faaleagaga faapitoa ua autasia ai uso talitonu, o loo iai le filemu ma Ieova le Atua faapea le tasi ma le isi. (Sala. 29:11; Isa. 54:13) E lē mafai ona faatusatusaina lo tatou parataiso faaleagaga i se mea i le lalolagi. Ua sili ona manino lenei mea i tauaofiaga faavaomalo, pe a potopoto faatasi uso ma tuafāfine mai atunuu, gagana, ma ituaiga eseese, i se siʻomaga filemu, autasi ma le alofa faaleuso.

¹³ E matuā eseese mamao lo tatou parataiso faaleagaga ma tulaga leaga o loo iai le lalolagi i aso nei. (Faitau le Isaia 65:13, 14.) E ala i le folafola atu o le feʻau o le Malo, ua iā i tatou le faaeaga o le valaaulia o isi e ō mai i le parataiso faaleagaga. O se faaeaga foʻi le fesoasoani i ē e fou mai i le faapotopotoga ma ua agavaa e toleniina i le faiva. I le pei o Akula ma Pisila o ē na ‘⁠faamatala atili atu ma le saʻo iā Apolo le ala o le Atua,’ atonu e ono tuuina atu e toeaina iā te oe le faaeaga o le fesoasoani i nisi o ē fou.—Galu. 18:24-26.

Ia Aʻoaʻo Pea Mai iā Iesu

14, 15. O a māfuaaga lelei e tatau ai ona tatou aʻoaʻo pea mai iā Iesu?

¹⁴ E iai māfuaaga lelei e tatou te aʻoaʻo ai pea mai iā Iesu. A o leʻi afio mai o ia i le lalolagi, sa umi lava se taimi o galulue ma lona Tamā. (Faata. 8:22, 30) Na ia silafia o le olaga e sili ona lelei, e faaautū i le auauna i le Atua ma molimau atu i le upu moni. (Ioa. 18:37) Na manino iā te ia, o le ola e tusa o se isi auala, e manatu faapito ma e gata mai. Na ia silafia o le a matuā tofotofoina o ia ma fasiotia. (Mata. 20:18, 19; Epe. 4:15) O Ia o lo tatou Faaaʻoaʻo, ma na ia aʻoaʻo mai le auala e tausisia ai le faamaoni.

¹⁵ E leʻi pine talu ona papatisoina Iesu ae tofotofoina loa o ia e Satani e lafoaʻi le olaga e sili ona lelei, ae e leʻi taulau ana taumafaiga. (Mata. 4:1-11) Ua aʻoaʻo mai e lenei mea iā i tatou, e tusa lava po o ā taumafaiga a Satani, ae e mafai ona tatou tumau pea. E foliga mai e taulaʻi atu ana taumafaiga i ē o loo agaʻi ina papatisoina, faapea ma ē faatoʻa uma ona papatiso. (1 Pete. 5:8) E ono tetee mai foʻi o tatou aiga o ē ona o le lē malamalama, e manatu ai o loo latou puipuia i tatou mai Molimau a Ieova. Peitaʻi, o na tofotofoga ua tatou maua ai avanoa e faaalia ai uiga lelei faa-Kerisiano, e pei o le faaaloalo ma le faautauta, i le taliina o a latou fesili ma avatu ai se molimau. (1 Pete. 3:15) E iai aafiaga lelei o nei mea i ē faalogo mai iā i tatou.—1 Timo. 4:16.

 Ia Tumau i le Olaga e Sili Ona Lelei!

16, 17. (a) E tusa ai ma le Teuteronome 30:19, 20, o ā vala autū e tolu e manaʻomia mo le ola? (e) Na faapefea ona lagolagoina e Iesu, Ioane, ma Paulo upu a Mose?

¹⁶ I le 1,500 tausaga a o leʻi afio mai Iesu i le lalolagi, na apoapoaʻi ai Mose i tagata Isaraelu ina ia filifili le olaga e sili ona lelei. Na ia faapea atu: “Ou te faia le lagi ma le lalolagi ma molimau e faasagatau iā te outou i le asō, ou te tuuina atu le ola ma le oti i ou luma, o le manuia ma le malaia; ma ia e filifili i le ola ina ia e ola ai pea, o oe ma lau fanau, e ala i le alofa iā Ieova lou Atua, e ala i le faalogo i lona siʻufofoga ma pipii atu iā te ia.” (Teu. 30:19, 20) E ui ina sa lē faamaoni Isaraelu i le Atua, ae e lē o suia ai vala autū e tolu na taʻua e Mose, e manaʻomia mo le ola. Na toe taʻua foʻi na vala e Iesu faapea ma isi.

¹⁷ Muamua, e ‘ao ona tatou alolofa iā Ieova lo tatou Atua.’ E faaalia lo tatou alofa i le Atua pe a gaoioi e tusa ma ona ala amiotonu. (Mata. 22:37) Lona lua, ‘e ao ona tatou faalogo i le siʻufofoga o Ieova,’ i le suʻesuʻeina o le Afioga a le Atua ma usiusitaʻi i ana poloaʻiga. (1 Ioa. 5:3) E manaʻomia ai lo tatou auai e lē aunoa i sauniga, o i inā o loo talanoaina ai le Tusi Paia. (Epe. 10:23-25) Lona tolu, ‘e ao ona tatou pipii atu iā Ieova.’ Po o ā lava mea e oo mai, ia tatou faatuatua pea i le Atua ma mulimuli i lona Alo.—2 Kori. 4:16-18.

18. (a) I le 1914, o le ā le faamatalaga a le Watch Tower e faatatau i le upu moni? (e) O le ā le lagona e ao ona iā i tatou e uiga i le malamalama o le upu moni i aso nei?

¹⁸ Maʻeu le faamanuiaga o le ola e tusa ai ma le upu moni o le Tusi Paia! I le 1914, na lomia ai lenei faamatalaga tāua i le Watch Tower: “Pe lē o i tatou ea o tagata e fiafia ma faamanuiaina? Pe lē o lo tatou Atua ea, o ia o le Atua faamaoni? Afai ua iloa e se tasi se mea e sili atu, ia ave i fale. Afai ua maua e se tasi o outou se mea e sili atu, e matou te faamoemoe o le a e faailoa mai. E leai se isi mea e sili atu ona lelei ua matou iloa, i lo o upu o le Afioga a le Atua. . . . E leai se gagana po o se tusitala e mafai ona faamatalaina le filemu, le olioli, ma faamanuiaga ua iai i o tatou loto ma olaga ona o le iloa lelei o le Atua moni. O Tala e uiga i le Atamai o le Atua, lona Faamasinotonu, Malosi ma le Alofa, ua faamalieina atoatoa ai o tatou mafaufau ma faanaunauga o o tatou loto. E tatou te lē o toe saʻili atu i se isi mea. E leai se isi faanaunauga o totoe seʻi vaganā ai le faateleina o le malamalama i lenei Tala matagofie.” (The Watch Tower, Tesema 15, 1914, itulau 377-378) E tumau pea lo tatou loto faafetai mo le malamalama faaleagaga faapea le upu moni. Ioe, ua iā i tatou nei se māfuaaga e sili atu e olioli ai, ona ua tatou “savavali i le malamalama o Ieova.”—Isa. 2:5; Sala. 43:3; Faata. 4:18.

19. Aiseā e lē tatau ai ona faatuai i latou ua agavaa, e papatisoina loa?

¹⁹ Afai ua e fia ‘savali i le malamalama o Ieova’ ae e te leʻi tuuina atu ma papatisoina o se Kerisiano, ia aua le faatuai. Ia faia mea uma e manaʻomia e tusa ai ma le Tusi Paia ina ia e papatiso, o lea le auala iloga e faaalia ai lou loto faafetai ona o mea ua faia e le Atua ma Keriso mo i tatou. Ia tuuina atu iā Ieova le mea e sili ona tāua ua iā te oe, o lou ola. Ia faailoa atu lou sini e fai le finagalo o le Atua e ala i le mulimuli i lona Alo. (2 Kori. 5:14, 15) O le mea moni, o lenā le olaga e sili ona lelei!

O le ā Lau Tali?

• O le ā ua faailogaina e lo tatou papatisoga?

• O ā faamanuiaga e maua mai i le tuuina atu i le Atua ma le papatisoga?

• Aiseā e tāua tele ai lo tatou aʻoaʻo mai ia Iesu?

• O le ā e fesoasoani iā i tatou e pipii ai i le olaga e sili ona lelei?

[Fesili mo le Suʻesuʻega]

[Ata i le itulau 25]

Ua faaalia i lou papatisoga ua e filifilia le olaga e sili ona lelei

[Ata i le itulau 26]

Po o e malupuipuia i le “mea lilo”?